He̍briyu 4 - Ya Baru nga Tulag

Uwed pagtalnaan diya toley ne̍ Apu Diyus

¹ Ket para dactida ita met pe̍ yan nga naikari nga pagtalnaan nga nisagana ne̍ Apu Diyus. Itu nga agannad tida kuma ngarud, tasun awan dactida ya maibilang nga madi makalak-am iya pannakipaginana e̍ Apu Diyus iyan nga pagtalnaan tida.

² Ta no dactida, naipakaemmu met pe̍ dactidan ya Makaparagsac nga Damag, nga agten pe̍ kadito am-ama tida itun. Ngem no igida, awan mamaay niya kagi ne̍ Apu Diyus nga nagicna da, ta di da met inawat nga sipapati.

³ Ngem dactida nga mamati, bekken tida nga agten iyan, ta makalak-am tida lugud iyan nga pagtalnaan tidan. Ngem no diya madi mamati, madi da met makalak-am, nga agten mettas ito kinunen ne̍ Apu Diyus nga, “Ket gapu ta napalaus ya unget ku igida, nagsapata ngac ngarud, ket kinunec, ‘Pulus nga madi da ngarud makipaginana iyaken iya pagtalnaan nga nisaganac para igida.’” Ket naisagana ngarud itunin ya pagtalnaan da ito kinunen ne̍ Apu Diyus yan, ta nanipud ito panamarsuwa na iya lubung, nalpasin ya panagwangel na.

⁴ Tutu met yan, ta uwed kunen na iya Bibliya maipanggep ito maikapitu nga algew ito panamarsuwa ne̍ Apu Diyus itun, nga kunen na, “Ket ito maikapitu nga algew, awan winangel ne̍ Apu Diyusin, ta nalpasin.”

⁵ Ket uwed met pe̍ to kunen na nga, “Pulus nga madi da ngarud makipaginana iyaken iya pagtalnaan nga nisaganac para igida.”

⁶ Ket dito non-ona nga nakadamag iya Makaparagsac nga Damag itun, madi da met nakalak-am iya pagtalnaan da, gapu ta sikukuntra da. Dikad pe̍ uwed ngarud pekkem waya diya duduma nga makipaginana e̍ Apu Diyus iya pagtalnaan nga nisagana na.

⁷ Emmu tida nga tutu met nga uwed pekkem pagtalnaan tida, ta kinunen ne̍ Apu Diyus manin itun, “Ita nga timpu,” kunen na met. Ket itu to nipaikagi na ito Ari Dabid maipanggep ito panagsukir dito nona nga nakadamag itun. Ta to Dabid met to nagkagi ito kaisursurat ku, nga kunen na, “Ita nga timpu, no magicna nun ya kagi ne̍ Apu Diyus, madi kayu agsukir igina.”

⁸ Ket to Huswe̍ itun, orey nidateng na dito pada na nga Israe̍lita ito ginet da, bekken met nga itu to pagtalnaan nga nikari ne̍ Apu Diyus. Ata kalpasan nito pannakadateng de̍ Huswe̍ itun ito ginet da, nagkagi manin nge̍ Apu Diyus maipanggep ka sabali pekkem nga timpu.

⁹ Ngarud, uwed pekkem pagtalnaan diya toley ne̍ Apu Diyus, nga arig nga makipaginana tida igina iya panagsardeng na ito nalpas nan ya panamarsuwa na.

¹⁰ Ta amin nga nakalak-am iya pagtalnaan dan nga nisagana ne̍ Apu Diyus para igida, isardeng da ngarud ya panagwangel dan, nga agten met pe̍ ito panangleppas ne̍ Apu Diyus ito wangel na itun.

¹¹ Dikad pe̍ ikagumaan tida ngarud ya makipaglak-am iyan nga pagtalnaan nga nisagana ne̍ Apu Diyus para dactida. Ikagumaan tida ngarud, tasun awan kuma madi makalak-am iya pagtalnaan na, gapu iya panangkuntra na e̍ Apu Diyus, nga agten mettas kadito sikukuntra nga toley itun pekkem nga madi nakalak-am iyan nga pagtalnaan.

Ya pannakabalin niya kagi ne̍ Apu Diyus

¹² Ipangag tida kuma ngarud ya ipakaemmu ne̍ Apu Diyus nga kagi na. Ta ya kagi ne̍ Apu Diyus, uwed met arig nga biyag na, se̍ uwed met pe̍ pannakabalin na. Ad-adu pe̍ ya kabaellan niya kagi ne̍ Apu Diyus ngem iya natadem nga ispada nga agsumbangir ya tadem na, nga maitodoc ka uneg, se̍ makaituwey iya sebbit nga edyan niya um-um se̍ pata niya tulang. Ket maiyarig ngarud met ya kagi ne̍ Apu Diyus iya agten iyan, ta gapu iya kagi ne̍ Apu Diyus, mailasin met ya uwed iya nakem niya toley se̍ ya uwed iya kararuwa na. Ket maipakaemmu pe̍ ya lemlemtan se̍ pangpanggeppen niya toley, gapu iya kagi ne̍ Apu Diyus.

¹³ Ket agten pe̍ diya amin nga naparsuwa, ta awan mailinged e̍ Apu Diyus, nga arig nga naipac diya amin nga panglinged. Ket iya agten iyan, maemmuwan met ne̍ Apu Diyus ya aminin, ket igina met pe̍ ya sumungbatan tida.

E̍ Je̍sus ya mangibegbeggi dactida e̍ Apu Diyus

¹⁴ Dikad pe̍ ipateg tida kuma ngarud nga sipapasnec ya panamati tida. Ta uwed met naturay nga Kangatuwan nga Agsirsirbi, nga mangibegbeggi dactida e̍ Apu Diyusin, nga itu nge̍ Je̍sus nga Anac na. Igina mettas ya nakapen ka langitin nga edyan ne̍ Apu Diyus.

¹⁵ Ket idi nga Kangatuwan nga Agsirsirbi nga mangibegbeggi dactida e̍ Apu Diyus, bekken met nga isa nga madi makaisakit iya kinakapsut tida. Maisakit nactida ngarud, ta napadas na met amin nga kita sulisug gapu iya kinatoley na nga agten dactida. Napadas na ngarud amin diyan, ngem madi pulus nagbasul.

¹⁶ Dikad pe̍ agtalged tida kuma nga umadenni ngarudin iya edyan ne̍ Apu Diyus nga pagtaudan niya siaayat nga panangaasi nga ipaay na dactida. Umadenni tida kuma ngarud, tasun kaasiyan nactida, se̍ tasun tulungan nactida kuma pe̍ gapu iya siaayat nga asi na dactida no uwed kasapulan tida.