He̍briyu 3 - Ya Baru nga Tulag

Nangatngatu nge̍ Je̍sus ngem ito Muyse̍s

¹ Itu nga dakayu nga kakabsat nga pinili ne̍ Apu Diyus nga toley na se̍ kabulun mi nga maipaayan ka nailangitan nga saad, ut-utuben nu kuma ya maipanggep e̍ Je̍sus. Ta igina met ya nibon ne̍ Apu Diyus nga arig nga apustul, se̍ igina pe̍ ya tutu nga Kangatuwan nga Agsirsirbi nga mangibegbeggi iya pammati tida.

² Nisaad ngarud ne̍ Apu Diyus nge̍ Je̍sus nga agpaay iyan nga wangel na. Ket e̍ Je̍sus, nagtungpal ngarud nga pe̍yeng e̍ Apu Diyus, nga agten mettas ito panagtungpal nito Muyse̍s e̍ Apu Diyus ito panagsirsirbi na kadito toley nga naiyarig nga pamilya ne̍ Apu Diyus.

³ Ngem e̍ Je̍sus, naibilang nga dacdackel nga unay ya kinadayaw na ngem ito Muyse̍s. Ta kaspagarigan ya baley nga nabangun: Nadaydayaw ngarud ya nangbangun ngem iya baley nga binangun na.

⁴ Ket tutu met nga no maipanggep kadiya nabangun nga baley, uwed ngarud nangbangun iya tunggal isa. Ngem e̍ Apu Diyus met ya nangbangun ka amin nga banbanag.

⁵ Ket to Muyse̍s, arig nga igina ya eb-ebbonen ne̍ Apu Diyus kadiya toley na itun. Ket nibilang met ne̍ Apu Diyus nga managtungpal to Muyse̍s ito panagsirbi na kadito amin nga toley nga naiyarig nga pamilya ne̍ Apu Diyus. Ket to Muyse̍s, igina ya nangipakaemmu ngas met itun maipanggep iya paibaga ne̍ Apu Diyus kadiya toley iya sumarunu nga timpu.

⁶ Ngem e̍ Kristu nga gennung, bekken nas met nga eb-ebbonen, no di lugud Anac ne̍ Apu Diyus, ket managtungpal iya panangituray na kadiya toley nga arig nga pamilya ne̍ Apu Diyus. Ket dactida, pamilya nactida met pe̍ no sipupudnu tida nga mangsalimetmet iya panagtalged se̍ panagnamnama tida igina nga pakaragsakan tida, agingga iya panungpalan.

Ya bekken nga sipapati nga nakem

⁷ Dikad pe̍ ipangag tida kuma ngarud ya kunen niya Ispiritu Santu, nga kunen na, “Ita nga timpu, no magicna nun ya kagi ne̍ Apu Diyus,

⁸ madi kayu agsukir igina nga agten ito panaglucsew dito am-ama nu igina ito panangsintir da igina itun ka away.

⁹ Ta sinintir dac ngarud antuni dito am-ama nu, kunen ne̍ Apu Diyus, orey nasingen da met dito inar-ariman ku ito las-ud eppat nga pulu nga dagun.

¹⁰ Itu nga napasungtanan nac kaditun nga toley, ket kinunec, ‘Pe̍yeng dac nga paglikudan, ket madi da met ipatpateg diya pagtuladan nga ipacpakaemmuc igida.’

¹¹ Ket gapu ta napalaus ya unget ku igida, nagsapata ngac ngarud, ket kinunec, ‘Pulus nga madi da ngarud makipaginana iyaken iya pagtalnaan nga nisaganac para igida,’ kinunec,” kunen na.

¹² Itu nga agannad kayu ngarud, kakabsat, tasun awan kuma dakayu ya dake̍c nga nakem winno ya bekken nga sipapati nga panpanunut. Ta no uwed diya agten iyan dakayun, paglikudan nu mettin ya sibibiyag nga Diyus.

¹³ Ngem ya wangwanglen nu kuma nga gennung iya agdama nga timpu, nga kinunen na nga “ita nga timpu”, ket agten idi: Agpipinnabileg kayu kuma lugud nga inalgew, tasun awan kuma dakayu ya agbalin nga nasukir gapu ka basul nga pakaiyaw-awanan na.

¹⁴ Ta siguradu nga nagbalin tidan nga kabulun ne̍ Kristu no ituluy tida nga sipupudnu ya sigud nga panagtalec tida igina nga sipapasnec, agingga iya panungpalan.

¹⁵ Ket laglagipen nu kuma pe̍ ya kaipapennan nito kinagi na nga, “Ita nga timpu, no magicna nun ya kagi ne̍ Apu Diyus, madi kayu agsukir igina nga agten ito panaglucsew dito am-ama nu igina itun.”

¹⁶ Ket nagan ngata dito kayat na nga kagiyen nga nakagicna kanu iya kagi ne̍ Apu Diyus se̍ nalucsew igina? Didi ngarud dito amin nga nipanaw nito Muyse̍s ka E̍hiptu itun.

¹⁷ Ket dito kunen na nga nakapasungtanan na ka las-ud eppat nga pulu nga dagun itun, ket itu met pe̍ dito nagbasbasul ka away, nga antuni ya nakatayan da.

¹⁸ Ket dito nangagiyan ne̍ Apu Diyus ito nisapata na nga madi da kanu makipaginana igina iya pagtalnaan nga nisagana na, itu met dito nangkuntra igina itun.

¹⁹ Dikad pe̍ maawatan tida ngarudin nga gapu ta madi da gabay ya mamati igina itun, ket madi da met nalak-aman ya pagtalnaan da.