He̍briyu 2 - Ya Baru nga Tulag

Ya pateg niya pannakaisalakan tida

¹ Ket gapu kadiyan nga banbanag, masapul ngarud nga lumallalu kuma ya panangipateg tida kadiya panursuru nga naadal tida, tasun bekken tida nga maiyaw-awan ka sabali.

² Ta laglagipen tida kuma nga to linteg ne̍ Apu Diyus, nipaikagi na mettas kadiya anghe̍le̍s itun, ket napanecnekkan met nga pudnu. Ket diya amin nga nagsalungasing winno nagsukir kadito bilbilin itun, nagbanag ngarud ka tumutup nga dusa da.

³ Dikad pe̍ ita, madi tida ngarud met pe̍ makalisi iya pannakadusa tida, no liwayan tida ya panangipateg idi nga pannakaisalakan tida. Ta ya Apu nga mismu ya nona nga nangipakaemmu idi nga pannakaisalakan nga ipaay na. Ket dito nakagicna igina itun, igida mettas ya nangipanecnec dactida nga pudnu yan nga pannakaisalakan.

⁴ Ket e̍ Apu Diyus, nipanecnec na met pe̍ maipanggep iyan, gapu kadiya nipasingen na nga pagilasinan, se̍ duduma nga nakaskasdaaw, se̍ diya nadumaduma nga nipawangel na gapu iya pannakabalin na. Ket pammanecnec pe̍ to panangiwaras ne̍ Apu Diyus ka nadumaduma nga pannakabalin nga ipaay niya Ispiritu Santu, sigun iya tarigagayan ne̍ Apu Diyus nga panangiwaras.

Ya mangituray ka amin

⁵ Bekken nga diya anghe̍le̍s ya nipaayan ne̍ Apu Diyus ka saad nga mangituray kadiya uwed iya lubung iya maadpangan nga timpu, nga itu pe̍ ya timpu nga kunec idi nin.

⁶ Ta uwed kinunen niya isa nga toley, nga naisurat iya Bibliya nga kunen na, “Kumaan kid ya kinapateg niya toley ikew, Apu Diyus? Ta silalagip ka met igida. Ape̍ ngarud nga biyangam ya kapututan niya toley?

⁷ Pinagbalin mu met ya toley nga nanumnumu ngem iya kasasaad diya anghe̍le̍s, ngem bekken nga nabayag ya agten iyan. Ta pinadayawam met manin, nga ne̍cde̍m igina ya naraem nga saad na.

⁸ Ket nipaituray mu met igina diya aminin, nga arig nga ipatey mu ya saka na iya amin nga naparsuwa,” kunen na. Ket iya agten iyan, nalawag ngarud nga igina ya pinagturay ne̍ Apu Diyus iya amin, ket pulus nga awan nailaskig iya panangituray na. Ngem ita, madi tida pekkem nga masingen ya panangituray na iya amin.

Ya mangiturung dactida iya pannakaisalakan tida

⁹ Ngem emmu tida nga e̍ Je̍sus, nagbalin ngarud itun nga nanumnumu ngem kadiya anghe̍le̍s, ngem madi nagbayag yan nga timpu. Ket gapu iya siaayat nga asi ne̍ Apu Diyus dactida, nalak-aman ne̍ Je̍sus ya pannakatey nga maipaay iya tunggal isa nga toley. Ket ya emmu tida ngarud itan, ket arig nga nabalangatan met nge̍ Je̍sus nga sibaballaigi yin. Ta napadayawan nga tutu win nga nae̍cdan ka maraem nga saad nan, gapu ito linak-am na nga pannakatey.

¹⁰ Mayat met ya agten iyan, ta e̍ Apu Diyus, igina ngarud ya pagpaayan diya amin nga naparsuwa, se̍ igina pe̍ ya paggayatan diya amin. Itu nga tumutup met to inariman na iya makaigapu iya pannakaisalakan tida, nga itu nge̍ Je̍sus. Ta inanayan ne̍ Apu Diyus ya kasasaad ne̍ Je̍sus gapu ito panaglak-am na ito rigat na. Ket agten iyan met tasun adu diya maibilang nga an-anac ne̍ Apu Diyus, se̍ tasun iturung ne̍ Je̍sus da iya pakaidayawan da.

¹¹ Ket bekken nas nga iyan, ta is-isa met ya Ama niya mangdalus se̍ ya Ama diya nadalusanin. Itu nga madi malyew nge̍ Je̍sus nga mangawag nga kakabsat na diya toley.

¹² Ta kinunen na ngarud e̍ Apu Diyus itun nga, “Ipakaemmuc nad ya maipanggep ikew kadiya kakabsat ku. Ikantac nad pe̍ ya panagdayaw ku ikew, iya imatang diya maurnung nga toley.”

¹³ Ket kinunen na pe̍, “E̍ Apu Diyus ya pagtalkac.” Ket kinunen na manin, “Uwed dac idi, nga makibulubulun kadiya naibilang nga anac ku nga ne̍cde̍ ne̍ Apu Diyus iyaken,” kunen na.

¹⁴ Ket gapu ta uwed kinatoley didi nga naibilang nga anac na, nagbalin met nge̍ Je̍sus nga agten pe̍ igida, ta naglak-am met pe̍ iya kasasaad niya kinatoley da. Agten iyan ya winangel na, tasun gapu iya pannakatey na, pirdiyen na ya pannakabalin niya diyablu, nga itu ya pakaigapuwan niya pannakatey.

¹⁵ Ket iya agten iyan, winayawayaan ngarud ne̍ Je̍sus diya amin nga nagan-ansing nga pe̍yeng bayat niya panagbiyag da gapu iya umbe̍t nga pannakatey da, nga arig nga ansing met ya nangtagabu igida.

¹⁶ Naglak-am ngarud nge̍ Je̍sus iya kinatoley da, ta diyan nga tinulungan na, bekken met nga diya anghe̍le̍s, no di lugud diya toley nga kapututan nito Abraham.

¹⁷ Ket itu nga masapul nga linak-am ne̍ Je̍sus diya amin nga kasasaad diya naibilang nga kakabsat na, tasun igina kuma ya agbalin nga managkaasi se̍ mapagtalkan nga Kangatuwan nga Agsirsirbi, nga mangibegbeggi dactida e̍ Apu Diyus. Ket iya agten iyan, inariman nan ya pannakaudas nga pakapakawanan diya basbasul diya toley.

¹⁸ Ket itan, gapu ta linak-am na ya panagrigat ito uwed nangsulisug igina, matulungan nactida pe̍ yin no uwed mangsulisug dactida.