He̍briyu 13 - Ya Baru nga Tulag

Ya panagbiyag nga makaay-ayu e̍ Apu Diyus

¹ Ituluy nu kuma ya panagiinnayat nu gapu iya panagkakabsat nu ka pammati.

² Ket madi nu liwayan ya rebbeng nu iya panagsangaili nu kadiya orey di nu nga em-emmu nga toley. Agten iyan kuma ngarud ya wanglen nu, ta uwed da nagpadagus itun, nga madi da nailasin nga anghe̍le̍s met diya sinangaili da.

³ Ket no diya pada nu nga mamati nga uwed iya pagbaludan, laglagipen nu da kuma nga makipagricna kayu igida, nga arig nga nisangaibalud kayu pe̍ igida. Se̍ diya agsagsagaba ka orey nagan na, laglagipen nu da kuma pe̍, nga arig nga makipagrigat kayu met pe̍ igida.

⁴ Dayawen tida kuma nga amin ya panagasawa diya agasawa. Se̍ masapul nga sipupudnu ya tunggal isa iya asawa na. Ta ukumen ngarud ne̍ Apu Diyus diya makikamalala, se̍ diya makitipun ka bekken da nga asawa.

⁵ Bekken kayu kuma nga naagum ka kuwarta, no di lugud kuntintu kayu ngas iya uwed dakayun. Ta kinunen met ne̍ Apu Diyus nga, “Pulus nga madi naka panawan, winno baybay-an,” kunen na.

⁶ Itu nga natalged tida nga agkunen iya agten idi: “Ya Apu ya tumulung iyaken, itu nga awan pakadanagac kun. Ta madic met mansing kadiya maariman diya toley iyaken.”

Diya duduma nga rebbeng diya agkakabsat ka pammati

⁷ Laglagipen nu kuma pe̍ dito non-ona nga nangipangulu nga nangipakaemmu iya kagi ne̍ Apu Diyus dakayu itun. Panunuten nu kuma no kumaan nito ugali da, se̍ to nabaru nga nagbanagan dito ugali da, ket tuladen nu to panamati da.

⁸ Laglagipen nu ngarud nga agten pe̍ iyan nge̍ Je̍sus, nga awan pulus pagbalbaliwan na. Ta no kumaan niya gangey na itun, agten mettas pe̍ ita, se̍ orey ka agnanayun.

⁹ Dikad pe̍ madi kayu kuma maallilaw kadiya nadumaduma nga panursuru nga sabali. Ta ya siaayat nga panangaasi ne̍ Apu Diyus kuma ngas ya mangpabileg dactida, nga bekken lugud nga diya al-alagaden maipanggep kadiya macmakan. Ta no dito nagtungtungpal kadiyan nga al-alagaden, awan met tulung nga nae̍cde̍ igida gapu kadiyan nga tungtungpalen da.

¹⁰ Ket no dactida, uwed met pagdatunan tida se̍ pagdatun tida. Ngem diya toley nga agsirsirbi ito pagdaydayawan, madi da mabalin ya makisangu nga mangan idi nga pagdatunan tida, ata awan met biyang da idi.

¹¹ Tutu met, ta malagip tida ngarud nga diya beggi dito animal nga nidatun da itun maigapu kadiya basbasul da, pinooran da met iya laskig niya kampu da. Ngem ya daga dito animal nga nidatun da, nipen niya kangatuwan nga agsirsirbi ito Kasantuwan nga Edyan ito pagdaydayawan da.

¹² Ket agten ngarud pe̍ iyan nge̍ Je̍sus, ta iya laskig niya siyudad to nagsagabaan na. Ket natey antuni tasun gapu iya daga na mettas, madalusan diya toltoley kadiya basbasul da.

¹³ Dikad pe̍ dactida, panawan tida kuma ngarud pe̍ yin diya kaaduwan, ta umadenni tida ngarud e̍ Je̍susin. Arig kuma ngarud nga makibulun tida igina iya nagsagabaan na nga laskig niya kampu, ta anusan tida kuma pe̍ yin ya mauy-uyaw gapu igina.

¹⁴ Ta idi nga lubung, awan agnanayun nga ili tida. Ngem uwed met namnamaen tida nga ili tidan, nga datngen tida nad iya maadpangan.

¹⁵ Dikad pe̍ gapu mettas e̍ Je̍sus, pe̍yeng tida kuma nga agdaydayaw e̍ Apu Diyus. Ket ya panangibalikas tida iya panagyaman tida maigapu iya kinaturay na, itu ya arig nga idatun tida iginan.

¹⁶ Ket di nu kuma pe̍ liwayan ya panagariman ka nabaru, se̍ ya panagtitinnulung nga siaasi. Ta diya agten kadiyan, arig da nga datun nu nga makaay-ayu e̍ Apu Diyus.

¹⁷ Nalagon kayu kuma kadiya mangipangulu dakayu nga mamati, ket agtungpal kayu ngarud kadiya kagkagiyen da dakayu. Igida met ya natalec nga mangay-aywan dakayu, ta uwed nad met sungbatan da e̍ Apu Diyus maipanggep dakayu. Agtungpal kayu ngarud igida tasun madi nu kuma parigaten da iya wangel da, no di lugud paanggemmen nu da. Ta awan mamaay na dakayu no mapasakitan da iya panagsirbi da.

Kararag

¹⁸ Ket ya ibagac dakayu, gabay ku nga ikarkararagan dakami kuma. Madi kayu kuma umikeb iya panangikararag nu dakami, ta maemmuwan nu kuma nga natalna ya nakem mi, gapu ta emmu mi nga maiparbeng amin nga winangel mi. Diya nalinteg ngas met ya pe̍yeng mi nga pangpanggeppen nga wanglen.

¹⁹ Ket ipangpangrunac dakayu nga ikarkararagan dac kuma, nga no mabalin, makasoli yac kuma dakayu iya di mabayag.

Pakumusta

²⁰ Ket e̍ Apu Diyus nga mange̍cde̍ ka talna, igina ya pagkararagac maipanggep dakayu. Igina met ya nangpagungar iya Apu tida nga Je̍sus itun. Ket e̍ Apu Je̍sus, igina met ya nagbalin nga Katurayan nga Agay-aywan dactida nga naibilang nga karne̍ru na. Nagbalin ngarud nge̍ Apu Je̍sus nga agten iyan gapu ito naiyayus nga daga na nga nangpatalged iya agnanayun nga tulag ne̍ Apu Diyus dactida.

²¹ Ngarud, e̍ Apu Diyus met ya pagkararagac maipanggep dakayu, ket ikararag ku nga ipaay na kuma dakayu diya amin nga nabaru nga masapul nu, tasun makatungpal kayu kuma iya tarigagay na. Ket sapay kuma ta e̍ Apu Diyus, ipawangel na dactida diya makaay-ayu mettas igina, gapu iya tulung ne̍ Je̍su Kristu dactida. Ket madaydayaw kuma ngarud nge̍ Je̍su Kristu ka agnanayun nga awan patingga na. Agten iyan kuma ngarudin.

²² Ala kakabsat, anusan nu was nga denggen ya pannakaibasa nidi nga surat ku nga pamagbagac dakayu, ta e̍teng ngas met ya panagsurat ku.

²³ Ket gabay ku pe̍ nga ipakaemmu dakayu nga napalubusanin nge̍ kabsat tida nga Timutyu ito pagbaludan. Ket no makamakam nac age̍ niya ipeppen ku iyan nga edyan nu, igina kuma ya kabulun ku nga umbe̍t iyan.

²⁴ Ipakumusta nakami kuma kadiya pangpangulu nu nga mamati, se̍ kadiya amin nga toley ne̍ Apu Diyus iyan. Ket pakumustaan dakayu pe̍ diya kakabsat tida nga taga-Italya.

²⁵ Ket sapay kuma ta ya siaayat nga asi ne̍ Apu Diyus ya uwed dakayu nga amin.