He̍briyu 12 - Ya Baru nga Tulag

E̍ Apu Je̍sus kuma ya pagtuladan tida

¹ Ket no dactida ita, arig nga nale̍cbut tidan kadito adu nga toley, ta uwed pekkem dactida ita diya pammanecnec da maipanggep ito panamati da. Itu nga ipac tida kuma ngarudin diya amin nga manggapus dactida iya panamati tida, se̍ ya pakabasulan tida nga mangsipar iya panamati tida. Ket se̍ an-anusan tida ngarud nga itultuluy ya panagtungpal tida iya rebbeng niya panamati tida, nga maiyarig iya panagtarus niya isa nga makilumba nga sisingen nan ya pagpatinggaan niya pannakilumba na.

² Ket e̍ Je̍sus kuma ngas ya namnamaen tida, nga arig nga igina ya sisingen tida. Ta igina met ya nangariman iya pangnamnamaan niya panamati tida, se̍ igina met pe̍ ya mangtungpal. Ket e̍ Je̍sus, niturtured na met nga siaanus to pannakatey na ito krus, nga madi na linaglagip to nakaiyal-alyewwan na. Ta laglagipen na nga gennung ya pakaanggemman na nga naikari igina. Ket ita, uwed met nga tutu win nga agtugtugew iya kadayawan nga edyan, nga itu ya madiwanan niya trunu nga pagtugawan ne̍ Apu Diyus.

³ Ngarud, utuben nu kuma ya maipanggep e̍ Je̍sus, tasun mapabileg ya panaganus nu, se̍ tasun bekken kayu nga nalaka nga makumsa. Ta e̍ Je̍sus, niturtured na met itun to nakaru nga pananggura igina dito toley nga managbasul.

⁴ Ngem no dakayu nga gennung, orey uwed pakaparigatan nu, bekken nga agten ito nakaparigatan na. Ta bekken met pekkem nga agpatingga ka mapatey kayu gapu iya panangkuntra nu ka basul nga gennung.

Ya panangpatigmaan ne̍ Apu Diyus kadiya anac na

⁵ Ket madi kayu kuma male̍panan to makapabileg nga balakad ne̍ Apu Diyus dakayu nga anac na, nga kunen na, “Anac ku, madi ka kuma ipagarup nga bekken nga napateg ya panangpatigmaan niya Apu ikew, se̍ di ka kuma makumsa, no ilbec naka.

⁶ Ta amin nga patpatgen niya Apu, patigmaanan na ngarud, ket diya ibilang na nga anac na, itu diya arig nga bauten na,” kunen na.

⁷ Anusan nu ngas kuma diya pakaparigatan nu, nga ibilang nu da kuma nga panangpatigmaan ne̍ Apu Diyus dakayu, ta itu ya panangisuru na kadiya ibilang na nga anac na. Ta no ya anac, rumbeng ngarud met igina no patigmaanan niya ama na.

⁸ Ket patigmaanan ngarud ne̍ Apu Diyus diya amin nga ibilang na nga anac na. Dikad pe̍ no awan panangpatigmaan na dakayu, bekken nakayu nga tutu nga anac, no di lugud maiyarig kayu ngas met ka bastardu.

⁹ Ket agten idi pe̍: Diya ama tida idi nga lubung, pinatigmaanan nactida pe̍ nga anac da, ket sidadayaw tida met nga nagtungpal igida. Dikad pe̍ no maipanggep iya Ama mettas diya kararuwa tida, ad-adda kuma ngarud pekkem nga paiturayan tida igina, tasun e̍cdan nactida ka biyag nga agnanayun.

¹⁰ Diya ama tida idi nga lubung, pinatigmaanan nactida nga nisuru da dactida ya emmu da nga nabaru ka e̍teng ngas nga timpu. Ngem e̍ Apu Diyus, isuru na dactida ya agbanag mettas ka tutu nga paglaingan tida, tasun aglak-am tida kuma iya kinalinteg na.

¹¹ Ket no mapatigmaanan tida, pagarup tida met no pagsakitan ngas nga awan paganggemman. Ngem ya tutu nga pagtungpalan na, ket agbanag met ka kinatalna se̍ kinanacman para iya maadalan gapu iyan nga patigmaan.

Pamagbaga maipanggep iya panagpasnec tida e̍ Apu Diyus

¹² Dikad pe̍ masapul nga madi kayu makumsa ngin, nga agten iya nakumsa nga toley nga agdodongyotin nga awan bilbilgen diya im-ima se̍ liplipey nan. Madi kayu kuma ngarud nga makumsa, no di lugud pabilgen nu diya panpanunut nu.

¹³ Suruten nu lugud ya kustu, nga arig nga dalanen nu ya natunung nga dalan, tasun madi kayu maisacdul, se̍ tasun madi marung-is ya piley nu, no di kuma lugud umunayin.

¹⁴ Arimanen nu ya amin nga kabaellan nu nga makikinnaawatan kadiya amin nga toley. Ket se̍ ikagumaan nu pe̍ ya pumaris iya kinalinteg ne̍ Apu Diyus, ta emmu tida nga ya toley nga awan igina ya agten iyan nga kinalinteg, madi na nad masingen ya Apu.

¹⁵ Agannad kayu ngarud tasun awan dakayu ya manglikud iya siaayat nga asi ne̍ Apu Diyus. Ket annadan nu pe̍ tasun awan kuma dakayu ya pakaigapuwan niya panagbasul, nga arig nga gamut niya kayu nga mange̍cde̍ ka nape̍t. Ta kaynun no makaalis pe̍ iya kaaduwan ya kinadake̍c niyan nga toley, nga mangriribuc igida.

¹⁶ Agannad kayu pe̍ tasun awan dakayu ya makikamalala, se̍ tasun awan kuma pe̍ dakayu ya madi mangipateg iya tarigagay ne̍ Apu Diyus, nga agten ito E̍saw itun. Ta to E̍saw, madi na met nipateg to tawid na nga naikari igina itun, nga naipaay igina gapu ta igina ya inauna nga anac. Ta nisukat na met to tawid na ka isa ngas nga pannangan.

¹⁷ Ket malagip nu met nga ito di mabayag, tinarigagayan na manin to nikari nito ama na. Ta gabay nito E̍saw no igina kuma ya mangtawid manin ito nisukat na nga tawid na. Ngem napaay ngas met, ta awan pakabaliwan nan, orey nibrit na to napalaus nga panagad-adeng na.

¹⁸ Ket no dakayu, bekken kayu met nga agten kadito toley itun, ata bekken nga maipanggep kadiya mapuut nga banbanag ya panangituray ne̍ Apu Diyus dakayu itan. Ta no igida itun, uwed met to nasingen da itun nga apuy nga gumgumlayab ito Tageytey Sinay. Ket nagicbet nga unay itun, nga uwed arig nga nangisit nga aluyus, se̍ uwed pe̍ nabileg nga belluut antuni itun.

¹⁹ Ket uwed pe̍ nagicna da itun nga uni tangguyub, se̍ nagicna da met pe̍ ya timec ne̍ Apu Diyus. Ket ito nagicna da to kunen na, madi da naitured din, itu nga nagpacpakaasi da, nga madi na kuma ituluy ya panagkagi na igidan.

²⁰ Ta dito toley itun, madi da naitured din gapu ito ansing da ito nagicna da to bilin ne̍ Apu Diyus. Nibilin na met nga no uwed makase̍cde̍ng ito tageytey, orey ngas no animal, masapul kanu met nga madampag ka batu agingga nga matey.

²¹ Ngarud, nakan-ansing nga tutu dito nasingen da itun. Itu nga orey to Muyse̍s, kinunen na met, “Nakapilpig gac mettin gapu iya ansing ku,” kunen na met.

²² Ngem dakayu nga gennung ita, bekken kayu nga agten igida. Ta nakadateng kayun iya arig nga Tageytey Siyun, nga itu ya edyan mettas ne̍ Apu Diyus. Itu pe̍ ya nailangitan nga He̍rusale̍m, nga siyudad niya sibibiyag nga Diyus, se̍ ya pagedyanan diya rinibribu nga anghe̍le̍s nga naur-urnung nga agragragsac kin.

²³ Nadateng nu ngarudin ya bungguy diya naibilang nga kaonaan nga anac ne̍ Apu Diyus. Ket didi, nailista pe̍ yin diya nagnagan da enna langit. Nakadateng kayu ngarud mettin iya edyan mettas ne̍ Apu Diyus, nga igina met ya mangkeddeng kadiya amin-amin. Se̍ nadateng nu pe̍ yin dito nat-atey nga toley na nga naibilang nga awan pagkurangan dan iya imatang na.

²⁴ Se̍ nadateng nu ngarud pe̍ yin ya edyan ne̍ Je̍sus, nga igina met ya mangibabaet dactida e̍ Apu Diyus sigun mettas iya paglinteggan niya baru nga tulag. Se̍ nakadateng kayu pe̍ yin iya nagbanagan nito daga na, nga itu ya pannakawarsi nga pakadalusan nun. Ket bekken ngarud nga agten nas ito naiyayus nga daga nito Abe̍l yan, no di lugud agsirbi iya namaymayat nga banag.

²⁵ Ket itu nga annadan nu ngarudin, nga madi kayu agmadi iya panangbagbaga niya mangbagbaga dakayu itan, nga itu nge̍ Apu Diyus. Ta madi kayu kuma tuladen dito toley itun, nga madi da nalisiyan ya dusa da itun, ito nagmadi da iya nibilin niya nangbagbaga igida ito uwed da pekkem idi nga lubung. Ket no madi nakalisi ditun ito dusa da, di ngarud nangnangruna tida ita nga madusa, no agmadi tida iya ibilin niya mangbagbaga dactida ita manipud ka langit?

²⁶ Ket itun, nayegyeg ya lubung ito nagtimec nge̍ Apu Diyus. Ngem itan, uwed met ya nikari ne̍ Apu Diyus, nga kunen na, “Bekken nas nga ya lubung nad ya iyegyeg ku no pe̍dwaec pekkem mas, no di lugud pe̍ orey ya langit,” kunen na.

²⁷ Ket iyan nga kunen na nga pe̍dwaen na kanu pekkem, ipakaemmu na ngarud dactida nga mayegyeg nad nga mapukaw diya naparsuwa nga banbanag, tasun diya nabaked nga madi mayegyeg winno mapukaw, didi ngas nad met diya mabati.

²⁸ Dikad pe̍ agyaman tida kuma ngarud e̍ Apu Diyusin, ta nibilang nactida nga makipagtagikuwa iya nabaked nga pagturayan na nga pulus nga madi mayegyeg winno mapukaw. Itu nga agyaman tida kuma ngarud nga siaayat e̍ Apu Diyusin, se̍ agdaydayaw tida pe̍ igina ka panagdayaw nga makaay-ayu igina, nga situtuluc se̍ sitatanang tida kuma.

²⁹ Ta ya Diyus tida, ket uwed met unget na nga maiyarig ka apuy nga mangkesset se̍ mangpirdi iya amin nga madalapus na.