He̍briyu 11 - Ya Baru nga Tulag

Maipanggep iya panamati

¹ Ket no maipanggep iya panamati, itu ya panangnamnama tida nga sitatalged, se̍ ya pannakaemmu tida nga uwed nga tutu diya di pekkem masingen nga banbanag.

² Ket gapu ta uwed panamati diya am-ama tida itun pekkem, inannamungan ne̍ Apu Diyus da.

³ Ket dactida pe̍, gapu ta uwed panamati tida, naemmuwan tida nga naariman ya lubung gapu mettas iya pannakabalin niya kagi ne̍ Apu Diyus. Ket iya agten iyan, naemmuwan tida nga diya masingen tida iya lubung, bekken da nga napataud kadiya masingen nga banbanag, no di lugud gapu mettas iya kagi ne̍ Apu Diyus.

⁴ Ket to Abe̍l, gapu ta uwed panamati na, napatpateg iya imatang ne̍ Apu Diyus to nidatun nito Abe̍l igina ngem ito nidatun nito Kain. Itu nga inannamungan ne̍ Apu Diyus to Abe̍l, nga nibilang na nga nalinteg. Ket nipakaemmu ne̍ Apu Diyus yani ito nipateg na to nidatun nito Abe̍l. Ket orey natey yin to Abe̍l, arig nga agkagkagi pekkem dactida gapu ka panamati, ta maadal tida pekkem ita gapu igina.

⁵ Ket to E̍nuc pe̍, gapu ta uwed panamati na, madi natey, ata inalac ne̍ Apu Diyus nga nipen ka langit ito sibibiyag pekkem. Ket madi nasmac dito pada na nga toley, ta naalac mettin. Ket emmu tida maipanggep ito panamati na, ta sigun ito naisurat iya Bibliya maipanggep igina, naemmuwan tida nga ito sibibiyag pekkem to E̍nuc idi nga lubung, naay-ayu na nge̍ Apu Diyus.

⁶ Ngarud, no awan panamati tida, madi met mabalin nga ay-ayuwen tida nge̍ Apu Diyus. Ta ya orey nagan na nga mayat nga umadenni kuma nga agdayaw e̍ Apu Diyus, masapul ngarud nga patiyen na nga uwed Diyus, se̍ patiyen na pe̍ nga e̍ Apu Diyus, igina ya manggun-guna nga tutu kadiya mangemmu igina.

⁷ Ket to Nue̍ pe̍, gapu ta uwed panamati na, tinungpal na to bilin ne̍ Apu Diyus ito nilawag ne̍ Apu Diyus igina ya maipanggep kadiya banbanag iya maadpangan nga di na pekkem nas-asingen. Tinungpal ngarud nito Nue̍ nga situtudyu, ta inariman na to daung nga nakaisalakanan da nga sangapamilya ito layus. Ket gapu ito panagtungpal na nga situtudyu, naipakaemmu itun nga uwed met pakaukuman diya uwed idi nga lubung. Ket to Nue̍, gapu ta uwed panamati na, nibilang ne̍ Apu Diyus nga nalinteg.

⁸ Ket to Abraham pe̍, gapu ta uwed panamati na, tinungpal na to bilin ne̍ Apu Diyus igina, nga nawe̍ ito lugar nga nikari ne̍ Apu Diyus nga tawiden na. Pimanaw ngarud to Abraham ito ili na nga nawe̍ yin, orey di na pekkem emmu ya pagpatinggaan na.

⁹ Ket gapu ito panamati na, inanusan na ya nagedyan nga arig nga isa nga gan-gannaet iyan nga lugar nga nikari ne̍ Apu Diyus igina. Ket bawi nga tulda to nagedyanan na. Agten pe̍ iyan ya kasasaad dito anac na nga Isaac se̍ Hakub, ket igida pe̍ diya nakipagtawid igina iyan mettas nga kari ne̍ Apu Diyus.

¹⁰ Ta to Abraham, namnamaen na ngamin ya ili nga nisagana se̍ binangun ne̍ Apu Diyus, nga uwed met nabaked nga pakabangunan na.

¹¹ Ket orey to Sara nga asawa nito Abraham, gapu mettas ka panamati, nabucsit met, orey bacbaket se̍ lakay da nga unay itunin, ta namnamaen na ngamin nga tungpalen ngarud ne̍ Apu Diyus ya kari na igida.

¹² Ket iya agten iyan, orey naibilang nga arig nga natey yin ya beggi nito Abraham gapu ito kinalakay nan, nagbalin met pekkem nga pagtaudan diya adu nga kapututan nga agten iya kaadu diya bitbituwen iya abac lawa, se̍ agten pe̍ iya kaadu diya lapuc iya pingit niya baybay nga madi mabilang toley.

¹³ Ket amin ditun nga toley, natey da nga sipapati, orey madi da pekkem naawat itun to nikari ne̍ Apu Diyus igida. Ngem arig nga nasingen da mettin, gapu ta namati da. Ket iya agten iyan, binigbig da ngarud nga arig da nga gan-gannaet idi nga lubung, nga awan pekkem kustu nga ili da itun.

¹⁴ Itu nga maawatan tida nga uwed pekkem namnamaen da nga sabali nga ili da, ta kunen da met nga gan-gannaet da kanu.

¹⁵ Ket bekken nga to naggayatan da nga ili to ninamnama da itun, ta no agten iyan, nawaya da ngas met nga sumoli antuni.

¹⁶ Ngem namaymayat met to ili nga inarapaap da, nga itu ya uwed ka langit. Itu nga madi malyew nge̍ Apu Diyus no kunen da nga igina ya Diyus da, ta uwed met nisagana na nga ili dan.

¹⁷ Ket to Abraham manin, gapu ta uwed panamati na, idatun na kuma nga tutu ya anac na nga Isaac kin, ito nibilin ne̍ Apu Diyus to pangsigir na ito Abraham. Ket to Abraham, idatun na kuma nga tutu win to kackaisu nga anac na itun, orey to Abraham mettas to nakaibagaan nito kari ne̍ Apu Diyus.

¹⁸ Ta nikari ne̍ Apu Diyus igina itun nga kinunen na, “E̍ Isaac nad met ya tumaudan diya kapututam,” kunen na.

¹⁹ Ket to Abraham, sisasagana latta nga mangidatun itun, ata namnamaen na ngamin nga mapaungar ne̍ Apu Diyus diya natey. Ket tutu met, ata arig it nga nagungar to Isaac itun, ta nibilang ne̍ Abraham nga naidatunin, ngem naipasoli mettas igina.

²⁰ Ket to Isaac pe̍ yin, gapu ta uwed panamati na ito kari ne̍ Apu Diyus, nikararag na nga nitalec dito anac na nga Hakub se̍ E̍saw e̍ Apu Diyus maipanggep kadiya nikari ne̍ Apu Diyus nga matungpal iya maadpangan.

²¹ Ket to Hakub pe̍, gapu ta uwed panamati na, ket ito dandani nga matey yin, nikararagan na dito duwa nga inapu na nga anac nito Huse̍. Ic-icman na itun ya gale̍cmanan nito sacgukud na, se̍ nagdumug nga nagdaydayaw e̍ Apu Diyus, ket nitalec na da ngarud e̍ Apu Diyusin.

²² Ket to Huse̍ pe̍, gapu ta uwed panamati na, ito dandani nga matey yin, linaglagip na to kari, nga makatalew nad kanu enna E̍hiptu dito kapututan nito Israe̍l. Ket nibilin na ya pamaayen da nad kuma iya bangkay na, sigun ito panamati na maipanggep kadiya mapasamac iya maadpangan.

²³ Ket maipanggep ito Muyse̍s pe̍, gapu ta uwed panamati dito naganac igina, madi da nansing orey emmu da to bilin nito Ari Paraun. Nisoroc da latta nge̍ Muyse̍s ka unus tellu nga bulan ito kake̍bit na pekkem, ta nasingen da nga nakay-ayat nga ebbing.

²⁴ Ket to Muyse̍s mettas, gapu ta uwed panamati na, ket ito manakem min, madi na ginabay ya maibilang nga anac nito babey nga anac nito Ari Paraun.

²⁵ Ta napatpateg ngamin igina ya pannakipaglak-am na iya rigat dito pada na nga toley ne̍ Apu Diyus, ngem iya panaglak-am na ito bekken nga agnanayun nga nam-ay nga kasasaad diya managbasbasul nga toley.

²⁶ Nibilang na ngarud nga namaymayat no mauy-uyaw gapu iya namnama na iya umbe̍t ne̍ Kristu ngem ito kinabacnang nga malak-am na kuma kadito iE̍hiptu. Ta to Muyse̍s, pe̍yeng nga namnamaen na ya igun-guna nad ne̍ Apu Diyus igina.

²⁷ Ket gapu pe̍ ito panamati nito Muyse̍s, pimanaw ka E̍hiptu nga situtured, ket madi nansing orey emmu na ya gura nito ari. Ket gapu ito panamati na, madi ngarud nagduwaduwa, ta arig ngamin nga masisingen nito Muyse̍s itun nge̍ Apu Diyus nga madi masingen.

²⁸ Ket gapu pe̍ ito panamati nito Muyse̍s, tinungpal na to nipawangel ne̍ Apu Diyus igina, nga nibilin na kadito pada na nga kapututan nito Israe̍l nga arimanen da to pannangan da nga maawagan ka Padaya Nitatalib ita. Nibilin na met pe̍ nga dagaan da diya gagayangan da, tasun madi iraman nito anghe̍l da ito panangpatey na kadito inauna nga lalaki nga an-anac dito iE̍hiptu, ito itatalib na itun.

²⁹ Ket gapu ta uwed panamati dito toley nga simurut ito Muyse̍s itun, nakalasat da ito baybay nga maaw-awagan ka Nadgang nga Baybay, ket namaga met to dinalan da. Ngem ito dinalan met pe̍ dito iE̍hiptu nga nangriwid igida, nagpulang mettas to danum nga nanglisem igida, ket natey dan.

³⁰ Ket enna He̍riku pe̍, gapu ta uwed panamati dito toley ne̍ Apu Diyus itun, nadugey to bakud nito siyudad nga He̍riku, ito nanalan da ngas nga nangle̍cle̍cbut ka unus pitu nga algew.

³¹ Ket to Rahab nga huste̍s antuni itun, gapu pe̍ ito panamati na, madi met nairaman nga napatey kadito kailiyan na nga agmadi e̍ Apu Diyus itun. Ta to Rahab, sipapati nga timulung kadito toley ne̍ Apu Diyus, nga pinadagus na dito nawe̍ nagispiya enna He̍riku itun.

³² Kustu kid diyanin nga naisalaysay ku dakayun. Adu kuma pekkem ya mabalin ku nga ibaga maipanggep iya panamati dito toley itun, ngem madi makaanay ya timpuc nga mangisalaysay maipanggep kadito duduma, nga agten kade̍ Gidyun, Barac, se̍ to Samsun, agten pe̍ ito He̍pte̍, Dabid, se̍ to Samwe̍l se̍ dito mammadtu ne̍ Apu Diyus itun.

³³ Ta gapu ta uwed panamati ditun nga toley, nangabac da kadiya pagpagariyan nga nakigubgubatan da. Ket diya duduma igida, nagturay da nga nangpalinteg kadiya toltoley da. Ket diya duduma igida, nagkari met nge̍ Apu Diyus igida. Ket uwed da pe̍ igida diya nangabac ka liyun ket madi da met nakagat.

³⁴ Se̍ uwed da pe̍ igida diya nakakusep itun ka gumgumlayab nga apuy, se̍ uwed da pe̍ igida diya mapatey kuma ka ispada, ngem nakalisi da. Ket dito duduma igida itun, orey nakapsut da ngas nga toley, bimileg da met gapu ito panamati da, ket natured da met nga nakigubgubat. Itu nga napatalew da dito gan-gannaet nga nakisangu nga nakigubat igida itun.

³⁵ Ket uwed da pe̍ babey itun, nga gapu ta uwed pe̍ panamati da, napagungar dito duduma kadito minminatey da, ket naiyawat mettas igida. Ket uwed da pe̍ lalaki itun, nga gapu mettas iya panamati da, nitured da ya naparparigat agingga nga napatey da, orey uwed met gundaway da nga mawayawayaan. Ngem madi da latta nagbabawi iya panamati da, ata ninamnama dan ya pannakapagungar da nad iya namaymayat nga biyag.

³⁶ Ket uwed da pe̍ duduma nga lalaki nga nauy-uyaw se̍ nabacbaut, se̍ uwed da pe̍ diya sikakawar nga naibalud itun.

³⁷ Uwed da pe̍ igida diya nadamdampag se̍ dito naputulan met ya beggi da ka ragadi, se̍ uwed da pe̍ napatey ka ispada. Uwed da pe̍ igida diya nakackaasi, gapu ta nagallaalla da ngas met. Lalat kalding se̍ karne̍ru ngas to nagluput da, ket naparparigat se̍ nairurumen da pe̍.

³⁸ Ket ya kinapudnu na, bekken nga maikari ya lubung nga pagedyanan ditun nga toley ne̍ Apu Diyus! Ngarud, nagallaalla da ngas met, ket naged-edyan da ngas met kadiya away se̍ kadiya tagtageytey, se̍ naged-edyan da pe̍ kadiya liliyang se̍ re̍cre̍kab niya ginet.

³⁹ Ket amin ditun nga toley, nipakaemmu ne̍ Apu Diyus nga inannamungan na da ngarud gapu iya panamati da. Ngem orey inannamungan ne̍ Apu Diyus da, madi pekkem natungpal igida itun to nikari na igida.

⁴⁰ Ta uwed namaymayat nga panggep ne̍ Apu Diyus para igida nga maigapu met dactida. Itu ya panangiraman na igida iya kasasaad tida nga awan pagkurangan iya imatang ne̍ Apu Diyus.