He̍briyu 10 - Ya Baru nga Tulag

Ya datun nga agsirbi ka agnanayun

¹ Agten idi nin: To Linteg ne̍ Muyse̍s, bekken nga naan-anay, no di arig nga niniwing ngas diya nabaru nga banbanag nga sumarunu. Ta sigun ito Linteg, masapul nga dinagun nga mabaliwan ya panangidatun kadito agten mettas nga kita datun, nga awan panagpatingga na. Ngem madi met kabaellan nito Linteg nga pagbalinen nga awan pagkurangan niya kasasaad diya toley iya imatang ne̍ Apu Diyus, gapu kadiyan nga datdatun, orey agdaydayaw da igina.

² Ta no diya agdaydayaw, no pudnu nga madalusan da kadiya basbasul da gapu kadito datdatun, agsardeng da kuma ngasin nga agdatun. Agsardeng da ngarud no pudnu nga kustu win para iya amin nga timpu to panangidatun da, ta awan kuma kansing da iya dusa diya basbasul dan.

³ Ngem bekken met nga agten iyan. Ta dinagun da met nga nagdatun. Ket dito datun da, pe̍yeng da met nga nipalpalagip kadito toley diya basul da.

⁴ Ta madi met kabaellan niya daga niya turu nga baka winno ya kalding ya mangipac ka basul.

⁵ Itu nga ito inumbe̍t nge̍ Kristu idi nga lubung, kinunen na e̍ Apu Diyus nga, “Madi ka napnec gapu kadiya nidatdatun diya toley nga naidaga nga animal, winno diya duduma nga pagdatun da. Itu nga nisaganaan nac lugud ka isa nga beggi nga pagdatun ku.

⁶ Madi ka ngarud nagustuwan diya datun nga animal nga mapooran iya pagdatunan, winno kadiya duduma nga datun nga maigapu ka basul.

⁷ Dikad pe̍ kinunec, ‘Apu Diyus, uwed dac idi nga sisasagana nga mangariman iya tarigagay mu maikanatad ito nipaisurat mu maipanggep iyaken itun iya nakaisuratan niya Linteg,’” kunen na.

⁸ Ket orey naibilin ngarud diyan nga datdatun ito Linteg ne̍ Muyse̍s, kinunen met ne̍ Kristu nga madi napnec nge̍ Apu Diyus se̍ madi na pe̍ nagustuwan dito datdatun da nga naidaga nga animal, winno dito duduma nga pagdatun da, se̍ kadito datun nga animal nga mapooran ito pagdatunan, winno kadito duduma nga datun nga maigapu ka basul.

⁹ Ket kinunen na pe̍ nga igina mettas ya sisasagana nga mangariman iya tarigagay ne̍ Apu Diyus. Ket iya agten iyanin, maemmuwan tidan nga nipac ngarud ne̍ Apu Diyus to non-ona nga panggep nan, tasun bangunen na ya maikadduwa.

¹⁰ Ket itan, naibilang tidan nga nadalus iya imatang ne̍ Apu Diyus, gapu ta inariman ne̍ Je̍su Kristu ya tarigagay ne̍ Apu Diyus ito nidatun na ya beggi na nga nam-ame̍nsan, ket kustu win para iya amin nga timpu.

¹¹ Ket sigun ito nona nga wagas nga panagdaydayaw e̍ Apu Diyus, ket inalgew nga sisisikad nga mangibegbeggi diya agsirsirbi iya pagdaydayawan. Ket ulit-uliten da nga idatun diya agten mettas nga kita datun. Ngem diyan nga datdatun, pulus nga madi da kabaellan ya mangipac ka basul.

¹² Ngem e̍ Kristu nga gennung, nam-ame̍nsan ngas nga nidatun na ya beggi na mettas, ket kustu win ka agnanayun. Ket agsirbi nga agnanayun yani nga datun na, nga itu mettin ya pakaipakan diya basbasul. Ket kalpasan nito panangidatun na iya beggi na, nawe̍ nagtugew iya kadayawan nga edyan, nga itu ya madiwanan ne̍ Apu Diyus.

¹³ Ket itan, ag-agton nge̍ Kristu ka langit, agingga nga pasukuwen nad ne̍ Apu Diyusin diya gumurgura e̍ Kristu, nga arig da nad mettin nga pagipatayan na iya saka na.

¹⁴ Ket dactida, agnanayun nga awan pagkurangan tida iya imatang ne̍ Apu Diyusin. Ta dactida nga toley na, no maipanggep ka basul, ket nadalusan tidan, gapu ito is-isa nga datun ne̍ Je̍su Kristu.

¹⁵ Itu met pe̍ ya ipanecnec niya Ispiritu Santu dactida, ta uwed nipaisurat na iya Bibliya nga kunen na,

¹⁶ “Kunen niya Apu, ‘Agten idi ya baru nga tulag nga bangunec kadiya toley ku no madatngan nad ya timpu na: Ipay ku nad diya bilbilin ku iya lemlemmet diya toltoley, ket ya panpanunut da, itu nad ya arig nga pagisuratac kadidi nin.’”

¹⁷ Se̍ kunen na pe̍, “Madic nad pe̍ laglagipen nin diya basbasul da se̍ ya kinadake̍c dan,” kunen na.

¹⁸ Ngarud, madi tida met masapulin diya datdatun nga maigapu ka basul, ta napakawan mettin diya basbasul tidan.

Awan mangsirra dactidan e̍ Apu Diyus gapu iya daga ne̍ Kristu

¹⁹ Ket ita, kakabsat, nawaya tidan nga umadenni nga sitatalged iya edyan ne̍ Apu Diyus iya Kasantuwan nga Edyan, gapu ito naiyayus nga daga ne̍ Je̍sus.

²⁰ Ta gapu iya pannakaidatun ne̍ Je̍sus, arig nga nailukatin to kurtina nga nangsirra dactida e̍ Apu Diyus. Itu nga uwed kabarbaru nga wagas tida nga agdaydayaw e̍ Apu Diyusin, nga nipaay ne̍ Kristu dactida gapu iya pannakaidatun niya beggi na, nga uwed manin biyag na itan.

²¹ Se̍ bekken nas nga iyan, ta e̍ Je̍su Kristu win ya naturay nga mangibegbeggi nga agpaay dactida nga toley ne̍ Apu Diyus, nga naibilang nga pamilya na.

²² Dikad pe̍ umadenni tida kuma ngarud e̍ Apu Diyus, nga sipupudnu tida kuma se̍ awan kuma duwaduwa tida iya panagtalged tida nga sipapati yin. Ta awan kansing tidan nga pannakadusa gapu ka basul, ta arig nga nawarsiyan diya lemlemmet tidan. Ket se̍ diya beggi tida, naibilang da nga nadalusanin, nga arig nga naugasan ka nadalus nga danum.

²³ Ipateg tida kuma ngarud pe̍ nga sipapasnec ya pammati tida maipanggep iya pagnamnamaan tidan. Ta emmu tida nga e̍ Apu Diyus, tungpalen na ngarud diya kari na.

²⁴ Emmuwen tida kuma ngarud pe̍ ya kasasaad diya pada tida nga mamati, tasun mabalin tida nga awisen ya tunggal isa dactida, nga agtitinnulung tida iya panagayat tida se̍ iya panagwangel tida ka nabaru.

²⁵ Uwed met dito duduma nga mamati nga liwayan da ya panaggigimung da. Ngem dactida, madi tida kuma ngarud nga liwayan, no di ad-adda kuma lugud nga agpipinnabileg tida, ta mailasin tida nga dumandani yin ya Timpu niya Apu.

Diya manglais iya Anac ne̍ Apu Diyus

²⁶ Agten iyan kuma ngarud, ta ya kinapudnu na, no naemmuwan tidan ya kinapudnu maipanggep iya pammati tida, ngem guraten tida pekkem ya agbasbasul, ket awan met sabali nga datun nga pakapakawanan diya basul tidan.

²⁷ Ket ya agten iyan nga toley nga awan namnamaen na nga pakapakawanan, ket yan nas ansing ya uwed iginan. Ta bagi na ngas ya panangukum ne̍ Apu Diyus, se̍ ya arig nga gumgumlayab nga apuy nga nakasagana ngin tasun mangpukaw kadiya kumuntra e̍ Apu Diyus.

²⁸ Ket emmu tida nga sigun ito Linteg ne̍ Muyse̍s, no uwed duwa winno tellu nga mangsacsi iya basul niya toley nga nangsalungasing ito Linteg, madusa yan nga toley ka patey, nga madi pulus nga maipaayan ka kaasi.

²⁹ Ket no patey ya dusa dito nangsalungasing ito Linteg itun, di ngarud nakarkaru pekkem ya rumbeng nga dusa niya toley nga agsalungasing iya kinapudnu maipanggep iya pammati tida ita? Ta ya agten iyan nga toley, manglais met iya Anac ne̍ Apu Diyus, se̍ mangibilang nga awan pateg na ya naiyayus nga daga na, nga nangpatalged iya tulag nga pakadalusan diya basbasul tida. Ket se̍ manguy-uyaw iya siaayat nga Ispiritu ne̍ Apu Diyus nga managkaasi. Nakarkaru ngarud met ya rumbeng nga dusa niya agten iyan nga toley!

³⁰ Nakan-ansing ngarud met, ta emmu tida ya gangey niya nagkunen nga, “Iyaken ya uwed turay na nga agibales, ket iyaken ngarud ya mangsupapac nga mangdusa.” Se̍ kunen na pe̍, “Ya Apu, mangkeddeng kadiya toley na,” kunen na.

³¹ Ay-ay! Nakan-ansing ngarud ya pannakaisangu iya pangukuman niya sibibiyag nga Diyus!

³² Ngem ita, laglagipen nu kuma to kasasaad nu ito damu nu pekkem ya makaawat maipanggep iya pammati tida, nga arig nga nawadaan kayun. Ta itun, situtured nga inan-anusan nu to panagsagaba nu gapu iya nakaru nga panagrigat nu itun.

³³ Pasaray nauyaw se̍ nairurumen kayu met itun iya imatang diya toltoley. Se̍ no duduma, nakipaglak-am kayu met pe̍ iya pakarigatan diya kapada nu.

³⁴ Ta nisakit nu diya kapada nu iya panagrigat da ito naibalud da itun. Ket ito tinagikuwa dito gumurgura dakayu diya sansanicwa nu, nitured nu met nga siaanggem, ata linaglagip nu ya namaymayat nga kuwa nu nga namnamaen nu nga madi mapukaw.

³⁵ Dikad pe̍ madi kayu kuma pukawen yan nga kinatalged nu, ta nabaru nga unay ya pagbanagan na nga gun-guna.

³⁶ Masapul nu ngarud ya agten iyan nga panaganus, tasun nad no naariman nun ya tartarigagayan ne̍ Apu Diyus, ket maalac nu ngarudin to nikari na.

³⁷ Ta agten ito naisurat iya Bibliya nga kunen na, “Iya di mabayag, umbe̍t ngarudin ya it-itonan nu, ket madi met agtactac.

³⁸ Ket diya toley ku nga naibilang nga nalinteg, agbiyag da nad nga situtured, gapu iya panamati da. Ngem ya mangadeyyu nga siaalyew iyaken, madic met magustuwan,” kunen na.

³⁹ Ngem no dactida, bekken nactida met nga kamkameng dito mangadeyyu nga siaalyew, nga itu diya mapukaw nga toley. Kamkameng nactida ngarud diya mamati, nga itu diya maisalakan.