He̍briyu 1 - Ya Baru nga Tulag

Ya kangrunaan iya amin, ket ya Anac ne̍ Apu Diyus

¹ Itun pekkem nga timpu, name̍n-adu ya panangipakaemmu ne̍ Apu Diyus iya kagi na kadito am-ama tida. Nipakaemmu na ngarud ya kagi na igida ka nadumaduma nga wagas gapu kadito mammadtu itun.

² Ngem ita nga kaodiyan nga timpu win, nipakaemmu nan ya kagi na dactida gapu iya Anac na. Igina met pe̍ ya pinagparsuwa ne̍ Apu Diyus iya amin nga uwed iya lubung, se̍ igina pe̍ ya pinili ne̍ Apu Diyus nga agtawid kadiya amin.

³ Ket ya Anac, igina mettas ya pakaemmuwan iya kinadayaw ne̍ Apu Diyus, se̍ igina ya pakasingnan iya gangey na. Ket gapu iya pannakabalin niya kagi niya Anac, igina ya makaemmu nga mangiturung kadiya amin nga naparsuwa. Ket ito nalpas ya panangdalus na dactida nga toley kadiya basbasul tida, nagtugew iya kadayawan nga edyan, nga itu ya madiwanan niya Nadayag nga Diyus nga nailangitan.

Naturturay ya Anac ne̍ Apu Diyus ngem kadiya anghe̍le̍s

⁴ Ket iya agten iyan, namaymayat nga amang ya saad niya Anac ne̍ Apu Diyus ngem iya saad diya anghe̍le̍s. Agten met pe̍ ya kinaturay na, ta nangatngatu met ya kinaturay na nga tinawid na e̍ Apu Diyus ngem iya kinaturay diya anghe̍le̍s.

⁵ Tutu met yan, ta awan pulus kadiya anghe̍le̍s ya nangibagaan ne̍ Apu Diyus iya agten idi: “Ikew ya Anac ku. Ket ita nga algew, nagbalin nac nga Ama mun.” Se̍ bekken nga maipanggep iya isa nga anghe̍l to kinunen na nga, “Iyaken nad ya Ama na, ket igina nad ya Anac ku.”

⁶ Ket nad manin no ibon ne̍ Apu Diyus idi nga lubung ya Kaonaan nga Anac na nga katurayan, kunen na, “Masapul nga agdayaw igina diya amin nga anghe̍le̍s ne̍ Apu Diyus.”

⁷ Ket no maipanggep kadiya anghe̍le̍s, kunen ne̍ Apu Diyus, “Eb-ebbonec met diya anghe̍le̍s ku. Ket mabalin ku nga pagbalinen da nga arig nga belluut winno apuy,” kunen na.

⁸ Ngem no maipanggep iya Anac na nga gennung, kunen ne̍ Apu Diyus nga agten idi: “Ikew nga Diyus, agnanayun nga awan patingga na ya panangituray mu, ket nalinteg met pe̍ ya panagturay mu.

⁹ Ya kinalinteg ya ipateg mu. Ket ya kinadake̍c, guraem. Itu nga iyaken nga Diyus mu, pinili naka nga mae̍cdan iya makaparagsac nga kinadayaw nga nangatngatu ngem iya nae̍cde̍ kadiya kabulun mu.”

¹⁰ Ket kunen na manin maipanggep iya Anac na nga, “Ikew, Apu, namarsuwa ka ka ginet iya lubung ito un-una na. Ket agten pe̍ diya uwed iya ngudu niya ginet, ket ikew met ya nangariman.

¹¹ Ket diyan, mapukaw da nad mettas. Ngem ikew nga gennung, madi ka pulus nga mapukaw. Diyan, agpatingga da nad ngas met nga arig nga nape̍rsepe̍rsey nga luput.

¹² Ket ipac mu da nad nga arig mettas nga isa nga ke̍bal nga nakupil. Ngarud, masukatan da nad met nga arig mettas iya pannakasukat niya luput. Ngem ikew nga gennung, pulus nga madi ka agbaliw. Ket ya kinapaut mu, madi nad pe̍ agpatingga,” kunen na.

¹³ Ket no diya anghe̍le̍s, awan pulus igida ya nangagiyan ne̍ Apu Diyus ka agten idi: “Agtugew ka idi nga madiwanan ku, agingga nga mapasukuc diya gumurgura ikew, nga arig da nad nga pagipatayam iya saka mun,” kunen na.

¹⁴ Ngem no diya anghe̍le̍s, emmu tida nga igida nga amin diya madi masingen nga eb-ebbonen ngas ne̍ Apu Diyus. Ket ibon ne̍ Apu Diyus da nga tumulung kadiya amin nga maipaayan ka pannakaisalakan.