Galasiya 6 - Ya Baru nga Tulag

Ya panangisakit tida iya kapada tida

¹ Kakabsat, no uwed madlaw nu nga sibabasul, ket dakayu nga paiturayan iya Ispiritu ne̍ Apu Diyus, mawe̍ kayu kuma patigmaanan nga siaalumamay, tasun agbabawi kuma ngin. Ngem annadan nu lugud ya panagpatigmaan nu, ta kaynun no maipada kayu pe̍ nga masulisug.

² Ngarud, agsisinnakit kayu kuma iya kasasaad diya kapada nu, ta iya agten iyan, matungpal nu ya paglinteggan ne̍ Kristu.

³ Agten iyan kuma ngarud, ta no uwed toley nga ipasindayaw na ya beggi na, ket allilawen na met ya beggi na mettas. Ta ya kinapudnu na, uwed met pe̍ pagkurangan na.

⁴ Ngem ya tunggal isa dakayu, utuben na kuma ya bukud na nga wangel, no nabaru winno bekken, tasun diya mismu nga wangwanglen na nga nabaru, itu mettas kuma ya pakaragsakan na. Ta bekken nga masapul nga maipada ya kabaellan nu iya kabaellan niya sabali nga toley.

⁵ Ta ya tunggal isa nga toley, igina kuma ya mismu nga makaemmu kadiya wangwanglen na.

⁶ Ket no diya toley nga masursuruwan iya kagi ne̍ Apu Diyus, ket rebbeng da met nga ilak-am ya mangisursuru igida kadiya amin nga nabaru nga banbanag.

⁷ Madi kayu kuma maallilaw a, ta emmu tida met nga madi mabalin nga masikapan nge̍ Apu Diyus kadiya wangwanglen tida. Ya wangwanglen niya toley, maiyarig mettas iya mula. Ta ya imula na, itu mettas ya apiten na.

⁸ Tutu met, ta no tarigagay ngas niya kinatoley na ya tungtungpalen na ya isa nga toley, ket agbanag ngas ka pakapukawan na, ta itu ya banagen niya kinatoley na. Ngem no agwangel ya isa nga toley ka maitutup iya tarigagay niya Ispiritu ne̍ Apu Diyus, agbanag nga gennung iya biyag nga agnanayun, ta itu ya ipaay niya Ispiritu ne̍ Apu Diyus.

⁹ Itu nga madi tida kuma nga makumsa iya panagwangel ka nabaru. Ta no madi tida kumapuy kadidi, uwed ngarud arig nga maapit tida nga nabaru, no madatngan nad ya kustu nga timpu na.

¹⁰ Dikad pe̍ gapu ta uwed gundaway tida nga agwangel ka nabaru ita, ipaay tida kuma ngarud kadiya amin nga toley, nangruna kadiya kakabsat tida ka pammati.

To modi nga pamagbaga ne̍ Pablu kadito iGalasiya

¹¹ Singen nu kay ya kadackel diya le̍tra nidi nga panagsurat ku, ta iyaken mettas ya mangisurat idi nin.

¹² Dito mayat nga mangipapilit dakayu iya ugali Hudyu nga agpakugit, igida met diya mangipasindayaw kadiya wangwangel nga masingen niya toley. Ket agten iyan ya ipapilit da dakayu, tasun maliclikan da ngas ya pannakairurumen maigapu iya panamati e̍ Kristu nga natey ito krus.

¹³ Ta ya kinapudnu na, orey dito Hudyu nga nakugit sigun iya ugali da, madi da met pe̍ agtungpal iya Linteg ne̍ Muyse̍s. Ngem piliten dakayu met nga makugit, tasun uwed kuma ipasindayaw da maipanggep iya isusurut nu igidan.

¹⁴ Ngem no iyaken, pulus met nga madic agpasindayaw kadiya wangwanglen toley. Ta no iyaken, itun nas pannakatey niya Apu tida nga Je̍su Kristu ito krus na ya ipatpateg kun. Ta gapu iya pannakairaman ku ito pannakailansa na ito krus, arig nga nailansa pe̍ nga napirdi yin ito krus na ya pannakaawis ku kadiya wangwangel nga masingen toley. Se̍ arig met nga nisangailansa ngac pe̍ ito krus na, ta naipac iyaken nin to panangipateg ku kadiyan.

¹⁵ Ta awan met sirsirbi na no nakugit man ya isa nga toley winno bekken. Ta ya napateg met nga gennung, ket itu ya nabaliwan nga gangey tida.

¹⁶ Ket amin nga sumurut idi nga nibagbagac, uwed kuma igida ya talna se̍ asi nga ipaay ne̍ Apu Diyus kadiya ibilang na nga pudnu nga Israe̍lita nga toley na.

¹⁷ Ket iya agten iyanin, manipud ita, awan kuma mangriribuc iyaken nin. Ta uwed met pe̍ pe̍gpe̍glat iya beggic nga itu ya pakasingnan iya panangparigat diya toley iyaken gapu iya panagsirsirbic e̍ Je̍sus.

¹⁸ Ket itan, kakabsat, aglak-am kayu kuma iya siaayat nga asi niya Apu tida nga Je̍su Kristu kadiya lemlemmet nu. Agten iyan kuma.