Galasiya 5 - Ya Baru nga Tulag

Ipateg tida kuma ya pannakawayawaya tida

¹ E̍pe̍.Ket iya agten iyan, winayawayaan nactida nge̍ Kristu win, tasun bekken tida nga maibilang nga arig nga tagabu win. Itu nga laglagipen nu ngarud nga pe̍yeng yani, ket puminget kayu nga madi kayu kuma manin nga paiturayan kadiya banbanag nga mangtagabu dakayu.

² Ket iyaken mettas nga Pablu ya mangibagbaga idi dakayu, ket tandaanan nu: No ipalubus nu nga maariman dakayu ya ugali Hudyu nga panagkugit, kayat na nga kagiyen nga awan sirsirbi na dakayun to winangel ne̍ Kristu.

³ Se̍ bekken nas nga iyan, ta kunec manin nga ya mayat nga agpakugit nga agtungpal iya Linteg Hudyu, basta rebbeng na met pe̍ yin nga tungpalen ya amin nga annungen niya Linteg.

⁴ Ket dakayu nga mangipagarup nga mapalinteg kayu iya imatang ne̍ Apu Diyus gapu iya panagtungpal nu iya Linteg, nisina nu mettin ya beggi nu iya pannakaitipun e̍ Kristu, ket pulus nga awan mamaay na dakayun ya siaayat nga panangaasi ne̍ Apu Diyus.

⁵ Ngem no dakami, namnamaen mi ya pannakaibilang mi nga nalinteg iya imatang ne̍ Apu Diyus gapu iya Ispiritu na. Itu nga sinanama kami gapu iya panamati mi.

⁶ Ta diya toley nga naitipun e̍ Kristu Je̍sus gapu iya panamati da, bekken met nga ya ugali diya toley nga agpakugit winno ya ugali da nga madi agpakugit ya napateg. Ta ya nasken lugud, itu ya panamati nga mangipasingen ka panagayat.

⁷ Nabaru met to panamati nu itun, nga arig kayu met nga nalaing nga managtag nga makilumlumba. Ngem nagan kad ya nangtiped dakayu iya isusurut nu iya kinapudnu?

⁸ Ya agten iyan nga pannakaawis nu, bekken met nga agtaud e̍ Apu Diyus nga nangpili dakayu.

⁹ Ala! Agannad kayu ngarud, ta tutu met to pagkakagi nga kunen na, “Ya orey e̍teng ngas nga pangpablad, ket pabladen na ya amin nga nakailaukan na nga are̍na,” kunen na.

¹⁰ Ngem sinanama ngac pekkem maipanggep dakayu. Ta gapu iya pannakaitipun tida iya Apu, namnamaec nga sumurut kayu ngarud iya kapanunutac maipanggep kadidi. Ket no ya mangriribuc dakayu, orey no nagan na nga toley, siguradu nga madusa nad mettas.

¹¹ Ket no maipanggep iyaken, kakabsat, busid das dito agkunen nga isursuruc pekkem kanu nga masapul tida pekkem mas ya panagpakugit. Busid da met nga tutu, ta no agten iyan kuma ya isursuruc pekkem, ape̍ ngarud nga mairurumen nac latta? Ta no ya paglinteggan Hudyu nga panagpakugit kuma ya isursuruc pekkem, ket awan kuma malucsew iyaken nin iya panangikasabac iya panamati maipanggep iya pannakatey ne̍ Je̍su Kristu ito krus.

¹² Ngem no maipanggep kadito mangriribuc iya panamati nu gapu iya ugali da nga panagkugit, ikapus da kuma ngasin agingga ka naputed ya aminin!

Yan nas ayat ya paglinteggan tidan

¹³ Ngem dakayu, kakabsat, napili nakayu ngarud nge̍ Apu Diyus nga mawayawayaan kadiya agten iyan nga paglinteggan. Ngem orey uwed yani nga wayawaya nun, madi kayu kuma gundawayan yani kadiya kumpurmi nga wanglen nu nga tarigagayan niya kinatoley nu, no di lugud gundaway nu kuma yani nga wayawaya nu nga agsisinnirbi, gapu iya panagiinnayat nu.

¹⁴ Ta amin nga bilbilin nga uwed iya Linteg ne̍ Muyse̍s, masiplut idi nin nga is-isa nga bilin: “Ayatem ya padam nga toley nga agten mettas iya panagayat mu iya beggim.”

¹⁵ Ngem no pe̍yeng kayu nga agsisinnuway se̍ agpipinnasakit, nga arig kayu nga animal nga agkikinnagat, annadan nu, ta kaynun no agpipinnirdi kayun.

Agkuntra ya tarigagay niya kinatoley se̍ ya tarigagay niya Ispiritu Santu

¹⁶ Idi ya ibagac dakayu: Paiturayan kayu kuma iya Ispiritu ne̍ Apu Diyus, tasun madi kayu agtungpal kadiya dake̍c nga tarigagay niya kinatoley nu.

¹⁷ Ta maikuntra ya tarigagay niya kinatoley iya tarigagay niya Ispiritu ne̍ Apu Diyus. Ket ya tarigagay niya Ispiritu ne̍ Apu Diyus, maikuntra met pe̍ iya tarigagay niya kinatoley. Ta agkuntra ngarud didi, itu nga bekken kayu nga nawaya nga agwangel iya gabay nu nga wanglen.

¹⁸ Ngem no ya Ispiritu ne̍ Apu Diyus ya mangituray dakayun, bekken kayu nga nasakupan niya turay niya Linteg gin.

¹⁹ Ket nalawag met ya wangwanglen diya toley nga naidalan iya dake̍c nga tarigagay niya kinatoley da, nga itu didi: ya pannakikamalala, se̍ ya panagpanggep kadiya duduma nga agten iyan nga dake̍c, se̍ ya madi malyew nga agwangel kadiyan.

²⁰ Agten pe̍ kadiya agtungpal kadiya didiyusen, se̍ ya panaggamut. Tumaud pe̍ iya kinatoley diya panaggiginnura, panagsusupyat, panagiman, se̍ ya panagung-unget. Agten pe̍ kadiya panagagawa, panagsuway, se̍ ya panamagsisina kadiya panpanunut diya toltoley.

²¹ Tumaud das pe̍ iya kinatoley diya panagapal, panage̍ng-e̍nglew, panaglucluku, se̍ diya duduma pe̍ nga agten kadidi nin. Ket baliwac ngarudin to pamagbagac dakayu itun, nga diya toley nga agten kadiyan ya wangwanglen da, madi da ngarud makipagtawid iya panangiraman ne̍ Apu Diyus kadiya iturayan na.

²² Ket ya masingen kadiya toley nga paiturayan iya Ispiritu ne̍ Apu Diyus, bekken nga agten kadiyan. Ta ya patauden nga gennung niya Ispiritu, itu diya panagayat, panaganggem, se̍ ya panagtalna gapu iya panagtutunus. Agten pe̍ kadiya panaganus, panangaasi, panangtulung, se̍ ya panagpudnu,

²³ panagsingpet se̍ ya panagtimbeng iya beggi. Ket awan met linteg nga mangkuntra kadidi.

²⁴ Ket diya toley nga naikameng e̍ Kristu Je̍sus, ibilang da nga natey yin ya tarigagay niya kinatoley da, nga arig nga nilansa dan ito krus, agraman diya naalas nga ricna da se̍ diya ke̍lugan da.

²⁵ Ket gapu ta ya Ispiritu ne̍ Apu Diyus ya pagtaudan niya biyag tida nga agnanayun, masapul tida ngarud met pe̍ nga paiturayan igina iya panagbiyag tidan.

²⁶ Awan kuma ngarud dactidan diya agtitinnangsit, winno agsisinnuting, winno agiinnapal.