Galasiya 4 - Ya Baru nga Tulag

Ya pangngarig maipanggep iya anac nga agtawid

¹ Agten idi ya kayat ku nga kagiyen maipanggep iya Linteg: Kaspagarigan ya isa nga anac nga lalaki nga agtawid iya sanicwa ne̍ ama na. Bayat niya kinaebbing na pekkem, maipada ya kasasaad na iya isa nga tagabu, orey igina ya kustu nga makin-kuwa iya amin nga sanicwa niya ama na.

² Ta paiturayan pekkem ya anac kadiya nakaipaaywanan na se̍ diya nakaitalkan na, patingga iya algew nga nikeddeng niya ama na nga panamet niya anac kadito tawid na.

³ Ket agten tida pe̍ iyan, ta arig tida nga ebbing itun, ito arig nga tagabu nactida diya ganggangey diya uwed iya lubung ngi, ito madi tida pekkem makaawat maipanggep e̍ Kristu.

⁴ Ngem ito nadatngan ya kustu nga timpu win, nibon ne̍ Apu Diyus ya Anac na idi nga lubung. Nibon na nga paiyanac iya isa nga babey. Ket nasakupan met pe̍ itun niya turay niya Linteg diya Hudyu,

⁵ tasun wayawayaan na diya nasakupan niyan nga Linteg. Ket iya agten iyan, maisaad tida nga kustu nga anac ne̍ Apu Diyusin.

⁶ Ket gapu ta an-anac nakayu nge̍ Apu Diyusin, nibon na ya Ispiritu niya Anac na nga timipun kadiya panpanunut tida. Ket ya Ispiritu niya Anac, umaw-awag met e̍ Apu Diyus, nga kunen na, “Ama! Amac!”

⁷ Dikad pe̍ bekken kayu nga maibilang nga tagabu win, no di lugud maibilang kayu nga anac kin. Ket gapu ta an-anac nakayu nge̍ Apu Diyusin, pinagbalin nakayu nga makipagtawid met pe̍ kadiya amin nga maipaay kadiya an-anac na.

To danag ne̍ Pablu kadito iGalasiya

⁸ Ngem ito madi kayu pekkem em-emmu nge̍ Apu Diyus, nagpatagabu kayu met pe̍ kadito dinaydayaw nu nga awan met kinadiyus da.

⁹ Ngem ita, em-emmu nun nge̍ Apu Diyus, winno em-emmu nakayun nge̍ Apu Diyus kunec kuma. Dikad pe̍ ape̍ ngarud nga gabay nu pekkem ya sumoli kadiya awan sirsirbi da nga ganggangey nga awan maipaay da nga paglaingan? Ape̍ aya nga gabay nu manin ya patagabu kadiyan?

¹⁰ Ta ngilinen nu pe̍ lugudin diya naidumduma nga algew, bulan, timpu, se̍ dagun.

¹¹ Ay-ay, madanagan nac dakayun, ta kaynun no awan mamaay nito panagbannug ku para dakayun.

¹² Agten idi ya ibilin ku nga sipapasnec dakayu nga kakabsat: Tuladen dac kuma, ta nagbalin nac met pe̍ yin nga agten dakayu nga bekken nga Hudyu. Ket ito uwed dac ennan, awan met winangel nu nga dake̍c iyaken.

¹³ Ket malagip nu ito damu na, nga gapu ito panagsakit ku itun, uwed pe̍ to gundaway nito nona nga panangaskasabac dakayu iya Makaparagsac nga Damag.

¹⁴ Ket orey narigatan kayu itun gapu ito panagkapsut niya karadkad ku, di dac met pinalpaliw winno kinalucsew itun, no di lugud rinispitar dac nga arig nga isa nga anghe̍l ne̍ Apu Diyus ya sinangaili nu itun, winno arig nga e̍ Kristu Je̍sus mettas ya sinangaili nu.

¹⁵ Ngem ita, nipacpaenya nu ngarudin yan nga panaganggem nu gapu iyaken itun? Ta mapanecnekkac nga pudnu to panangtulung nu iyaken itun. Ket gapu ito pakarigatac, no mabalin kuma, gabay nu met nga kotkoten kuma nga iyalis diya mata nu itun nga e̍cde̍ kuma iyaken.

¹⁶ Ngem ita, kaynun no ibilang dac nga kagura nun, gapu ta ibagbagac dakayu ya pudnu.

¹⁷ Ngem dito agindudungngu nga mangaw-awis dakayu ka sabali nga sursuru, bekken met nga nabaru ya panggep da dakayu. Ta gabay da ngas ya mangiyadeyyu dakayu iya isursuruc, tasun agpasnec kayu kuma nga mangdungngu igida.

¹⁸ Ket bekken met nga dake̍c no uwed pe̍yeng nga mangdungngu dakayu, no nabaru was lugud ya panggep na. Ngem no uwed agpasnec nga mangdungngu dakayu, masapul ngarud nga pe̍yeng kuma ya panagdungngu na, bekken nas nga bayat niya kauwed ku dakayu.

¹⁹ Dakayu nga arig nga an-anac kun, masakitan ya nakem kun gapu dakayu, nga maiyarig iya pannakapasakit niya isa nga babey nga agpakiskis nga aganac. Ket agten iyan ngarud ya panagrigat ku gapu dakayu, agingga nga ya gangey ne̍ Kristu kuma ngin ya mangituray nga pe̍yeng dakayu.

²⁰ Paya no uwed dac kuma ngas iya edyan nu ita, tasun bekken kuma nga agten idi nga makapasakit ya pamagbagac dakayu. Uwed dac kuma ngarud iyan, ta tutu met nga madic emmu ya pamaayec dakayun.

Pangngarig maipanggep kade̍ Hagar nge̍ Sara

²¹ Dakayu nga mayat nga sumurut pekkem iya Linteg Hudyu, mabalin ngata nga madi kayu pekkem maawatan ya naisurat ito Linteg.

²² Ta naisurat iyan nga to Abraham, uwed duwa nga anac na nga lalaki. Ket to isa, anac na ito Hagar nga tagabu da, ket to isa, anac na ito Sara nga asawa na nga bekken nga tagabu.

²³ Ket to anac na ito tagabu, kadawyan nas ya pannakaiyanac na. Ngem to anac na ito asawa na nga bekken nga tagabu, naiyanac nga pakatungpalan nito kari ne̍ Apu Diyus igida.

²⁴ Ket ita, agpangngarig gac maipanggep kadidi nga banbanag: Ket dito duwa nga babey, iyarig ku da ka duwa nga tulag. To Hagar, itu ya maiyarig ito tulag nga nibilin ne̍ Apu Diyus enna Tageytey Sinay itun. Ket diya nasakupan niyan nga tulag, maiyarig da kadiya matagabu nga an-anac nito Hagar.

²⁵ Ket ya nagan nga Hagar, kayat na nga kagiyen nga, “Tageytey Sinay” enna Arabya. Ket kaiyarigan met nito Hagar diya toltoley iya ili nga He̍rusale̍m ita, nga patagabu da pekkem iya ugali da.

²⁶ Ngem dactida, bekken tida nga agten kadiyan nga patagabu. Ta ya maiyarig nga ina tida, bekken nga ya ili nga He̍rusale̍m idi nga lubung, no di lugud ya ili nga He̍rusale̍m ka ngudu nga makasakup kadiya an-anac na nga nawayawayaan.

²⁷ Agten iyan pe̍ ya banag nito isa nga pangngarig nga naisurat iya Bibliya nga kunen na, “Agragsac ka ngasin, ikew nga lupes nga babey, ket ipkaw mu kuma ya panagdayaw mu nga siraragsac, ikew nga madi pekkem nakalak-am ka sakit niya panagpakiskis. Ta maiyarig ka iya isa nga naiyadi nga babey nga ad-adu met diya an-anac na ngem iya babey nga kakobung na pekkem ya asawa na,” kunen na.

²⁸ Ket dakayu nga kakabsat, nagbalin kayun nga an-anac ne̍ Apu Diyus gapu ito kari na, nga agten kayu mettas ito Isaac, nga igina to naiyanac sigun ito kari ne̍ Apu Diyus.

²⁹ Ket agten tida pe̍ yin kade̍ Isaac nge̍ Ismae̍l nga agkabsat. Ta itun, to Ismae̍l, nga naiyanac itun iya kadawyan nas nga pannakaiyanac, nirurumen na met to Isaac, nga itu to naiyanac sigun ito panggep niya Ispiritu ne̍ Apu Diyus. Ket agten pekkem iyan ya mapaspasamac ita maigapu iya Linteg.

³⁰ Ngem ya kunen met niya naisurat iya Bibliya, ket agten idi: “Pagtalawem ya tagabu nga babey se̍ ya anac na. Ta madi mabalin nga makipagtawid ya anac niya tagabu iya anac niya siwayawaya nga babey nga bekken nga tagabu,” kunen na.

³¹ Dikad pe̍ kakabsat, bekken tida nga maiyarig nga anac niya tagabu nga babey, no di lugud anac niya siwayawaya.