Galasiya 3 - Ya Baru nga Tulag

Bekken nga maigapu ka panagtungpal iya Linteg ya panamati

¹ Nagkapsut ket lugud niya pannakaawat nu nga iGalasiya ngin! Ta ape̍ naglaka kayu nga naiyaw-awanin? Nabatad met dakayu itun to pannakailawlawag nito pannakapatey ne̍ Je̍su Kristu ito krus.

² Ita, uwed das isa nga damagec dakayu: Kumaan nito panangawat nu iya Ispiritu ne̍ Apu Diyus itun? Gapu iya panagtungpal nu iya Linteg, winno gapu iya panamati nu iya kinapudnu nga nagicna nu?

³ Nakapsut ngas nga unay ya pannakaawat nun! Ta ito rugi nito panamati nu, ya Ispiritu ne̍ Apu Diyus met ya pagnamnamaan nu. Ngem ita, ya kabucbukudan nu nga bileg nga mangtungpal met ya gabay nu nga pagnamnamaan.

⁴ Ape̍? Awan aya mamaay nan dito amin nga napasamac dakayu ito damu? Uwed met!

⁵ Ngarud, e̍ Apu Diyus met ya mangipaay dakayu iya Ispiritu na, se̍ ya mangariman ka nakaskasdaaw iya imatang nu. Ngem ape̍ ngata nga arimanen na didi dakayu? Gapu ngata iya panagtungpal nu iya Linteg? Winno gapu iya panamati nu iya kinapudnu nga nagicna nu?

⁶ Agten pe̍ to Abraham, ta naisurat iya Bibliya maipanggep igina nga, “Pinati ne̍ Abraham to kunen ne̍ Apu Diyus. Ket gapu iya panamati na, nibilang ne̍ Apu Diyus nga nalinteg,” kunen na.

⁷ Ngarud, maemmuwan nu kuma ngin nga diya toley nga uwed panamati da, itu diya maibilang nga kapututan nito Abraham.

⁸ Ket sigud nga naisurat iya Bibliya to gandat ne̍ Apu Diyus nga ibilang na nga nalinteg diya bekken nga Hudyu, gapu was iya panamati da. Itu nga uwed to naipakaemmu ito Abraham itun, ket itu pe̍ ya Makaparagsac nga Damag ito Abraham. Ta kinunen ne̍ Apu Diyus igina, “Gapu ikew, matulungan nad diya amin nga toltoley kadiya il-ili iya lubung,” kunen na iya Bibliya.

⁹ Itu nga agten ito kunec, nga diya amin nga uwed panamati da e̍ Apu Diyus ita, matulungan da ngarudin, nga nairaman da mettas ito Abraham nga namati pe̍ e̍ Apu Diyus itun.

¹⁰ Ket ya kinapudnu na, diya toley nga agnamnama kanu nga nalinteg da gapu iya panangtungpal da iya Linteg ne̍ Muyse̍s, uwed met igidan ya pakaukuman da gapu iyan mettas nga Linteg. Ta naisurat met iya Bibliya nga, “Maukum ya orey nagan na nga madi makatungpal kadiya amin nga paglinteggan nga naisurat iya libru nga nakaisuratan niya Linteg,” kunen na iya Bibliya.

¹¹ Itu nga nalawag ngarudin, nga no iya imatang ne̍ Apu Diyus, awan nga pulus mapalinteg gapu iya panangtungpal na iya Linteg. Ta naisurat pe̍ iya Bibliya nga kinunen ne̍ Apu Diyus nga, “Ya naibilang nga nalinteg, agbiyag nad gapu iya panamati na,” kunen na.

¹² Ngem ya Linteg, bekken nga maigapu ka panamati, no di lugud maigapu ka panagtungpal. Tutu met, ta kunen na pe̍ iya Bibliya nga, “Ya makatungpal kadidi nga paglinteggan, agbiyag nad gapu kadidi,” kunen na.

¹³ Ngem e̍ Kristu, winayawayaan nactidan iya pakaukuman nga ipaay niya Linteg ne̍ Muyse̍s. Ta e̍ Kristu met ya naukum nga naisunu para dactida, maikanatad iya naisurat pe̍ iya Bibliya nga kunen na, “Maemmuwan ngarud ya panangukum ne̍ Apu Diyus iya orey nagan na nga maisabit ka kayu nga pakapateyyan na,” kunen na.

¹⁴ Dikad pe̍ gapu kaditun nga naariman e̍ Kristu Je̍sus, natungpalin to nikari ne̍ Apu Diyus ito Abraham, nga matulungan kanu diya amin nga toltoley gapu e̍ Abraham. Ket iya agten iyan, dakayu nga bekken nga Hudyu, nairaman kayu met pe̍ yin idi nga kari ne̍ Apu Diyus ito Abraham. Ket agten iyan ngarud, tasun gapu iya panamati tida, mae̍cdan tida iya Ispiritu ne̍ Apu Diyus sigun ito kari na.

Madi mabaliwan to kari ne̍ Apu Diyus

¹⁵ Kakabsat, uwed pangngarig ku nga nalaka nga maawatan toley: No uwed da kuma toley nga agtulag, ket no napirmaanin ya katulagan da, awan makabalin nga mangwaswas winno mangdegga iya nailanadin.

¹⁶ Ket agten met pe̍ iyan dito nikari ne̍ Apu Diyus ito Abraham se̍ iya kapututan na. Ngem bekken nga adu to nagkariyan ne̍ Apu Diyus, ta madi na met kinunen nga, “se̍ kadiya kapututam,” no di lugud kunen na, “se̍ iya kapututam.” Ket kayat na nga kagiyen nga is-isa yan nga kabulun nito Abraham nga nagkariyan na, ket e̍ Kristu mettas yan.

¹⁷ Ket itu yani ya gabay ku nga ibaga, nga e̍ Apu Diyus, nakitulag ito Abraham itun, ket nikari ne̍ Apu Diyus nga tungpalen na ngarud to kinunen na. Ngem kalpasan nito eppat nga gasut se̍ tellu nga pulu nga dagunin nanipud ito pannakitulag ne̍ Apu Diyus ito Abraham, binangun na pe̍ dito bilbilin nito Linteg nito Muyse̍s. Ngem orey nod-odi to panangbangun na ito Linteg ngem ito panagkari na ito Abraham, madi met naipac ya kinapateg nito kari. Dikad pe̍ madi ngarud met napirdi to kari ne̍ Apu Diyus ito Abraham.

¹⁸ Itu nga ne̍cde̍ ne̍ Apu Diyus ya nikari na dactida nga tawiden tida igina. Ngem ya panange̍cde̍ na, bekken nga gapu iya panagtungpal tida iya Linteg, no di lugud gapu iya kari na. Ta no mapatawidan tida gapu iya panagtungpal tida iya Linteg, ket awan met sirsirbi nito kari ne̍ Apu Diyusin. Ngem nipatawid na met ito Abraham gapu ngarud ito panangikari na.

Ya panggep nito Linteg nito Muyse̍s

¹⁹ No agten iyan, nagan ngarud to panggep ne̍ Apu Diyus ito Linteg nga nipabangun na? Agten idi: Nipabangun ne̍ Apu Diyus to Linteg nga naidga ito kari na, tasun maemmuwan kuma diya toltoley ya kinadake̍c da. Ngem niranta ne̍ Apu Diyus nga agpatingga ya turay nito Linteg no umbe̍tin to kapututan nito Abraham, nga itu mettas to nagkariyan na. Ket to Linteg, nipaibilin ne̍ Apu Diyus kadiya anghe̍le̍s ito Muyse̍s. Ket e̍ Muyse̍s, igina to mangibeggi kadiya toltoley itun.

²⁰ Ngem madi masapul ya mangibeggi, no isa ngas ya agkari, ket e̍ Apu Diyus ngas met to nagkari ito Abraham itun.

²¹ Ket yaen na, kunen tida kadi nga maikuntra ya Linteg nito Muyse̍s kadito nikari ne̍ Apu Diyus? Bekken met! Ta awan met nipabangun ne̍ Apu Diyus nga linteg nga makae̍cde̍ dactida ka biyag nga agnanayun gapu iya panagtungpal tida. Ta no uwed, itu kuma ngarudin ya pakapalinteggan tidan.

²² Ngem bekken met nga agten iyan. Ta kunen na iya Bibliya nga amin nga toley, ya basul ya mangituray igida. Ket agten iyan ngarud ya kinunen na tasun maemmuwan tida kuma nga to nikari ne̍ Apu Diyus, mae̍cde̍ gapu ngas iya panamati diya toley e̍ Je̍su Kristu, tasun mae̍cdan ngarudin diya amin nga mamati igina.

²³ Ngem ito madi pekkem nadatngan yani nga timpu niya panamati e̍ Je̍su Kristu, ket arig tida nga balud nga niturayan niya Linteg ne̍ Muyse̍s. Ta arig nga ya Linteg ya mangbayabay dactida itun, agingga iya pannakairugi nidi nga timpu niya panamati.

²⁴ Dikad pe̍ to Linteg, itu ya nangaywan dactida itun patingga ito inumbe̍t ne̍ Kristu, tasun no umbe̍tin, mapalinteg tidan iya imatang ne̍ Apu Diyus gapu iya panamati tida e̍ Kristu.

²⁵ Ket itan, gapu ta nadatnganin yani nga timpu niya panamati, bekken nin nga ya Linteg ya mangaywan dactidan.

Anac ne̍ Apu Diyus diya naitipun e̍ Kristu

²⁶ Ta gapu iya panamati nu, nagbalin kayu nga amin nga an-anac ne̍ Apu Diyusin, gapu iya pannakaitipun nu e̍ Kristu Je̍sus.

²⁷ Ta dakayu nga nabautisaranin gapu iya pannakitipun nu e̍ Kristu, nipada nu ya gangey nu iya gangey ne̍ Kristu win.

²⁸ Dikad pe̍ gapu iya pannakaitipun nu e̍ Kristu Je̍sus, naibilang kayu nga agpapada ngin. Awan ngarud nagdudumaanin diya Hudyu se̍ bekken nga Hudyu iya imatang ne̍ Apu Diyus, ket awan pe̍ pagdumaanin niya tagabu winno bekken nga tagabu, se̍ awan pe̍ pagdumaan niya lalaki winno babey, ta is-isa kayu nga aminin.

²⁹ Itu nga no naikameng kayu e̍ Kristu win, maibilang kayu met pe̍ yin nga kapututan nito Abraham. Ket no kapututan nakayu to Abraham, makipagtawid kayu pe̍ iginan, sigun ito nikari ne̍ Apu Diyus igina.