Galasiya 1 - Ya Baru nga Tulag

¹ Iyaken nge̍ Pablu nga isa nga apustul. Ket bekken met nga toley ya nangibon iyaken winno ya nangisaad iyaken, no di lugud e̍ Je̍su Kristu mettas, se̍ e̍ Apu Diyus nga Ama, nga itu ya nangpaungar igina.

² Isurat ku yani dakayu nga kamkameng diya bungguy diya mamati ka prubinsiya nga Galasiya. Ket amin diya kakabsat tida nga kabulun ku ennidi, makipagpakumusta da kanu pe̍ dakayu.

³ Sapay kuma ta uwed dakayu ya siaayat nga asi, se̍ talna, nga gayat e̍ Apu Diyus nga Ama tida, se̍ iya Apu tida nga Je̍su Kristu.

⁴ Ta e̍ Apu Je̍sus, nipalubus na nga naidatun ya beggi na gapu kadiya basbasul tida, tasun isalakan nactida iya pannakabalin niya kinadake̍c nga uwed ita idi nga lubung. Agten iyan ngarud to inariman na, ta itu ya tinarigagayan ne̍ Apu Diyus nga Diyus se̍ Ama tida.

⁵ Ngarud, madaydayaw kuma nge̍ Apu Diyus ka agnanayun nga awan patingga na. Agten iyan kuma.

Nasnup ngas ya pudnu nga Makaparagsac nga Damag

⁶ Nasdaaw wac met dakayu, ta dagus nu met nga likudan ya nangpili dakayu. Pinili nakayu ngarud gapu ito siaayat nga panangaasi ne̍ Kristu dakayu. Liclikudan nu ngarud ya kunec, ta agtungpal kayu mettin ka sabali nga makaparagsac nga damag, nga sabali met ya banag na ngem iya banag niya pudnu nga Makaparagsac nga Damag.

⁷ Ngem yan nga tungtungpalen nu, bekken met nga tutu nga Makaparagsac nga Damag. Kinapudnu na, uwed da met toley nga mangriribuc dakayun, ta gabay da nga pasabaliyen nin ya pudnu nga Makaparagsac nga Damag maipanggep e̍ Kristu.

⁸ Ngem mailunud kuma lugud ya orey nagan na nga mangisuru ka makaparagsac kanu nga damag, nga sabali ya banag na iya pudnu nga Makaparagsac nga Damag nga nikasaba mi dakayu itun. Orey no dakami kuma, winno ya isa nga anghe̍l kuma ya mangisuru ka agten iyan, basta mailunud kuma.

⁹ Ulitec ngarud manin ita, ta nibaga mi dakayu itun, nga no uwed orey nagan na nga mangisuru dakayu ka sabali nga sursuru ngem iya pudnu nga Makaparagsac nga Damag nga nipateg nu itun, mailunud kuma ngarudin!

¹⁰ Nitured ku nga nibaga ya agten iyan, ta bekken met nga ya beggic ya gabay ku nga padayawen. Ya iyaannamung ne̍ Apu Diyus lugud ya sapsapulec kadidi nga nibagac. Bekken ngarud nga toley ya gabay ku nga ay-ayuwen kadidi nga nibagac, ta no toley kuma ya gabay ku nga ay-ayuwen, bekken met nga e̍ Kristu ya pagsirsirbiyac kun.

Maipanggep ito kinaapustul nito Pablu

¹¹ Ket ita, kakabsat, ipalagip ku kuma ngarud dakayun nga bekken met nga nagtaud ka toley ya Makaparagsac nga Damag nga nikasabac dakayu.

¹² Ta bekken nga toley ya nakaemmuwac idi, ket awan met toley nga nangisuru idi iyaken, no di lugud nipaltiing mettas ne̍ Je̍su Kristu iyaken.

¹³ Tutu met yan, ta nadamag nu ngarudin maipanggep ito dati nga ugalic itun, ito napasnekkac nga unay itun nga nangtungtungpal iya pammati diya Hudyu. Napalaus met to panangirurumen ku itun kadiya toley ne̍ Apu Diyus, ta winangel ku ya amin nga kabaellac nga mangpukaw kuma igida.

¹⁴ Ket no maipanggep kadiya kataeg gac itun nga kailiyac, inabac ku da itun iya panangtungpal ku iya pammati mi nga Hudyu, ta nipasnec ku nga unay ya panangtungpal ku kadito ug-ugali dito am-ama mi.

¹⁵ Ngem orey ito di yac pekkem naiyanac, pinili nac kun nge̍ Apu Diyus gapu iya siaayat nga asi na, ket itu pe̍ ya gapu na nga nisaad nac nga agsirsirbi igina.

¹⁶ Ket itun, gapu ta gabay ne̍ Apu Diyus, nipaltiing na met iyaken ya maipanggep iya Anac na. Nipakaemmu na ngarud ya Makaparagsac nga Damag iyaken, tasun ikasabac kuma met pe̍ dakayu nga bekken nga Hudyu. Ket ito nipakaemmu na iyaken nin, madi yac nawe̍ nakiuman maipanggep idi ka orey nagan na nga toley.

¹⁷ Di yac met pe̍ nawe̍ enna He̍rusale̍m nga nakiuman kadito duduma nga apustule̍s, nga non-ona ngem iyaken nga naisaad nga apustul. Nawe̍ yac lugud nga sigida enna nasyun nga Arabya, nga gayat tac enna ili nga Damasku, se̍ yac simoli mettas enna Damasku.

¹⁸ Ket ito kalpasan tellu nga dagun, se̍ yac ngas nawe̍ enna He̍rusale̍m, tasun mawe̍ yac singen nge̍ Pe̍dru. Ket nakipagedyan nac igina ka sangapulu ket lima nga algew.

¹⁹ Ngem awan met nasingec itun kadito duduma nga apustule̍s, malacsid e̍ Santiyagu nga kabsat ne̍ Apu Je̍sus.

²⁰ Ket amin didi nga ibagbagac idi nga surat ku, tutu da met, ket emmu met pe̍ ne̍ Apu Diyus nga madi yac agbusbusid.

²¹ Ket kalpasan niyan, nawe̍ yac kadiya duduma nga il-ili enna prubinsiya nga Sirya se̍ Silisiya.

²² Ngem diya kamkameng dito bungguy diya mamati e̍ Kristu enna prubinsiya nga Hudya, ket di dac pekkem em-emmu itun.

²³ Yan nas emmu da to nadamag da, nga to toley nga nangirurumen igida itun, nagbalin gayamin nga isa nga mangisursuru iya pammati da nga pinanggep na itun nga pukawen.

²⁴ Dikad pe̍ nagyaman da nga sidadayaw e̍ Apu Diyus itun gapu iyaken.