E̍pe̍su 6 - Ya Baru nga Tulag

Pamagbaga kadiya anac se̍ ama

¹ Dakayu nga an-anac, rebbeng nu ya agtungpal kadiya naganac dakayu, ta itu ya tumutup iya panamati nu iya Apu.

² Ta uwed met to bilin ne̍ Apu Diyus maipanggep iyan, ket itu ya nona nga bilin na nga napabulunan ka kari, nga kunen na, “Dayawem ya amam se̍ ya inam,

³ tasun nabaru was ya malak-amam, se̍ tasun mabayag ya panagbiyag mu idi nga ginet,” kunen na.

⁴ Ket dakayu nga am-ama, madi kayu agariman ka makapasakit iya nakem diya an-anac nu, nga pakaigapuwan niya unget da, no di lugud idalan nu da kuma iya panursuru se̍ pamagbaga niya Apu.

Pamagbaga kadiya tagabu se̍ diya amu da

⁵ Dakayu nga tagabu, managtungpal kayu kuma nga sidadayaw se̍ siaannad kadiya ipawangel diya amu nu dakayu. Sipapasnec kayu ngarud nga agtungpal kadiya amu nu idi nga lubung, nga arig nga e̍ Kristu mettas ya pagsirbiyan nu.

⁶ Ket gapu ta naibilang kayu nga agsirsirbi e̍ Kristu win, ket ya tarigagay ne̍ Apu Diyus kuma lugud ya tungtungpalen nu nga sipapasnec kin. Itu nga orey uwed man winno awan toley nga sumingsingen dakayu, nagaget kayu kuma latta. Ta bekken nga ya panangannamung ngas toley ya sapsapulen nu.

⁷ Ket tungpalen nu kuma ngas nga siraragsac ya panagsirbi nu, ta ya Apu met ya ibilang nu nga pagsirbiyan nu, nga bekken lugud nga toley.

⁸ Ta laglagipen nu kuma nga gun-gunaan niya Apu ya orey nagan na nga toley nga agariman ka nabaru, orey tagabu man winno bekken nga tagabu ya mangariman.

⁹ Ket dakayu met nga amu diya tagabu, agten kayu kuma pe̍ iyan, ta madi kayu kuma panpansingen diya tagabu nu. Ta laglagipen nu nga dakayu se̍ diya tagabu nu, ket is-isa ya pagsirsirbiyan nu nga Apu nu ka langit. Ket no igina, awan met idumduma na nga toley, orey no nagan ya kasasaad da.

Diya pangabac tida e̍ Satanas

¹⁰ Ket itan, idi ya ibagac dakayu: Pabilgen nu diya panpanunut nu maipanggep iya panamati nu gapu iya pannakaitipun nu iya Apu, se̍ gapu iya bileg nga tumaud iya pannakabalin na.

¹¹ Ngarud, usaren nu amin nga pannakabalin nga e̍cde̍ ne̍ Apu Diyus nga maiyarig nga kabal nu, tasun maabac nu diya dake̍c nga kinasikap niya diyablu.

¹² Ta bekken met nga toley ya kakuntra tida, no di lugud diya dake̍c nga di mas-asingen nga gayat iya ngudu. Itu diya uwed pannakabalin se̍ turay da, se̍ diya agituray kadiya dake̍c nga toltoley nga uwed idi nga lubung ita nga timpu, nga arig nga nagicbet.

¹³ Itu nga usaren nu ya amin nga arig nga pannakakabal nga e̍cde̍ ne̍ Apu Diyus, tasun no uwed dumateng nga dake̍c nga timpu dakayu, mangabac kayu ngarud, nga mangpagtalew kadiya dake̍c nga di mas-asingen. Ket kalpasan niyan nga naiyarig ka pannakilaban nu kadiya dake̍c, ituluy nu pekkem ya panagusar nu kadiyan nga kabal, tasun madi kayu ngarud maabac.

¹⁴ Ngarud, madi kayu agduwaduwa ngin, no di lugud agtalged kayu kuma ngarud gapu iya panangipateg nu kadiya kinapudnu nga banbanag, nga itu ya maiyarig ka barikes nu. Ket ya panangipateg nu iya kinalinteg, itu ya arig nga pagkabal niya barukung nu.

¹⁵ Ket ya maiyarig ka sapatus nu, itu ya pe̍yeng nu nga sisasagana nga mangipakaemmu iya Makaparagsac nga Damag nga mange̍cde̍ ka talna.

¹⁶ Ket deggaan nu pe̍ didi nga pagkabal nu ka panamati, ta ya panamati nu, maiyarig ka pannakakalasag, nga arig nga pangkusep nu kadiya nagilab nga pana niya diyablu nga managdacdake̍c.

¹⁷ Ket ya panangisalakan ne̍ Apu Diyus dakayu, itu ya namnama nu, nga maiyarig ka pag-he̍lme̍t nu. Ket ya kagi ne̍ Apu Diyus, itu ya arig nga pannakaispada nu nga e̍cde̍ niya Ispiritu Santu.

¹⁸ Usaren nu ngarud amin didi nga alikamen nu, ket sikakararag kayu nga pe̍yeng. Paiturayan kayu iya Ispiritu Santu kadiya amin nga ikararag winno adngen nu e̍ Apu Diyus. Ket tasun agten iyan nga tutu, naridam kayu kuma nga sipapasnec nga pe̍yeng iya panangibabaet nu kadiya karkararag nu para kadiya amin nga toley ne̍ Apu Diyus.

¹⁹ Ket ikararagan dac pe̍ kuma, nga ikararag nu nga isuru kuma ne̍ Apu Diyus iyaken diya kagiyec, tasun situtured dac nga mangipakaemmu iya kaipapennan niya Makaparagsac nga Damag nga madi pekkem naipakaemmu itun.

²⁰ Ta ya Makaparagsac nga Damag, itu ngarud ya pakaibonac, nga isa ngac nga mangipacpakaemmu, orey nakakawar rac ita idi nga pagbaludan. Ket itu nga ikarkararagan dac kuma, tasun natured dac nga mangipakaemmu iya Makaparagsac nga Damag maikanatad iya rebbeng ku nga wanglen.

To nodi nga nibaga ne̍ Pablu kadiya iE̍pe̍su

²¹ Ket uwed nibon ku nga agipadamag dakayu maipanggep iyaken se̍ ya kasasaad ku wi. Itu nge̍ Tikiku nga patpatgen tida nga kabsat, nga mapagtalkan nga agsirsirbi iya Apu. Ket igina ya mangipakaemmu dakayu iya amin maipanggep iyaken idi, ta gabay ku no maemmuwan nu pe̍ didi.

²² Ibon ku ngarud tasun ipadamag na dakayu ya kasasaad mi idi, se̍ tasun liwliwaen nakayu kuma pe̍.

²³ Sapay kuma ta uwed kadiya amin nga kakabsat ku ka pammati ya panagtutunus se̍ panagayat nga kabulun niya panamati da, nga itu diya ipaay ne̍ Apu Diyus nga Ama se̍ e̍ Apu Je̍su Kristu.

²⁴ Sapay kuma ta uwed ya siaayat nga asi ne̍ Apu Diyus kadiya amin nga agayat iya Apu tida nga Je̍su Kristu ka ayat nga awan panagpatingga na.