E̍pe̍su 4 - Ya Baru nga Tulag

Agtutunus kuma diya kamkameng ne̍ Kristu

¹ Ket itan, iyaken, uwed dac iya pagbaludan nga idi gapu iya panagsirbic iya Apu. Ket sipapasnekkac nga mangbagbaga dakayu nga maitutup kuma ya ugali niya panagbiyag nu iya kinadayaw niya saad nu nga nangpiliyan ne̍ Apu Diyus dakayu.

² Napakumbaba se̍ nanacman kayu kuma, se̍ naanus kayu kuma nga pe̍yeng, ket agpipinnase̍nsiya kayu kuma ngarud gapu iya panagiinnayat nu.

³ Ta arimanen nu kuma ya amin nga kabaellan nu nga agtultuluy iya panagkaykaysa nu nga patauden niya Ispiritu ne̍ Apu Diyus, gapu iya panagbubulun nu nga situtunus.

⁴ Ngarud, amin tida nga toley ne̍ Kristu, sangkabungguy tida met, nga maiyarig iya is-isa nga beggi. Ket is-isa pe̍ ya Ispiritu ne̍ Apu Diyus nga uwed dactida, agten met pe̍ nga is-isa ya namnama tida gapu iya nangpiliyan ne̍ Apu Diyus dactida.

⁵ Is-isa ngarud ya Apu tida, is-isa ya pammati tida, se̍ is-isa pe̍ ya pakabautisaran tida.

⁶ Ket se̍ is-isa met ya Diyus nga Ama tida nga amin. Igina met ya kangatuwan iya amin, ket igina ya gapu niya amin, ket igina met ya uwed kadiya amin.

Diya nadumaduma nga pannakabalin nga e̍cde̍ ne̍ Kristu

⁷ Ngem orey is-isa kuma ya panpanunut tida, nadumaduma met ya pannakabalin nga nae̍cde̍ iya tunggal isa dactida, sigun iya gabay nga e̍cde̍ ne̍ Kristu dactida.

⁸ Agten met iyan to naisurat maipanggep e̍ Kristu nga kunen na, “Ito simoli ka ngudu, adu diya balud nga nitarey na. Ket itun, ne̍cdan na diya toley ka pannakabalin da,” kunen na.

⁹ Ket ito kinunen na nga simoli ka ngudu, kayat na nga kagiyen nga nona nga nimulug iya segged nga nawe̍ iya kaun-gan nga edyan iya ginet.

¹⁰ Ngarud, ya nagpasegged, igina mettas pe̍ ya nagpangudu win iya kangatuwan nga edyan iya ngudu, tasun igina ya pakakumplituwan niya aminin.

¹¹ Ket e̍ Kristu ngarud ya nange̍cde̍ ka nadumaduma nga pannakabalin kadiya toley na. Ket uwed da dinutukan na nga agbalin nga apustule̍s, se̍ diya agbalin nga mangikaskasaba iya kagi ne̍ Apu Diyus. Ket uwed duduma nga dinutukan na nga agbalin nga mangipakaemmu iya Makaparagsac nga Damag, se̍ diya agbalin nga agay-aywan se̍ manursuru kadiya mamati.

¹² Ket binangun ne̍ Kristu amin diyan nga saad, tasun isaganaan nactida nga amin nga toley ne̍ Apu Diyus iya panangtungpal tida kadiya ipawangel ne̍ Apu Diyus dactida. Itu didi diya ipawangel na dactida tasun mapabileg ya bungguy ne̍ Kristu nga maiyarig iya beggi na.

¹³ Ket agten iyan kuma ya maariman agingga nga agkaykaysa tidan iya panamati tida se̍ iya pannakaawat tida maipanggep iya Anac ne̍ Apu Diyus. Ta agbalin kuma nad nga naan-anay diya nakem tida maipanggep kadidi, nga agten mettas kuma iya nakem ne̍ Kristu nga awan pagkurangan na.

¹⁴ Ket no agten iyanin, bekken tida nga arig nga diya maipalupalung winno diya maipurad ngas iya kumpurmi nga pennan niya belluut. Ta bekken tida kuma nga arig nga diya ebbing, nga nalaka nga maawis kadiya nadumaduma nga panursuru diya mangallilaw nga mangiyaw-awan ka toley gapu kadiya kinasikap da.

¹⁵ Ngarud, bekken tida kuma nga agten kadiyan, no di tida kuma lugud siaayat nga agkagi ngas ka pudnu nga pe̍yeng. Ket no agten iyan, bumilbileg tida ngarud agingga nga agbalin tida nga awan pagkurangan nan, nga agten mettas iya gangey ne̍ Kristu nga pangulu tida.

¹⁶ Ta maiyarig tida kadiya nadumaduma nga parte̍ niya beggi na, nga paiturayan tida igina nga ulu tida. Ket gapu igina, kustu ya pannakaikamang tida iyan nga beggi na, nga arig nga uwed ug-ugat nga namagkakamang kadiya tunggal um-um na. Ket no nakaradkad ya beggi, nga tungtungpalen diya parparte̍ na diya kustu nga pagrebngan da, ket dumackel ngarud se̍ bumileg yan nga beggi. Ket dactida nga mamati, agten tida met pe̍ iyan, no agiinnayat tida.

Ya kabarbaru nga gangey tida nga gayat e̍ Kristu

¹⁷ Ket itan, uwed ibilin ku dakayu gapu iya turay ku nga ne̍cde̍ niya Apu iyaken: Madi kayu kuma ngarud nga ituluy ya panagbiyag nu sigun iya gangey diya bekken nga Hudyu, nga itu diya agtungtungpal ngas kadiya uwed iya panpanunut da nga awan sirsirbi na.

¹⁸ Ta diya agten iyan nga madi mamati, nagicbet pekkem ya panpanunut da. Ket awan ngarud pakairamanan da iya kabarbaru nga biyag nga e̍cde̍ ne̍ Apu Diyus, ta gapu iya kinamulinas da, madi da makaawat maipanggep e̍ Apu Diyus.

¹⁹ Ket gapu ta naigamer ya dake̍c igidan, arig nga nagkalmadura mettin diya nakem dan. Awan ngarud alyew dan nga agtungpal ka orey nagan na nga dake̍c nga ricna niya beggi da, se̍ pulus nga madi mapnec ya e̍lug da nga agwangel latta ka naalas.

²⁰ Ngem no dakayu, bekken met nga agten kadiyan ya naisursuru dakayu maipanggep iya gangey ne̍ Kristu.

²¹ Ta tutu met nga nagicgicna nun ya panursuru nga gayat e̍ Je̍sus. Ket gapu iya pannakaitipun nu igina, naisuru met dakayun ya pudnu nga panursuru maipanggep iya panamati igina, ta emmu tida nga yan nas pudnu ya tumaud e̍ Je̍sus.

²² Dikad pe̍ ipac nu ngarudin to sigud nga gangey nu, nga itu to tinungtungpal nu ito daan nga panagbibiyag nu itun. Ta dake̍c ngas met diyan nga gangey nu nga mangiyaw-awan dakayu gapu kadiya dake̍c nga ricricna niya beggi nu.

²³ Ket ita, pabaruwen nu kuma lugud ya panpanunut nun,

²⁴ se̍ sukatan nu kuma ngarudin to daan nga gangey nu ka kabarbaru nga parsuwa nga maipada iya gangey mettas ne̍ Apu Diyus, nga tutu nga nalinteg se̍ nadalus.

²⁵ Dikad pe̍ ipac nu ngarud ya panagbusbusidin. Ket ya tunggal isa dakayu, pudnu kuma ngasin ya ibaga nu kadiya kapada nu, ta kamkameng nactida nga amin ya is-isa nga bungguy.

²⁶ Ket no uwed unget nu, agteppel kayu ngarudin, tasun madi kuma agbanag ka basul ya unget nu. Madi kuma magidaman ya unget nu, no di lugud nalaka ngas nga agbaaw.

²⁷ Ta masapul nga madi kayu ngarud e̍cdan ya diyablu ka gundaway na nga mangsulisug dakayu.

²⁸ Ket no uwed dakayu ya isa nga mannanakew itun, pagpatinggaen nan ya panagtakew na. Ket agwangel kuma lugud nga sigagaget kadiya nabaru win, tasun uwed kuma maitulung na kadiya uwed kasapulan da.

²⁹ Masapul nga awan dake̍c nga ibalikas nu, no di yas diya balikas nga mangpabileg ka nakem niya toley ya ibalikas nu, sigun iya kasapulan niya katkatbar nu, tasun matulungan kuma diya aggigicna dakayu.

³⁰ Ket se̍ madi nu kuma ngarud paldaangan ya Ispiritu Santu. Igina mettas ya Ispiritu ne̍ Apu Diyus nga arig nga marka nga mangpatalged dakayu maipanggep iya timpu nad nga panangipawayawaya ne̍ Apu Diyus dakayu.

³¹ Bay-an nu pe̍ ya agiyungit no mapasakitan ya nakem nu, se̍ bay-an nu pe̍ ya gumura se̍ makaunget. Ket madi kayu makior-orot winno mamadpadake̍c, se̍ ipac nu kuma pe̍ diya amin nga dake̍c nga pangpanggep nu.

³² Ket ya wanglen nu kuma lugud, ket itu ya agkikinnaasi se̍ agpipinnateg kayu, nga agpipinnakawan kayu nga agten mettas ito panangpakawan ne̍ Apu Diyus dakayu gapu iya pannakaitipun nu e̍ Kristu.