E̍pe̍su 3 - Ya Baru nga Tulag

To gagara ne̍ Pablu kadito bekken nga Hudyu

¹ Itu ya gapu na nga iyaken nga Pablu, uwed dac idi nga nakaibaludac. Naibalud dac ngarud gapu mettas iya isusurut ku e̍ Kristu Je̍sus iya pannakaibon ku nga mangipakaemmu maipanggep igina dakayu nga bekken nga Hudyu.

² Ket nadamag nu kidin maipanggep iya nitalec ne̍ Apu Diyus iyaken, nga itu ya siaayat nga asi na para dakayu. Ket itu yan ya gagarac nga maipaay dakayu nga bekken nga Hudyu.

³ Ta gapu iya nangiparangarang ne̍ Apu Diyus, nipakaemmu na iyaken ya panggep na nga madi pekkem naipakaemmu itun. Ket itu ya banag nito e̍teng nga naisurat ku dakayun.

⁴ Ket no mabasa nun, maawatan nu ngarudin ya agten mettas nga pannakaemmuc maipanggep iya panggep ne̍ Kristu, nga bekken pekkem nga naipalawag itun.

⁵ Ket idi nga panggep na, bekken nga naipakaemmu kadiya toltoley kaditun nga timpu. Ngem ita, gapu iya Ispiritu ne̍ Apu Diyus, nipakaemmu ne̍ Apu Diyusin dakami nga apustule̍s se̍ mangaskasaba nga maipaay ngas igina.

⁶ Ket ya panggep na nga nipakaemmu nan, ket agten idi: Gapu iya Makaparagsac nga Damag, uwed dakayu nga bekken nga Hudyu ya gundawayin nga makipagtawid kadiya ipatawid ne̍ Apu Diyus kadiya Hudyu. Naibilang kayu pe̍ yin nga kamkameng niyan nga is-isa nga bungguy, se̍ nairaman kayu pe̍ yin iya pagbanagan nito nikari ne̍ Apu Diyus kadiya Hudyu. Kuwa nu ngarud pe̍ diyanin gapu iya pannakaitipun nu e̍ Kristu Je̍sus.

⁷ Ket no iyaken, gapu iya siaayat nga asi ne̍ Apu Diyus, nagbalin nac nga agsirsirbi nga mangikaskasaba idi nga Makaparagsac nga Damag. Ta itu to saad nga ne̍cde̍ ne̍ Apu Diyus iyaken sigun iya inariman na iyaken gapu iya pannakabalin na.

⁸ Ket orey iyaken ya kanumuwan kadiya amin nga toley ne̍ Apu Diyus, pinili nac latta nga mangipakaemmu dakayu nga bekken nga Hudyu kadiya nakaskasdaaw nga unay nga banbanag nga ipaay ne̍ Kristu dactida.

⁹ Ket iyaken pe̍ ya pinili na nga mangipalawag kadiya amin nga toley maipanggep iyan nga panggep ne̍ Apu Diyus nga madi pekkem naipakaemmu itun. Ta agingga ita nga timpu, e̍ Apu Diyus nga namarsuwa ka amin, igina ngas met ya makaemmu iyan nga panggep na.

¹⁰ Ket ita, gapu iya masingen iya bungguy mamati, ket diya uwed turay winno pannakabalin da ka langit, maemmuwan da ngarudin ya nakaskasdaaw nga kinasirib ne̍ Apu Diyus kadiya nadumaduma nga panggep na.

¹¹ Ket agten iyan ngarud ya inariman ne̍ Apu Diyusin, maikanatad iya sigud se̍ agnanayun nga panggep na, nga natungpalin gapu e̍ Kristu Je̍sus nga Apu tida.

¹² Ket itan, gapu iya pannakaitipun tida e̍ Kristu, agtalged tida nga umadenni nga siwayawaya e̍ Apu Diyusin gapu iya panamati tida e̍ Kristu.

¹³ Itu nga gabay ku ngarud no madi kayu kuma nga makumsa gapu idi nga pakarigatac para dakayu, ta itu ya pakasingnan iya dayaw nu gapu iyaken.

To kararag ne̍ Pablu para kadiya iE̍pe̍su

¹⁴ Dikad pe̍ no malagip ku nga amin diyan, sidadayaw wac nga agkarkararag e̍ Apu Diyus nga Ama tida.

¹⁵ Igina met ya Ama nga pagtaudan diya amin nga bungguy nga uwed ka langit se̍ idi nga lubung.

¹⁶ Tutu ngarud met nga dackel nga unay ya kinadayaw ne̍ Apu Diyus, ket itu nga adngec igina nga gapu iya pannakabalin niya Ispiritu na, mapabileg kuma diya nakem nu.

¹⁷ Ket se̍ adngec pe̍ nga e̍ Kristu kuma ya pe̍yeng nga mangiturturay kadiya nakem nu gapu iya panamati nu, tasun gapu iya panagiinnayat nu, agbalin nga nauneg se̍ nabaked kuma ya panagnamnama nu.

¹⁸ Ta no agten iyan, dakayu, se̍ amin diya duduma nga toley ne̍ Apu Diyus, ket uwed dakayun ya kabaellan nga makaawat maipanggep iya kinawaya se̍ kinadeddu, kinangudu se̍ kinauneg niya panagayat ne̍ Kristu.

¹⁹ Ngarud, gapu ta uwed dakayun yan nga kabaellan nga makaawat, maemmuwan nu kuma maipanggep idi nga ayat na, nga madi matukud toley. Ket iya agten iyan, agbalin kayu nga awan pagkurangan nan iya panangtulad nu iya gangey nga ipasingen ne̍ Apu Diyus, nga awan met pagkurangan na.

²⁰ Ngarud, malagip tida nga gapu iya dackel nga kabaellan ne̍ Apu Diyus nga ipaay na dactida, ket orey nagan na nga adngen tida igina, kabaellan na met nga tungpalen ka nasursuruc pekkem ka adu ngem iya maadeng tida. Ket dacdackel ngarud met pe̍ ya kabaellan na ngem iya orey nagan na nga maarapaap tida.

²¹ Dikad pe̍ madaydayaw kuma ngarud nge̍ Apu Diyus iya imatang diya amin nga toley, iya amin nga timpu ka agnanayun, gapu mettas dactida nga bungguy mamati se̍ gapu e̍ Kristu Je̍sus. Agten iyan kuma.