E̍pe̍su 1 - Ya Baru nga Tulag

¹ Iyaken nge̍ Pablu nga pinagbalin ne̍ Apu Diyus nga isa nga apustul nga agpaay e̍ Kristu Je̍sus. Isurat ku yani dakayu nga toley ne̍ Apu Diyus enna E̍pe̍su, dakayu nga pe̍yeng nga nabileg ya panamati na e̍ Kristu Je̍sus.

² Sapay kuma ta uwed dakayu ya siaayat nga asi, se̍ talna, nga gayat e̍ Apu Diyus nga Ama tida, se̍ e̍ Apu Je̍su Kristu.

Maipanggep iya pannakaitipun tida e̍ Kristu

³ Madaydayaw kuma ngarud nge̍ Apu Diyus, nga Diyus se̍ Ama niya Apu tida nga Je̍su Kristu, ta gapu iya pannakaitipun tida e̍ Kristu, nipaay ne̍ Apu Diyus dactida amin nga e̍cde̍ niya Ispiritu na nga tumaud ka langit.

⁴ Ta orey ito sacbay nga naparsuwa ya lubung ngi, pinili nactidan nge̍ Apu Diyus, nga agbalin nga toley na nga nadalusan ka basul se̍ awan pakababalawan tida iya imatang na, gapu mettas iya pannakaitipun tida e̍ Kristu.

⁵ Ngarud, gapu iya ayat ne̍ Apu Diyus dactida, nikeddeng na itun pekkem nga pagbalinen nactida nga anac nan gapu e̍ Je̍su Kristu. Ta itu ya sigud nga panggep ne̍ Apu Diyus sigun iya tarigagay na.

⁶ Agten iyan ya naariman, tasun daydayawen tida kuma ngarud nge̍ Apu Diyus gapu iya nakaskasdaaw nga siaayat nga asi na nga nipaay na dactida gapu iya pannakaitipun tida iya Dungdungnguwen na nga Anac.

⁷ Gapu iya pannakaitipun tida e̍ Kristu, nawayawayaan tidan iya pakaukuman tida, gapu ito pannakaidaga na. Ta itu ya pakapakawanan diya basbasul tida, sigun iya napalaus nga asi ne̍ Apu Diyus nga siaayat.

⁸ Ket idi nga siaayat nga asi na, nipaay na dactida nga sibubuslun. Ket sigun iya kinasirib se̍ pannakaawat ne̍ Apu Diyus,

⁹ inariman na ngarud to panggep na, se̍ nipakaemmu na pe̍ dactidan. Itu ya panggep na nga madi tida naawatan itun, nga nikeddeng na nga tungpalen, gapu e̍ Kristu sigun iya tarigagay na.

¹⁰ Ta ya panggep ne̍ Apu Diyus nga tungpalen na nad no madatngan ya kustu nga timpu, itu ya panangipasakup na kadiya amin nga parsuwa iya panangipangulu ne̍ Kristu, orey diya uwed ka langit se̍ diya uwed idi nga lubung.

¹¹ Ket e̍ Apu Diyus, matungpal na ngarud diya amin nga panggep na sigun iya pangngeddeng na. Itu nga no dactida, gapu iya pannakaitipun tida e̍ Kristu, pinili nactida nge̍ Apu Diyus, nga agtawid igina. Ta nikeddeng na nga agbalin tida nga toley na, sigun iya panggep na itun pekkem.

¹² Dikad pe̍ dactida nga non-ona nga uwed namnama na gapu e̍ Kristu, agpaay tida ngarud iya pakaidayawan ne̍ Apu Diyus, ta itu ya tarigagay na para dactida.

¹³ Ket iya agten iyan, namati kayu e̍ Kristu ito nagicna nu ya kasaba maipanggep iya kinapudnu, nga itu ya Makaparagsac nga Damag nga pakaisalakanan nu. Ket gapu iya pannakaitipun nu e̍ Kristu, arig nga minarkaan nakayu nge̍ Apu Diyus iya Ispiritu Santu. Itu ya Ispiritu nga nikari ne̍ Apu Diyus, ket itu ya pakaemmuwan iya panangtagikuwa na dakayu.

¹⁴ Ket ya Ispiritu Santu, igina ya mangpatalged iya tawiden tida e̍ Apu Diyus, nga patalgeddan na ngarud ya panangpawayawaya ne̍ Apu Diyus dactida nga toley na. Ket gapu iyan nga inariman ne̍ Apu Diyus, agpaay tidan iya pakaidayawan na maigapu iya kinadayag na.

To gabay ne̍ Pablu nga matungpal kuma kadito iE̍pe̍su

¹⁵ Tutu ngarud diyan, ket itu nga manipud ito nadamag ku ya panamati nu e̍ Apu Je̍sus se̍ ya panagayat nu kadiya amin nga toley ne̍ Apu Diyus,

¹⁶ siiiyaman nac nga pe̍yeng gapu dakayu, se̍ ipalpalagip nakayu pe̍ e̍ Apu Diyus kadiya karkararag ku.

¹⁷ Ngarud, gapu dakayu, agpacpakaasi yac e̍ Apu Diyus nga Diyus mettas niya Apu tida nga Je̍su Kristu se̍ ya madaydayaw nga Ama. Ipacpakaasic nga e̍cde̍ na kuma dakayu ya sirib se̍ pannakaawat nga gayat iya Ispiritu Santu, tasun makaawat kayu kuma maipanggep e̍ Apu Diyus.

¹⁸ Ngarud, ikarkararag ku nga ipakaawat kuma ne̍ Apu Diyus kadiya panpanunut nu, tasun maawatan nu kuma ya banag niya namnama nga uwed dakayu sigun ito panangpili na dakayu. Ket itu ya nipatawid ne̍ Apu Diyus kadiya toley na, ket idi nga tawid, nakaskasdaaw ya pammadayaw na.

¹⁹ Ket itu pe̍ ya nabileg nga pannakabalin na nga naipaay dactida nga mamati yin, ket awan met kapada nidi nga pannakabalin na. Ket nipaay ngarud ne̍ Apu Diyus yan nga nabileg nga pannakabalin na dactidan, nga agten mettas ito panangipaay na e̍ Kristu itun.

²⁰ Itu mettas ya pannakabalin ne̍ Apu Diyus nga inusar na ito pinagungar na nge̍ Kristu, se̍ ito pinagtugew na iya kadayawan nga saad, nga itu ya madiwanan ne̍ Apu Diyus enna langit.

²¹ Ngarud, pinagturay na nge̍ Kristu nga naturturay ngem kadiya amin nga duduma nga uwed turay winno pannakabalin da, se̍ diya uwed bileg winno karbengngan da. Ket se̍ nangatngatu met pe̍ ya turay ne̍ Kristu ngem iya turay niya orey nagan na nga sabali nga awagan toley ita winno iya umbe̍t nga timpu.

²² Ket nipaituray ne̍ Apu Diyus ya amin nga banbanag e̍ Kristu, tasun igina kuma ya apu diya aminin. Ket nisaad pe̍ ne̍ Apu Diyus nga pangulu nga makaemmu kadiya amin nga maipaay iya bungguy mamati nga kamkameng na.

²³ Ket didi nga kamkameng niya bungguy ne̍ Kristu, arig da nga beggi na nga awan kurang na, ta igina met ya pakakumplituwan niya amin-amin.