Aramid 9 - Ya Baru nga Tulag

To panamati ne̍ Saulu e̍ Je̍sus

¹ Ket e̍ Saulu itun, panpansingen na pekkem dito pasurut niya Apu, nga patayen na da kanu. Nawe̍ ito kangatuwan nga agsirsirbi iya Te̍mplu, ket nagadeng ka surat nga pammalubus igina.

² Ket itu ya itarey na kadiya gigimungan diya Hudyu ka ili nga Damasku, tasun no uwed masmac na nga kameng niya Dalan ne̍ Apu Je̍sus, nga lalaki man winno babey, mabalin na da nga tiliwen, se̍ na da ipen ka He̍rusale̍m.

³ Ket nawe̍ ngarud nge̍ Saulu ka Damasku win. Ket ito uwed ito dalan nga denni ka Damasku, pagamwan na ngas nga nadarangan ya edyan na ka darang nga gayat ka langit.

⁴ Ket e̍ Saulu, natuwang ngarud iya ginet tin. Ket uwed timec nga nagicna na nga kinunen na, “Saulu, Saulu, ape̍ parparigaten nac?” kunen na.

⁵ Ket e̍ Saulu, kinunen na, “Nagan mu, Apu?” kunen na. Ket to timec, kinunen na, “Iyaken nge̍ Je̍sus. Iyaken met ya parparigatem.

⁶ Ngem itan, gumnukat kan nga mawe̍ ka umuneg iya ili yin. Ket antuni ya pakaemmuwam no nagan ya masapul mu nga wanglen,” kunen na.

⁷ Ket diya kabulun ne̍ Saulu ito dalan, madi da met nakakim ito ansing dan, ta nagicna da ngarud pe̍ to timec, ngem awan met nasingen da nga toley nga nagkagi.

⁸ Ket ginumnukat ngarud nge̍ Saulu win, ngem orey nagmulagat, madi met latta makasingen. Itu nga gine̍pe̍d da nga nipen ka Damasku win.

⁹ Tellu nga algew na nga madi nakasingen, ket bayat didi nga tellu nga algew, madi pe̍ nangan se̍ iminum.

¹⁰ Ket enna Damasku, uwed isa nga pasurut niya Apu nga agnagan ka Ananyas. Ket uwed pe̍ kinagi niya Apu igina iya parparmata na nga kinunen na, “Ananyas!” Ket e̍ Ananyas, kinunen na met, “Nagan na Apu?” kunen na.

¹¹ Ket kinunen niya Apu igina, “Mawe̍ ka iya kalsada nga maawagan ka Nalinteg. Ket enna baley de̍ Hudas, damagem ya isa nga toley nga iTarsu nga agnagan ka Saulu, ta uwed antuni nga agkarkararag.

¹² Ket nipakaemmuc e̍ Saulu win iya parparmata na nga uwed umbe̍t nga isa nga toley nga agnagan ka Ananyas, ket itu ya mangipatey nad kadiya ima na igina, tasun makasingen manin,” kunen na.

¹³ Ngem kinunen ne̍ Ananyas, “Ay-ay! Adu ya nadamag kun Apu, maipanggep ito Saulu. Ta napalaus kanu ya dake̍c nga inariman na kadiya mamati nga toley mu ka He̍rusale̍m.

¹⁴ Ket ita kanun, dakami idi nin nga umapu ikew, tiliwen nakami kanu pe̍, ta uwed kanu igina ya pammalubus dito pangpangulu diya agsirsirbi iya Te̍mplu,” kunen na.

¹⁵ Ngem kinunen niya Apu igina, “Mawe̍ ka lugudin, ta igina ya pinilic nga mangipakaemmu nad maipanggep iya kinaturay ku kadiya bekken nga Hudyu se̍ kadiya ar-ari da se̍ dakayu pe̍ nga Israe̍lita.

¹⁶ Ket ipakaemmuc nad pe̍ igina diya napalaus nga rigrigat nga mapasamac nad igina gapu iya panagsirbi na iyaken,” kunen niya Apu e̍ Ananyas.

¹⁷ Itu nga nawe̍ ngarud nge̍ Ananyasin. Ket ito nimuneg ito baley ne̍ Hudas, nipatey na ngarud diya ima na e̍ Saulu, nga kunen na igina, “Kabsat nga Saulu, e̍ Apu Je̍sus met ya nagpasingen ikew ito kalsada ito agpapen ka idi. Ket igina met pe̍ ya nangibon iyaken idi. Nibon nac ngarud idi, tasun makasingen ka manin se̍ tasun maidalan ya panpanunut mun gapu iya Ispiritu Santu,” kunen na.

¹⁸ Ket sigida met nga uwed da arig nga sicsic nga niterkag nga gayat iya mata ne̍ Saulu win, ket nakasingen met nga tutu win. Ket bimangun ngarudin, ket nabautisaran.

¹⁹ Ket ito nakakanin, bimileg manin. Sumagpipiga nga algew pekkem nge̍ Saulu ka Damasku itun, nga nibulubulun kadito pasurut niya Apu antuni.

To panangaskasaba ne̍ Saulu ka Damasku

²⁰ Ket manipud itun, nawe̍ nangaskasaba kadiya gigimungan diya Hudyu iya maipanggep e̍ Je̍sus, nga nikaskasaba na ngarud nga Anac ne̍ Apu Diyus nge̍ Je̍sus.

²¹ Ket nasdaaw amin dito nakagicna e̍ Saulu, nga kinunen da, “Ape̍ kad nga agten idi ya kasaba na? Ta igina met yan to nangpukaw kadito umapu e̍ Je̍sus ka He̍rusale̍m itun. Ket igina pe̍ yan ya mangisicsikat kanu nga umbe̍t ennidi nga mangtiliw kadiya pasurut ne̍ Je̍sus, ta ipen na da kanu iya edyan dito pangpangulu dito agsirsirbi iya Te̍mplu,” kunen da.

²² Ngem orey agten iyan ya kinunkunen dito toltoley, bimilbileg latta to panangikaskasaba ne̍ Saulu, agingga ka madi makaskasungbat iginan dito Hudyu ka Damasku. Ta nilawlawag ne̍ Saulu nga nalaing nga e̍ Je̍sus, ket igina nga tutu ya Kristu nga nibon ne̍ Apu Diyus.

²³ Ito nabayag nga agten iyanin, nagiinnumanan dito Hudyu antuni no kumaan na ya panamatey da e̍ Saulu.

²⁴ Ngem naipakaemmu e̍ Saulu win to sikat da. Ket dito Hudyu nga mayat nga pumatey igina, algew-gabi nga sansanben da nga pe̍yeng kadito ruwangan niya ili, ta rantaen da nga patayen no rumwar.

²⁵ Ngem iya name̍nsan nga gabi, dito pasurut ne̍ Saulu, nipay da ka sinan-kuribut, se̍ da binaluyubuy nga nipadsag ito segged nga laskig niya nangudu nga bakud nito ili.

To kauwed ne̍ Saulu ka He̍rusale̍m

²⁶ Ket e̍ Saulu, nawe̍ ka He̍rusale̍min. Ngem ito nawe̍ makitipun kuma kadito pasurut niya Apu antuni, nansing da igina, ta madi da mamati nga pudnu nga napasurutin.

²⁷ Ngem e̍ Be̍rnabe̍, binulun na nge̍ Saulu, se̍ na niyem-emmu kadito apustule̍s antuni. Ket nisalaysay na igida to pannakasingen ne̍ Saulu iya Apu ito kalsada ito nakitbar ya Apu igina. Kinagi na pe̍ to kinatured ne̍ Saulu nga nangikaskasaba iya kinaturay ne̍ Je̍sus ka Damasku.

²⁸ Itu nga nibulubulunin nge̍ Saulu kadito pasurut ka He̍rusale̍m. Ket nagpaspasyar pe̍ nge̍ Saulu nga nangikaskasaba nga situtured iya kinaturay niya Apu.

²⁹ Nakitbar se̍ nakidiskutir kadiya agkagkagi ka kagi Griye̍gu nga Hudyu. Ngem didi nga Hudyu, panggeppen da nga patayen nge̍ Saulu.

³⁰ Ket ito naemmuwan dito kakabsat ne̍ Saulu ka pammati yani nga panggep da, nawe̍ da nitulud ka Se̍sarya, se̍ da nipapen ka ili nga Tarsu win.

³¹ Ket iyan nga timpu win, awan to pannakaparparigat iya bungguy diya mamati kadiya prubinsiya nga Hudya, Galilya se̍ Samarya ngin. Ket bimileg ya panamati da se̍ imadu ya bilang dan, ta nipatpateg dan ya Apu iya panagbiyag da, se̍ tinulungan pe̍ niya Ispiritu Santu da.

To pannakapalaing nito E̍nyas enna Lida

³² Ket e̍ Pe̍dru, adu dito il-ili nga napasyar na. Ket iya isa nga algew, nanagus se̍ dimateng ka ili nga Lida, nga sacwaran na diya mamati nga toley ne̍ Apu Diyus antuni.

³³ Ket uwed isa nga lugpi antuni nga agnagan ka E̍nyas. Walu nga dagun na nga madi makabangunin.

³⁴ Ket e̍ Pe̍dru, kinunen na igina, “E̍nyas, agasan naka nge̍ Je̍su Kristu win. Gumnukat kan, se̍ lukutem ya abec mun,” kunen na. Ket tutu ta dagus nga ginumnukat to E̍nyasin.

³⁵ Ket dito toltoley nga taga-Lida se̍ taga-Saruna, nasingen da nga amin to E̍nyas nga nalainganin, ket imapu da iya Apu win.

To pannakapagungar nito Tabita

³⁶ Ket enna ili nga Huppa itun, uwed isa nga babey nga pasurut ne̍ Je̍sus, nga agnagan ka Tabita. (Durkas ya nagan na ka kagi Griye̍gu, nga kayat na nga kagiyen, ugsa.) Ket pe̍yeng nga agwangwangel to Tabita kadiya napaw-is, nga situtulung se̍ sikakaasi kadiya makasapul.

³⁷ Ket ito kauwed ne̍ Pe̍dru ka Lida, nagsakit nge̍ Tabita, ket natey. Dinigus da to bangkay na, se̍ da nisadag iya min-ngudu nga kuwartu.

³⁸ Ket gapu ta denni ya ili nga Lida iya Huppa, nadamag diya pasurut niya Apu ka Huppa nga uwed nge̍ Pe̍dru ka Lida ngin. Itu nga nangibon da ka duwa nga lalaki nga nawe̍ nangayab e̍ Pe̍dru. Ket kinunen dito duwa nga naibon, “Pangngaasim ta gawaam kay ya umbe̍t,” kunen da.

³⁹ Itu nga nibulun nge̍ Pe̍dru igida nga nawe̍ ka Huppa ngin. Ket ito dimateng dan, nilnec da ito min-ngudu nga kuwartu. Ket diya balu nga babey iyan, imadenni da e̍ Pe̍dru win, ket nagbeberrit da nga nagipasingen kadito badbadu se̍ duduma nga lupluput nga dage̍t nito Durkas ito sibibiyag pekkem.

⁴⁰ Ket e̍ Pe̍dru, pinaruwar na da ito kuwartu, se̍ nagparintumeng nga nagkararagin. Kalpasan na, sinangu na to bangkay, nga kinunen na, “Tabita, bumangun kan,” kunen na. Ket nagmata met nga tutu win. Ket ito nasingen na nge̍ Pe̍dru, bimangun mettin.

⁴¹ Inicman ne̍ Pe̍dru to ima na, ket pinasikad na. Kalpasan na, pinalbe̍t na dito mamati nga toley ne̍ Apu Diyus, pati dito balu, ket nipasangu na nge̍ Durkas igida nga sibibiyagin.

⁴² Ket nagdinamag yani kadiya amin nga umili ka Huppa. Ket adu ngarud diya namati iya Apu win.

⁴³ Ket e̍ Pe̍dru, nabaybayagan ka Huppa, nga naged-edyan iya baley ne̍ Simon, ya isa nga agdaldalus ka lalat nga para laku.