Aramid 8 - Ya Baru nga Tulag

¹ Ket imannamung nge̍ Saulu nga siaanggem ito pannakapatey ne̍ E̍ste̍ban. Ket iyan mettas nga algew, itu ya panangrugi niya napalaus nga pannakairurumen ito bungguy diya mamati enna He̍rusale̍m gapu kadito bekken nga mamati. Itu nga naiwarawara diya mamati kadiya nadumaduma nga lugar kadiya prubinsiya nga Hudya se̍ Samarya. Ngem dito apustule̍s, nagbati da nga nagedyan pekkem ka He̍rusale̍m itun.

To pannakairurumen diya mamati

² Ket uwed antuni diya nagipasnec ka pammati da. Itu diya nangitamen ito E̍ste̍ban. Ket napalaus ya panagsangsangit da igina.

³ Ket to Saulu, pinarparigat na met dito mamati e̍ Je̍sus, ta gabay na nga pirdiyen ya bungguy da. Adu dito linnec na nga babaley, nga nawe̍ nagiyulug ka lalaki kada babey, se̍ na da nipabalud.

To Simon nga salamangke̍ru

⁴ Ket dito mamati nga naiwarawara, nikaskasaba da ya Makaparagsac nga Damag maipanggep iya kagi ne̍ Apu Diyus kadiya amin nga il-ili nga napennan da.

⁵ Ket e̍ Pe̍lipe̍ itun, nanagus nga nawe̍ iya isa nga ili ka Samarya. Nangikaskasaba kadiya umili antuni maipanggep iya Kristu nga nibon ne̍ Apu Diyus.

⁶ Ket diya toltoley ennan, nagkaykaysa da nga nangipangag ito nikasaba ne̍ Pe̍lipe̍ ito nagicna da to kinagi na se̍ nasingen da diya pagilasinan nga inariman na.

⁷ Ta napatalew diya sacsairu kadiya adu nga toley nga naluganan, ket nagkerkerre̍s met dito adu nga sacsairu nga rinumwar kadito linuganan da. Se̍ adu pe̍ dito napalaing nga piley se̍ lugpi.

⁸ Dikad pe̍ nagang-anggem nga unay dito toley iyan nga ili.

⁹ Ket uwed isa nga lalaki antuni nga salamangke̍ru nga nasnasdaawan dito iSamarya itun, nga agnagan ka Simon. Kunen met nito Simon nga igina kanu ya isa nga nadayaw nga toley.

¹⁰ Ket nipangpangag ngarud diya orey nagan na nga toley, orey nanumu man winno mabigbig. Ket kinunen dito toltoley, “Igina mettin ya pudnu nga pakasingnan iya pannakabalin ne̍ Apu Diyus, ket maawagan met ka ‘Mannakabalin’,” kunen da.

¹¹ Nipangpangag da ngarud, ta nabayagin nga nagsalsalamangka ka nagsedseddaawan da.

¹² Ngem ito mamati dan ito nikaskasaba ne̍ Pe̍lipe̍ nga Makaparagsac nga Damag maipanggep iya panangituray ne̍ Apu Diyus se̍ maipanggep iya kinaturay ne̍ Je̍su Kristu, diya babey se̍ diya lalaki, ket nagpabautisar dan.

¹³ Ket orey pe̍ to Simon, namati pe̍, ket nagpabautisar pe̍ yin. Kalpasan na, nibulubulun e̍ Pe̍lipe̍. Ket nasdaaw kadito nasingen na nga inariman ne̍ Pe̍lipe̍, ta uwed pagilasinan se̍ nakaskasdaaw nga inariman na.

¹⁴ Ket ito nadamag dito apustule̍s ka He̍rusale̍m nga mamati dito iSamarya iya kagi ne̍ Apu Diyusin, nibon da de̍ Pe̍dru nge̍ Juan nga mawe̍ ka Samarya.

¹⁵ Ket ito dimateng da antuni, nikararagan da dito mamati, tasun mae̍cdan da pe̍ iya Ispiritu Santu.

¹⁶ Ta orey nabautisaran da ito namati da iya kinaturay ne̍ Apu Je̍sus, ket madi pekkem inumbe̍t igida ya Ispiritu Santu itun.

¹⁷ Ket dito duwa nga apustule̍s, nipatey da diya ima da igida. Ket dito iSamarya nga namati yin, naipaayan da ngarud iya Ispiritu Santu win.

¹⁸ Ket to Simon nga salamangke̍ru itun, ito nasingen na nga naipaayan da iya Ispiritu Santu ito nipatey dito apustule̍s diya im-ima da igidan, nangidawawa met ka kuwarta kadito apustule̍s, tasun ngumina kuma kanu iyan nga pannakabalin da, nga kinunen na,

¹⁹ “E̍cdan dac man met iyan nga pannakabalin, tasun orey nagan na nga pangipatayac met iya imac, ket maipaayan pe̍ kuma iya Ispiritu Santu,” kunen na.

²⁰ Ngem kinunen ne̍ Pe̍dru igina, “Maimpiye̍rnu ka kuma ngarud agraman ya kuwartam! Ta pagarup mu no mabalin mu nga nginaan ya sagut ne̍ Apu Diyus.

²¹ Awan bibiyang mu winno bagim idi nga wangwanglen mi, ta emmu ne̍ Apu Diyus nga bekken nga nabaru ya lemlemmet mu.

²² Babawiyem lugud yan nga kinadake̍c mu, se̍ ikararag mu e̍ Apu Diyus nga no mabalin, pakawanen naka kuma iya dake̍c nga lemlemmet mu.

²³ Ta malasin ku nga napalaus ya apal mu, se̍ emmuc nga paiturayan ka ka kinamanagbasul,” kunen ne̍ Pe̍dru ito Simon.

²⁴ Ket kinunen ngarud nito Simon kade̍ Pe̍dru, “Ikararagan dac kay ngarud iya Apu nga awan kuma mapasamac iyaken kadito kinagim,” kunen na.

²⁵ Ket ito nalpasin de̍ Pe̍dru nge̍ Juan nga nangipadamag se̍ nangikaskasaba antuni iya kagi niya Apu, simoli da ka He̍rusale̍m. Ket nangikaskasaba da pe̍ iya Makaparagsac nga Damag kadito adu nga nadaldalanan da nga purpuruc ka Samarya.

To panagbautisar nito upisyal nga taga-Itiyupya

²⁶ Ngem to Pe̍lipe̍, uwed isa nga anghe̍l niya Apu nga nangbilin igina nga kinunen na, “Kan! Ta mawe̍ ka iya abagatan, nga dalanem to kalsada nga lumasat iya away. Itu to kalsada nga gayat ka He̍rusale̍m nga agpaili ka Gasa,” kunen na.

²⁷ Ket nawe̍ ngarud nge̍ Pe̍lipe̍ yin. Ket uwed met isa nga lalaki nga yunuku antuni, nga isa nga upisyal nga taga-Itiyupya. Kagaygayat ka He̍rusale̍m, ta itu ya nagdaydayawan na e̍ Apu Diyus. Igina met ya te̍sure̍ru ne̍ Re̍yna Kandase̍, nga babey nga pangulu da ka Itiyupya.

²⁸ Ket to upisyal, madama nga agawirin, ket agtugtugew iya kale̍sa na nga agbasbasa ito nisurat nito mammadtu nga Isayas nga uwed iya Bibliya.

²⁹ Ket kinunen niya Ispiritu Santu e̍ Pe̍lipe̍, “Adenniyam ya kale̍sa na, ta mibulun ka igina,” kunen na.

³⁰ Dikad pe̍ nanagtag nge̍ Pe̍lipe̍ nga imadenni igina, ket nagicna na nga agbasbasa ito libru nga nisurat nito Isayas nga mammadtu itun. Ket kinunen ne̍ Pe̍lipe̍, “Maawatam ya banag niyan nga basbasaem?” kunen na.

³¹ Ket simungbat to upisyal, “Madic ngarud maawatan, ta awan met mangisuru iyaken,” kunen na. Ket pinasakey na ngarud nge̍ Pe̍lipe̍, ket nagabay dan.

³² Ket itu didi to naisurat nga binasbasa nito upisyal: “Igina ya maiyarig iya karne̍ru nga iturung da iya pakapartiyan na. Se̍ maiyarig pe̍ iya urbun karne̍ru nga di agun-uni no pukisen da ya dutdut na, ta pulus nga di nagpagpagas.

³³ Pinabasul da, nga ipasegged da ya dayaw na, orey awan basul na. Awan makaistorya maipanggep kadiya kapututan na, ta nagpatingga to panagbiyag na iya lubung ngi nin.” Itu yan to binasbasa nito upisyal nga nisurat nito Isayas.

³⁴ Ket kinunen nito upisyal e̍ Pe̍lipe̍, “Ibagam kay no nagan na ya isuru kuma nito mammadtu iyan, no igina mettas nga mismu, winno sabali,” kunen na.

³⁵ Ket e̍ Pe̍lipe̍, nirugi na ya panangilawlawag na iyan mettas nga binasbasa nito upisyal iya Bibliya, ket nibaga na igina ya Makaparagsac nga Damag maipanggep e̍ Je̍sus.

³⁶ Ket ito agluglugan da pekkem, uwed danum nga mataliban da. Ket kinunen nito upisyal, “Kad ya danum! Di ngarud nabaru no agpabautisar rac kun?” kunen na.

³⁷ [Ket kinunen ne̍ Pe̍lipe̍, “Mabalin a, no ipasnec mu was lugud ya mamati e̍ Je̍sus,” kunen na. Ket kinunen nito upisyal, “Bo, a. Pudnu nga mamati yac kun. Patiyec nga e̍ Je̍su Kristu, igina ya Anac ne̍ Apu Diyus,” kunen na.]

³⁸ Pinasardeng nito upisyal to kale̍sa na, se̍ da nawe̍ nga duwa ito danum. Ket binautisaran ngarud ne̍ Pe̍lipe̍ yin.

³⁹ Ket ito gimacdang dan, kellat met nga nipanaw niya Ispiritu niya Apu nge̍ Pe̍lipe̍ yin, ket madi nasingen nito upisyalin. Ket to upisyal, nituluy na to panagawir na nga siraragsac kin.

⁴⁰ Ket e̍ Pe̍lipe̍, uwed nga gennung ka ili nga Asotu win. Ket nikaskasaba na ya Makaparagsac nga Damag kadito amin nga il-ili nga dinalan na patingga ito nakadateng ka Se̍sarya.