Aramid 28 - Ya Baru nga Tulag

To kauwed de̍ Pablu ka Malta

¹ Ket ito nakagacdang kamin, naemmuwan mi nga Malta kanu to puru nga simangladan mi.

² Ket diya umili antuni, naasiyan da dakami nga unay. Nakigayyem da dakami nga amin. Niyapuyan dakami ka naginuduwan mi, ta agud-udan, ket nalmin met.

³ Ket e̍ Pablu, nawe̍ nagakup ka ruting, se̍ na nidungsu ito apuy. Ngem gapu ito pudut nito apuy, uwed met rinumwar nga malaga nga nagita. Kinagat na met ya ima ne̍ Pablu, se̍ madi na met ibsananin.

⁴ Ket ito nasingen dito umili to nagita nga malaga nga gabe̍be̍sin pekkem ito ima ne̍ Pablu, kinunen da iya tunggal isa igida, “Isa nga pumapatey kid yan nga toley, ta orey madi nalibet ito baybay, matey mettin iya tumutup nga dusa na,” kunen da.

⁵ Ngem e̍ Pablu, madi nasakitan ito kagat nito malaga. Niwarsi na ngas ito apuy.

⁶ Ket dito umili, it-itonan da ya lumteg nito ima na se̍ ya kellat nga pannakatey na. Nabayag da met nga nit-itonan, ngem awan nas met nadlaw da nga pagbaliwan nan. Itu nga binabawi da to nipagarup da maipanggep e̍ Pablu, ket kunen da lugudin nga isa nga diyus kanu nge̍ Pablu.

⁷ Ket to edyan mi itun, denni pe̍ iya ginet ne̍ Publiyu, nga pangulu niyan nga puru nga Malta. Pinalnec nakami ito baley na, ket tellu nga algew nga siririspitar nga nangsangaili dakami antuni.

⁸ Ket to ama ne̍ Publiyu itun, agid-ida nga agsakit, ta agdagdagang se̍ agsicsika. Dikad pe̍ linumnec nge̍ Pablu ito edyan na. Nagkararag nge̍ Pablu, se̍ nipatey na diya ima na igina, ket pinalaing na mettin.

⁹ Ket kalpasan nitun nga naariman, inumbe̍t nga amin dito duduma nga agsasakit iyan nga puru, ket napalaing da pe̍ yin.

¹⁰ Ket adu lugudin to ne̍cde̍ da dakamin nga panangipasingen da ka panagdayaw da dakami. Ket ito pumanaw kami nga agbapurin, ne̍cdan dakami pe̍ kadiya orey nagan na nga masapsapul mi.

To idadateng de̍ Pablu ka Ruma

¹¹ Ket kalpasan tellu nga bulan mi enna Malta ngin, pimanaw kamin. Naglugan kami ka bapur nga gayat ka Ale̍handriya, ta yan nga puru pe̍ ya nagsardengngan na ito nagamyan. Itun nga bapur, napanaganan ka “Singin nga Diyus.”

¹² Ket ito nagsardeng kami ka ili nga Sirakusa, nagedyan kami antuni ka unus tellu nga algew.

¹³ Ket ito naggunay kami manin, nagre̍kure̍kus kami ka e̍teng tasun makadateng kami ka ili nga Re̍hiyu. Ket ito kadamlag na, uwed belluut nga gayat iya abagatan. Dikad pe̍ ito kalpasan duwa nga algew win, nakadateng kami ka ili nga Putyuli.

¹⁴ Uwed da naaskuran mi antuni nga kakabsat mi ka pammati, ket pinagedyan dakami antuni ka makaduminggu. Ket agten iyan ngarud to ipeppen mi ka Ruma.

¹⁵ Ket diya kakabsat mi ka pammati ka Ruma, ito nadamag da nga uwed kami iya dalan nga agpa-Ruma ngin, inumbe̍t dakami sinabet ito deyyu kami pekkem. Ta ito ili nga maawagan ka Tindaan ka Apiyu ya nangsabtan dito duduma dakami. Se̍ dito duduma, ito ili nga maawagan ka Tellu nga Pagdagusan ya nangsabtan da dakami. Ket ito nasingen ne̍ Pablu da, nagyaman ngarud e̍ Apu Diyus, se̍ bimileg ya ricna nan.

¹⁶ Ket ito nakadateng kami iya siyudad nga Ruma, napalubusan nge̍ Pablu nga agedyan ka bukud na nga pagedyanan. Ngem uwed suldadu nga agbanbantay igina.

To panagtetebbar de̍ Pablu se̍ diya Hudyu ka Ruma

¹⁷ Ket ito kalpasan tellu nga algew, pinalbe̍t ne̍ Pablu diya pangpangulu diya Hudyu ka Ruma. Ket ito uwed dan, kinunen na igida, “Wawagi, orey awan nagbasulac kadiya pada tida nga Hudyu, winno maikuntra kadiya ug-ugali nga pinataud kadito am-ama tida, tinkem dac ngas met ka He̍rusale̍m nga nibalud, se̍ dac niyawat kadiya iRuma.

¹⁸ Ket ito sinumarya dac dito iRuma, gabay dac nga paruwaren nin, gapu ta awan emmu da nga gapu nga pamatayan da iyaken.

¹⁹ “Ngem dito pada tida nga Hudyu, madi da met nipalubus. Itu nga masapul ku nga ipakusgar e̍ Ari Se̍sar ya kasuc. Ipakusgar ku ngarud, ngem gapu ngas iya panagidarum da iyaken a, bekken nga gapu ta uwed ipabasul ku igida nga kailiyac.

²⁰ Ket iyan ya gapu nga nangpalbe̍tac dakayu, tasun makapagtetebbar tida. Ta gabay ku ngas nga ipakaemmu ya kustu nga gapu niya pannakaibalud ku. Ta ya kinapudnu na, awan sabali nga gapu na, no di ngas ya panamatic iyan mettas nga padpadaanan tida nga sinanama, dactida nga Israe̍lita,” kunen ne̍ Pablu.

²¹ Ket dito Hudyu, kinunen da igina, “Awan met naawat mi nga surat nga gayat ka prubinsiya nga Hudya maipanggep ikew. Ket dito inumbe̍t nga kailiyam, awan nangipadamag maipanggep ikew se̍ awan nibaga da nga winangel mu nga dake̍c.

²² Ngem emmu mi nga makackaunget diya toltoley iya amin nga il-ili gapu idi nga pammati nu. Itu nga gabay mi nga denggen ya ibagam maipanggep iya panamatim,” kunen da.

²³ Ket nipatulag da ngarud ya algew nga panaguurnung da ito pagedyanan ne̍ Pablu. Ket ito inumbe̍t dan, ad-adu da ngem ito damu. Ket nanipud iya agsapa agingga ka gabi, nangilawlawag nge̍ Pablu igida ka maipanggep iya pammati na. Nipakaemmu na ngarud diya pudnu nga banbanag maipanggep iya panangituray ne̍ Apu Diyus. Ket nibanag na pe̍ dito naisurat ito Linteg nito Muyse̍s se̍ dito nisurat dito mammadtu itun, tasun mapanecnekkan da kuma maipanggep e̍ Je̍sus.

²⁴ Ket uwed da met nakapanecnec ito kinagi ne̍ Pablu. Ngem diya duduma, madi da namati.

²⁵ Ket iya agten iyan, madi nagtutunus dito Hudyu nga aggigicna. Itu nga pumanaw da kuma, ngem uwed pekkem to nodi nga pamagbaga ne̍ Pablu igida, nga kinunen na, “Pudnu met to nipaisurat niya Ispiritu Santu ito mammadtu nga Isayas itun, nga kinunen na kadito am-ama tida,

²⁶ ‘Kunen ne̍ Apu Diyus iyaken, nga mawe̍ yac kanu kagiyen yani kadiyan nga toley: “Pe̍yeng kayu nad nga aggigicna, ngem pulus nga madi kayu met makaawat. Pe̍yeng kayu nad nga makas-asingen, ngem pulus nga madi kayu met makalasin.

²⁷ Ta kimapsut mettin ya panpanunut didi nga toley, se̍ narigat ya pannakagicna dan, se̍ nagkuringet dan. Ta no bekken nga agten iyan, kaynun no malasin da ya masingen da, se̍ natarus igida ya magicna da, se̍ maawatan da ya panunuten da, ket kaynun no sumoli da iyaken, tasun agasac da,”’ kunen nito Isayas itun.

²⁸ “Itu nga gabay ku pe̍ nga ipakaemmu dakayu nga naipadamag pe̍ yin kadiya bekken nga Hudyu ya panangisalakan ne̍ Apu Diyus. Ket no igida, ipangag da met,” kunen ne̍ Pablu.

²⁹ [Ket ito nakagi na diyanin, pimanaw dito Hudyu win nga nagsusungbat da nga tutu win.]

To panagedyan ne̍ Pablu ka Ruma

³⁰ Ket duwa nga dagun ne̍ Pablu nga nagedyan ito inupaan na nga baley ka Ruma. Ket rinispitar na nga amin diya toley nga inumbe̍t iya edyan na.

³¹ Nilawlawag na igida ya panangituray ne̍ Apu Diyus, se̍ nisuru na pe̍ igida ya maipanggep e̍ Apu Je̍su Kristu. Ket madi imik-ikeb kadiya kinagkagi na, ta napalubusan nga nagisuru.