Aramid 27 - Ya Baru nga Tulag

To panagbapur de̍ Pablu nga agpa-Ruma

¹ Ket ito nibaga da nga algew win niya panangipapen da dakami nge̍ Pablu ka Italya ngin, ket pinapen da ngarud nge̍ Pablu, se̍ dito duduma nga baludin. Pinabantayan da da e̍ Hulyu, nga isa nga kapitan diya suldadu ito batalyun ne̍ Ari Se̍sar.

² Dikad pe̍ nagsakey kami iya isa nga bapur nga gayat ka ili nga Adrume̍tu, ta agbulabulayin nga mawe̍ kadiya il-ili iya pingit baybay ka prubinsiya nga Asiya. Ket iya agten iyan, naggunay kamin. Nibulun dakami pe̍ nge̍ Aristarku, nga isa nga iTe̍salunika, iya sakup niya Mase̍dunya.

³ Ket ito kadamlag na, nakadateng kami ka ili nga Sidun. Ket gapu ta naasiyan nge̍ Kapitan Hulyu e̍ Pablu, pinalubusan na nga nawe̍ simacwar kadiya gagayyem na ka Sidun, tasun igida ya agistimar igina.

⁴ Ket ito naggunay kami manin nga manipud ka Sidun, nanalan ya bapur mi enna dumna ka puru nga Sipre̍ nga masale̍pengngan, ta sabten nakami ngamin ya belluut.

⁵ Ket ito naliwanan mi ya batug diya prubinsiya nga Silisiya se̍ Pampilya, nakadateng kami ka ili nga Mira enna prubinsiya nga Lisiya.

⁶ Ket itu ya nakasmakan ne̍ Kapitan Hulyu ka bapur nga gayat ka ili nga Ale̍handriya, nga agpapen ka Italya ngin. Dikad pe̍ itu to nangisakayan na dakamin.

⁷ Ket gapu ta sabten nakami to belluut, nainayad to pananalan nito bapur mi. Itu nga nabayag se̍ kami nakadateng ka batug niya ili nga Nidu, kalpasan niya piga nga algew, ta naparigatan kami, ta sabten nakami met to belluut. Dikad pe̍ madi kami met makaalisin. Itu nga nangliclic kamin, ta nanalan kami iya dumna iya masale̍pengngan nga puru nga Kre̍ta, nga lumiwan iya panapanag nga maawagan ka Salmun.

⁸ Nanalan ya bapur mi iya denni iya pingit nito puru nga Kre̍ta, ngem narigatan kami pe̍. Se̍ kami nakadateng iya isa nga ili nga maawagan ka Natalna nga Pagsardengngan, nga denni ka ili nga Lasya.

⁹ Ngem gapu ta nabayag ya bapur mi ito dalanin, dake̍c ya timpu nga agbapurin, ta timpu amyanin. Ta nalpasin to Algew Ngilin diya Hudyu itun nga maawagan ka Algew Nakaikaruwan, itu nga nakan-ansing nga agsakey kami ka bapur itun. Dikad pe̍ madi kuma ipalubus ne̍ Pablu nga mawe̍ kamin, ta kinunen na,

¹⁰ “Kabulun, nabatad iyaken nga no ituluy tida ngas ya mawe̍, marigatan tida ngarud, se̍ adu ya mapirdi kadiya kagkagtu tida, se̍ orey iya bapur nga idi, se̍ uwed pe̍ matey,” kunen na.

¹¹ Ngem e̍ Kapitan Hulyu, madi na pinati to kinagi ne̍ Pablu, ta yan nas kunen nito agmanmane̍hu se̍ to makin-kuwa ito bapur to nipangag na.

¹² Ket ya kaaduwan pe̍, gabay da no agrubwat kami kanun, ta dake̍c kanu to nagsardengngan mi nga paged-edyanan iya panagaamyan. Se̍ bareng kanu pe̍ no makadateng kami ka ili nga Pe̍nic, nga isa nga pagsasardengngan bapur iyan mettas nga puru nga Kre̍ta. Ta itu kuma kanu ya pagedyanan mi bayat niya panagamyan, ta ya pagsasardengngan bapur antuni kanu, bekken nga misolong iya amyanan.

To pannakaamyan de̍ Pablu iya baybay

¹³ Ket ito nagsal-oy ka e̍teng nga gayat iya abagatan, inalun-un da to battun nito bapur, se̍ naggunay kamin, ta pagarupen da no makadateng kami ka Pe̍nic kin. Sinurut da ngarud to denni iya pingit nito puru nga Kre̍ta.

¹⁴ Ngem iya di nabayag, nagbelluut met manin ka nabileg nga gayat iya gacdang, ta nagamyanin, ket arig met nga pasulugin.

¹⁵ Dinalapus nakami pe̍ yin, dikad pe̍ to belluut ngas to nangipatpaturung dakamin, ta madi kami met mabalinan nga sabten nin.

¹⁶ Ket naiturung kami iya abagatan niya isa nga tekkut nga puru nga maawagan ka Kauda, ket naglidum kami ka e̍teng ngin. Itu nga nisagpat mi to tekkut nga bangka nga goygoyoden nito bapur, ngem narigat pe̍.

¹⁷ Ket ito naisagpatin to bangka, ginalugalutan da nga pabakedden to beggi nito bapur. Ket nadanagan da pe̍, ta kaynun no maisayad to bapur no maipapen ito bebbew nga danum ito lapulapuc nga maawagan ka Sirte̍. Dikad pe̍ linukut da to layag nito bapur, tasun maiyukus kami ngas iya belluutin.

¹⁸ Ket ito kadamlag na, agbelbelluut pekkem ka nabileg. Itu nga nagitemsit da kadiya ag-agtu nito bapur.

¹⁹ Ket ito maikatlu nga algew, nitemsit da pe̍ yin dito alikamen nito bapur, nga mabalin da nga bagkaten nin.

²⁰ Ket gapu ta adu nga algew win nga awan mas-asingen mi nga sinag se̍ bitbituwen, se̍ gapu ta nabileg nga pe̍yeng to belluut, awan nas namnama mi nga maisalakan kamin.

²¹ Ket ito nabayag nga awan kinkinan dito kabulun mi ito bapurin, nagsikad nge̍ Pablu iya sangu da nga kinunen na, “Kabulun, no nipangag dac kuma ito kinagic itun, nga madi tida pekkem kuma agrubwat ka Kre̍ta, awan kuma napirdi se̍ awan kuma agten idi nga rigrigat tida.

²² Ngem orey agrigrigat tida itan, madi kayu madanaganin, ta awan pulus matey dactida. Ngem isu na ngas, a, nga mapirdi ya bapur ri.

²³ Emmuc nga mapasamac ya agten iyan ta uwed anghe̍l ne̍ Apu Diyus nga inumbe̍t nangibaga iyaken ito gabi. Ket no iyaken, e̍ Apu Diyus met ya daydayawec, se̍ igina ya makin-kuwa iyaken.

²⁴ Ket kinunen ngarud nito anghe̍l na iyaken nga, ‘Madi ka mansing, Pablu, ta ya kasapulan ket ya ipeppen mu iya sangu ne̍ Ari Se̍sar. Se̍ ipaay pe̍ ne̍ Apu Diyus nga siaasi ya ikarkararag mu igina, nga awan kuma matey kadiya kabulun mu iya bapur,’ kunen nito anghe̍l iyaken.

²⁵ Itu nga bumileg kuma ya namnama nun, kabulun. Ta no iyaken, mamati yac ngarud e̍ Apu Diyus nga matungpal ya amin nga nibaga na iyaken.

²⁶ Ngem orey maisalakan tida, mailumlum mas ya bapur tida iya bebbew niya isa nga puru,” kunen ne̍ Pablu.

²⁷ Ket sangapulu ket eppat nga gabi mi ito baybay ka Adriyatiku win, nga awan nga di kami pakaipalpalatanin. Ket ito tumengnga ya gabi, nalasin dito mangmangged ito bapur nga umadenni kami ka gacdangin.

²⁸ Itu nga rinukud da to kasalem nito danum, ket duwa nga pulu wadpa pekkem kanu ya kasalem na. Ket iya di nabayag, rinukud da manin, ket sangapulu ket lima ngadpa to kasalem nan.

²⁹ Ket itu lugud to pakadanagan dan, ta kaynun no maidungpar kami ka batubatu win. Dikad pe̍ nangiteb-ung da ka eppat nga battun ito dumna iya ipus nito bapur, se̍ da nikarkararag nga dagus kuma nga umagsapa ngin.

³⁰ Ngem dito mangmangged nga agwangwangel ito bapur, gabay da ya aglibas kuma nga pumanaw ito bapurin. Itu nga nagpambar da nga mawe̍ mangiteb-ung ka battun ito sungu nito bapur, ngem pambar da ngas nga mangidsag ito bangka iya baybay.

³¹ Ngem ito naemmuwan ne̍ Pablu to wanglen da, kinunen na e̍ Kapitan Hulyu se̍ dito suldadu na, “No panawan dito mangmangged ya bapur ri nin, madi kayu maisalakanin,” kunen na.

³² Dikad pe̍ pinuted met dito suldadu to silu nito bangka, ket binaybay-an dan.

³³ Ket ito dandani umagsapa ngin, gabay ne̍ Pablu no mangan da nga amin, itu nga kinunen na igida, “Sangapulu ket eppat nga algew ita nga awan kinkinan nu, ta ipaspasna nu ya sumardeng niya belluut.

³⁴ Itu nga gabay ku no mangan kayu kuma ngin, tasun bumileg kayu. Madi kayu pe̍ madanaganin, ta tutu nga awan mapukaw dactida, se̍ awan pe̍ orey matalingu dactida,” kunen na.

³⁵ Ket ito kinagi ne̍ Pablu yan, namet ka sangabukel nga tinapay, se̍ nagkararag nga nagyaman e̍ Apu Diyus iya imatang da nga amin, se̍ na pinisey nga nangan.

³⁶ Ket bimileg ya namnama da, se̍ nangan da pe̍ yin.

³⁷ Ket to dagup mi nga amin ito bapur, duwa nga gasut ket pitu nga pulu ket ennem.

³⁸ Ket ito nabsug kamin, nitemsit da to kagkagtu da nga trigu win, tasun lumag-an to bapurin.

To pannakapirdi nito bapur

³⁹ Ket ito agwada ito umagsapa ngin, nalagib da to gacdangin, ngem madi da malasin no nagan na nga puru. Ngem uwed nasingen da nga suyu nga panapanag ya pingit na. Ket iyan kanu kuma ya pangisangladan da iya bapur, no mabalin.

⁴⁰ Dikad pe̍ pinuted da diya tali dito battun, ket nibati da ito baybayin. Inukas da pe̍ dito tali nga naggalut da kadito pangiturung ito bapur, se̍ da binicrad to layag niya akin-rupa, tasun idurun nakami to belluut ito pingitin.

⁴¹ Ngem nasayad mettin to bapur iya bebbew nga danum nga laplapuc. Ket nilumlum ngarud to sungu na, ket madi da met nawarwarin. Ket to ipus na, pinirpirdi nito bileg nito palung niya baybayin.

⁴² Ket dito suldadu, gandat da nga patayen kuma dito baludin, ta kaynun no agkawey da kanu, nga aglibas nga agtalew diya duduma igida.

⁴³ Ngem e̍ Kapitan Hulyu, pinagbabawi na da ito panggep da, ta gabay na nga isalakan nge̍ Pablu. Binilin na nga gennung dito makaemmu nga agkawey nga lumatuc da kanu nga mona nga agpagacdang ngasin,

⁴⁴ se̍ na pinagsasarunu dito duduma, nga pinagangpew na da kadito tabla se̍ dito kayu nga napirpirdi nga gayat ito bapurin. Ket itu win a, nakagacdang kami nga aminin.