Aramid 26 - Ya Baru nga Tulag

To panagkalinteggan ne̍ Pablu ito sangu ne̍ Ari Agripa

¹ Ket e̍ Ari Agripa, kinunen na ngarud e̍ Pablu, “Mabalin mu ya sumungbat ka kabucbukudam mun maipanggep iya ipabasul da ikew,” kunen na. Ket e̍ Pablu, nitayag na ya ima na, ta irugi na ya panagikalinteggan nan,

² nga kinunen na, “Apu Ari Agripa, nabaru ya gasat ku ita nga algew, ta ikew ya mabalin ku nga pangagiyan iya sungbat ku maipanggep kadito amin nga nangidaruman diya padac nga Hudyu iyaken.

³ Ta ikew, tutu nga emmum nga nalaing diya amin nga ug-ugali diya Hudyu, se̍ amin nga pagdidiskutiran mi. Itu nga anusam kuma ngas ya agdengngeg kadiya kagiyec kun.

⁴ “Amin diya padac nga Hudyu, emmu da no kumaan niya panagbiyag ku manipud ito kinaebbing ku pekkem, ito nagedyan nac enna ilic, se̍ orey ito naged-edyan nac ka He̍rusale̍min.

⁵ Sigud da met nga emmu manipud ito damu nga iyaken, nakitipun nac itun iya bungguy diya Parisiyu, nga itu ya kapasnekkan nga bungguy niya pammati mi nga Hudyu. Itu kuma ya ibaga da, no gabay da kuma nga ibaga ya pudnu.

⁶ “Ket ita, uwed dac idi nga sangu nu, ta nidarum dac gapu ta patiyec to ninamnama pe̍ dito am-ama mi, nga nikari ne̍ Apu Diyus igida itun.

⁷ Ket to nikari ne̍ Apu Diyus igida itun, itu pe̍ ya gapu na nga algew-gabi, sipapasnec nga agsirsirbi e̍ Apu Diyus diya pada mi nga Hudyu. Ta amin mi nga kapututan dito sangapulu ket duwa nga anac nito Hakub, namnamaen mi pe̍ to nikari ne̍ Apu Diyus igida itun. Ket itu met pe̍ yan ya patiyec. Ngem idi mettas nga namnamaen mi, itu met ya gapu niya nangidaruman da iyaken, Apu Ari.

⁸ “Dakayu nga padac nga Hudyu, ape̍ ta madi kayu lugud gabay nga patiyen nga paungaren ne̍ Apu Diyus diya natey?

⁹ “Orey iyaken pe̍ itun, ta nipagarup ku pe̍ no pagrebngac ya mangkuntra iya kinaturay ne̍ Je̍sus nga iNasare̍t.

¹⁰ Itu yan to pe̍yeng ku nga winangel itun ka He̍rusale̍m. Adu dito toley ne̍ Apu Diyus nga nipabalud ku, ta nae̍cdan nac itun ka turay nga gayat kadiya pangpangulu diya agsirsirbi iya Te̍mplu. Ket iyaken pe̍ ya isa nga imabuluy iya ipapatey dito pasurut ne̍ Je̍sus.

¹¹ Pe̍yeng ngac nga linumnec itun nga nawe̍ nangdusa igida kadiya amin nga paggigimungan mi nga Hudyu, tasun ipapilit ku igida nga agkagi da ka dake̍c maikuntra iya pammati da. Napalausan nga unay to kinauyung ku igida, ta nawe̍ yac met pe̍ kadiya il-ili diya bekken nga Hudyu, tasun mangirurumen nac kadiya Hudyu antuni nga pasurut ne̍ Je̍sus.

¹² “Ket itu pe̍ ya gapu niya ipeppen ku ka Damasku itun, ta nakaawat tac ka pammalubus se̍ bilin nga gayat kadiya pangpangulu diya agsirsirbi iya Te̍mplu.

¹³ Ket ito agmatuun nga kauwed ku ito dalan, Apu Ari, uwed nasingec nga darang nga gayat ka langit. Nadardarang met ngem iya sinag, ket dinarangan nac se̍ dito kabulun ku.

¹⁴ Natuwang kami nga amin iya ginet, ket uwed met timec nga nagicnac, nga nagkagi iyaken ka kagi He̍briyu, nga kagi mi nga Hudyu, ket kinunen na, ‘Saulu, Saulu, ape̍ parparigaten nac? Maparigatan ka ngas, ta ikew met ya masakitan,’ kunen na.

¹⁵ “Ket sinaludsud ku ngarud no nagan nito nagtimec, ket kinunen niya Apu iyaken, ‘Iyaken nge̍ Je̍sus. Iyaken ya parparigatem.

¹⁶ Ngem itan, gumnukat kan. Idi ya gapu nga nagpasingen nac ikew: tasun dutukan naka nga katulungac, se̍ tasun mangipakaemmu ka iya nasingem ita maipanggep iyaken, se̍ tasun ipakaemmum pe̍ diya ipasingec nad pekkem ikew.

¹⁷ Ibon naka nga mawe̍ kadiya padam nga Hudyu, se̍ kadiya bekken nga Hudyu. Ket isalakan naka kadiya pamaayen da ikew.

¹⁸ Ibon naka ngarud igida, tasun malasin dac gapu iya ibagam igida, tasun pe̍yeng nga e̍ Apu Diyus ya mangituray igidan, nga bekken nga e̍ Satanasin, se̍ tasun wada ya suruten dan, nga bekken nga ya gicbet tin. Ket iya agten iyan, mapakawan diya basbasul dan, gapu iya panamati da iyaken, se̍ maidga dan kadiya maibilang nga toley ne̍ Apu Diyus,’ kunen na iyaken.

¹⁹ “Dikad pe̍ iyaken, Apu Ari Agripa, tinungpal ku ngarud to nipakaemmu ne̍ Apu Diyus iyaken ito parparmatac.

²⁰ Ta nipakaemmuc met kadiya amin nga toley, nga masapul da nga agbabawi kadiya basbasul da, se̍ umapu da e̍ Apu Diyus. Se̍ kunec pe̍ nga masapul nga ipasingen da kadiya wangwanglen da ya panagbabawi dan. Agten iyan ngarud to nikaskasabac, nga nangasaba ngac nga nona kadito iDamasku, se̍ kadito iHe̍rusale̍m pe̍, se̍ kadito amin nga il-ili enna prubinsiya nga Hudya, se̍ kadiya bekken nga Hudyu pe̍.

²¹ Ket gapu mettas kadito nikaskasabac, tinkem dac met diya padac nga Hudyu enna Te̍mplu, se̍ dac kuma patayen.

²² “Ngem e̍ Apu Diyus, pe̍yeng nac nga tultulungan nga orey patingga ita. Itu nga uwed dac idi nin nga mangipacpakaemmu kadiyan, orey kadiya nanumu man, winno mabigbig nga toley. Ket ya ipacpakaemmuc, itu mettas dito nipadtu pe̍ nito Muyse̍s se̍ dito mammadtu itun.

²³ Ta kinagi da itun nga masapul nga agrigat ya Kristu nga ibon ne̍ Apu Diyus, se̍ masapul pe̍ nga igina ya mona nga agungar, tasun ipakaemmu na nga uwed din ya wada, nga itu ya panangisalakan ne̍ Apu Diyus dactida nga Hudyu, se̍ orey pe̍ kadiya bekken nga Hudyu,” kunen ne̍ Pablu.

²⁴ Ngem ito ikalkalinteggan pekkem ne̍ Pablu ya beggi na, binugtac ne̍ Gube̍rnadur Pe̍stu nga kinunen na igina, “Agel-ellut ka mettin, Pablu! Pagelluten naka met ya napalausan nga adal mun,” kunen na.

²⁵ Ngem kinunen ne̍ Pablu, “Bekken nac nga agellut, Apu Gube̍rnadur. Ta pudnu ngas met se̍ kustu ya kagkagiyec.

²⁶ Madic mansing nga mangagi kadito kinagic e̍ Ari Agripa, ta emmu na ya kinapudnu maipanggep kadiya kinagkagic. Itu nga siguradu wac nga naemmuwan na amin diyan, ta bekken nga nalimed ya pannakapasamac diyan,” kunen na.

²⁷ Ket e̍ Ari Agripa manin ya nangagiyan ne̍ Pablu, nga kinunen na, “Apu Ari Agripa, mamati ka kid kadito kinagkagi dito mammadtu itun. Emmuc ngarud nga mamati ka,” kunen na met.

²⁸ Ngem e̍ Ari Agripa, kinunen na lugud e̍ Pablu, “Pagarup mu aya no nalaka ngac nga maawis nga agkristiyanu?” kunen na.

²⁹ Ket kinunen ne̍ Pablu, “Orey no nalaka winno narigat, ikew se̍ diya amin nga aggigicna iyaken ita, ikarkararagan nakayu latta e̍ Apu Diyus, ta mamati kayu kuma pe̍ nga agten kuma iyaken. Agten kayu kuma ngarud iyaken, ngem yan nas madi kayu kuma nga maikanunung iyaken nga nakawaran nga mibalud,” kunen na.

³⁰ Ket ginumnukat to ari se̍ to gube̍rnadur se̍ e̍ Bernis se̍ dito nakipagtugtugew pe̍ igida,

³¹ se̍ da rinumwarin. Ket nagtetebbaran dan nga kinunen da, “Awan met wangwanglen niyan nga toley nga tumutup nga pakabaludan winno pakatayan na,” kunen da.

³² Ket kinunen ne̍ Ari Agripa e̍ Gube̍rnadur Pe̍stu, “Mabalin nga mawayawayaan kuma ya toley nga iyan, ngem madi mabalinin, ta agpakusgar kanu e̍ Ari Se̍sar,” kunen na.