Aramid 25 - Ya Baru nga Tulag

To panagkalinteggan ne̍ Pablu ito sangu ne̍ Gube̍rnadur Pe̍stu

¹ Tellu nga algew kalpasan nito seppuc ne̍ Gube̍rnadur Pe̍stu ka prubinsiya nga Se̍sarya, ket nawe̍ ka He̍rusale̍min.

² Ket dito pangulu diya agsirsirbi iya Te̍mplu, se̍ dito pangpangulu diya Hudyu, nibaga da e̍ Gube̍rnadur Pe̍stu ya ipabasul da e̍ Pablu.

³ Ket sipipinget da nga nagpacpakaasi igina nga papennen na kuma nge̍ Pablu ka He̍rusale̍m. Agten iyan ngarud to kinagi da, ta uwed panggep da nga mangsaneb e̍ Pablu iya dalan, ta patayen da kuma.

⁴ Ngem kinunen ne̍ Gube̍rnadur Pe̍stu nga mabantayan ngas kuma ka Se̍sarya nge̍ Pablu, ket gandat na mettas kanu ya sumoli antuni iya di mabayag.

⁵ Ket kinunen na, “Dikad pe̍ no uwed pangpangulu nu nga gabay da ya mipuyut iyaken, nabaru met, tasun antuni ngas ya pangagiyan nun, no uwed ipabasul nu e̍ Pablu,” kunen na.

⁶ Ket pasar walu winno sangapulu nga algew pekkem ne̍ Gube̍rnadur Pe̍stu enna ili da nga He̍rusale̍m, se̍ simoli ka Se̍sarya. Ket ito kadamlag nito iseseppuc na ka Se̍sarya, nawe̍ ito pangukuman antuni nga mangusig, ket pinalbe̍t na nge̍ Pablu win.

⁷ Ket ito inumbe̍t nge̍ Pablu win, line̍cbut met dito Hudyu nga gayat ka He̍rusale̍m. Ket adu dito dake̍c nga nipabasul da igina, ngem awan met nakagi da nga pammanecnec da nga pudnu dito nipabasul da.

⁸ Ket ito nagkalinteggan nge̍ Pablu, kinunen na, “Awan pulus basul ku nga maikuntra iya Linteg mi nga Hudyu, winno maipanggep iya Te̍mplu mi, se̍ orey pe̍ e̍ Ari Se̍sar,” kunen na.

⁹ Ngem e̍ Gube̍rnadur Pe̍stu, gapu ta gabay na nga pagustuwan dito Hudyu, sinaludsud na nge̍ Pablu nga kinunen na, “Gabay mu kad ya mawe̍ ka He̍rusale̍m, tasun antuni ngasin ya pangusigac kadiya ipabasul da ikew?” kunen na.

¹⁰ Ket e̍ Pablu, kinunen na met, “Madic, apu. Idi ngas ya pakausigac kun, ta ikew met ya nisaad ne̍ Ari Se̍sar nga mangkusgar dakami. Ngem no diya padac nga Hudyu, awan biyang da iyaken, ta emmum mettin nga awan basul ku igida.

¹¹ Ta no tutu nga nagbasul lac maikuntra iya linteg Ruma ka tumutup nga pakatayac, di yac met gabay nga liclikan ya dusac nga patey. Ngem gapu ta awan met pudnu kadiya ipabasul didi nga padac nga Hudyu iyaken, bekken met nga rumbeng no maiyawat tac igida. Itu nga gabay ku mettas no e̍ Ari Se̍sar kuma ya mangusig iyaken nin,” kunen na.

¹² Ket ito niyuman ne̍ Gube̍rnadur Pe̍stu tun kadito kunse̍hale̍s na, kinunen na e̍ Pablu, “Basta e̍ Ari Se̍sar ya pagusigem iya kasu mun, ta itu met ya inadeng mu. Dikad pe̍ mabalin mu ya mawe̍ e̍ Ari Se̍sarin,” kunen na.

To pannakaisangu ne̍ Pablu ito Ari Agripa

¹³ Ket kalpasan niya sumagpipiga nga algew win, inumbe̍t enna Se̍sarya to ari diya Hudyu nga Agripa, se̍ e̍ Bernis. Ta we̍ da kablaawan nge̍ Pe̍stu nga kapagtugew nga gube̍rnadur.

¹⁴ Ket ito nabaybayagan da ka Se̍sarya, nipalawag ne̍ Gube̍rnadur Pe̍stu e̍ Ari Agripa to kasasaad ne̍ Pablu, nga kinunen na, “Uwed idi ya isa nga balud nito Gube̍rnadur Pe̍lic nga nibati na.

¹⁵ Ket ito kauwed ku ka He̍rusale̍m, kinagi diya pangpangulu diya agsirsirbi iya Te̍mplu se̍ diya panglakayen diya Hudyu iyaken diya ipabasul da igina, ta pe̍nya da no ukumec kuma.

¹⁶ “Ngem kinagic igida nga bekken tida nga ugali nga iRuma ya mangipalubus iya panangdusa ka isa nga toley no awan pekkem pannakaisangu na kadiya mangpabasul igina, tasun mabalin met pe̍ nga agikalinteggan.

¹⁷ Dikad pe̍ ito inumbe̍t da met iya Se̍sarya ngi, di yac tinactac to panggep da. Ta ito kadamlag nito inumbe̍t dan, nawe̍ yac iya pangukuman se̍ pinalbe̍t ku to balud.

¹⁸ Ngem ito nagkagi dito nagidarum, awan met dake̍c nga ipabasul da igina, nga agten ito nipagarup ku.

¹⁹ Ket to riri da ngas igina, ket maipanggep ngas iya pammati da nga Hudyu, se̍ maipanggep pe̍ iya isa nga toley nga nagnagan ka Je̍sus, nga natey yin. Ngem e̍ Pablu, kunen na met nga sibibiyag kanu pekkem to Je̍sus.

²⁰ Ket gapu ta madic emmu ya pamaayec nga mangkusgar kadiyan, dinamag ku e̍ Pablu no gabay na no enna He̍rusale̍m ya pakausigan na kadiyan.

²¹ Ngem madi met nge̍ Pablu, ta gabay na kanu was nga agedyan pekkem iya nakaibaludan na, tasun e̍ Ari Se̍sar kuma kanu ya mangusig igina. Itu nga pinabantayac pekkem patingga ka dic nibon e̍ Ari Se̍sar,” kunen na.

²² Ket kinunen ne̍ Ari Agripa e̍ Gube̍rnadur Pe̍stu, “Kayat ku met pe̍ nga denggen ya kagiyen niya Pablu nga iyan,” kunen na. Ket to Gube̍rnadur Pe̍stu, kinunen na, “Mabalin met. Pae̍lbe̍t ku no damlag, tasun magicnam,” kunen na.

²³ Ket tutu met, nga ito kadamlag na, nawe̍ de̍ Ari Agripa nge̍ Bernis ito pangukuman. Ket adu ya naisagana nga pangpadayaw tasun maipakaemmu ya kinaturay da ito lumnec da. Ket nibulun pe̍ igida diya pangpangulu diya suldadu se̍ diya lallakay nito ili. Ket ito pinalbe̍tin ne̍ Gube̍rnadur Pe̍stu nge̍ Pablu, pinalnec da.

²⁴ Ket kinunen ne̍ Gube̍rnadur Pe̍stu, “Ari Agripa, se̍ dakayu nga amin nga uwed idi ita, masingen nu idi nin ya toley nga nidarum diya amin nga Hudyu iyaken itun, enna He̍rusale̍m, se̍ idi pe̍ ili nga Se̍sarya. Ket nip-ipkaw da pe̍ itun nga bekken kanu nga maikari nga agbiyagin.

²⁵ “Ngem no iyaken, awan masmac ku nga basul na nga maitutup nga pakatayan na. Ket mabalin met latta kunec, no papennec ka edyan ne̍ Ari Se̍sarin, ta gabay ne̍ Pablu no e̍ Ari Se̍sar kanu ya mangusig igina.

²⁶ Ngem awan nas emmuc nga isurat ku e̍ Apu nga Ari Se̍sar maipanggep idi nga toley. Nansa ta nipae̍lbe̍t ku iya sangu nu nga amin, kangrunaan ikew, Ari Agripa, tasun no malpas ya panangusig tida igina ita, uwed kuma maisurat kun.

²⁷ Ta no iyaken, bekken nga rumbeng kunec ya mangipatulud ka isa nga balud e̍ Ari Se̍sar, no awan pe̍ emmu ta nga kagiyen nga ipabasul ta igina,” kunen na.