Aramid 24 - Ya Baru nga Tulag

To pannakaisangu ne̍ Pablu e̍ Gube̍rnadur Pe̍lic

¹ Kalpasan lima nga algew, nakadateng da ka Se̍sarya de̍ Ananyas nga kangatuwan nga agsirsirbi iya Te̍mplu, se̍ dito duduma nga panglakayen dito Hudyu, se̍ isa nga abugadu nga agnagan ka Te̍rtulu. Ket nawe̍ da nipalawag ito gube̍rnadur to gapu niya pangguraan da e̍ Pablu.

² Ket ito napauneg nge̍ Pablu win, kinagi nito Abugadu Te̍rtulu ito gube̍rnadur to ipabasul da e̍ Pablu win, nga kinunen na, “Nadayaw nga Gube̍rnadur, gapu iya kinasirib niya panangipangulum dakami, talna ngas ya uwed iya panagbiyag mi. Ket adu pe̍ diya ar-arimanem nga mangpaurnus idi nga pagiliyan tida.

³ Ket naemmuwan diya umili kadiya amin nga il-ili nga tutu amin didi nga kinagic, itu nga agyaman kami nga unay ikew, Apu Gube̍rnadur.

⁴ “Ket gapu ta madic gabay no matactac ka, adngec kay ya anus mu nga agdengngeg iya e̍teng nga makagi mi.

⁵ Ta naemmuwan mi nga dake̍c yani nga lalaki, ta riribuken na diya amin nga pada mi nga Hudyu iya amin nga lubung. Ket igina met pe̍ ya isa kadito mangipangulu iya bungguy dito Nasare̍nu.

⁶ Gabay na pe̍ nga mansaan ya Te̍mplu mi. Itu nga tinkem mi, [ta idarum mi kuma maikanatad iya Linteg mi.

⁷ Ngem nakibiyang met to Kumande̍r Lisiyas nga nipapilit na nga inagaw dakami,

⁸ se̍ nibilin na pe̍ nga umbe̍t kami idi nga mangipabasul igina iya sangum.] Itu ya kinauwed mi yi. Ket no ikew kemmas ya mangsumarya iginan, mapanecnekkam nga tutu amin diya ipabpabasul mi yi,” kunen nito Abugadu Te̍rtulu.

⁹ Ket dito kabulun ne̍ Te̍rtulu nga Hudyu, nakipagkaypa da nga nagpabasul igina, nga kinagkagi da nga pudnu kanu dito kinunen ne̍ Te̍rtulu.

To panangilawlawag ne̍ Pablu ito Pe̍lic

¹⁰ Ket to Gube̍rnadur Pe̍lic, sininyasan na nge̍ Pablu nga agkagi yin. Ket idi to kinunen ne̍ Pablu: “Apu Gube̍rnadur, emmuc nga nabayag ka nga nagturturay idi nin nga pagiliyan. Dikad pe̍ sitatalged dac nga mangikalinteggan iya beggic iya imatang mu.

¹¹ Nalaka met nga mapanecnekkam, nga sangsangapulu ket duwa nga algew pekkem mas nanipud ito ipeppen ku nga nakipagdayaw ka He̍rusale̍m.

¹² Ket maemmuwam pe̍ nga bekken nac nga nakisusuway winno nagkibkibur kadiya toley iya Te̍mplu mi, se̍ orey pe̍ kadito gigimungan mi, se̍ orey no awac nga lugar ito siyudad.

¹³ Iya agten iyan pe̍, ket didi nga mangpabasul iyaken, awan makagi da ikew nga pakapanecnekkan nga pudnu diya ipabpabasul da iyaken ita.

¹⁴ “Ngem tutu met to kunen da nga makitipun nac iya Dalan ne̍ Apu Je̍sus, nga kunen didi nga toley nga busid kanu nga pammati. Ngarud, agdaydayaw wac e̍ Apu Diyus, nga Diyus pe̍ dito am-ama mi. Se̍ mamati yac pe̍ kadiya amin nga naisurat iya Linteg mi nga Hudyu, se̍ kadiya amin nga nisurat dito mammadtu itun.

¹⁵ Namnamaec pe̍ ya panangpagungar ne̍ Apu Diyus kadiya amin nga toley, nga dake̍c man se̍ nalinteg. Ket orey pe̍ didi nga mangipabasul iyaken, itu met pe̍ ya namnamaen da.

¹⁶ Itu nga wanglec nga pe̍yeng ya kabaellac nga agwangel iya kustu, ta gabay ku no nadalus nga pe̍yeng ya nakem ku, nga awan basbasul ku e̍ Apu Diyus se̍ kadiya toltoley.

¹⁷ “Ket nabayag gac nga awan ka He̍rusale̍m ka piga nga dagun itun. Ket kasaspuc ku ngas antuni nga nawe̍ nangitulud ka pangtulung nga kuwarta kadiya kailiyac nga makasapul, se̍ mawe̍c pe̍ kuma agdatun iya Te̍mplu.

¹⁸ Ket enna Te̍mplu, itu to nakaaskuran dito duduma nga Hudyu nga iAsiya iyaken. Ngem awan met emmuc nga basul ku, ta kaar-ariman ku was ya pakadalusac, se̍ awan pekkem riribuc itun, se̍ awan pekkem unay nga toley itun.

¹⁹ Dito Hudyu nga iAsiya kuma ya umbe̍t idi nga mangpabasul iyaken, no uwed makagi da kuma ikew nga ipabasul da iyaken.

²⁰ Winno didi kuma ngas nga pangpangulu mi kuma ya mangagi yin, no uwed naemmuwan da nga basul ku ito inusig dac dito kunse̍hale̍s ka He̍rusale̍m itun.

²¹ Ngem yan nas emmuc ket kaynun no to panangagic ka nabileg ito naisangu wac igida ya gabay da nga ipabasul iyaken, ta nibagac itun nga kagura dac gapu ta patiyec nga agungar diya natey,” kunen ne̍ Pablu.

²² Ket to Gube̍rnadur Pe̍lic, gapu ta uwed emmu na maipanggep iya pammati nga Dalan ne̍ Apu Je̍sus, nisardeng na to panangbistigar na, ta disidiren na da kanu nad no umbe̍t nge̍ Kumande̍r Lisiyasin.

²³ Ket binilin nito gube̍rnadur to kapitan nga pabantayan na nge̍ Pablu, ngem madi da kanu parigaten, se̍ bekken pe̍ nga maparitan diya gagayyem na nga mange̍lbe̍t kadiya masapul na.

²⁴ Ket kalpasan niya sumagpipiga nga algew, inumbe̍t to Gube̍rnadur Pe̍lic, se̍ e̍ Drusila nga asawa na nga Hudyu. Pinalbe̍t da nge̍ Pablu, ta gabay da nga denggen ya kagiyen na maipanggep iya panamati e̍ Kristu Je̍sus.

²⁵ Ket e̍ Pablu, nikaskasaba na ya maipanggep iya panagtungpal kadiya nalinteg se̍ iya panagtimbeng iya beggi, se̍ iya panangukum pe̍ ne̍ Apu Diyus nad mettas. Ket to Gube̍rnadur Pe̍lic, mansingin ito nikasaba ne̍ Pablu, itu nga kinunen na, “Kustu nan! Mame̍nsan nad manin, ta palbe̍ten naka manin no uwed nad wayac,” kunen na.

²⁶ Ngem gabay na pe̍ no pasucsukan kuma ne̍ Pablu. Itu nga pe̍yeng na nga pinalbe̍t tasun makiamlang e̍ Pablu.

²⁷ Ket ito kalpasan duwa nga dagunin, uwed sabali nga gube̍rnadur dan nga naisukat ito Pe̍lic, nga itu nge̍ Pursiyu Pe̍stu. Ket to Gube̍rnadur Pe̍lic, binaybay-an na nge̍ Pablu ito pagbaludan, ta gabay na no magustuwan kuma dito Hudyu.