Aramid 23 - Ya Baru nga Tulag

¹ Ket e̍ Pablu, pespeskan na dito kunse̍hale̍s, se̍ kinunen na igida, “Wawagic, natalna ngas ya nakem ku, ta awan met winangel ku nga iyalyew ku e̍ Apu Diyus, orey agingga ita,” kunen na.

² Ket e̍ Ananyas, to kangatuwan nga agsirsirbi iya Te̍mplu, nipatungpa na kadito agsisikad nga denni e̍ Pablu to musung ne̍ Pablu.

³ Ket kinagi ne̍ Pablu e̍ Ananyasin, “Dusaen naka nad met pe̍ nge̍ Apu Diyus, ta aginnanacman ka ngas met! Ta ukumen nac ya kunem maikanatad iya Linteg tida, ngem ikew kuma ya maukum. Ta ikew mettin ya nangkuntra iya Linteg ito nipatungpa nac,” kunen na.

⁴ Ket dito nagsisikad iya denni ne̍ Pablu, kinunen da igina, “Ape̍ aya nga paalyewwem ya kangatuwan nga agsirsirbi e̍ Apu Diyus?” kunen da.

⁵ Ket e̍ Pablu, kinunen na, “Ay, kakabsat, di yac met emmu nga igina ya kangatuwan nga agsirsirbi iya Te̍mplu. Ta kunen na ngarud iya Bibliya nga madi ta kagiyen ya dake̍c maikuntra kadiya pangpangulu ta,” kunen ne̍ Pablu.

⁶ Ket itunin, nalagip ne̍ Pablu win nga makikamkameng dito duduma nga kunse̍hale̍s iya bungguy diya Sadusiyu, se̍ dito duduma, iya bungguy diya Parisiyu. Itu nga ginewweng ne̍ Pablu da, ta nibileg na ya timec na nga kinagi na, “Wawagi, iyaken, Parisiyu wac met pe̍, se̍ Parisiyu met pe̍ dito nagputputut iyaken. Ket emmuc met ya kagura nu iyaken nin, ta namnamaec nga uwed nad panagungar diya natey,” kunen na.

⁷ Ket itu yani nin ya pagsusuwayan dito Parisiyu se̍ Sadusiyu, ta madi da nagpapada ka panpanunutin.

⁸ Ta ya panursuru diya Sadusiyu, ket awan kanu panagungar se̍ awan pe̍ anghe̍l, se̍ awan pe̍ kanu kararuwa. Ngem diya Parisiyu, mamati da kadiya amin diyan.

⁹ Dikad pe̍ napagas da nga unay nga nagpipinnekkawin. Ket uwed diya Parisiyu nga manursuru iya Linteg Hudyu nga nagsikad nga sipipinget nga nangikalinteggan, nga kinunen da, “Awan emmu mi nga basul nidi nga toley, ta mabalin met nga tutu nga uwed nakatbar na nga kararuwa niya isa nga natey, winno isa nga anghe̍l,” kunen da.

¹⁰ Ket ito dandani da nga agkakabilin, nadanagan to kumande̍r, ta mansing, kaynun no pisapisayen da nge̍ Pablu win. Dikad pe̍ binilin na dito suldadu nga mawe̍ mamet e̍ Pablu tasun iyadeyyu da kadito Hudyu, se̍ e̍lbe̍t da kanu iya kampu dan. Ket tinungpal da ngarud.

¹¹ Ket iyan nga gabi, enna kampu da, nagpasingen manin ya Apu e̍ Pablu. Ket kinunen na e̍ Pablu, “Sinanama ka ngasin. Maisalakan ka ngarud idi, ta masapul pekkem nga ipakaemmum ya maipanggep iyaken enna siyudad nga Ruma, agten mettas iya panangipakaemmum iya kinapudnu na idi He̍rusale̍m,” kunen na.

To panangisikat da nga mangsaneb e̍ Pablu

¹² Ket iya agsapa nito kadamlag na, uwed da Hudyu nga naguuman no kumaan niya panangpatey da e̍ Pablu. Nagkikinnari da nga nisapata da nga madi da kanu mangan winno uminum patingga ka di da mapatey nge̍ Pablu.

¹³ Ket dito nagisikat, uwed da nasuruc nga eppat nga pulu.

¹⁴ Ket nawe̍ da nakitbar kadito pangpangulu diya agsirsirbi iya Te̍mplu se̍ kadito panglakayen diya Hudyu, nga kinunen da, “Uwed nisapata mi nga nagkikinnariyan mi, nga tutu nga madi kami mangan agingga ka di mi mapatey nge̍ Pablu.

¹⁵ Dikad pe̍ dakayu, se̍ amin nu nga kunse̍hale̍s, paibaga nu kuma ito kumande̍r nga e̍lbe̍t da kuma nge̍ Pablu iya mimitingan nun, ta sumaryaen nu nga nalaing, kunen nu kuma. Ngem sacbay da nga makadateng iya edyan nu, sanben mi met nga patayen nin,” kunen da.

¹⁶ Ngem ya kaanakan ne̍ Pablu nga bagbagu, nga anac niya kabsat na nga babey, naemmuwan na to tulag dito toley nga sanben da kuma nge̍ Pablu. Dikad pe̍ nawe̍ ngarud linumnec ito kampu nga nangibaga e̍ Pablu.

¹⁷ Dikad pe̍ pinalbe̍t met ne̍ Pablu ya isa nga kapitan diya suldadu, nga kinunen na igina, “Ipen mu kay ya bagbagu nga idi iya edyan niya kumande̍r, ta uwed ibaga na igina,” kunen na.

¹⁸ Itu nga nipen nito kapitan ito kumande̍r nga kinunen na igina, “Ya balud nga Pablu, nibon nac, ta ipabulun na ya bagbagu nga idi, nga e̍lbe̍t ku kanu ikew. Ta uwed kanu ibaga na ikew,” kunen na.

¹⁹ Ket to kumande̍r, kine̍we̍d na to bagbagu nga nipen ito nabay-at kadito duduma, se̍ na sinaludsud no nagan ya ibaga na kuma igina.

²⁰ Ket kinunen nito bagbagu ito kumande̍r, “Dito pangpangulu diya Hudyu, uwed nagnunumuwan da nga pae̍lbe̍t da kanu nge̍ Olteg nga Pablu ikew no damlag iya Kunse̍hus, tasun barbaruwen da kanu nga sumaryaen.

²¹ Ngem madi ka kay patiyen da, ta uwed da nasuruc nga eppat nga pulu nga lalaki nga nagtutulag nga mangsaneb kanu igina. Ta nisapata da nga nagkikinnariyan da nga di da kanu mangan winno uminum patingga ka di da mapatey nge̍ Olteg nga Pablu. Nakasagana dan. Yan nas makunem ya ipaspasna dan,” kunen na.

²² Ket kinunen nito kumande̍r ito bagbagu, “Di ka ibagbaga ka orey nagan na nga inumbe̍t mu nibaga iyaken didi, a,” kunen na, se̍ na pinagawirin.

To panangipen da e̍ Pablu ka Se̍sarya

²³ Ket pinalbe̍t nito kumande̍r diya duwa nga kapitan, se̍ na kinunen igida, “Mangipadaan kayu ka duwa nga gasut nga suldadu nga mawe̍ mangitulud e̍ Pablu ka ili nga Se̍sarya, se̍ duwa nga gasut nga agtagisay-ang, se̍ pitu nga pulu nga agkabayu. Ket aggunay kayu no agalas nuwe̍be̍ no gabi.

²⁴ Pangabalyuwen nu pe̍ nge̍ Pablu. Asintaran nu, tasun awan an-anu na nga idateng nu e̍ Gube̍rnadur Pe̍lic,” kunen nito kumande̍r kadito kapitan.

²⁵ Ket nagsurat pe̍ to kumande̍r ka nipakagtu na, nga kunen na,

²⁶ “Surat para e̍ Apu Gube̍rnadur Pe̍lic, nga gayat e̍ Kumande̍r Klawdiyu Lisiyas. Kumusta ka, apu.

²⁷ “Ya toley nga e̍lbe̍t diya suldaduc ki, tinkem diya Hudyu ennidi, ta patayen da kuma. Ngem binulun ku diya suldaduc nga nawe nangisalakan igina, ta naemmuwac nga iRuma met.

²⁸ Ket gapu ta gabay ku nga emmuwen no nagan nito ipabasul dito Hudyu igina, nipen ku ito Kunse̍hus da nga Hudyu.

²⁹ Itu nga naemmuwac nga awan basul na nga naan-anay nga pakatayan winno pakabaludan na, ta maipanggep ngas met ito linteg da kem pe̍ yasin to ipabasul da igina.

³⁰ Ket nadamag kun nga uwed kanu sikat dito Hudyu nga patayen da kuma, itu nga ipatulud ku nga dagus ikew. Nibilin ku pe̍ kadiya mangpabasul igina, nga mawe̍ da pe̍ kuma ipakaemmu ikew no nagan niya gapu nga pangguraan da igina,” kunen na ito surat.

³¹ Ket tinungpal ngarud dito suldadu to bilin nito kumande̍r, ta nitulud da nge̍ Pablu. Ket naidateng da ka ili nga Antipatrisa iyan mettas nga gabi.

³² Ket ito kadamlag na, simoli dito duduma nga suldadu ito kampu da ka He̍rusale̍m, ta dito agkakabayu ngas dito nawe̍ nangitulud e̍ Pablu win.

³³ Ket ito nakadateng de̍ Pablu ka Se̍sarya ngin, ne̍cde̍ da to surat ito gube̍rnadur, se̍ niyawat da nge̍ Pablu igina.

³⁴ Ket ito nabasa nito gube̍rnadur to suratin, sinaludsud na e̍ Pablu, no awac nga prubinsiya ya ili na. Ket Silisiya to nisungbat ne̍ Pablu.

³⁵ Ket kinunen nito gube̍rnadur e̍ Pablu, “Bistigaren nakayu nad no dumateng diya mangpabasul ikew,” kunen na igina, se̍ na pinagbantay ito baley nga pinatdec nito Ari He̍rude̍s itun.