Aramid 22 - Ya Baru nga Tulag

To panagpalawag ne̍ Pablu kadito Hudyu

¹ Ket kinunen ne̍ Pablu igida, “Dakayu nga wawagic, se̍ aammac, denggen nu kuma ya panangikalinteggac dakayu,” kunen na.

² Ket ito nagicna da nga He̍briyu to panagkagi na, pulus nga awan pagpagas dan. Ket nituluy ne̍ Pablu to kagi na nga kinunen na manin,

³ “Iyaken, Hudyu wac met nga naiyanac ka Tarsu ka prubinsiya nga Silisiya. Ngem dimackel lac idi mettas nga ili nga He̍rusale̍m. Ket e̍ Mistru Gamalye̍l to mistruc itun. Nisuru nac nga nalaing kadito amin nga bilbilin niya Linteg dito am-ama tida nga Hudyu. Dikad pe̍ napasnekkac pe̍ iya panamatic e̍ Apu Diyus nga agten mettas dakayu nga amin idi ita.

⁴ Itu nga iyaken, pinarparigat se̍ nipapatey ku diya pasurut niya Dalan ne̍ Apu Je̍sus itun. Lalaki kada babey, tiniliw ku da se̍ yac da nipabalud nga amin.

⁵ Ya kangatuwan nga agsirsirbi iya Te̍mplu se̍ amin diya kunse̍hale̍s, ket mapanecnekkan da to winangwangel ku. Ta igida met ya namettac kadito surat nga para kadiya pada tida nga Hudyu ka Damasku, tasun palubusan dac nga mawe̍ mangtekkem kadiya pasurut ne̍ Je̍sus antuni, ta gabay ku da nga e̍lbe̍t ennid He̍rusale̍m, tasun madusa da.

⁶ “Ngem ito agmatuun nga kauwed ku iya dalan nga denni ka Damasku win, kellat ngas nga nadarangan to edyan ku ka darang nga gayat ka langit.

⁷ Natuwang ngac met iya ginet tin. Se̍ uwed pe̍ nagicnac nga timec, nga kinunen na iyaken, ‘Saulu, Saulu, ape̍ parparigaten nac?’ kunen na met.

⁸ “Ket kinunec, ‘Nagan mu, Apu?’ kunec ngarud. “Ket kinunen na iyaken, ‘Iyaken nge̍ Je̍sus nga iNasare̍t. Iyaken ya parparigatem,’ kunen na.

⁹ Ket dito kabulun ku, nasingen da met pe̍ to darang, ngem di da nagicna to timec nito nakitbar iyaken.

¹⁰ “Ket kinagic manin, ‘Nagan ngarud ya wanglec, Apu?’ kunec. “Ket kinunen na met iyaken, ‘Gumnukat kan, se̍ mawe̍ ka ka Damasku win, ta antuni ya pakaemmuwam kadiya amin nga maipawangel ikew,’ kunen na iyaken.

¹¹ “Ket itun, madic met makasingen nin, ta nakulap pac gapu ito dimarang. Dikad pe̍ gine̍pe̍d dac diya kabulun ku patingga ka siyudad nga Damasku win.

¹² “Ket uwed isa nga taga-antuni nga agnagan ka Ananyas. Napasnec nga agtungpal iya Linteg tida, dikad pe̍ rinaem amin dito kapadpada na nga Hudyu ka Damasku.

¹³ Ket to Ananyas, inumbe̍t iya edyan ku itun. Ket ito uwed iya abay kun, kinagi na iyaken, ‘Kabsat nga Saulu, makasingen ka manin,’ kunen na. Ket sigida met nga nakasingen nac kun, ta nasingec nga tutu nge̍ Ananyasin.

¹⁴ Ket kinagi na iyaken, ‘E̍ Apu Diyus nga Diyus dito am-ama tida, pinili naka nga pangipakaemmuwan na iya panggep na. Ikew pe̍ ya isa nga pinili na nga makasingen se̍ makagicna iya nalinteg nga Anac na.

¹⁵ Ta ikew ya pinili na nga mangipakaemmu nad kadiya amin nga toley kadiya mas-asingem se̍ magicgicnam.

¹⁶ Ket itan, madi ka agsagudadeng. Gumnukat kan, ta agpabautisar kan, se̍ ipakawan mu diya basbasul mu, nga awagam nga sitatalec ya Apu win,’ kunen ne̍ Ananyas iyaken.

¹⁷ “Ket ito simoli yac ennid He̍rusale̍min, uwed nipasingen ne̍ Apu Diyus iyaken iya parparmatac, ito agkarkararag gac iya Te̍mplu.

¹⁸ Ta nasingec ya Apu, nga kinunen na iyaken, ‘Alistuwam ya agtalew idi He̍rusale̍m. Ta diya toley ennid, madi da patiyen diya kagkagiyem maipanggep iyaken,’ kunen na.

¹⁹ “Ngem kinunec igina, ‘Mamati da ngata iyaken, Apu, ta siguradu nga emmu da nga iyaken to nangkabkabil se̍ nangibalud itun kadito mamati ikew kadiya tunggal gigimungan mi.

²⁰ Se̍ orey ito panamatey da ito E̍ste̍ban nga isa nga nangipacpakaemmu iya pudnu maipanggep ikew itun, uwed dac pe̍ nga imannamung ito pannakatey na. Ta iyaken to nagsisikad antuni nga nangaywan kadito ke̍bal dito namatey igina,’ kunec iya Apu.

²¹ “Ket kinunen na met iyaken, ‘Pumanaw ka lugudin, ta ibon naka kadiya bekken nga Hudyu enna deyyu,’ kinunen ne̍ Je̍sus iyaken,” kunen ne̍ Pablu.

²² Ket dito Hudyu, naggigicna da ngarud kadito kagkagiyen ne̍ Pablu igida, ngem ito nakagi na to mawe̍ kanu kadiya bekken nga Hudyu, nipkaw da manin nga kinunen da, “Patayen tida ngarudin! Ta bekken nga rumbeng nga agbibiyag yan nga toley!” kunen da.

²³ Ket nagpecpekkaw dito toltoley gapu iya napalaus nga unget da. Ket niwasawas da pe̍ dito ke̍bal da se̍ pinagasipurapur da ya tapuc.

²⁴ Dikad pe̍ nibilin nito kumande̍r nga mapalnec nge̍ Pablu ito kampu, se̍ maipabaut kanu, tasun ipudnu kuma kanu ne̍ Pablu no nagan nito pakaungtan dito toley igina.

²⁵ Ngem ito iraked da tasun sapliten da kuma ka latiku win, nakitbar nge̍ Pablu ito kapitan nga agsisikad ito denni igina nga kinunen na, “Di aya maikuntra iya linteg tida nga iRuma, no saplitem ka latiku ya toley nga iRuma ngin, no madi pekkem mapanecnekkan ya basul na?” kunen na.

²⁶ Ket ito nagicna nito kapitan to kinagi na, nawe̍ ngarud ito kumande̍r nga kinunen na, “Nagan ngarud yani nga ubraen tida? Ta iRuma gayam ya toley nga iyan,” kunen na.

²⁷ Dikad pe̍ nawe̍ ngarud to kumande̍r ito edyan ne̍ Pablu nga kinunen na igina, “Ibagam kay no tutu ka nga iRuma,” kunen na. Ket, “Bo, tutu met,” kunen ne̍ Pablu.

²⁸ Ket to kumande̍r, kinunen na e̍ Pablu, “Iyaken, adu met to nibayad ku tasun naibilang ngac nga isa nga iRuma,” kunen na. Ket kinunen met ne̍ Pablu, “Ngem no iyaken, madic nasapul ya nagbayad, ta naiyanakac met nga naibilang nga iRuma ngin,” kunen na.

²⁹ Ket ito nagicna da yan, dagus nga imadeyyu iginan dito imadenni nga mangbaut kuma igina, se̍ orey to kumande̍r, nadanagan pe̍ yin, ta naemmuwan nan nga iRuma gayam to nipairaked na.

To pannakausig ne̍ Pablu kadito Hudyu

³⁰ Ket to kumande̍r, gabay na nga emmuwen to pudnu nga ipabasul dito Hudyu e̍ Pablu. Itu nga ito kadamlag nan, inukasan nito kumande̍r dito pungu ne̍ Pablu, ta pinagmimiting na dito pangpangulu diya agsirsirbi iya Te̍mplu se̍ amin dito duduma nga kunse̍hale̍s diya Hudyu, se̍ na nipen nge̍ Pablu iya sangu da.