Aramid 21 - Ya Baru nga Tulag

To ipeppen ne̍ Pablu ka He̍rusale̍m

¹ Ito nagpakada kami de̍ Pablu nga nangpanaw kadito ie̍pe̍su win, nagbapur kami nga nagtarus ka puru nga managan ka Kus. Ito kadamlag na, nawe̍ kami ka puru nga Rudas, se̍ nanipud ka Rudas, nawe̍ kami ka ili nga Patara.

² Ket ito nakasmac kami ka bapur nga mawe̍ ka Pe̍nisiya, nakilugan kami manin, ket naggunay kami manin.

³ Nasingen mi to puru nga Sipre̍ ito dumna iya makatigid mi ito dakami nga tumalib. Se̍ kami nangaw-as ka prubinsiya nga Sirya, nga dimsag kami ka ili nga Tiru, ta itu ya pagidsagan da kadiya karga nito bapur.

⁴ Ket sinapul mi diya pasurut niya Apu nga taga-antuni, ket ito nakasmac kamin, nagedyan kami antuni ka makaduminggu. Ket dito mamati nga taga-ennan, naidalan ya panpanunut da gapu iya Ispiritu Santu, ket nibilin da e̍ Pablu nga madi kuma kanu mawe̍ ka He̍rusale̍min.

⁵ Ket ito nakaduminggu kami antuni nin, pimanaw kami lattan. Ket igida nga amin nga pasurut nga pati babey se̍ diya aanac da, nawe̍ dakami nitulud patingga iya pingit niya baybay iya laskig nito ili, ket nagparintumeng kami nga nagkararag ito panapanag.

⁶ Ket ito nagpakada kamin, naglugan kami ito bapurin. Ket dito pasurut, nagawir da met pe̍ yin.

⁷ Ket manipud ka Tiru, nituluy mi ya panagbapur mi agingga ka ili nga Tule̍mayda. Isa nga gabi mi antuni nga nakiam-amlang kadito kakabsat mi ka pammati.

⁸ Ket ito kadamlag na, nawe̍ kami ka ili nga Se̍sarya. Nagedyan kami ito baley de̍ Pe̍lipe̍, nga isa nga mangipakaemmu iya Makaparagsac nga Damag. Igina ya isa kadito pitu nga napili nga katulungan ka He̍rusale̍m itun.

⁹ Ket e̍ Pe̍lipe̍, uwed da eppat nga anac na nga babbalasang, nga mangikaskasaba iya kagi ne̍ Apu Diyus.

¹⁰ Ket ito sumagpipiga nga algew kami antuni nin, uwed pe̍ isa nga mammadtu nga inumbe̍t nga gayat ka Hudya nga agnagan ka Agabu.

¹¹ Ket ito nakadateng ito edyan mi, nimet na ya barikes ne̍ Pablu. Pinungu na diya bukud na nga saka se̍ diya ima na, se̍ na kinunen, “Ya Ispiritu Santu, kunen na nga ya akin-kuwa iya barikes nga idi, igina nad ya punguwen diya Hudyu ka He̍rusale̍m, nga agten iya pannakapungu diya sakac se̍ imac ki. Ket iyawat da nad pe̍ kadiya bekken nga Hudyu,” kunen na.

¹² Ket ito nagicna mi se̍ dito toltoley antuni to nipadtu nito Agabu, pinilit mi ngarud nge̍ Pablu nga nibaga mi nga madi na kuma ituluy ya mawe̍ na ka He̍rusale̍min.

¹³ Ngem kinunen ne̍ Pablu, “Ape̍ nga berberritan dac? Pasakitan nu was ya nakem ku iya agten iyan. Nakasagana ngac kun nga agrigat iya pannakapunguc, se̍ orey no patayen dac ka He̍rusale̍m gapu iya panamatic iya kinaturay ne̍ Apu Je̍sus,” kunen na.

¹⁴ Ket ito madi kami magapusin, pinalubusan min, ket kinunen mi ngas nga ya gabay niya Apu kuma ya matungpalin.

¹⁵ Ket ito di mabayag, nagbulay kami, se̍ kami nawe̍ ka He̍rusale̍min.

¹⁶ Ket uwed diya pasurut niya Apu nga iSe̍sarya nga nangitulud dakami ka He̍rusale̍m. Nipen dakami ka baley de̍ Nasun nga iSipre̍, nga nabayag nga pasurut niya Apu win. Ket antuni kami nga nagedyan.

To panangsacwar ne̍ Pablu kade̍ Santiyagu

¹⁷ Ket naganggem dito kakabsat mi ka pammati ka He̍rusale̍m, ito sinumpuc kami de̍ Pablu.

¹⁸ Ket ito kadamlag na, nawe̍ kami de̍ Pablu nga nangsacwar e̍ Santiyagu, ket uwed pe̍ antuni amin dito panglakayen da.

¹⁹ Ket ito kinablaawan ne̍ Pablu dan, nisalaysay na amin dito nipawpawangel ne̍ Apu Diyus igina nga para kadiya bekken nga Hudyu, ito nawe̍ nangaskasaba igida.

²⁰ Ket ito nagicna de̍ Santiyagu yan, nagdaydayaw da ngarud e̍ Apu Diyus. Ket kinunen da e̍ Pablu, “Emmum kabsat, nga rinibribu ya bilang diya Hudyu nga mamati e̍ Je̍sus itan. Ket amin da, managtungpal da nga sipapasnec iya Linteg tida nga Hudyu.

²¹ Ngem itan, nadamag da dito isursurum kanu kadiya pada tida nga Hudyu nga agedyan kadiya ili diya bekken nga Hudyu. Ket dake̍c kanu met, ta isurum kanu nga baybay-an da kuma ya Linteg nito Muyse̍s, ta madi ka kanu nga palubusan da iya panangipakugit da kadiya an-anac da, se̍ iya panangtungpal da kanu kadiya ug-ugali tida nga Hudyu.

²² Ket itan, nagan na ngarud ya wanglen tidan? Ta siguradu nga madamag da nga sinumpuc ka idi nin.

²³ Dikad pe̍ tungpalem ngarud yani nga ibaga mi ikew: Uwed eppat nga lalaki dakami idi nga uwed kari da e̍ Apu Diyus, ket dandani agpatingga to kari dan.

²⁴ Itu nga mibulun ka kuma igida, ta makitipun ka iya pannakadalus da nga maikanatad iya ugali tida nga Hudyu. Se̍ kalpasan niya pitu nga algew, ikew kuma ya makaemmu kadiya masapul da nga gastuwen, tasun agpakiros dan. Dikad pe̍ iyan ya pakasingnan diya toley yin nga agtungpal ka pe̍ iya Linteg tida. Ket maemmuwan da pe̍ nga busid to nadamag da maipanggep ikew.

²⁵ Ket no maipanggep kadito bekken nga Hudyu nga mamati pe̍ e̍ Je̍sus, uwed nadisisyunan mi nga bilin nga nisurat mi igidan, nga madi da mangan kadiya makan nga naidatun ka didiyusen, se̍ madi da pe̍ nga agsida ka daga, winno iya karni animal nga di napadaga. Se̍ madi da pe̍ makikamalala.” Itu diyan to kinunen de̍ Santiyagu e̍ Pablu.

²⁶ Ket e̍ Pablu, binulun na ngarud dito eppat nga lalaki ito kadamlag na nga nawe̍ da pinaariman to pannakadalus da. Kalpasan na, imuneg iya Te̍mplu, ta nipakaemmu na nga uwed pekkem pitu nga algew sacbay na nga agkabas to kari da, nga itu nad ya panagdatun da ka datun para iya tunggal isa igidan.

To pannakatkem ne̍ Pablu iya Te̍mplu

²⁷ Ngem ito dandani manggibus to pitu nga algew win, uwed Hudyu nga iAsiya nga nakasingen e̍ Pablu ito Te̍mplu. Itu nga nibaga dito iAsiya kadito adu nga toley, tasun makipagunget da pe̍ e̍ Pablu. Ket tinkem ngarud dito iAsiya nge̍ Pablu win.

²⁸ Ket nip-ipkaw da nga kinunen da, “Ala, kabulun nga iIsrae̍l! Tulungan dakami kay! Ta igina yani nin to toley nga agpaspasyar ka amin nga luglugar, nga agisursuru ka dake̍c maikuntra dactida nga Hudyu, se̍ iya Linteg tida se̍ iya Te̍mplu wi. Se̍ bekken nas nga iyan, ta nangilnec pe̍ ka bekken nga Hudyu idi nga lugar niya Te̍mplu tida, nga mangmansa mettin iya Te̍mplu nga nasantuwan,” kunen da.

²⁹ Kinunen da met ya agten iyan, gapu ta nasingen da nge̍ Trupimu nga ie̍pe̍su nga nibulubulun e̍ Pablu itun iya ili, dikad pe̍ pagarup da no nilnec ne̍ Pablu nge̍ Trupimu ito Te̍mplu.

³⁰ Ket dito toltoley ka He̍rusale̍m, nakaunget da nga amin ito nagicna da to kinagi dito iAsiya. Itu nga nanagtag da nga naguurnung ito Te̍mplu. Ket tinkem da nge̍ Pablu, se̍ da pinarorod nga niruwar manipud iya uneg nito Te̍mplu, ket dagus da nga nigiset dito gagayangan na.

³¹ Ket tutu nga pinanggep da nga patayen, ngem to kumande̍r nga agituray kadiya suldadu antuni, nadamag na nga amin dito toltoley iya He̍rusale̍m, agriribuc da kanun.

³² Itu nga binulun nito kumande̍r diya duduma nga kapitan se̍ diya suldadu da, nga nagtatagtag da nga nawe̍ nangdateng kadito toltoley. Ket ito nasingen dito toley to kumande̍r se̍ dito suldadu, nisardeng da ya panagkabil da e̍ Pablu.

³³ Ket to kumande̍r, nawe̍ ngarud ito edyan ne̍ Pablu ket linabnuc na, se̍ na pinapungu ka duwa nga kawar. Ket sinaludsud na kadito toltoley no nagan ya nagan na, se̍ no nagan ya winangel na.

³⁴ Ket nagsasabali dito nip-ipkaw dito toltoley nga sungbat da. Itu nga madi nailasin nito kumande̍r no nagan ya pudnu, ta napagas met dito toltoley yin. Dikad pe̍ nibilin nito kumande̍r nga maipen nge̍ Pablu iya kampu.

³⁵ Ngem ito nadateng da to agdan nito kampu, masapul nga itayag dito suldadu nge̍ Pablu win, ta napalausan to unget dito toltoley igina.

³⁶ Ta sumursurut nga pumpumkaw diya adu nga toley nga kinunen da, “Patayen tidan!” kunen da.

³⁷ Ket ito dandani da maiyuneg nge̍ Pablu ito uneg nito kampu win, kinunen ne̍ Pablu ito kumande̍r, “Uwed ibagac kuma ikew, no mabalin,” kunen na. Ket to kumande̍r, kinunen na, “Nih! Emmum met gayam ya kagi Griye̍gu!

³⁸ Garup ku no ikew to isa nga ie̍hiptu nga nagriribuc itun, nga nangipangulu kadito eppat nga ribu nga toley nga managdacdake̍c, ito nawe̍ da nga sangkabungguy enna away,” kunen na.

³⁹ Ket kinunen ne̍ Pablu, “Ay, bekken met. Hudyu wac met nga iTarsu, ya isa nga dackel nga siyudad ka prubinsiya nga Silisiya. Ket pangngaasim, ta uwed gabay ku nga ibaga kadidi nga toley,” kunen na.

⁴⁰ Ket pinalubusan ngarud nito kumande̍r nge̍ Pablu. Dikad pe̍ e̍ Pablu, nagsikad ito agdan nito kampu, se̍ na sininyasan dito napagas nga toltoley nga agulimec da. Ket ito nagtalna nga nalaing dito toltoley yin, nagkagi nge̍ Pablu igida ka kagi da nga He̍briyu.