Aramid 20 - Ya Baru nga Tulag

To ipeppen manin ne̍ Pablu ka Mase̍dunya

¹ Ito nagsardeng ngin to riribuc dito mammanday, pinaurnung ne̍ Pablu dito pasurut niya Apu. Binagbagaan na da ngarudin, ket kalpasan na, nagpakada igida, nga nawe̍ ka prubinsiya nga Mase̍dunya ngin.

² Ket ito napasyar nan amin nga il-ili nga masakupan niya Mase̍dunya nga nangisuruwan na kadito mamati, nakadateng enna Gre̍siya ngin nga akin-sakup iya prubinsiya nga Akaya.

³ Nagedyan nge̍ Pablu antuni ka tellu nga bulan, se̍ agbapur kuma nga mawe̍ ka prubinsiya nga Sirya. Ngem naemmuwan na nga pangpanggeppen nga patayen dito Hudyu nga bekken nga mamati e̍ Je̍sus. Dikad pe̍ nalagip na ya sumoli nga lumasat ka Mase̍dunya.

⁴ Ket dito nibulun e̍ Pablu, itu de̍ Supatru nga iBe̍rya nga anac ne̍ Piru, se̍ de̍ Aristarku nge̍ Se̍gundu nga iTe̍salunika, se̍ e̍ Gayu nga iDe̍rbe̍, se̍ e̍ Timutyu, se̍ de̍ Tikiku nge̍ Trupimu nga iAsiya.

⁵ Nagbapur didi nga non-ona ngem dakamin, ta nawe̍ dakami nitonan ka Truwas.

⁶ Ket ito nalpasin to Padaya Tinapay nga Awan Pangpablad Na, naglugan kami pe̍ ka bapurin nga pinanawan mi ya ili nga Pilipus. Lima nga algew mi, se̍ kami nadateng dito kabulun mi ka Truwas. Ket nakaduminggu kami antuni.

To pannakaibaltug ne̍ E̍yutiku

⁷ Ito nadatngan to gidam Sabadu win, naguurnung kami. Ket itu ya pannangan mi nga panangilagip mi iya Apu. Ket gapu ta pumanaw kami kuma de̍ Pablu iya kadamlag na, nibaybayag ne̍ Pablu to panangbagbaga na kadiya toley, patingga ka tengnga gabi.

⁸ Ket adu dito dilag ito kin-ngudu nga kuwartu nga naggigimungan mi.

⁹ Ket uwed isa nga bagbagu antuni nga agnagan ka E̍yutiku nga nagtugtugew iya tawa. Ket ito nabayag nge̍ Pablu nga agkagkagi yin, makatkatudugen to E̍yutiku, ket agdocdocyep pin. Ket ito nibaybayag pekkem ne̍ Pablu to panagkagkagi na, niplec ka tudug to E̍yutiku win, itu nga nibaltug mettin manipud ito maikatlu nga gessar ka ngudu nito baley. Nawe̍ da ngarud binacrun ito segged, ngem natey yin.

¹⁰ Ket imulug pe̍ nge̍ Pablu ito segged, se̍ na naglacban nga inanganguy to natey nga bagbagu, ket kinunen na, “Madi kayu madanagan, ta uwed biyag nan,” kunen na.

¹¹ Ket e̍ Pablu, ito imune̍c manin, nangan, se̍ nakitkitbar pekkem ka nabayag igida agingga ka agwadawada ngin, se̍ na da pinanawanin.

¹² Ket to E̍yutiku, niyawir dan, ket naragsakan da nga unay, ta sibibiyag met.

To ipeppen ne̍ Pablu ka Mile̍tu

¹³ Ket dakami, non-ona kami, ta naglugan kami ka bapur nga nagpaili ka Assun. Ngem e̍ Pablu, nanalan ngasin, ket nipatulag na nga makipaglugan kanu dakami ka Assun.

¹⁴ Ket ito nadateng nakami ka Assunin, nakilugan dakami ket nawe̍ kami nga amin ka ili nga Mitile̍ne̍ yin.

¹⁵ Ito kadamlag na, nawe̍ manin to bapur mi, ket limiwan kami iya batug niya puru nga Siyu. Ket iya kadamlag na manin, dimagas kami ka puru nga Samus. Ket ito kadamlag na manin, nakadateng kami ka ili nga Mile̍tu win.

¹⁶ Ket e̍ Pablu, niranta na nga labsan ya ili nga E̍pe̍su win, tasun madi kami kanu mabayag ka prubinsiya nga Asiya. Ta kunen na nga magan-ganat kami kuma, ta uwed kami kuma kanu ka He̍rusale̍min no algew Pe̍nte̍koste̍s, no mabalin.

To palawag ne̍ Pablu kadiya panglakayen nga ie̍pe̍su

¹⁷ Ket ito kauwed mi ka Mile̍tu, nangibon nge̍ Pablu ka nawe̍ ka E̍pe̍su nga nangayab kadito panglakayen nito bungguy mamati ka E̍pe̍su.

¹⁸ Ket ito dimateng dito pinaayaban nan, kinunen na igida, “Dakayu, emmu nu met to gangey ku ito kauwed ku dakayu idi nga prubinsiya nga Asiya, nanipud ito damu nga inumbe̍t ku.

¹⁹ Ta ya tarigagay niya Apu ngas to tinungtungpal ku. Nagpakumbaba ngac pe̍, ket adu ya luluwac se̍ rigrigat ku gapu kadito sicsikap diya Hudyu iyaken.

²⁰ Malagip nu pe̍ nga awan niliblibac ku dakayu nga sursuru nga makatulung dakayu. Ta nangaskasaba se̍ nangisursuru wac dakayu orey iya sangu niya adu nga toley se̍ kadiya babaley nu.

²¹ Se̍ napasnekkac pe̍ nga mangbagbaga kadiya kapadac nga Hudyu, se̍ orey pe̍ kadiya bekken nga Hudyu, ta nibagac nga sumurut da kuma nga sibababawi e̍ Apu Diyus se̍ mamati da iya Apu tida nga Je̍sus.

²² “Ket itan, agpa-He̍rusale̍m mac kun, ta itu ya nibilin niya Ispiritu Santu iyaken. Madic met emmu no nagan nad ya mapaspasamac iyaken antuni.

²³ Ngem yan nas emmuc, itu ya ipacpakaemmu niya Ispiritu Santu iyaken. Ta iya tunggal ili nga kap-apennac, ipakaemmu na iyaken nga pagbaludan se̍ rigat kanu ya nakasagana iyaken.

²⁴ Ngem orey a, ta ya biyag ku, bekken ku nga kake̍ngan. Ta ibilang ku nga awan sirsirbi niya biyag ku, tasun matungpal ku ya nakaibonac se̍ ya wangel nga gabay ne̍ Apu Je̍sus nga ipawangel iyaken, nga itu ya panangipakaemmuc iya Makaparagsac nga Damag maipanggep iya siaayat nga asi ne̍ Apu Diyus.

²⁵ “Ket itan, dakayu nga amin nga nadaldalanac nga nangikaskasabaac maipanggep iya panangituray ne̍ Apu Diyus, siguradu wac nga madi dac masingen manin.

²⁶ Itu nga gabay ku nga ibaga dakayu nga nalaing ita, nga bekken ku nga basul no uwed bekken nga maisalakan dakayun.

²⁷ Ta nagtured dac nga nangibaga dakayu iya amin nga panggep ne̍ Apu Diyus.

²⁸ “Dikad pe̍ ita, dakayu nga panglakayen, agannad kayu nga tunggal isa, se̍ siputan nu pe̍ diya amin nga mamati nga nitalec niya Ispiritu Santu dakayu iya tunggal bungguy nu. Aywanan nu da nga nalaing, ta bukud ne̍ Apu Diyus da nga arig nga ngininaan na da iya daga niya Anac na.

²⁹ Emmuc nga nad no awan nac kun, uwed da umbe̍t dakayu nga arig nga atap nga asu nga nauyung, ta gabay da nga pirdiyen ya panamati diya toley niya bungguy ne̍ Apu Diyus.

³⁰ Se̍ orey iya bungguy nu mettas, uwed da met pe̍ mangirugrugi nad nga mangisuru ka busid, ta gabay da nga awisen diya pasurut niya Apu tasun sumurut da met igidan.

³¹ Itu nga agannad kayu ngarud, ket laglagipen nu kuma to winangwangel ku ito kauwed ku dakayu ka unus tellu nga dagun, nga awan sardeng ku nga nangbagbaga iya tunggal isa dakayu, orey algew-gabi, ket adu ya luluwac gapu dakayu itun.

³² “Ket ita, ipaaywan nakayu e̍ Apu Diyus, se̍ iya siaayat nga asi na nga nikari na dactida. Ta itu ya makapabileg iya panamati tida se̍ ya makae̍cde̍ iya tawid nga nikari na kadiya amin nga toley na.

³³ Ket ito nangisursuru wac dakayu, awan inapalac nga kuwarta nu winno balituc nu winno luput nu.

³⁴ Ta emmu nu nga iyaken mettas to makaemmu kadito masapul ku se̍ dito kabulun ku, ta uwed mettas to tarabakuc itun.

³⁵ Itu yan to pe̍yeng ku nga ipaspasingen dakayu, nga aggaget tida kuma, tasun makatulung tida kadiya makasapul ka tulung. Ta malagip tida kuma to kinunen ne̍ Apu Je̍sus, nga kinunen na, ‘Dacdackel ya anggem niya mange̍cde̍ ngem iya mae̍cdan,’ kunen ne̍ Apu Je̍sus itun.” Itu yan to gibus nga kinagi ne̍ Pablu.

³⁶ Ket ito nalpas ne̍ Pablu to nagkagi yin, nagparintumeng da nga amin, se̍ da nagkararag.

³⁷ Ket amin da, nagberberrit da nga tutu win, ket inarakup da se̍ inag-agkan da nge̍ Pablu,

³⁸ ta lumdaang da gapu iya pumanaw nan, se̍ nangruna ito kinagi na nga madi da nad kanu agsisingen nin. Se̍ da nawe̍ nitulud ito bapurin.