Aramid 19 - Ya Baru nga Tulag

To kauwed ne̍ Pablu ka E̍pe̍su

¹ Ket ito kauwed ne̍ Apulus ka Kurintu, itu pe̍ to panaglasat ne̍ Pablu kadiya tagtageytey nga madalanan nga mawe̍ ka E̍pe̍su. Ket ito nakadateng enna E̍pe̍su, uwed nadateng na nga pasurut niya Apu.

² Ket nagsaludsud nge̍ Pablu igida no nae̍cdan da iya Ispiritu Santu ito namati dan. Ket kinunen da, “Awan met. Awan pekkem orey nagicgicna mi maipanggep iyan nga Ispiritu Santu nga kunem,” kunen da.

³ Ket kinunen manin ne̍ Pablu, “Nagan na ngarud to pinati nu ito nabautisaran kayu?” kunen na. Ket kinunen da, “To nikaskasaba nito Juan nga Mammautisar itun, itu to pinati mi,” kunen da.

⁴ Ket kinunen ngarud ne̍ Pablu, “To Juan, binautisaran na ngarud diya toley itun, no nagbabawi da kadiya basbasul dan. Ket kinagi na pe̍ nga masapul nga patiyen da pe̍ ya mod-odi ngem igina nga umbe̍t, ket itu nge̍ Je̍sus,” kunen na.

⁵ Ket ito nagicna da to kinagi ne̍ Pablu, nagpabautisar da manin gapu iya panamati da iya kinaturay ne̍ Apu Je̍susin.

⁶ Ket nipatey ngarud ne̍ Pablu diya ima na igida, ket nagedyan pe̍ igida ya Ispiritu Santu win. Ket nagkagkagi dan ka nadumaduma nga pagkakagi, se̍ nikasaba da ya kagi ne̍ Apu Diyusin.

⁷ Ket uwed da ngata sangapulu ket duwa nga lalaki nga namati antuni nin.

⁸ Ket e̍ Pablu, nangaskasaba nga situtured ito gigimungan dito Hudyu ka E̍pe̍su ka unus tellu nga bulan. Nipalpalawag na nga nipanecnec kadito Hudyu ya maipanggep iya panangituray ne̍ Apu Diyus, tasun mamati da kuma pe̍.

⁹ Ngem dito duduma nga Hudyu nga madi mamati, nasukir dan. Itu nga am-amisen da ya Dalan ne̍ Apu Je̍sus iya imatang diya toltoley. Dikad pe̍ e̍ Pablu, pinanawan na da. Ket nipanaw na pe̍ dito pasurut na, nga nawe̍ da ito pagisursuruwan ne̍ Tiranu, nga itu win ya pangaskasabaan ne̍ Pablu nga pe̍yeng nga algew.

¹⁰ Ket agten iyan to pampamaay ne̍ Pablu ka unus duwa nga dagun. Itu nga diya toltoley ka prubinsiya nga Asiya, nga Hudyu se̍ bekken nga Hudyu, nagicna da nga amin ya kagi maipanggep iya Apu.

Dito anac ne̍ Iske̍ba

¹¹ Ket uwed met nakaskasdaaw nga nipaariman ne̍ Apu Diyus e̍ Pablu, nga awan pekkem nakaskasingen iya agten kadiyan.

¹² Ta orey no pangyu winno mongmong ngas nga inusar na, nipen diya toley kadiya agsakit se̍ kadiya naluganan ka sairu, ket nalaingan mettin diya agsakit se̍ pimanaw diya sairu nga limugluganin.

¹³ Ket ya napasamac itun, uwed da Hudyu nga nagpaspasyar nga mangpatalew kadiya sairu nga aglugan ka toley. Ket pinadas da pe̍ nga ibalikas ya nagan ne̍ Apu Je̍sus no madama da nga agag-agas, nga kunen da, “Pumanaw kayun, dakayu nga sairu, ta ya kinaturay ne̍ Je̍sus nga ikaskasaba nito Pablu ya pangpatalew mi dakayu,” kunen da met.

¹⁴ Ket uwed met pitu nga agkakabsat nga lalaki nga Hudyu, nga nagar-ariman iya agten iyan. E̍ Iske̍ba ya ama da, nga isa kadito pangulu diya agsirsirbi iya Te̍mplu.

¹⁵ Ket ito name̍nsan nga pinadas dito lalaki ya agten iyan, simungbat met to sairu igida, nga kinunen na, “E̍ Je̍sus, ket em-emmuc, se̍ e̍ Pablu, em-emmuc pe̍. Ngem dakayu nga gennung, madi nakayu met em-emmu,” kunen na.

¹⁶ Ket to sairu nga naglugan ito toley, rinanggasan na da mettin nga inabac, ket kinabkabil na da nga amin. Itu nga nakatkatalew dito lalaki ito baley nga nalabusan da se̍ nataltalingu da pe̍.

¹⁷ Ket naipadamag ngarud yan kadiya amin dito Hudyu se̍ dito bekken nga Hudyu nga agedyan ka E̍pe̍su, ket nansing da nga aminin. Ket nipatpateg da ngarud ya kinaturay ne̍ Apu Je̍susin.

¹⁸ Ket iya agten iyan, adu kadito mamati e̍ Je̍susin ya nagipudnu nga silalatac maipanggep kadito dake̍c nga winangwangel da nga paglikudan dan.

¹⁹ Adu pe̍ dito nakibiyang kadiya sacsairu itun nga nagiltuwadin kadiya liblibru da nga maipanggep kadiyan. Inurnung da dito liblibru, se̍ da pinooran iya sangu diya amin nga toltoley antuni. Ket to dagup niya amin nga pateg dito pinooran da, agdagup met ka nasuruc nga lima nga pulu nga ribu nga pisus.

²⁰ Ket iya agten iyan, nagdindinamag ya kagi niya Apu, se̍ limallalu met pe̍ ya dayaw na iya imatang diya toltoley.

To panangriribuc dito mammanday nga ie̍pe̍su

²¹ Ket kalpasan diyan, gabay ne̍ Pablu ya mawe̍ pekkem nga mona kadiya prubinsiya nga Mase̍dunya se̍ Akaya, sacbay nga mawe̍ ka He̍rusale̍m. Ket kinunen na, “Kalpasan niya mawe̍c ka He̍rusale̍m, masapul nga mawe̍ yac pe̍ ka siyudad nga Ruma,” kunen na.

²² Dikad pe̍ e̍ Pablu, pinapen na pekkem nga non-ona dito duwa nga katulungan na ka Mase̍dunya. Itu de̍ Timutyu nge̍ E̍rastu. Ket e̍ Pablu, nagedyan pekkem ka prubinsiya nga Asiya nga akin-sakup iya E̍pe̍su.

²³ Ket ito kauwed ne̍ Pablu ka E̍pe̍su, itu to panangrugi niya isa nga dackel nga riribuc maipanggep iya pammati nga Dalan ne̍ Apu Je̍sus.

²⁴ Ta uwed isa nga lalaki antuni nga agnagan ka De̍me̍triyu, ket isa nga nalaing nga agpanday ka kuwarta. Ket ya ar-arimanen na iya tarabaku na, be̍be̍teng nga sinan-pagdayawan da iya didiyusen da nga Arte̍mis. Ket adu ya maganansiya diya mangmangged igina nga mammanday.

²⁵ E̍ De̍me̍triyu, miniting na dito mangmangged igina se̍ dito kapada na nga mammanday, ket kinunen na igida, “Kabulun, emmu tida nga ya tarabaku tida, itu ya panglakagan tida nga mamet ka pagbiyag tida.

²⁶ Ket itan, nasingen tida se̍ nagicna tida pe̍ nga adu nga unay diya naawis se̍ napasurut ito ikaskasaba niyan nga Pablu idi nga siyudad nga E̍pe̍su, se̍ nistay amin diya parte̍ niya prubinsiya nga Asiya. Iyaw-awan na da, ta kunen na nga diya diyus nga pinanday diya toley, bekken da kanu nga pudnu nga diyus.

²⁷ Ket ita, gapu iya isursuru niyan nga Pablu, mabalin nga kalucsew diya toltoley ya panagpanday tida. Se̍ bekken nas nga iyan, ta kaynun no awan pe̍ pannakadayawin niya pagdayawan niya naturay nga diyus tida nga Arte̍misin. Se̍ kaynun no mapukaw pe̍ ya dackel nga kinaturay ne̍ Arte̍mis, nga itu met ya daydayawen diya amin nga toley iya prubinsiya nga Asiya, se̍ orey iya amin nga lubung, no ipatpaturay tida ngas ya Pablu nga iyan,” kunen na.

²⁸ Ket ito nagicna dito pada na nga mammanday to kinagi na, nakaunget da pe̍ nga unay, ket nipkaw da nga kinunen, “Madaydayaw nge̍ Arte̍mis, nga diyus tida nga ie̍pe̍su!” kunen da.

²⁹ Dikad pe̍ nariribukan dito amin nga toley ito ili. Tinkem da de̍ Gayu nge̍ Aristarku, nga itu diya iMase̍dunya nga kabulun ne̍ Pablu, ket inalistuwan da nga nipen ito bubuyaan da.

³⁰ Ket e̍ Pablu, gabay na pe̍ ya lumnec nga mawe̍ ito edyan dito adu nga toley, ngem madi pinalubusan dito pada na nga pasurut niya Apu.

³¹ Se̍ uwed pe̍ gagayyem ne̍ Pablu nga pangpangulu nito prubinsiya nga Asiya, nga nangibon da pe̍ ka nawe̍ nangibaga e̍ Pablu nga madi kuma agpaspasingen ito uneg nito bubuyaan.

³² Ket dito toley ito bubuyaan, nagpecpekkaw da nga aminin. Ngem sabali ya nipkaw niya tunggal isa igida, ta bekken nga agpapada ya nakem da. Ket diya kaaduwan, di da met emmu orey no nagan na ya gapu nito panaguurnung da.

³³ Ket dito duduma, pagarupen da no e̍ Ale̍handru to kalucsew da, ta igina ya ipasangu dito Hudyu nga agkagi kadito toley ito bubuyaanin. Ket to Ale̍handru, sininyasan na dito toley nga patalnaen na da, ta gabay na nga ikalinteggan ya beggi na.

³⁴ Ngem ito nadlaw dito toley nga Hudyu nge̍ Ale̍handru, nagkaykaysa da met nga nangip-ipkaw ka unus duwa nga uras, nga kinunen da, “Madaydayaw nge̍ Arte̍mis, nga diyus tida nga ie̍pe̍su!” kunen da.

³⁵ Ket to se̍kre̍taryu nito ili, napatalna na dito toley, se̍ na kinunen igida, “Dakayu nga padac nga ie̍pe̍su, emmu tida nga naemmuwan nga sigud diya amin nga toley maipanggep iya ili tida. Ta ya ili nga E̍pe̍su wi, itu ya edyan niya pagdayawan iya nadayaw nga diyus tida nga Arte̍mis, se̍ orey pe̍ to batu nga niterkag nga gayat ka langit itun nga dayawen tida.

³⁶ Naemmuwan tida nga tutu didi nga banbanag, nga awan makailibac. Itu nga agtalna tida kuma ngin, tasun awan kuma ubraen tida nga dinadarusudus.

³⁷ “Ket didi nga toley nga ne̍lbe̍t nu idi, awan met tinakew da iya pagdayawan tida se̍ di da pe̍ am-amisen ya diyus tida.

³⁸ Itu nga no e̍ De̍me̍triyu se̍ diya pada na nga mammanday, no uwed gabay da nga idarum, mawe̍ da kuma iya pangukuman, ta uwed met algew nga panagidarum, se̍ uwed met pe̍ diya mangkuis. Igida kuma ya pangibagaan dan.

³⁹ Ket no uwed sabali pekkem nga gabay nu nga saludsuden, disidiren tida ngasin no kustu nga panagmimiting tida.

⁴⁰ Ta kaynun no pabasulen dactida diya pangpangulu tida nga iRuma nga kunen da lugud nga nagriribuc tida idi nga napasamac ita, se̍ di tida nad emmu ya isungsungbat tida igida, ta awan met banag nidi nga nakusu nga panaguurnung tida.”

⁴¹ Itu to kinunen nito se̍kre̍taryu igida, ket kalpasan na, pinagawir na dan.