Aramid 18 - Ya Baru nga Tulag

To panamati dito iKurintu

¹ Ito nalpas diyanin, pimanaw nge̍ Pablu ka Ate̍nasin, nga nawe̍ ka ili nga Kurintu.

² Ket antuni, uwed lalaki nga naaskuran na nga agnagan ka Akila. Igina se̍ e̍ Prisila nga asawa na, Hudyu da met nga iPuntu, ngem nawe̍ da nagedyan iya nasyun nga Italya itun. Ket kalalbe̍t da pe̍ ka Kurintu nga gayat ka Italya, gapu ta pinagtalew ngamin nito Ari Se̍sar Klawdiyu amin dito Hudyu ka siyudad nga Ruma. Dikad pe̍ nawe̍ nge̍ Pablu simacwar igida.

³ Ket nakipagedyan igida ito baley da, ta kapada na da ka tarabaku nga agar-ariman da ka tulda nga para bawi. Ket nipagariman pe̍ igidan.

⁴ Ket kada Algew Ngilin, nawe̍ nagpalawag nge̍ Pablu iya pammati na iya gigimungan diya Hudyu antuni, tasun awisen na kuma dito Hudyu, se̍ orey pe̍ dito bekken nga Hudyu.

⁵ Ket ito inumbe̍t de̍ Silas nge̍ Timutyu nga gayat ka Mase̍dunya ngin, nisnup ne̍ Pablu ya pe̍yeng nga mangikasaba iya kagi ne̍ Apu Diyusin. Ket nilawlawag na nga nalaing kadito Hudyu nga e̍ Je̍sus ya Kristu nga nibon ne̍ Apu Diyus.

⁶ Ngem dito Hudyu, kinuntra da met dito nikaskasaba na, se̍ nagkagkagiyan da pe̍ ka dake̍c. Itu nga sinapuc met ne̍ Pablu ya dapag iya lupluput na, nga itu ya panangipakaemmu na kadito Hudyu nga madi makibiyang igidan, se̍ kinunen na igida, “Dakayu diya makaemmu iya pannakaukum nu nad mettin! Bekken ku nga basul, ta madi kayu gabay ya ikasabac dakayu. Ket manipud ita, mawe̍ yac lugud mangaskasaba kadiya bekken nga Hudyu win,” kunen na.

⁷ Ket pinanawan na da ngarudin nga nagalis ka isa nga baley nga uwed iya abay nito gigimungan da, nga itu ya baley ne̍ Tisiyu Hustu. Ket e̍ Tisiyu, bekken nga Hudyu, ngem managdayaw met e̍ Apu Diyus.

⁸ Ket e̍ Krispu nga pangulu nito gigimungan diya Hudyu antuni, se̍ dito kakobung na, namati da nga amin iya Apu. Se̍ adu pe̍ dito duduma nga iKurintu nga namati ito nagicna da to kagi ne̍ Pablu, ket nabautisaran da.

⁹ Ket iya isa nga gabi itun, uwed nipasingen niya Apu e̍ Pablu iya parparmata na. Nasingen na ya Apu, ket kinunen niya Apu e̍ Pablu, “Madi ka mansing kadiya toley ennid, se̍ di ka sumardeng nga mangasaba.

¹⁰ Ta uwed dac nga pe̍yeng nga mibulubulun ikew, ket awan makaranggas winno makapasakit ikew, ta adu diya toley ku idi nga ili,” kunen niya Apu.

¹¹ Ket isa nga dagun ket ennem nga bulan nge̍ Pablu antuni nga nangisursuru kadito toley iya kagi ne̍ Apu Diyus.

To panangidarum dito Hudyu e̍ Pablu

¹² Ngem ito panaggube̍rnadur ne̍ Galyu ka prubinsiya nga Akaya ngin, nagtutulag dito bekken nga mamati nga Hudyu, nga pirdiyen da kuma kanu ya gagara ne̍ Pablu. Itu nga nidarum da enna pangukuman da.

¹³ Ket kinunen da ito Gube̍rnadur Galyu, “Idi nga toley, ay-ayuyuten na diya toley iya sabali nga panagdayaw e̍ Apu Diyus, tasun maikuntra ya panagdayaw da iya Linteg mi nga Hudyu,” kunen da.

¹⁴ Ket tage̍ agkagi nge̍ Pablu win, ngem kinunen ne̍ Gube̍rnadur Galyu kadito Hudyu, “No maipanggep kuma ka basul winno dake̍c nga naariman nga maikuntra iya gubiye̍rnu, mabalin nga anusac ya aggicgicna dakayu nga Hudyu.

¹⁵ Ngem biyang nu ngas met yanin, ta maipanggep ngas met iya panangisuru nu iya Linteg nu nga Hudyu, se̍ maipanggep ngas pe̍ ka kagkagi se̍ nagnagan. Itu nga dakayu was ya makaemmu iyanin, ta di yac makibibiyang nga manglinteg kadiyan nga banbanag,” kunen na.

¹⁶ Ket pinagtalew na da ito pangukumanin.

¹⁷ Ket dito bekken nga Hudyu, tinkem da met nge̍ Suste̍ne̍s nga pangulu nito gigimungan diya Hudyu antuni, se̍ da kinabkabil ito sangu mettas nito pangukuman, ngem madi latta nikaskasu nito Gube̍rnadur Galyu.

To simoli de̍ Pablu ka Antiyakiya

¹⁸ Ket nabaybayagan pekkem nge̍ Pablu ka Kurintu itun, se̍ na pinanawan dito kakabsat na ka pammati antuni, nga nawe̍ ka prubinsiya nga Sirya ngin. Ket nibulun pe̍ de̍ Prisila nge̍ Akila igina. Ket ito uwed da ka ili nga Se̍nkre̍ya, nagpakiros nge̍ Pablu, ta uwed natungpalin nga kari na e̍ Apu Diyus. Ket nanipud ka Se̍nkre̍ya, nagbapur da nga nawe̍ ka Sirya.

¹⁹ Nakadateng da ka ili nga E̍pe̍su, ket itu ya nangibatiyan ne̍ Pablu kade̍ Prisila nge̍ Akila. Ket e̍ Pablu, nawe̍ iya gigimungan diya Hudyu nga nagpalawag igida.

²⁰ Ket dito naggigicna, inawis da nge̍ Pablu nga agbayag kuma pekkem nga agedyan igida, ngem madi met mabalin.

²¹ Ket nagpakada ngarud nge̍ Pablu win, ket kinunen na igida, “Sumoli yac nad ngarud dakayu, no itu ya gabay ne̍ Apu Diyus,” kunen na. Ket nagbapur nga pimanaw ka E̍pe̍su win.

²² Ket ito nakadateng nge̍ Pablu ka Se̍sarya iya prubinsiya nga Sirya ngin, nanang-at nga nawe̍ simacwar ito bungguy mamati ka He̍rusale̍m. Ket kalpasan na, nawe̍ ka Antiyakiya enna prubinsiya nga Sirya.

To panangisuru ne̍ Apulus

²³ Ket ito naalac na ya sumagpipiga nga algew antuni nin, pimanaw manin, nga nawe̍ na pinaspasyar diya il-ili kadiya prubinsiya nga Galasiya se̍ Prigya, nga nangpabpabileg iya panamati diya amin dito pasurut niya Apu antuni.

²⁴ Ket itun, uwed isa nga Hudyu nga iAle̍handriya nga nawe̍ ka E̍pe̍su, nga agnagan ka Apulus. Nalaing nga agisuru se̍ adu diya emmu na maipanggep kadiya banbanag iya Bibliya.

²⁵ Ket ya ipalpalawag se̍ isursuru na, maiyannatup pe̍ iya kustu nga panursuru maipanggep e̍ Je̍sus, ta naadalan iya Dalan niya Apu. Ngem orey nagaget nge̍ Apulus nga mangaskasaba, kurang pekkem to pannakaawat na, ta yan nas bautisar nga nisuru nito Juan ya emmu na pekkem.

²⁶ Ket to Apulus, timured nga nangisuru ito gigimungan diya Hudyu, ket itu to nakagicnaan de̍ Prisila nge̍ Akila iginan. Dikad pe̍ inawis da ngarud ka baley da, se̍ da nilawlawag igina dito madi na pekkem emmu maipanggep iya Dalan ne̍ Apu Diyus.

²⁷ Ket itun, to Apulus, gabay na ya mawe̍ sumacwar kadiya pasurut niya Apu ka prubinsiya nga Akaya ngin, nga itu ya akin-sakup iya siyudad nga Kurintu. Ket dito kakabsat na ka pammati ka E̍pe̍su, gabay da ngarud no mawe̍ sumacwar antuni. Itu nga nagsurat da kadito pasurut enna Akaya nga awaten da kuma nge̍ Apulus. Ket ito dimateng nge̍ Apulus ka Akaya, adu ya naitulung na kadito nagbalin nga mamati gapu iya tulung niya siaayat nga asi ne̍ Apu Diyus.

²⁸ Ket dito Hudyu nga madi pekkem mamati e̍ Je̍sus, awan nangabakan da e̍ Apulusin, gapu ito napasnec nga pannakidiskutir na igida. Ta orey iya imatang diya adu nga toley, nibasbasa na dito naisurat iya Bibliya nga pinanecnekkan na nga ya Kristu nga nikari ne̍ Apu Diyus itun, itu nga tutu nge̍ Je̍sus.