Aramid 17 - Ya Baru nga Tulag

To kauwed de̍ Pablu ka ili nga Te̍salunika

¹ Ket ito nakaliwan de̍ Pablu nge̍ Silas iya ili nga Ampipulis se̍ ili nga Apulunya, nakadateng da ka ili nga Te̍salunika, nga itu ya edyan niya isa nga gigimungan diya Hudyu.

² Ket tellu nga Algew Ngilin nga nawe̍ nge̍ Pablu ito gigimungan da, ta itu to gangey na. Ket nagilawlawag igida iya banbanag nga naisurat iya Bibliya.

³ Nilawlawag se̍ nipanecnec na igida to naisurat iya Bibliya, nga masapul nga agrigrigat se̍ matey ya Kristu nga nikari ne̍ Apu Diyus, se̍ kalpasan na, agungar. Ket kinagi ne̍ Pablu igida, “Idi nga Je̍sus nga ibagbagac dakayu, itu met yan ya Kristu nga nibon ne̍ Apu Diyus,” kunen na.

⁴ Itu nga naawis ngarud dito duduma nga Hudyu, ket nakitipun da kade̍ Pablu nge̍ Silasin. Ket orey pe̍ dito bekken nga Hudyu nga managdayaw e̍ Apu Diyus, adu da pe̍ nga nakitipun igida, se̍ adu pe̍ dito mabigbig nga babey nga nakitipunin.

⁵ Ngem dito Hudyu nga madi mamati, umapal dan. Itu nga inurnung da dito duduma nga lukuluku nga lalaki nga agkakaldoyus, ket ito uwed adu nga toley yin, pinariribuc dito Hudyu da. Ket ito nakibur da to ili yin, nawe̍ da rinaut to baley ne̍ Diyasun, ta alac da kuma de̍ Pablu, tasun isangu da kuma kanu kadito adu nga toley.

⁶ Ngem awan nasmac da kade̍ Pablu nge̍ Silas. Itu nga e̍ Diyasun, se̍ duduma pekkem nga kabsat na ka pammati, igida ya pinarorod da, nga nipen da da nga nidarum kadiya pangpangulu nito ili. Ket nipkaw da nga kinunen, “Dito agdinamag nga toley nga mangriribuc kadiya toltoley kadiya amin nga il-ili, nakadateng da pe̍ idi nin.

⁷ Ket ya Diyasun nga idi, pinadagus na da. Igida nga amin, kuntraen da met diya bilbilin ne̍ Ari Se̍sar, ta kunkunen da nga uwed kanu sabali nga ari, ket agnagan kanu ka Je̍sus,” kunen da.

⁸ Ket iya agten iyan, nariribukan ngarud dito toltoley se̍ dito pangpangulu niya ili, ito nagicna da to nipabasul dito nagidarum.

⁹ Ket pinagbayad da de̍ Diyasun se̍ dito pada na nga mamati ka piyansa da, se̍ da da pinaruwarin.

Dito iBe̍rya

¹⁰ Ket iyan mettas nga gabi, dito kakabsat ka pammati, pinapen da de̍ Pablu nge̍ Silas enna ili nga Be̍rya. Nawe̍ da ngarud, ket ito nakadateng da antuni, nakigimung da pe̍ iya gigimungan diya Hudyu antuni.

¹¹ Ket dito Hudyu ka Be̍rya, nanacnacman da ngem kadito iTe̍salunika, ta gabay da nga unay ya agdengngeg iya kagi ne̍ Apu Diyus. Ket inalgew nga ad-adalen da ya Bibliya, tasun mapanecnekkan da no pudnu dito isursuru de̍ Pablu.

¹² Itu nga adu diya Hudyu nga namati antuni. Ket adu pe̍ diya bekken nga Hudyu nga namati, nga itu diya mabigbig nga babey se̍ diya lalaki pe̍.

¹³ Ngem dito Hudyu ka Te̍salunika nga madi mamati, ito nadamag da nga ikaskasaba pe̍ ne̍ Pablu ya kagi ne̍ Apu Diyus ka Be̍rya ngin, nawe̍ da pe̍ ka Be̍rya nga mangriribuc se̍ mangpaunget kadito umili.

¹⁴ Dikad pe̍ dito agkakabsat ka pammati ennan, sigida nga pinapen da nge̍ Pablu iya baybayin. Ngem de̍ Silas nge̍ Timutyu, nabati da ka Be̍rya.

¹⁵ Ket dito nangitulud e̍ Pablu, nibulun da igina patingga ka ili nga Ate̍nas. Ket ito uwed da ka Ate̍nasin, uwed nibilin ne̍ Pablu igida nga palbe̍ten da pe̍ kanu de̍ Silas nge̍ Timutyu nga sumarunu da kuma nga dagus igina. Ket dito iBe̍rya, nagawir dan.

To pannakidiskutir dito manursuru e̍ Pablu enna Ate̍nas

¹⁶ Ket ito kauwed ne̍ Pablu ka siyudad nga Ate̍nas nga nagpaspasnaan na kade̍ Silas nge̍ Timutyu, linumdaang ngarud gapu kadito nasingen na nga nakad-adu nga bulbultu iyan nga ili, nga itu diya didiyusen dito taga-Ate̍nas.

¹⁷ Dikad pe̍ e̍ Pablu, nangilawlawag kadiya Hudyu ito gigimungan da, se̍ kadiya bekken nga Hudyu ennan nga managdayaw e̍ Apu Diyus. Se̍ inalgew nga nangilawlawag pe̍ iya plasa da ka orey nagan na nga toley nga uwed antuni.

¹⁸ Ket uwed da pe̍ antuni diya manursuru nga pasurut niya panursuru E̍pikuryu se̍ Istuwiku, ket nakidiskutir da e̍ Pablu. Ket kinunen da pe̍, “Eppes ngas met ya kagkagiyen niya agbuwabuwakaw nga idi,” kunen da. Ket dito duduma, kinunen da, “Maipanggep kadiya sabsabali nga didiyusen kid ya kagkagiyen niyan,” kunen da, ta nikasaba ne̍ Pablu ya Makaparagsac nga Damag maipanggep e̍ Je̍sus, se̍ ya panagungar na.

¹⁹ Itu nga ne̍lbe̍t da nge̍ Pablu ito mimitingan da ka mung-ul Aryupagu. Ket ito uwed da antuni nin, kinunen da, “Ipakaemmum kay pe̍ dakami dito sabsabali nga isursurum.

²⁰ Ta awan pekkem nagicna mi nga agten iyan nga sursuru, ket gabay mi nga emmuwen no nagan diya kaipapennan da,” kunen da.

²¹ Agten iyan ngarud to kinunen da, ta amin dito iAte̍nas, se̍ amin dito sangsangaili nga aged-edyan antuni, nalaing da nga agkagkagi se̍ aggigicna ka maipanggep kadiya kagicgicna da nga banbanag, ta itu ya gangey da antuni.

To diyus dito iAte̍nas nga di da em-emmu

²² Ket e̍ Pablu, nakisangu ngarud ito mimitingan da ito mung-ul Aryupagu, nga kinunen na, “Dakayu nga iAte̍nas, nasitalac kun nga napasnec kayu nga unay iya pammati nu.

²³ Ta ito pinaspasyar ku ya ili nu wi, binbintaac dito pagkarkararagan nu kadiya didiyusen nu. Ket uwed pe̍ naaskurac nga isa nga pagdatunan nu nga nasuratan ka kunen na nga, ‘Maipaay iya diyus nga di kami em-emmu,’ kunen na. Ket yan mettas nga diyus nga daydayawen nu nga kunen nu nga di kayu em-emmu, igina ngarud ya ipakaemmuc dakayu itan.

²⁴ “Idi nga Diyus nga ibagac dakayu, itu ya Diyus nga nangariman iya lubung ngi se̍ diya amin nga uwed idi nga lubung. Ket madi met nga aged-edyan kadiya arimanen diya toley nga pagdaydayawan da, ta igina mettas ya Apu nga mangituray iya amin nga uwed ka langit se̍ amin nga uwed iya lubung.

²⁵ Ket idi nga Diyus, madi na pe̍ masapul ya tulung tida nga toley igina, ta awan pulus kasapulan na. Ta igina met ya mange̍cde̍ dactida nga amin nga toley iya anges tida se̍ biyag tida se̍ orey nagan na nga uwed dactida.

²⁶ Ket ya nagtaudan diya amin nga toltoley ka amin nga pagpagiliyan, itu ya is-isa ngas nga toley nga pinarsuwa ne̍ Apu Diyus. Ket e̍ Apu Diyus met ya nangpaadu kadiya toley tasun naiwaraswaras da iya amin nga parte̍ niya lubung. Igina met pe̍ ya nangibaga no nungey ya pannakaibangun diya pagpagiliyan, se̍ no awac ya patingga niya masakupan da.

²⁷ Agten iyan ngarud ya winangel ne̍ Apu Diyus, ta panggep na nga madi kuma male̍panan diya toltoley ya Diyus da, no di lugud laglagipen da. Ket no agpasnec diya toley nga agsapsapul igina, mabalin da met nga masmac. Ta ya kinapudnu na, bekken nga deyyu dactida nge̍ Apu Diyus.

²⁸ Ta agten ngarud iya kunen da nga, ‘Igina ya makagapu iya kinauwed tida, se̍ igina met ya mange̍cde̍ ka biyag se̍ bileg tida.’ “Orey dito mamasirib dakayu itun, agten pe̍ iyan to kinagi da, ito kinunen da nga, ‘Diyus ya akin-anac dactida nga toley,’ kunen da met itun.

²⁹ Ket no tutu nga anac nactida nge̍ Apu Diyus, madi tida kuma ngarud ipagarup nga maipada ya Diyus tida ka balituc, kuwarta winno batu. Ta kurang ngarud ya kinalaing se̍ kinasirib niya toley nga mangiladawan iya gangey ne̍ Apu Diyus.

³⁰ Ket itun nga timpu, nipampamoya ngas ne̍ Apu Diyus diya wangwanglen diya toley, ta madi da pekkem emmu itun ya kustu nga wanglen da. Ngem itan, bilinen na diya amin nga toley iya amin nga lubung nga agbabawi dan.

³¹ Agbabawi tida kuma ngarudin, ta uwed lalaki nga nisaad ne̍ Apu Diyusin nga mangikeddeng iya pagbanagan diya amin nga toley iya lubung. Ket e̍ Apu Diyus, nalinteg nad nga tutu yan nga pangngeddeng na. Ket emmu na pe̍ no nungey nad ya pannakapasamac niyan, ta igina met ya nakin-keddeng. Ket emmu tida nga tutu diyan, ta ne̍cde̍ ne̍ Apu Diyus ya pammanecnec na dactida nga amin, ta pinagungar na mettin to nisaad na nga mangikeddeng nad mettas.” Itu yan to patingga nito kagi ne̍ Pablu itun.

³² Ket ito nagicna da to kinunen ne̍ Pablu maipanggep iya panagungar niya natey, inuyaw dito duduma. Ngem dito duduma, kinunen da, “Denggen daka nad manin no mame̍nsan maipanggep iyan,” kunen da.

³³ Ket iya agten iyan, pinanawan ne̍ Pablu dan.

³⁴ Ket uwed da pe̍ nakitipun igina nga namati yin. Ya isa, e̍ Diyunisiyu nga isa kadito agturay ito mimitingan da ito mung-ul Aryupagu. Se̍ namati pe̍ ya isa nga babey nga agnagan ka Damaris, se̍ uwed da pekkem duduma.