Aramid 16 - Ya Baru nga Tulag

To pannakibulun ne̍ Timutyu kade̍ Pablu

¹ Ket de̍ Pablu, nakadateng da ka De̍rbe̍, se̍ ka Listra ngin. Ket uwed agedyan antuni nga isa nga pasurut niya Apu nga agnagan ka Timutyu. Ket mamati pe̍ ya ina na. Hudyu ya ina na, ket ya ama na, Griye̍gu.

² Ket e̍ Timutyu, raemmen amin dito kakabsat na ka pammati enna Listra se̍ Ikunyu.

³ Ket ginabay ne̍ Pablu nga ibulun nge̍ Timutyu igida. Ket gapu ta emmu amin dito Hudyu antuni nga bekken nga Hudyu to ama na, pinakugit pekkem ne̍ Pablu nge̍ Timutyu, maikanatad ito ugali Hudyu, tasun awan pangdellawan dito Hudyu.

⁴ Ket kadito il-ili nga nagisuruwan da kadiya mamati, nibaga da dito bilin dito apustule̍s se̍ dito panglakayen nito bungguy mamati ka He̍rusale̍m, tasun tungpalen kuma diya toley.

⁵ Ket iya agten iyan, bimileg ngarud ya panamati dito mamati iya kada bungguy antuni. Ket inalgew nga imadu ya bilang da.

To panangibon ne̍ Apu Diyus kade̍ Pablu ka Mase̍dunya

⁶ Ket mawe̍ de̍ Pablu kuma ka prubinsiya nga Asiya tasun mangikasaba da antuni iya kagi ne̍ Apu Diyus, ngem pinaritan met niya Ispiritu Santu da. Itu nga nawe̍ da pinasyar ya prubinsiya nga Prigya ngin, se̍ ya prubinsiya nga Galasiya.

⁷ Ket ito sumungsungad da iya pagiliyan nga Misiya, gabay da pe̍ ya mawe̍ ka prubinsiya nga Bitinya. Ngem ya Ispiritu ne̍ Je̍sus, madi na da pinalubusan manin.

⁸ Dikad pe̍ limiwan da ka Misiya, ket nagtarus da nga nawe̍ ka ili nga Truwas.

⁹ Ket iya gabi, uwed nipasingen ne̍ Apu Diyus e̍ Pablu iya parparmata na nga iMase̍dunya nga lalaki. Ket to lalaki, nakasikad nga nagpacpakaasi e̍ Pablu nga kinunen na, “Umbe̍t kayu kay ennid prubinsiya nga Mase̍dunya, ta tulungan dakami kay pe̍,” kunen na.

¹⁰ Ket ito nasingen ne̍ Pablu to nipasingen ne̍ Apu Diyus iya parparmata na, dagus kami ngarud nga nagbulay nga nawe̍ ka Mase̍dunya ngin. Ta emmu min nga itu ya pangibonan ne̍ Apu Diyus dakami, nga mawe̍ kami mangikasaba igida iya Makaparagsac nga Damagin.

To panamati ne̍ Lidya e̍ Apu Je̍sus

¹¹ Ket nanipud ka Truwas, nagbapur kami de̍ Pablu, nga nagtarus kami ka puru nga Samutrasiya, se̍ ka ili nga Ne̍yapulis iya kadamlag na.

¹² Ket manipud iyan, nagtuluy kami ka ili nga Pilipusin, nga itu ya isa nga dackel nga ili ka prubinsiya nga Mase̍dunya. Ket diya agnaed ka Pilipus, iRuma da. Ket nabaybayagan kami antuni.

¹³ Ket ito nadatngan ya Algew Ngilin, nawe̍ kami ito laskig nito ili nga pingit niya wangag, ta itu to emmu mi nga pagkararagan diya Hudyu. Ket nakipagtugtugew kami nga nakitkitbar kadiya babey nga nadacdaan nga naguurnung antuni.

¹⁴ Ket iTiyatira to isa kadito babey nga naggigicna dakami. Lidya ya nagan na, nga isa nga aglaclaku ka nangina nga luput nga nadgang. Ket e̍ Lidya, emmu na ya agdaydayaw e̍ Apu Diyus, orey no bekken nga Hudyu. Ket ne̍cde̍ niya Apu igina ya pannakaawat na kadito kinagi ne̍ Pablu, tasun ipangag na.

¹⁵ Ket itun, nabautisaran de̍ Lidya nga amin nga sangabaley. Ket kalpasan na, inawis nakami ka baley da, nga kinunen na, “No mapnec kayu nga tutu nga mamati yac kun iya Apu, ya baley mi kuma ya pagedyanan nun,” kunen na dakami. Dikad pe̍ nawe̍ kamin, ta nipapilit na dakami.

To pannakaibalud de̍ Pablu nge̍ Silas

¹⁶ Ket iya isa nga algew, nawe̍ kami manin de̍ Pablu ito pagkararagan. Ket uwed simabet dakami nga isa nga balasang nga tagabu. Ket to balasang, nalaing nga mammadtu maipanggep iya maadpangan, ta naluganan met ka sairu. Ket adu ya kuwarta diya amu nan, gapu ta adu diya tangdan na nga mammadtu.

¹⁷ Nip-ipuyut met yan nga balasang dakami de̍ Pablu, se̍ nip-ipkaw na nga kinunen na, “Didi nga toley, e̍ Apu Diyus nga Kangatuwan ya agsirsirbiyan da, ket inumbe̍t da nga mangipakaemmu dakayu no nagan niya pakaisalakanan nu,” kunen na.

¹⁸ Ket adu nga algew nga agten iyan ya winangwangel nito balasang. Ket e̍ Pablu, nalucsew met kadiyanin, itu nga limaw-ing nga kinunen na ito sairu, “Bilinen naka gapu iya kinaturay ne̍ Je̍su Kristu nga agtalew kan iyan nga balasang!” kunen na. Ket sigida ngarud nga nagtalew to sairu iginan.

¹⁹ Ngem ito naemmuwan dito amu nito balasang nga napirdi yin to namnamaen da nga pagalkan ka kuwarta, tinkem da de̍ Pablu nge̍ Silasin, se̍ da da pinarorod nga nipen ito plasa da. Nipasangu da da ngarud kadito pangpangulu niya ili da,

²⁰ ta nidarum da da met kadiya kangatuwan nga agtuturay nga iRuma antuni, nga kinunen da, “Hudyu didi nga toley, ket mangriribuc da iya ili tida.

²¹ Ta ya ugali nga isursuru da, di mabalin nga suruten winno tungpalen tida, ta maikuntra iya linteg tida nga iRuma,” kunen da.

²² Ket nipagkaypa nga nakaunget met pe̍ amin dito toltoley kade̍ Pablu. Ket dito pangpangulu da, pinigispigis da mettin nga nipac dito badu de̍ Pablu, ket nibilin da nga masaplit dan.

²³ Ket ito name̍n-adu da nga sinaplit dan, nibalud da da. Ket binilin da met to agbanbantay nga makaemmu ito pagbaludan nga bantayan na da kanu nga nalaing.

²⁴ Itu nga ito nabilin to agbanbantayin, nipen na de̍ Pablu ito akin-uneg nga siled nito pagbaludan, se̍ na linipit dito saka da ka nadammet nga kayu.

²⁵ Ket to napasamac, ket ito tumengnga gabi, agkarkararag se̍ agkankanta met de̍ Pablu nge̍ Silas nga agdaydayaw e̍ Apu Diyus. Ket dito pada da nga balud, aggigicna da ngarud.

²⁶ Ket pagamwan da ngas nga nangyegyeg ka nabileg. Ket nagyosoyosew ya gessar nito pagbaludan, ket naclatan met nga nalukatan amin dito giset nito pagbaludanin, se̍ naukas pe̍ amin dito panggapus kadito baludin.

²⁷ Ket nalukag ngarud met to agbanbantay nga makaemmu ito pagbaludan, ket nasingen na nga nailukat gayam amin dito giset nito pagbaludanin. Dikad pe̍ inasut na to ispada na, tasun agpessel lin, ta pagarupen na ngamin no nagtalew amin dito baludin.

²⁸ Ngem e̍ Pablu, nipkaw na ka nabileg nga kinunen na, “Madi ka ranggasan ya beggim, ta uwed kami pekkem nga amin idi,” kunen na.

²⁹ Ket to agbanbantay, pinasibtan na diya dilag, se̍ na inalistuwan ya nimuneg ito edyan de̍ Pablu nge̍ Silas, ket nagparintumeng ngarud iya sangu da nga agpilpilpig iya ansing na.

³⁰ Ket pinaruwar na da, se̍ na kinunen igida, “Nagan kad ya wanglec, apu, tasun maisalakan nac?” kunen na.

³¹ Ket kinunen da igina, “Mamati ka e̍ Apu Je̍sus, tasun maisalakan ka, agten pe̍ kadiya kakobung mu,” kunen da.

³² Ket nilawlawag de̍ Pablu ya kagi niya Apu igina se̍ iya amin nga kakobung na.

³³ Ket orey tengnga niya gabi pekkem, inugadan nito agbanbantay dito baled da, ket kalpasan na, nabautisaran da nga amin nga sangabaley yin.

³⁴ Se̍ na nipen de̍ Pablu nge̍ Silas ka baley da, ket pinakan na da. Ket naragsac da nga sangabaley yin gapu iya panamati da e̍ Apu Diyus.

³⁵ Ket ito kaagsapaan nitun, uwed da pulisiya nga nibon dito kangatuwan nga agtuturay nga mawe̍ mangpawayawaya kade̍ Pablu ito agbanbantay.

³⁶ Ket to agbanbantay nga makaemmu ito pagbaludan, nipadamag na ngarud yani kade̍ Pablu, nga kinunen na, “Pawayawayaan dakayu kanu dito kangatuwan nga agtuturayin. Dikad pe̍ rumwar kayu ngarudin, se̍ kayu sitatalna nga pumanawin,” kunen na.

³⁷ Ngem kinunen lugud ne̍ Pablu kadito pulisiya, “Se̍pe̍? Nipabpabaut dakami met iya sangu diya adu nga toley, se̍ dakami nibalud, orey awan pekkem pannakausig mi. Se̍ bekken nas nga iyan, ta iRuma kami met pe̍. Ket itan, dito agtuturay, gabay dakami nga palubusan ka limed! Ngem madi kami met nga pumanaw a, no bekken nga igida mettas ya umbe̍t mangiruwar dakami,” kunen na.

³⁸ Ket dito pulisiya, nawe̍ da ngarud nibaga kadito kangatuwan nga agtuturay to kinagi ne̍ Pablu. Ket nadanagan da nga tutu win, ito naemmuwan da nga iRuma pe̍ de̍ Pablu.

³⁹ Dikad pe̍ nawe̍ da ngarud nagpakawan kade̍ Pablu. Ket niruwar da da, se̍ da nipakaasi kade̍ Pablu nga pumanaw da kuma iyan nga ili yin.

⁴⁰ Ket rinumwar da ngarud ito pagbaludanin, nga nawe̍ da enna baley de̍ Lidya. Ket itu ya nagbubulunan da dito duduma nga kakabsat da ka pammati. Binagbagaan de̍ Pablu da, se̍ da pimanaw win.