Aramid 15 - Ya Baru nga Tulag

To diskutir maipanggep kadito mamati nga bekken nga Hudyu

¹ Ket itun, uwed da Hudyu nga gayat ka prubinsiya nga Hudya, nga nawe̍ ka Antiyakiya nga nagisuru kadito bekken nga Hudyu nga agkakabsat ka pammati antuni. Ket kinunen dito Hudyu, “Madi kayu maisalakan no madi kayu tungpalen ya nipaugali ne̍ Muyse̍s nga agpakugit tida,” kunen da.

² Ket rimaba ngarud to pannakidisdiskutir de̍ Pablu nge̍ Be̍rnabe̍ igida maipanggep ito panursuru da. Itu nga naikeddeng nga mawe̍ kanu kuma de̍ Pablu nge̍ Be̍rnabe̍ se̍ diya duduma nga ibon da nga mawe̍ ka He̍rusale̍m, tasun makitbar da kanu kadito apustule̍s se̍ dito panglakayen antuni maipanggep iyan nga panursuru.

³ Ket dito nibon nito bungguy mamati, nawe̍ da ngarud. Ket dimagas da ka Pe̍nisiya se̍ Samarya, ket nibaga da kadito kakabsat da ka pammati antuni to panagbalin pe̍ nga pasurut dito bekken nga Hudyu win. Ket naganggem da nga unay nga amin ito nagicna da.

⁴ Ket ito nakadateng de̍ Pablu ka He̍rusale̍m, siririspitar nga sinangaili nito bungguy mamati agraman dito panglakayen da se̍ dito apustule̍s. Ket nibaga ngarud de̍ Pablu dito amin nga nipawpawangel ne̍ Apu Diyus igida.

⁵ Ngem uwed dito duduma nga mamati nga kamkameng niya bungguy dito Parisiyu, nga nagsikad nga kinunen da, “Dito pasurut nga bekken nga Hudyu, masapul nga tungpalen da ya ugali tida nga agkugit, se̍ bilinen tida da pe̍ nga tungpalen da ya Linteg ne̍ Muyse̍s,” kunen da.

⁶ Ket dito apustule̍s se̍ dito panglakayen diya mamati, naguurnung da ngarud nga usigen da tun nga susic.

⁷ Ket ito nabayag to panagdidiskutir dan, e̍ Pe̍dru met ya nagsikad nga nagkagi para igida. Ket kinunen na, “Wawagi, naemmuwan nu mettin nga iyaken to pinili ne̍ Apu Diyus dactida itun nga mangikasaba iya Makaparagsac nga Damag kadiya bekken nga Hudyu, tasun patiyen da kuma pe̍.

⁸ Ket e̍ Apu Diyus nga makailasin iya panpanunut diya toley, nipasingen na met ya panangannamung na kadito bekken nga Hudyu, ito nipabulun na ya Ispiritu Santu igida nga agten pe̍ dactida itun.

⁹ Ket nipada met ne̍ Apu Diyus ya inariman na kadiya bekken nga Hudyu dactida nga Hudyu. Ta nibilang na da pe̍ nga nadalus kadiya basbasul dan, gapu iya panamati da.

¹⁰ Ket itan, ape̍ nga gabay nu nga paungten nge̍ Apu Diyus nga ipawangel nu ya narigat nga banbanag kadiya pasurut niya Apu nga bekken nga Hudyu? Ta orey dito am-ama tida itun se̍ dactida met pe̍ ita, madi tida met kinabaellan nga tinungpal diyan.

¹¹ Madi tida ngarud kabaellan diya agten kadiyan nga tungtungpalen, ngem emmu tida nga gapu was iya siaayat nga asi ne̍ Apu Je̍sus dactida, maisalakan tida, ket agten met pe̍ igida,” kunen na.

¹² Ket de̍ Be̍rnabe̍ nge̍ Pablu to simublat nga nagkagi yin. Ket dito naggigicna, nagulimec da ngarud ito nibaga de̍ Be̍rnabe̍ nge̍ Pablu dito pagilasinan se̍ nakaskasdaaw nga nipaariman ne̍ Apu Diyus igida ito kauwed da kadito bekken nga Hudyu.

¹³ Ket ito nalpas da nga nagkagi yin, nagpalawag pe̍ nge̍ Santiyagu, nga kinunen na, “Wawagi, denggen dac kuma.

¹⁴ E̍ Simon Pe̍dru, nipalpalawag na ito deddan dactida to damu nga panangipasingen ne̍ Apu Diyus iya ayat na kadito bekken nga Hudyu, ta uwed da pinili na igida nga nagbalin nga toley na.

¹⁵ Naiyannatup met pe̍ yan ito kinunen nito mammadtu nga mangaskasaba itun, ta naisurat iya Bibliya nga,

¹⁶ ‘Kunen ne̍ Apu Diyus, “Kalpasan nidi, sumoli yac nad nga mangipabangun ito nagedyanan nito Ari Dabid nga nalasangin. Ngarud, ipabangun ku nad dito napirdi nga banbanag

¹⁷ tasun emmuwen pe̍ dito duduma nga toley ya maipanggep iyaken. Itu diyan diya pinilic kadiya bekken nga Hudyu nga agbalin nga toley kun.”

¹⁸ Itu didi dito kinagi ne̍ Apu Diyus nga nipakaemmu na itun pekkem,’ kunen nito mammadtu itun.

¹⁹ “Itu nga ya kunec ita, madi tida kuma nga parigaten diya bekken nga Hudyu nga umapu e̍ Apu Diyusin.

²⁰ Ket ya wanglen tida nga gennung, ket agsurat tida kuma igida, nga ibaga tida kuma ngas nga madi da kuma mangan kadiya makan nga naidatun ka didiyusen, ta dake̍ken tida yan. Se̍ isurat tida pe̍ nga madi da makikamalala. Se̍ madi da pe̍ kuma agsida ka daga winno ya karni niya di napadaga.

²¹ Agten iyan kuma ya ibilin tida kadiya bekken nga Hudyu, ta kada ili, uwed pada tida nga Hudyu nga mangikaskasaba mettas iya Linteg ne̍ Muyse̍s. Ta orey manipud itun pekkem nga timpu, kada Algew Ngilin, uwed ibasa da kadiya gigimungan da nga naisurat ito Linteg ne̍ Muyse̍s,” kunen na.

To surat kadito bekken nga Hudyu nga mamati e̍ Je̍sus

²² Ket dito apustule̍s se̍ dito panglakayen, se̍ amin dito duduma nga mamati nga nakitipun ito bungguy da, ginabay da ya nangpili ka ibon da nga makibulun kade̍ Pablu nge̍ Be̍rnabe̍ nga mawe̍ ka Antiyakiya. Ket dito pinili da, duwa nga mabigbig nga toley: E̍ Hudas nga inagan da pe̍ ka Barsabas, se̍ e̍ Silas.

²³ Ket uwed nisurat da nga nipakagtu da igida. Ket agten idi to nisurat da: “Dakami nga kakabsat nu nga apustule̍s se̍ panglakayen ennid He̍rusale̍m, agsurat kami dakayu nga kakabsat mi ka pammati nga bekken nga Hudyu enna Antiyakiya se̍ Sirya se̍ Silisiya. Kablaawan dakayu.

²⁴ “Isurat mi yani dakayu, ta nadamag mi nga mariribukan kayu kanun gapu kadiya taga-idi nga nawe̍ nangisuru ka sabali nga sursuru nga mangpagduwaduwa dakayu. Ngem awan met bilin mi igida kadiyan.

²⁵ “Itu nga nagmimiting kami, ket nagkaykaysa kami nga nagkunen nga nabaru no mangpili kami ka ibon mi dakayu. Ket mibulun da kade̍ Pablu nge̍ Be̍rnabe̍ nga patpatgen tida nga kakabsat,

²⁶ nga mangipusta met iya biyag da gapu iya turay niya Apu tida nga Je̍su Kristu.

²⁷ Ket diya ibon mi dakayu ita, itu de̍ Hudas nge̍ Silas, tasun uliten da nga ibaga dakayu didi nga banbanag nga nisurat mi idi nga surat.

²⁸ Ta ya Ispiritu Santu se̍ dakami, gabay mi no madi kayu kuma maparigatan gapu kadiya bilbilin, itu nga didi ngas diya kasapulan nga unay nga tungpalen nu:

²⁹ Madi kayu kuma mangan kadiya masida nga naidatun kadiya didiyusen, se̍ madi kayu agsida ka daga, se̍ madi kayu pe̍ agsida kadiya di napadaga, se̍ madi kayu makikamalala. “No liclikan nu didi nga banbanag nga nisurat mi, nabaru ya pagbanagan nu. “Ket agten iyan nas ya maibaga min,” kunen da.

³⁰ Ket dito nibon da nga nakaitalkan nito surat, nawe̍ da ngarud enna Antiyakiya ka Sirya ngin. Ket ito uwed da antuni nin, pinaurnung da amin to bungguy mamati ennan, se̍ da niyawat to surat igida.

³¹ Ket dito mamati enna Antiyakiya, ito nabasa dan, nagang-anggem da gapu ito balakad ito surat.

³² Ket de̍ Hudas nge̍ Silas, duwa nga naibilang nga mangasaba iya kagi ne̍ Apu Diyus. Ket binagbagaan se̍ pinabileg da dito kakabsat da ka pammati ito bungguy, ka adu nga kasaba da.

³³ Ket ito nabaybayagan de̍ Hudas nge̍ Silas antuni nin, pinalubusan dito mamati dan, tasun sumoli da ito edyan dito mamati ka He̍rusale̍m nga nangibon igida.

³⁴ [Ngem e̍ Silas, gabay na ya mabati pekkem ka Antiyakiya, dikad pe̍ e̍ Hudas ya simoli yin.]

³⁵ Ket de̍ Pablu nge̍ Be̍rnabe̍, nabati da pe̍ ka Antiyakiya. Ket igida se̍ agraman ya adu nga kabulun da, nangisursuru se̍ nangikaskasaba da iya Makaparagsac nga Damag maipanggep iya kagi niya Apu.

To madi panagtunus de̍ Pablu nge̍ Be̍rnabe̍

³⁶ Ket ito nabayag ka e̍teng ngin de̍ Pablu ka Antiyakiya, kinagi ne̍ Pablu e̍ Be̍rnabe̍ nga sumoli da kuma nga mawe̍ sumacwar kadito kakabsat da ka pammati iya tunggal ili nga nangikaskasabaan da iya kagi niya Apu itun. Ta emmuwen da kuma kanu ya kasasaad dan.

³⁷ Ket e̍ Be̍rnabe̍, gabay na nga ibulun da pe̍ nge̍ Juan nga agnagan pe̍ ka Markus.

³⁸ Ngem e̍ Pablu, madi na ginabay, ta e̍ Markus, madi na nituluy to gagara da itun ka prubinsiya nga Pampilya, no di na lugud pinanawan da.

³⁹ Ket ya napasamac, rimaba to diskutir de̍ Pablu nge̍ Be̍rnabe̍, ket nagsina da mettin. Ket e̍ Be̍rnabe̍, nibulun na nge̍ Markus, nga nagbapur da nga nawe̍ ka Sipre̍.

⁴⁰ Ngem e̍ Pablu, e̍ Silas nga gennung ya pinili na nga mibulun igina. Ket dito kakabsat da ka pammati ennan, nikararag da nga nitalec da de̍ Pablu iya Apu nga mangaasi kuma nga siaayat igida, se̍ da nawe̍ yin.

⁴¹ Ket nanalan de̍ Pablu kadiya prubinsiya nga Sirya se̍ Silisiya, nga nangpabileg iya panamati diya bungbungguy diya mamati antuni.