Aramid 14 - Ya Baru nga Tulag

To kauwed de̍ Pablu ka Ikunyu

¹ Ket enna ili nga Ikunyu, nakigimung manin de̍ Pablu nge̍ Be̍rnabe̍ ito gigimungan diya Hudyu. Nangaskasaba da antuni, ket gapu ito panangasaba da, adu manin diya namati, nga Hudyu se̍ bekken nga Hudyu.

² Ngem dito Hudyu nga madi mamati, pinasurut da dito bekken nga Hudyu tasun makipagkaypa da nga gumura pe̍ kadito agkakabsat ka panamati iya Apu win.

³ Ket iya agten iyan, ya napasamac itun, ket nabaybayag pekkem de̍ Pablu antuni, ket natured da nga nangipalawag gapu iya Apu. Ket naemmuwan dito toley nga pudnu ya ipakaemmu de̍ Pablu maipanggep iya siaayat nga panagkaasi niya Apu, ta tinulungan niya Apu de̍ Pablu nga agariman ka pagilasinan se̍ nakaskasdaaw.

⁴ Ngem dito umili, bekken da nga nagpapada ka panpanunut, ata nakibungguy met dito duduma kadito Hudyu nga madi mamati, ket dito duduma, nakibungguy da kadito apustule̍s.

⁵ Ket itun, dito madi mamati nga bekken nga Hudyu, se̍ dito Hudyu nga agraman pe̍ dito pangpangulu da, nagtutulag da nga mawe̍ da uyawen de̍ Pablu, se̍ dampagen da da kanu pe̍ nga patayen.

⁶ Ngem ito naemmuwan de̍ Pablu, nagpacni da ngarud nga nawe̍ kadiya ili nga Listra se̍ De̍rbe̍ nga sakup niya Likawniya, se̍ kadiya duduma nga ili nga uwed iya le̍but da.

⁷ Ket antuni, nituluy da ya panangikasaba da iya Makaparagsac nga Damag.

To napasamac kade̍ Pablu ka Listra

⁸ Ket enna Listra, uwed isa nga lugpi. Lugpi met yani manipud ito pannakaiyanac na, itu nga nakatugew antuni nin, ta agingga itun, pulus nga di pekkem nakadalan.

⁹ Ket to lugpi, naggicgicna ito panangaskasaba ne̍ Pablu. Ket e̍ Pablu, binubuteg na to lugpi, ket nalasin na nga nabileg ya panamati nito lugpi e̍ Apu Diyus nga mangagas igina.

¹⁰ Itu nga nipkaw ngarud ne̍ Pablu, nga kinunen na, “Ucnatem ya saka mun, ta agsikad kan!” Ket dagus ngarud nga nagsikad, ket nakadalanin.

¹¹ Ket ito nasingen dito umili to winangel ne̍ Pablu, nip-ipkaw da ka pagkakagi da nga iLikawniya nga kinunen da, “Nagpaitoley yin diya diyus tida, ket nagpasegged dan iya edyan tida!” kunen da.

¹² Ket iya agten iyan, pagarup da nga e̍ Se̍yus nga diyus da nge̍ Be̍rnabe̍. Ket e̍ Pablu, igina kanu ya diyus da nga He̍rme̍s, ta e̍ Pablu to nalaing nga agkagi.

¹³ Ket to simbaan nga pagdaydayawan da iya diyus da nga Se̍yus, uwed iya laskig niya ili. Ket to padi da, uwed met nipen na nga turu nga baka se̍ belbellad iya ruwangan niya ili, ta igina se̍ dito umili, gabay da nga idatun kuma diyan nga pagdaydayaw da kade̍ Pablu.

¹⁴ Ngem dito apustule̍s nga Be̍rnabe̍ se̍ Pablu, dake̍c met igida to wangwanglen dito toley. Itu nga ito naemmuwan da to panggep da, pinigpigis da mettin diya mismu nga lupluput da nga nanagtag da iya tengnga dito toltoley. Ket nipkaw da nga kinunen da,

¹⁵ “Nagan diyan nga wangwanglen nu aya, kabulun? Toley kami met pe̍ nga agten dakayu. Inumbe̍t kami nga mangikaskasaba iya Makaparagsac nga Damag, tasun baybay-an nu kuma didi nga didiyus nu nga awan mamaay da, se̍ umapu kayu kuma ngin iya sibibiyag nga Diyus. Igina ya namarsuwa iya abac lawa, ginet se̍ ya danum, se̍ amin diya uwed kadiyanin.

¹⁶ Ket ito napalabes sin nga timpu, nipampamoya ne̍ Apu Diyus diya amin nga bekken nga Hudyu nga wanglen da ngas ya orey nagan na nga gabay da.

¹⁷ Ngem orey itun, uwed met pakaemmuwan diya toley iya kinauwed ne̍ Apu Diyus. Ta uwed dito nabaru nga inariman na nga pangparagsac dakayu, agten iya panagudan, se̍ iya dinagun nga panamisic diya mulmula, tasun uwed kanen nu,” kunen de̍ Pablu.

¹⁸ Ngem orey nagicna dito toltoley dito kinagi de̍ Pablu, nistay da latta datunan da.

¹⁹ Ket to napasamac itun, uwed da inumbe̍t nga Hudyu nga madi mamati nga taga-Antiyakiya se̍ Ikunyu. Ket pinasurut da met dito iListra nga dinampag da nge̍ Pablu, se̍ da pinarparorod nga nipen iya laskig niya ili yin, ta pagarupen da no natey yin.

²⁰ Ngem ito inarikoyopan dito pasurut niya Apu nge̍ Pablu, bimangun met gayamin. Ket simoli manin de̍ Pablu ito ili yin. Ket ito kadamlag na, nawe̍ de̍ Pablu nge̍ Be̍rnabe̍ ka ili nga De̍rbe̍ yin.

To simoli de̍ Pablu ka Antiyakiya enna Sirya

²¹ Ket nikasaba de̍ Pablu ya Makaparagsac nga Damag kadiya taga-De̍rbe̍, ket adu diya napasurut da iyan nga ili. Ket kalpasan na, simoli da kadiya ili nga Listra se̍ Ikunyu, se̍ ka Antiyakiya enna Pisidya,

²² tasun pabakedden da ya panamati diya pasurut niya Apu antuni. Binagbagaan da da nga ituluy da kuma ya isusurut da iya pammati iya Apu, nga kinunen da, “Dactida nga mamati iya Apu, masapul met nga maparparigat tida nga unay. Ket iya agten iyan, makipaglak-am tida nad iya panangituray ne̍ Apu Diyus dactida,” kunen da igida.

²³ Ket kadiya amin nga bungguy diya mamati antuni, uwed da pinili de̍ Pablu nga panglakayen da. Ket inanusan da ya madi nangnangan itun, tasun ipasnec da ya panangikararag da kadito napili, se̍ da da nitalec iya Apu nga maningsingen igidan, ta igina ngarud ya patpatiyen dan.

²⁴ Ket pinanawan de̍ Pablu ya prubinsiya nga Pisidya, se̍ da nakadateng iya prubinsiya nga Pampilya ngin.

²⁵ Ket nikasaba da pe̍ ya kagi ne̍ Apu Diyus ka ili nga Pe̍rge̍, ket kalpasan na, nawe̍ da ka ili nga Atalya.

²⁶ Ket nanipud ka Atalya, nagbapur de̍ Pablu nga simoli ka Antiyakiya enna Sirya ngin. Itu to naggayatan de̍ Pablu ito panangitalec dito mamati ennan igida iya siaayat nga panangaasi ne̍ Apu Diyus, tasun matungpal da kuma diya ipawangel na igida. Ket natungpal ngarud de̍ Pablu win.

²⁷ Ket ito nakadateng de̍ Pablu ka Antiyakiya ngin, pinagurnung da ya bungguy mamati, nga nisalaysay da igida dito amin nga nipawangel ne̍ Apu Diyus igida, se̍ to gundaway nga mamati diya bekken nga Hudyu.

²⁸ Ket nabayag de̍ Pablu nge̍ Be̍rnabe̍ nga nagedyan ito edyan dito pasurut niya Apu ka Antiyakiya enna Sirya.