Aramid 13 - Ya Baru nga Tulag

To pannakaibon de̍ Be̍rnabe̍ nge̍ Saulu

¹ Ket ito bungguy mamati enna Antiyakiya, uwed da nalaing nga mangisursuru se̍ mangikaskasaba kadiya paikagi ne̍ Apu Diyus. Itu de̍ Be̍rnabe̍, Simyun nga ninagan da pe̍ ka Pugut, se̍ e̍ Lusiyu nga iSire̍ne̍ se̍ e̍ Manae̍n nga kinaebbingan nito He̍rude̍s nga gube̍rnadur ka Galilya, se̍ uwed pe̍ nge̍ Saulu.

² Ket iya name̍nsan nga algew, madama da nga agsirsirbi maigapu iya Apu, se̍ niparit da pe̍ yin iya beggi da ya mangan. Ket ya Ispiritu Santu, kinunen na igida, “Isibna nu ngarud nga ipaay de̍ Be̍rnabe̍ nge̍ Saulu, ta uwed panggep ku nga ipawangel igida,” kunen na.

³ Ket iya agten iyan, ito nalpas da nga nagkarkararagin nga di nangnangan, nipatey da ngarud ya ima da kade̍ Be̍rnabe̍ nge̍ Saulu, se̍ da da nibonin.

To E̍limas nga salamangke̍ru enna Sipre̍

⁴ Ket iya agten iyan, nibon ngarudin niya Ispiritu Santu de̍ Be̍rnabe̍ nge̍ Saulu nga nawe̍. Nanagus da nga nawe̍ ka ili nga Se̍lyusiya, se̍ da naglugan ka bapur manipud iyan, nga nawe̍ da ka puru nga Sipre̍.

⁵ Ket ito nakadateng da iya ili nga Salamina, nikasaba da ya kagi ne̍ Apu Diyus kadiya gigimungan diya Hudyu antuni. Ket uwed pe̍ to Juan Markus nga naibulun igida nga tumultulung igida.

⁶ Pinasyar da ya amin nga puru nga Sipre̍ agingga ito nakadateng da enna ili nga Papu nga uwed iya isa nga pungtu niya puru. Ket ito uwed da antuni, naaskuran da ya isa nga salamangke̍ru nga Hudyu nga agnagan ka Bar-Je̍sus. Ket diya paikagi ne̍ Apu Diyus kanu ya kagkagiyen na, ngem busid met.

⁷ Ket to Bar-Je̍sus, kabulun ne̍ Se̍rhiyu Paulu nga gube̍rnadur ka Sipre̍. Nasirib met yani nga gube̍rnadur. Ket pinalbe̍t na de̍ Be̍rnabe̍ nge̍ Saulu, ta gabay na nga denggen ya kagi ne̍ Apu Diyus.

⁸ Ngem to Bar-Je̍sus, nga inagan da pe̍ ka E̍limas, ta itu ya nagan na ka Griye̍gu, ket kinuntra na met de̍ Be̍rnabe̍ nge̍ Saulu, ta gabay na nga kumsaen to gube̍rnadur iya pammati da.

⁹ Ngem e̍ Saulu nga agnagan pe̍ ka Pablu, paiturayan iya Ispiritu Santu. Ket sinelngan na nge̍ E̍limasin,

¹⁰ se̍ kinunen na igina, “Hoy, ikew! Anac naka nge̍ Satanas! Maikuntra ka kadiya amin nga nabaru. Naglaing mu ket lugud nga agbusbusid se̍ mangal-allilaw! Ape̍, ta pacpakilluwem ya nabaru nga kagi niya Apu?

¹¹ Ita, kulapen naka ya Apu win gapu iya turay na, ta pangpakig-as na ikew. Madi ka makasingen, orey nasinag, patingga ka di naka mettas palaingen ya Apu,” kunen ne̍ Pablu ito E̍limas. Ket tutu met, ta nakulabutan ya mata nan, ket gimicbet ya panagsingen nan. Ket karkaradapen na ya agsapul ka mangge̍pe̍d iginan.

¹² Ket ito nasingen nito gube̍rnadur to napasamac, namati ngarudin, ta nasdaaw ito nisuru de̍ Pablu maipanggep iya Apu.

De̍ Pablu nge̍ Be̍rnabe̍ ka Antiyakiya nga dumna ka Pisidya

¹³ Ket nagbapur de̍ Pablu nga gayat ka Papu, nga nawe̍ da ka ili nga Pe̍rge̍ iya prubinsiya nga Pampilya. Ket ito uwed da antuni, pinanawan ne̍ Juan Markus da, ta simoli nga gennung ka He̍rusale̍m.

¹⁴ Ket de̍ Pablu, nawe̍ da ka ili nga Antiyakiya nga denni iya prubinsiya nga Pisidya, nga gayat da ka ili nga Pe̍rge̍. Ket ito Algew Ngilin diya Hudyu win, linumnec da iya gigimungan diya Hudyu ka Antiyakiya, ket nakipagtugew da nga nakigimung.

¹⁵ Ket ito nalpasin ya pannakaibasa dito sursurat nito Muyse̍s se̍ dito mammadtu, uwed nibon diya pangulu niya gigimungan kade̍ Pablu. Ket kinunen na kade̍ Pablu, “Wawagi, no uwed maibaga nu nga pamagbaga kadiya toley, waya nu was nga kagiyen,” kunen na.

¹⁶ Dikad pe̍ nagsikad ngarud nge̍ Pablu, se̍ sininyasan na dito toley tasun madi da kuma mamagasin. Ket nirugi na to panangilawlawag na, nga kinunen na, “Padac nga Israe̍lita se̍ dakayu nga bekken nga Hudyu nga mangipatpateg e̍ Apu Diyus, denggen dac kuma.

¹⁷ Ya Diyus tida nga Israe̍lita, pinili na dito am-ama tida nga toley na. Ket ito nagedyan da ka E̍hiptu nga bekken da nga pagiliyan, pinagadu ne̍ Apu Diyus da antuni. Ket itun, gapu iya pannakabalin na, niyalis na da antuni.

¹⁸ Ket ito pimanaw da ka E̍hiptu win, unus eppat nga pulu nga dagun da nga nagali-alis enna away, ket inanusan ne̍ Apu Diyus nga tinulungan da.

¹⁹ Ket e̍ Apu Diyus, pinangabac na da kadito pitu nga pagiliyan enna Kanaan, se̍ na nipatagikuwa nga nipatawid igida to ginet dito inabac da.

²⁰ “Kalpasan niya eppat nga gasut ket lima nga pulu nga dagunin, nangisaad ngarud nge̍ Apu Diyus ka pangpangulu nga mangilinlinteg igida. Ngem ito timpu nito kauwed nito mammadtu nga Samwe̍l,

²¹ inadeng pe̍ dito am-ama tida nga uwed kuma met ari da nga mangituray igida. Dikad pe̍ nisaad ne̍ Apu Diyus to Saulu nga anac nito Kis nga kapututan nito Be̍nhamin. Ket nagari to Saulu ka eppat nga pulu nga dagun.

²² Ket ito pinagpatingga ne̍ Apu Diyusin, nisukat na to Dabid nga pinagari, ta kinunen ne̍ Apu Diyus, ‘Naemmuwac nga e̍ Dabid nga anac ne̍ He̍sse̍, makaay-ayu iyaken, ket tungpalen na ngarud diya amin nga ipawangel ku igina,’ kunen na.

²³ “Ket ya kapututan nito Dabid, itu ya naggayatan ne̍ Je̍sus nga nibon ne̍ Apu Diyus nga mangisalakan dactida nga Israe̍lita, sigun ito nikari na.

²⁴ Ket sacbay niya panangirugi ne̍ Je̍sus ito gagara na, uwed pe̍ to Juan nga nangaskasaba kadiya amin nga Israe̍lita, nga kinunen na nga agpabautisar tida kuma nga agbabawi tida kadiya basbasul tida.

²⁵ Ket ito nganngani malpas to gagara nito Juan, agten idi to kinunen na kadiya toley: ‘Garup nu kid no iyaken ya nibon ne̍ Apu Diyus nga umbe̍t mangisalakan dakayu, ngem bekken met. Ta uwed met umbe̍t nga mod-odi ngem iyaken, ket itu nad yanin. Iyaken, madi yac met maikari orey no mangukas ngas kadiya palloka na,’ kunen nito Juan itun.

²⁶ “Wawagi, dactida nga kapututan nito Abraham se̍ dakayu nga bekken nga Hudyu nga mangipatpateg e̍ Apu Diyus, dactida met ya nangipakaemmuwan ne̍ Apu Diyusin iya kagi na maipanggep iya panangisalakan na dactida.

²⁷ Ngem dito Hudyu nga iHe̍rusale̍m se̍ dito pangpangulu da, madi da nalasin nga e̍ Je̍sus to nibon ne̍ Apu Diyus. Se̍ di da pe̍ naawatan ya banag dito nisurat dito mammadtu itun, orey itu ya maibasbasa iya kada Algew Ngilin kadiya gigimungan da. Ket igida met diya nangtungpal iya banag mettas dito nibasbasa da, ito inukum da met nge̍ Je̍sus nga nipapatey da.

²⁸ Nipapatey da ngarud e̍ Pilatu, orey awan mabalin da nga ipabasul nga maitutup nga pamatayan da igina.

²⁹ Ket ito natungpal dan amin dito naisurat nga naipadtu maipanggep e̍ Je̍sus, uwed da nawe̍ nangdessag iya bangkay na ito krus, se̍ da nitamen.

³⁰ “Ngem pinagungar met ne̍ Apu Diyus.

³¹ Ket ito napaungar nge̍ Je̍susin, nagpaspasingen ka nabayag kadito kabulun na. Dito nakasingen igina, itu dito nibulbulun igina itun nga nawe̍ ka He̍rusale̍m nga gayat ka Galilya ito di na pekkem natey. Ket igida diya mangipakaemmu win iya pudnu maipanggep igina dactida nga Hudyu.

³² Ket itu pe̍ ya kauwed mi idi nga mangikasaba dakayu iya Makaparagsac nga Damag maipanggep ito nikari ne̍ Apu Diyus kadito am-ama tida.

³³ Ket to kari na igida, natungpalin dactida nga kapututan da, ito pinagungar na nge̍ Je̍sus. Ta itu ya kaipapennan niya maikadduwa nga kanta iya libru nga Salmu, nga kunen na, ‘Ikew ya Anac ku. Ket ita nga algew, nagbalin nac nga Ama mun,’ kunen na.

³⁴ Se̍ uwed pe̍ to kinunen ne̍ Apu Diyus maipanggep iya panangpaungar na e̍ Je̍sus, ta kunen na nga pulus nga di nad matey manin nge̍ Je̍sus nga maropsa, ta kunen na manin iya Bibliya, ‘Ya nadiyusan se̍ napudnu nga tulung ku nga nikaric ito Ari Dabid itun, e̍cde̍c ngarud ikew,’ kunen na.

³⁵ Itu nga kunen na pe̍ ka sabali nga kanta iya libru nga Salmu, ‘Madi ka ipalubus nga maropsa ya beggic, iyaken nga dungdungnguwem nga agsirsirbi ikew,’ kunen na.

³⁶ Ngem to Ari Dabid nga gennung, ito nalpas dito nipawangel ne̍ Apu Diyus igina, nga tumulung kadito toltoley itun, natey mettin. Ket nitamen da pe̍ nga agten kadito akinputputut igina, se̍ naropsa pe̍ to bangkay na.

³⁷ Ngem e̍ Je̍sus, madi nga gennung naropsa, ta pinagungar met ne̍ Apu Diyus.

³⁸ “Dikad pe̍ wawagi, ipakaemmu mi ngarud dakayu nga gapu idi nga Je̍sus, pakawanen ne̍ Apu Diyus diya basbasul tida.

³⁹ Ket to Linteg ne̍ Muyse̍s, madi nakaipac iya rebbeng diya toley maigapu kadiya basbasul da. Ngem gapu e̍ Je̍susin, orey nagan na nga mamati igina, mawayawayaan ka amin ditun nga banbanagin.

⁴⁰ “Annadan nu kuma ngarud, ta kaynun no maariman dakayu dito kinagi dito mammadtu itun, nga kinunen da,

⁴¹ ‘Agannad kayu, dakayu nga mangam-amis iya pudnu. Masdaawan kayu nad se̍ matey kayu pe̍, ta uwed nad masingen nu nga wanglec iya timpu niya panagbiyag nu pekkem, ngem di kayu patpatiyen, orey no uwed mangilawlawag dakayu,’ kunen da.” Ket amin diyan dito nilawlawag ne̍ Pablu kadito iAntiyakiya.

⁴² Ket ito rumwar de̍ Pablu nge̍ Be̍rnabe̍ ito gigimunganin, aw-awisen met dito toley da nga ikasaba da kuma manin diyan nga banbanag no sumarunu nga Algew Ngilin.

⁴³ Ket ito nagaawir dito nakigimungin, adu dito nipuyut kade̍ Pablu nge̍ Be̍rnabe̍, nga Hudyu se̍ dito bekken nga Hudyu nga managdayaw e̍ Apu Diyus, nga napasurut iya ugali Hudyu. Ket de̍ Pablu, binagbagaan da da nga ituluy da kuma nga pe̍yeng ya panamati da iya siaayat nga asi ne̍ Apu Diyus igida.

To panangpatalew dito Hudyu kade̍ Pablu enna Antiyakiya

⁴⁴ Ket ito sumarunu nga Algew Ngilin, nistay amin dito umili, nawe̍ da nakigimung ito gigimungan diya Hudyu, ta nawe̍ da naggigicna iya kagi niya Apu.

⁴⁵ Ngem dito Hudyu nga madi mamati, ito nasingen da nga adu diya toley nga nawe̍ naggigicna, napalaus ya apal dan. Itu nga diniskutir da to kunen ne̍ Pablu tasun iyal-alyew da kuma.

⁴⁶ Ngem de̍ Pablu nge̍ Be̍rnabe̍, nagtured da latta nga agkagi, nga kunen da, “Masapul nga dakayu nga Hudyu ya mona nga pakaipalawagan niya kagi ne̍ Apu Diyus. Ngem gapu ta madi kayu gabay, se̍ madi kayu ibilang nga maikari kayu iya agnanayun nga biyag nga naipalawag dakayun, panpanawan dakayu nga Hudyu ngarudin, ta diya bekken nga Hudyu nga gennung ya mangipalpalawagan min.

⁴⁷ Ta itu yani ya bilin niya Apu dakami, nga kinunen na, ‘Nibon naka nga mangipawada kadiya bekken nga Hudyu iya pakaisalakanan da, tasun maipadamag yani kadiya amin nga il-ili iya lubung,’ kunen na,” kunen de̍ Pablu.

⁴⁸ Ket dito bekken nga Hudyu, ito nagicna da to kinagi de̍ Pablu, nagang-anggem da nga unay, ket nagyaman da e̍ Apu Diyus gapu ito nikasaba ne̍ Pablu maipanggep iya Apu. Ket namati ngarud amin dito ginabay ne̍ Apu Diyus nga mae̍cdan ka biyag nga agnanayun.

⁴⁹ Ket itun, naisacnap nga pe̍yeng ya kagi niya Apu kadiya amin nga il-ili antuni.

⁵⁰ Ngem dito Hudyu, riniribuc da met dito mabigbig nga babey nga managdayaw e̍ Apu Diyus, se̍ dito lallakay nga pangpangulu niya ili, tasun makipagkaypa da nga makaunget kade̍ Pablu. Itu nga pinarparigat da ngarud de̍ Pablu nge̍ Be̍rnabe̍ yin, ket pinagtalew da iya ili dan.

⁵¹ Ket de̍ Pablu nge̍ Be̍rnabe̍, sinapuc da met ya dapag iya saka da, nga mangipasingen kadito umili nga madi da makibiyang iya basul da. Ket nawe̍ da ka ili nga Ikunyu win.

⁵² Ket dito pasurut niya Apu nga iAntiyakiya, naganggem da nga unay, se̍ paiturayan da pe̍ iya Ispiritu Santu.