Aramid 12 - Ya Baru nga Tulag

To panangiruwar nito anghe̍l e̍ Pe̍dru ito pagbaludan

¹ Ket itun nga timpu ya nangrugiyan ne̍ Ari He̍rude̍s nga namarparigat kadito duduma nga kamkameng niya bungguy diya mamati.

² Ket nipapatey na met nge̍ Santiyagu nga kabsat ne̍ Juan, nga pinutulan da ka ispada ya ulu na.

³ Ket ito naemmuwan nito Ari He̍rude̍s nga nagustuwan dito Hudyu, nipatkem na pe̍ nge̍ Pe̍dru. Ket nairana met yan ito padaya da nga maawagan ka Padaya Tinapay nga Awan Pangpablad Na.

⁴ Ket ito naipatkem na nge̍ Pe̍dru win, nipabalud na, nga pinabantayan na ka eppat nga bungguy nga saggapat nga suldadu, ta gabay na nga ukumen iya sangu diya umili no malpas ya Padaya Nitatalib.

⁵ Ket iya agten iyan, uwed nge̍ Pe̍dru ito pagbaludan. Ket dito kamkameng nito bungguy mamati, nikarkararagan da nga sipapasnec e̍ Apu Diyus.

⁶ Ket iya gabi sacbay niya algew nga panangpairuwar ne̍ Ari He̍rude̍s e̍ Pe̍dru tasun ukumen na, natudug nge̍ Pe̍dru iya baet diya duwa nga agbanbantay igina nga suldadu. Nakawaran met ka duwa, ket uwed da pe̍ agbanbantay iya gagayangan niya pagbaludan.

⁷ Ket pagamwan na ngas nga uwed wada iya uneg nito pagbaludan, ket uwed met anghe̍l niya Apu iya edyan ne̍ Pe̍dru win. Kinulbit na to tacgang ne̍ Pe̍dru nga linukag na, se̍ kinunen na, “Wey! Bumangun ka, gawaam!” kunen na. Ket dito kawar kadiya ima ne̍ Pe̍dru, niterkag da met pe̍ yin.

⁸ Ket to anghe̍l, kinunen na manin e̍ Pe̍dru, “Agbadu se̍ agsapatus kan,” kunen na. Ket tinungpal ngarud ne̍ Pe̍dru win. Ket kinunen pe̍ nito anghe̍l, “Pagke̍bal mu ya kagey mun, se̍ suruten nac,” kunen na.

⁹ Ket simurut ngarud nge̍ Pe̍dru nga rinumwarin. Ngem pagarupen ne̍ Pe̍dru no bekken nga tutu yani, ta pagarupen na ngas no parparmata na.

¹⁰ Ket naliwanan da to nona se̍ maikadduwa nga agbanbantay, se̍ da nadateng to gagayangan nga rumwar iya ili yin. Or-orey yas nito landuc nga giset ya naglukatin. Ket rinumwar dan. Ket ito nalasat da ya isa nga kalsada ngin, kellat ngas nga pinanawan nito anghe̍l nge̍ Pe̍dru win.

¹¹ Ket ito maawatanin ne̍ Pe̍dru to napasamac igina, kinunen na, “Pudnu gayam nga nibon niya Apu ya anghe̍l na nga inumbe̍t nangisalakan iyaken iya turay ne̍ Ari He̍rude̍s, se̍ kadito amin nga ipagpagarup dito Hudyu nga maariman kuma iyaken,” kunen na.

¹² Ket ito naemmuwan ne̍ Pe̍dru nga tutu yani, nawe̍ yin ka baley de̍ Marya nga ina nito Juan nga inagan da pe̍ ka Markus. Ket adu dito naguurnung nga nagkarkararag antuni nin.

¹³ Ket ito nagtogtog nga nagpakaemmu nge̍ Pe̍dru iya ruwangan niya paraangan nito baley da, nawe̍ siningen niya isa nga balasang nga mangmangged ennan, nga agnagan ka Ruda.

¹⁴ Ket ito nailasin nan to timec ne̍ Pe̍dru, madi na nalagip nga nilukat to giset tin gapu iya anggem na. Nanagtag to balasang nga simoli ito paguurnungan dito agkarkararag, ket nibaga na nga uwed nge̍ Pe̍dru iya ruwanganin.

¹⁵ “Ahah! Agam-amangew kan!” kunen da igina, ta madi da namati. Ngem nipapilit na met latta, itu nga kinunen da nga anghe̍l ngata ne̍ Pe̍dru.

¹⁶ Ngem e̍ Pe̍dru, nagtogtogtog latta nga agpailukat, dikad pe̍ nilukat dan. Ket nasdaaw da nga unay, ta e̍ Pe̍dru met nga tutu win!

¹⁷ Ket e̍ Pe̍dru, sininyasan na da nga agulimec da kuma, se̍ na nisapsaput igida no kumaan nito panangiruwar niya Apu igina ito pagbaludan. Ket nibilin na pe̍ nga kinunen na, “Isapsaput nu kay pe̍ yani e̍ Santiyagu se̍ kadiya duduma nga kakabsat tida ka pammati,” kunen ne̍ Pe̍dru, se̍ man pimanawin nga nawe̍ ka sabali nga lugar.

¹⁸ Ket ito umagsapa ngin, nasikuran nga unay dito suldadu win, no ape̍ nga awan nge̍ Pe̍dru enna pagbaludanin.

¹⁹ Ket to Ari He̍rude̍s, pinasapul na ngarud, ngem madi da nasmac. Itu nga sinumarya na met dito suldadu nga nagbanbantay, se̍ na nibilin nga mapatey da. Ket itun, pimanaw to Ari He̍rude̍s iya prubinsiya nga Hudya nga nawe̍ nagedyan ka Se̍sarya ngin.

To pannakatey nito Ari He̍rude̍s

²⁰ Ket ya napasamac itun, ket uwed pakaungtan ne̍ Ari He̍rude̍s kadiya umili ka Tiru se̍ Sidun. Dikad pe̍ uwed da nibon dito iTiru se̍ iSidun nga nawe̍ makitbar e̍ Ari He̍rude̍s. Ket dake̍c igida no uwed iyunget ne̍ Ari He̍rude̍s igida, ta diya il-ili nga iturayan ne̍ He̍rude̍s, itu ya pagal-alkan da kadiya kanen da. Dikad pe̍ pinona dito naibon ya nakigayyem e̍ Blastu nga itu ya isa nga pangulu iya baley ne̍ Ari He̍rude̍s, se̍ da sangkabungguy nga nawe̍ nakitunus e̍ Ari He̍rude̍s.

²¹ Ket ito nadatngan to algew nga pannakimiting ne̍ Ari He̍rude̍s kadito toley, nagkawwes ka luput ari, se̍ nawe̍ nagtugew ito napaw-is nga tugew ari, ket agipalpalawag igida.

²² Ket ito nalpas to panagkagi na, dinaydayaw dito toley nge̍ Ari He̍rude̍sin nga kinunen da nga nipkaw, “Isa nga diyus met yani nga nagkagi, bekken nas nga toley!” kunen da.

²³ Ket sigida nga dinusa niya isa nga anghe̍l niya Apu nge̍ Ari He̍rude̍sin, gapu ta bekken nga e̍ Apu Diyus ya pinadayawan na. Tutu ta naegsan nge̍ Ari He̍rude̍sin, se̍ natey.

²⁴ Ket itun nga timpu, nagdindinamag ya kagi ne̍ Apu Diyus, ket imadu win ya bilang dito mamati iya Apu.

²⁵ Ket de̍ Be̍rnabe̍ nge̍ Saulu, ito nalpas to gagara dan nga mangitulud kadito tulung dito iAntiyakiya ka He̍rusale̍m, simoli da manin enna Antiyakiya, ket nitarey da nge̍ Juan nga agnagan pe̍ ka Markus.