Aramid 11 - Ya Baru nga Tulag

To panangilawlawag ne̍ Pe̍dru ito panamati diya bekken nga Hudyu

¹ Ket itun, nadamagin dito apustule̍s se̍ diya duduma nga Hudyu nga agkakabsat ka pammati enna pagiliyan diya Hudyu, nga uwed da pe̍ yin bekken nga Hudyu nga mamati iya kagi ne̍ Apu Diyusin.

² Ket ito nawe̍ nge̍ Pe̍dru ka He̍rusale̍min, dinlaw dito duduma nga Hudyu nga mamati e̍ Je̍sus, nga kinunen da,

³ “Ape̍ nagedyan se̍ nakikan ka kadiya bekken nga Hudyu?” kunen da e̍ Pe̍dru.

⁴ Dikad pe̍ nilawlawag ngarud ne̍ Pe̍dru igida dito amin nga napasamac manipud ito damu na, nga kinunen na,

⁵ “Ito kauwed ku ka ili nga Huppa nga agkarkararag, uwed nipasingen ne̍ Apu Diyus iyaken iya parparmatac. Ket uwed arig nga dackel nga ules nga naibaluyubuy nga nasiluwan diya sulsuli na. Ket naggayat ka langit nga dinumsag ito edyan ku.

⁶ Ket ito bettabettaac, nasingec nga namayanan met ka an-animal, aguy-uyas se̍ sibsibud.

⁷ Ket uwed met pe̍ nagicnac nga timec nga kinunen na iyaken, ‘Gumnukat kan Pe̍dru, ta agparti ka ka sidaem kadiyan,’ kunen nito timec.

⁸ “Ngem kinunec, ‘Ay, madi met mabalin Apu! Ta madic ngarud nga kanen diya agten kadiyan nga naibilang nga dake̍c se̍ maiparit nga masida dakami nga Hudyu,’ kunec.

⁹ “Ket kinunen manin nito timec nga gayat ka langit, ‘Di ka ibilang nga dake̍c ya nibilang ne̍ Apu Diyus nga nadalusin,’ kunen na met.

¹⁰ Ket name̍tlu nga naariman ya agten iyan, ket kalpasan na, naipangatu ya amin ka langitin.

¹¹ “Ket pag-isu met nga uwed inumbe̍t nga tellu nga lalaki nga gayat ka Se̍sarya, nga nakadateng dan ito baley nga paged-edyanac itun.

¹² Ket ya Ispiritu Santu, kinunen na met iyaken nga madi yac kuma nga agduwaduwa nga mibulun igida. Itu nga iyaken se̍ didi nga ennem nga kakabsat tida ka pammati, nibulun kami igida. Ket linumnec kami ngarud ito baley ne̍ Kurne̍lyu, nga itu to nangpaayab iyaken.

¹³ “Ket e̍ Kurne̍lyu, nisalaysay na dakami nga uwed nasingen na nga anghe̍l iya baley na, ket kinunen nito anghe̍l igina nga, ‘Mangibon ka ka toley nga mawe̍ ka Huppa ngin, nga mawe̍ da ayaban ya toley nga agnagan ka Simon nga inagan da pe̍ ka Pe̍dru.

¹⁴ Ta igina met ya mangilawlawag ikew iya pakaisalakanam se̍ amin diya kabbalay mu,’ kunen kanu nito anghe̍l.

¹⁵ “Ket ito rugi pekkem niya panangasabac, inumbe̍t gayamin ya Ispiritu Santu nga nagedyan igida, nga agten pe̍ ito damu nga inumbe̍t na dactida nga Hudyu.

¹⁶ Ket nalagip kun to kinagi niya Apu itun, ito kinunen na, ‘To Juan, binautisaran nakayu ngarud ka danum itun. Ngem uwed nad panagbautisar nu nga pannakaiyalubu niya Ispiritu Santu dakayu,’ kunen niya Apu itun.

¹⁷ Ket iya agten iyanin, diya bekken nga Hudyu met pe̍ ya pangipaayan ne̍ Apu Diyus iya Ispiritu Santu, agten pe̍ yin dactida nga Hudyu, ito namati tida pe̍ e̍ Apu Je̍su Kristu. Dikad pe̍ ya kunec, madic kuma ngarud kuntraen ya wangwanglen ne̍ Apu Diyus kunec,” kunen ne̍ Pe̍dru.

¹⁸ Ket ito nagicna dito mamati nga Hudyu yan, awan met pangdellawan da e̍ Pe̍dru win, no di lugud nagdayaw da e̍ Apu Diyusin, nga kinunen da, “Agten iyan ngarudin, ta gabay ne̍ Apu Diyus ya mangipaay pe̍ ka pagbabawiyan diya bekken nga Hudyu, nga pakae̍cdan da ka biyag nga agnanayun,” kunen da.

Dito nona nga naawagan ka Kristiyanu

¹⁹ Ito nakatey nito E̍ste̍ban itun, itu to panangrugi dito duduma nga mamati nga naiwarawara kadiya sabasabali nga il-ili, gapu ta maparparigat dan kadiya madi mamati e̍ Je̍sus. Ket dito duduma nga naiwarawara, nakadateng da iya pagiliyan nga Pe̍nisiya se̍ enna puru nga Sipre̍ se̍ iya ili nga Antiyakiya ka prubinsiya nga Sirya. Ket nibaga didi ya damag maipanggep e̍ Je̍sus kadiya pada da nga Hudyu, ngem madi da nakibiyang kadiya bekken nga Hudyu.

²⁰ Ngem agten idi ya napasamac itun: Uwed da pe̍ duduma nga lalaki igida nga iSipre̍ se̍ iSire̍ne̍. Ket nawe̍ da ka Antiyakiya, ket nangasaba da pe̍ kadiya bekken nga Hudyu, nga nikaskasaba da pe̍ igida ya Makaparagsac nga Damag maipanggep e̍ Apu Je̍sus.

²¹ Ket gapu ta uwed igida ya tulung niya Apu, adu diya namati e̍ Je̍sus, nga imapu da igina.

²² Ket to bungguy mamati ka He̍rusale̍m, ito nadamag da ya maipanggep kadito bekken nga Hudyu nga mamati enna Antiyakiya, nibon da nge̍ Be̍rnabe̍ antuni.

²³ Ket ito nakadateng nge̍ Be̍rnabe̍ ennan, naganggem, ta nasingen na ya nabaru nga nagbanagan niya siaayat nga asi ne̍ Apu Diyus kadito iAntiyakiya. Ket nangpabileg nge̍ Be̍rnabe̍ igida, nga kinagi na nga siiinget igida nga amin nga ituluy da kuma ya panamati da iya Apu, nga madi da kuma agduwaduwa.

²⁴ Ket iya agten iyan, imadu ya bilang dito bekken nga Hudyu nga mamati iya Apu ka Antiyakiya, ta e̍ Be̍rnabe̍, isa nga nanacman, se̍ paiturayan iya Ispiritu Santu se̍ iya nabaked nga panamati.

²⁵ Ket e̍ Be̍rnabe̍, nawe̍ na ngarud sinapul nge̍ Saulu ka Tarsu.

²⁶ Ket ito nasmac nan, nipen na ka Antiyakiya. Ket nakadagun da ennan nga nibulubulun kadito mamati antuni, ket adu dito nasursuruwan da ito bungguy da. Ket dito iAntiyakiya nga pasurut niya Apu, igida dito nona nga ninagan diya toley ka Kristiyanu.

²⁷ Ket ito kauwed pekkem de̍ Be̍rnabe̍ nge̍ Saulu ka Antiyakiya, uwed da toley nga inumbe̍t nga gayat ka He̍rusale̍m, nga itu diya nangikasaba kadiya paikagi ne̍ Apu Diyus.

²⁸ Agabu ya nagan niya isa igida. Ket nipakaemmu na nga uwed nad dackel nga panagbisin nga umbe̍t iya amin nga lubung, ta itu to nipaikagi niya Ispiritu Santu igina. Ket napatutuwan met yan nga panagbisin ito panagari ne̍ Klawdiyu ka Ruma.

²⁹ Ket dito pasurut niya Apu enna Antiyakiya nga bekken nga Hudyu, nalagip da ya mangipakagtu ka tulung da kadito kakabsat da ka pammati enna pagiliyan diya Hudyu. Nange̍cde̍ ya tunggal isa, sigun iya kabaellan na nga e̍cde̍.

³⁰ Nipakagtu da ngarud kade̍ Be̍rnabe̍ nge̍ Saulu to nakadagupan dito e̍cde̍ da kadiya panglakayen dito mamati ka He̍rusale̍m.