Aramid 10 - Ya Baru nga Tulag

To panangpaayab nito Kurne̍lyu e̍ Pe̍dru

¹ Ket itun, enna Se̍sarya, uwed isa nga lalaki nga agnagan ka Kurne̍lyu. Ket e̍ Kurne̍lyu, kapitan niya isa nga bungguy suldadu nga maawagan ka Kumpanya Italyana.

² Ket orey bekken nga Hudyu nge̍ Kurne̍lyu, igina se̍ diya kabbalay na, managdayaw da met pe̍ e̍ Apu Diyus. Nakaasi pe̍ nga unay kadiya Hudyu nga napanglaw, se̍ managkararag pe̍ e̍ Apu Diyus.

³ Iya name̍nsan nga algew, iya banda alas tre̍s iya gidam, uwed nalawag nga nasingen na iya parparmata na nga isa nga anghe̍l ne̍ Apu Diyus. Ket linumnec to anghe̍l ito edyan na nga kinunen na, “Kurne̍lyu!” kunen na.

⁴ Ket nakam-amutleng ngarud nge̍ Kurne̍lyu ito anghe̍l, ta nakigtut mettin, ket kinunen ne̍ Kurne̍lyu, “Nagan na, apu?” kunen na. Ket kinunen nito anghe̍l, “Silalagip nge̍ Apu Diyus ikew, ta inannamungan na dito karkararag mu, se̍ emmu na pe̍ ya panangaasim kadiya makasapul.

⁵ Ket itan, mangibon ka ka toley nga mawe̍ ka Huppa ngin, nga mawe̍ da ayaban ya toley nga agnagan ka Simon nga inagan da pe̍ ka Pe̍dru.

⁶ Aged-edyan iya pingit niya baybay iya baley niya isa nga Simon nga agdaldalus ka lalat nga para laku,” kunen na.

⁷ Ket ito pimanawin to anghe̍l, uwed pinkawan ne̍ Kurne̍lyu nga duwa kadiya katulung na, se̍ isa nga katulungan na nga suldadu nga managdayaw pe̍ e̍ Apu Diyus.

⁸ Ket ito naibaga na nga amin dito kinagi nito anghe̍l iginan, nibon na da ka Huppa ngin.

To nakaskasdaaw nga naipasingen e̍ Pe̍dru

⁹ Iya matuun ito kadamlag na, umad-adenni dito nibon ne̍ Kurne̍lyu ka Huppa ngin. Ket e̍ Pe̍dru, nawe̍ nagkararag iya nasimpa nga atep de̍ Simon.

¹⁰ Ket nabisin nge̍ Pe̍dru win, ket gabay na ya mangan kuma ngin. Ket ito madama pekkem diya agut-utu, uwed nipasingen ne̍ Apu Diyus e̍ Pe̍dru iya parparmata na.

¹¹ Ket nasingen na nga arig nga nalukatan ya langit, ket uwed arig nga dackel nga ules nga dinumsag iya edyan na nga naibaluyubuy nga nasiluwan diya sulsuli na.

¹² Ya mayan nito ules, ket amin nga kita an-animal, aguy-uyas se̍ sibsibud.

¹³ Ket uwed met nagicna na nga timec nga kinunen na igina, “Gumnukat kan, Pe̍dru, ta agparti ka ka sidaem kadiyan,” kunen na.

¹⁴ Ngem kinunen ne̍ Pe̍dru, “Ay, madi met mabalin, Apu! Ta madic ngarud nga kanen diya agten kadiyan nga naibilang nga dake̍c se̍ maiparit nga masida dakami nga Hudyu,” kunen na.

¹⁵ Ket kinunen manin nito timec igina, “Di ka ibilang nga dake̍c ya nibilang ne̍ Apu Diyus nga nadalusin,” kunen na.

¹⁶ Name̍tlu nga naariman ya agten iyan, ket kalpasan na, dagus nga naipangatu to sinan-ules ka langitin.

¹⁷ Ket e̍ Pe̍dru, pinanpanunut na no nagan ngata ya banag nito nipasingen ne̍ Apu Diyus igina ito parparmata na. Ket pag-isu, dito toley nga nibon ne̍ Kurne̍lyu, uwed dan ito ruwangan niya paraangan nito baley ne̍ Simonin, ta nasmac dan.

¹⁸ Ket imawag da nga emmuwen da no iyan ya paged-edyanan nito Simon nga inagan da pe̍ ka Pe̍dru.

¹⁹ Ket e̍ Pe̍dru, uwed pekkem ito atep nga ut-utuben na to naipasingen igina ito parparmata na. Ket kinunen niya Ispiritu Santu iginan, “Uwed tellu nga lalaki nga makasapul ikew win.

²⁰ Umulug kan, ta mibulun ka igida, nga awan duwaduwam, ta iyaken ya kin-ebbon igida,” kunen na.

²¹ Ket ito nakaulug nge̍ Pe̍dru win, kinunen na kadito naibon, “Iyaken met ya masapul nu. Nagan kad ya numbe̍tan nu?” kunen na.

²² Ket dito naibon, kinunen da, “E̍ Kapitan Kurne̍lyu ya nangibon dakami. Ket e̍ Kapitan Kurne̍lyu, isa nga nalinteg nga toley, se̍ managdayaw e̍ Apu Diyus. Ket orey pe̍ amin diya padam nga Hudyu, raemmen da pe̍. Ket nibon nakami idi, ta uwed kanu isa nga anghe̍l ne̍ Apu Diyus nga mangpaayab igina ikew, tasun denggen na kanu diya ibagam,” kunen da.

²³ Ket pinalnec ngarud ne̍ Pe̍dru da, ket dimagus da met pe̍ ito baley yin. Ket ito kadamlag na, nibulun nge̍ Pe̍dru kadito nibon ne̍ Kurne̍lyu. Uwed da pe̍ kakabsat ka pammati nga iHuppa nga nangbulun igina.

To panangilawlawag ne̍ Pe̍dru kade̍ Kurne̍lyu

²⁴ Ket ito kadamlag na manin, dimateng da ka Se̍sarya. Ket uwed da amin de̍ Kurne̍lyu, diya kabagiyan na se̍ diya gagayyem na nga ag-agton, ta nisangapalbe̍t na da pe̍.

²⁵ Ket ito lumnec nge̍ Pe̍dru win, sinabet ne̍ Kurne̍lyu, ket naglakeb iya sangu ne̍ Pe̍dru nga sidadayaw igina.

²⁶ Ngem e̍ Pe̍dru, pinagsikad na nge̍ Kurne̍lyu, ket kinunen na, “Agsikad ka a, ta toley yac met pe̍,” kunen na.

²⁷ Dikad pe̍ nagtetebbar dan nga linumnec ito baley na, nga nawe̍ nangdateng kadito adu nga toley nga naurnung.

²⁸ Ket kinunen ne̍ Pe̍dru igida, “Emmu nun ya ugali mi nga Hudyu, nga maiparit dakami ya makigayyem dakayu nga bekken nga Hudyu, winno orey lumnec iya baley nu. Ngem nipakaemmu ne̍ Apu Diyus iyaken nin nga awan kuma toley nga ibilang ku nga dake̍c winno maiparit.

²⁹ Dikad pe̍ ito pinaayaban dac, bekken nac nga nagmadi nga umbe̍t dakayu idi. Ket ita, itu ya gabay ku nga emmuwen dakayu, no ape̍ nga pinaayaban dac?” kunen na.

³⁰ Ket agten idi to kinunen ne̍ Kurne̍lyu: “Itu ya maikapat nga algew win nanipud ito napasamac iyaken, ta uwed dac itun nga agkarkararag idi nga baley ito alas tre̍s, nga agten mettas idi nga uras iya gidam. Ket pagamwac ngas nga uwed lalaki nga agsisikad iya sanguc nga sumilsilap ya luput na.

³¹ Ket kinunen nito lalaki iyaken, ‘Kurne̍lyu, inannamungan ne̍ Apu Diyus ya kararag mu, se̍ laglagipen na diya panangaasim kadiya makasapul.

³² Mangibon ka ka toley nga mawe̍ ka Huppa ngin, nga mawe̍ da ayaban ya toley nga agnagan ka Simon nga inagan da pe̍ ka Pe̍dru. Aged-edyan iya pingit niya baybay iya baley niya isa nga Simon nga agdaldalus ka lalat nga para laku,’ kunen nito lalaki iyaken.

³³ “Itu nga sigida nga pinaayaban naka, ket gapu iya panangaasim, inumbe̍t kan. Ket itan, naguurnung kami nga amin nga sidadayaw iya imatang ne̍ Apu Diyus, tasun aggigicna kami kadiya amin nga paikagi niya Apu ikew,” kunen ne̍ Kurne̍lyu.

³⁴ Ket rinugiyan ngarud ne̍ Pe̍dru ya nangaskasaba nga kinunen na, “Nalawag met iyaken nin nga awan nga tutu idumduma ne̍ Apu Diyus kadiya toley.

³⁵ Ta awaten na met ya orey nagan na nga toley iya orey awac nga nasyun, no e̍ Apu Diyus ya ipatpateg na se̍ no wanglen na pe̍ diya nalinteg.

³⁶ “Emmu nun ya Makaparagsac nga Damag nga nipakaemmu ne̍ Apu Diyus dakami nga iIsrae̍l maipanggep e̍ Je̍su Kristu nga Apu diya amin nga toley. Ta e̍ Je̍sus, igina ya mangitunus dactida e̍ Apu Diyus.

³⁷ Ket emmu nu met pe̍ ya maipanggep kadito naar-ariman iya prubinsiya nga Hudya se̍ diya duduma nga prubinsiya idi nga pagiliyan. Ket nangrugi diyan nga napasamac enna prubinsiya nga Galilya, kalpasan nito panangikasaba nito Juan ito panangbacbautisar na.

³⁸ Ket emmu nu met pe̍ nga pinili ne̍ Apu Diyus nge̍ Je̍sus nga iNasare̍t nga nae̍cdan iya Ispiritu Santu se̍ iya pannakabalin na. Ket nagpaspasyar nge̍ Je̍sus nanipud ka Galilya, nga timultulung kadiya toley, se̍ pinalaing na pe̍ diya nasairuwan nga toley, ta uwed met nge̍ Apu Diyus igina.

³⁹ “Ket dakami nga apustule̍s na, mangipakaemmu kami iya pudnu maipanggep kadiya nasingen mi, nga amin dito winangwangel na ka He̍rusale̍m, se̍ orey pe̍ kadiya amin nga il-ili mi nga Hudyu. Se̍ nasingen mi pe̍ nga nilansa da met ka krus, nga itu ya nakatayan na.

⁴⁰ Ngem e̍ Apu Diyus, pinagungar na met nge̍ Je̍sus iya maikatlu nga algew, se̍ na nibon nga nagpasingen ka toley.

⁴¹ Nakisangu kami ngarud pe̍ igina nga nangan kalpasan nito panagungar na. Ngem bekken nga amin nga toley ya nakasingen e̍ Je̍sus itun, ta dito nakasingen igina, dakami ngas nga pinili ne̍ Apu Diyus nga mangipakaemmu iya pudnu maipanggep igina.

⁴² Ket nibilin pe̍ ne̍ Je̍sus nga mangikasaba kami kadiya toley, nga ipanecnec mi kanu nga sipapasnec nga e̍ Je̍sus, igina ya dinutukan ne̍ Apu Diyus nga mangikeddeng no nagan na ya pagtungpalan diya toley nga sibibiyag pekkem se̍ diya natey yin.

⁴³ E̍ Je̍sus met to nipakaemmu dito amin nga mammadtu nga Hudyu itun, ta nipakaemmu da nga gapu iya kinaturay na, mapakawan diya basbasul diya amin nga mamati igina,” kunen ne̍ Pe̍dru kade̍ Kurne̍lyu.

To inumbe̍t niya Ispiritu Santu kadiya bekken nga Hudyu

⁴⁴ Ket ito agkagkagi pekkem nge̍ Pe̍dru, inumbe̍t ya Ispiritu Santu nga nagedyan kadito amin nga aggigicna ito kagkagiyen ne̍ Pe̍dru.

⁴⁵ Ket dito mamati nga Hudyu nga nibulun e̍ Pe̍dru nga gayat ka Huppa, nasdaaw dan kadito iSe̍sarya. Ta orey bekken da nga Hudyu, inalubuwan met pe̍ ne̍ Apu Diyus da iya Ispiritu Santu.

⁴⁶ Ta nagicna da nga nagkagkagi da ka nadumaduma nga pagkakagi, se̍ nagicna da pe̍ ya panagdaydayaw da e̍ Apu Diyus.

⁴⁷ Ket kinunen ne̍ Pe̍dru kadito kabulun na, “Uwed met pe̍ kadidi ya Ispiritu Santu win, nga agten pe̍ dactida. Dikad pe̍ madi tida ngarud nga maiparit ya panagbautisar da ka danum,” kunen na.

⁴⁸ Ket nibilin ngarud ne̍ Pe̍dru nga mabautisaran dan, gapu iya panamati da iya kinaturay ne̍ Je̍su Kristu win. Ket kalpasan na, pinagedyan pekkem de̍ Kurne̍lyu nge̍ Pe̍dru iya edyan da ka sumagpipiga nga algew pekkem.