3 Juan 1 - Ya Baru nga Tulag

¹ Iyaken ya panglakayen. Agsurat tac ikew, patgec nga Gayu, nga ay-ayatec nga sipupudnu.

² Emmuc nga nabaru ya nakem mu e̍ Apu Diyus, patgec nga gayyem, ket ikararag ku nga nabaru kuma pe̍ ya kasasaad mu, se̍ nakaradkad ka kuma pe̍.

³ Emmuc nga nabaru nga tutu ya nakem mu, ta uwed kakabsat tida nga inumbe̍t idi, ket naragsakan nac nga unay gapu ito nipadamag da iyaken. Ta nibaga da ya napudnu nga panagbiyag mu, nga sumursurut ka kanu iya pudnu nga pammati.

⁴ Naragsakan nac ngarud gapu ikew, ta aganggem mac nga unay no madamag ku nga uwed da anac ku ka pammati nga sumursurut iya pudnu nga pammati. Itu ya kadackellan nga makapaanggem iyaken.

Ya tulung ne̍ Gayu kadiya mangaskasaba

⁵ Patgec nga gayyem, maitutup met iya pammati tida ya panagrispitar mu kadiya kakabsat tida ka pammati, orey no madi mu da em-emmu.

⁶ Ket uwed da met kadidi diya nangipadamagin iya bungguy mamati ennidi maipanggep iya panagayat mu igida. Ket no uwed da manin dumagdagus iyan, pangngaasim kay ta nabaru met no tulungam da iya orey nagan na nga masapul da iya panagbulay da. Ta itu ya tumutup nga ugali diya agsirsirbi e̍ Apu Diyus.

⁷ Tulungam da kuma ngarud, ta nigagara didi ya mangipakaemmu maipanggep iya kinaturay ne̍ Je̍sus, nga awan met pe̍ naawat da nga tulung nga gayat kadiya bekken nga mamati.

⁸ Itu nga no dactida, tulungan tida kuma diya agten iyan, tasun makitipun tida igida iya panangipakaemmu da maipanggep iya pudnu nga pammati.

Ya kinadake̍c ne̍ Diyutre̍pe̍s

⁹ Uwed nisurat ku itun iya bungguy mamati iyan nga edyan mu. Ngem e̍ Diyutre̍pe̍s, madi nac met nipangag. Madi na ngarud dayawen ya turay ku, ta gabgabay na met no igina ngas ya mangipangulu dakayu.

¹⁰ Itu nga no umbe̍t tac nad iyan, ipalawag ku dakayun diya dake̍c nga wangwanglen na, ta uwed met kagkagiyen na nga dake̍c maipanggep dakami. Ket bekken nas nga iyan ya wangwanglen na nga dake̍c, ta no uwed kabsat tida ka pammati nga dumagus iyan, madi na da met awaten. Ket no uwed dakayu diya mayat nga umawat igida, paritan na da met, se̍ na da met pe̍ laskigen iya bungguy mamati yin.

Ya kinanacman ne̍ De̍me̍triyu

¹¹ Patgec nga gayyem, madi ka kuma ngarud tuladen ya ugali nga dake̍c, no di kuma ya nabaru ya tuladen nu. Ya agariman ka nabaru, ket kameng ne̍ Apu Diyus. Ngem ya agariman ka dake̍c, madi pekkem makaawat maipanggep iya gangey ne̍ Apu Diyus.

¹² Ket no e̍ De̍me̍triyu, agdindinamag kadiya aminin ya kinanacman na. Ta nabatad ya kinanacman na gapu kadiya wangwanglen na nga maikanatad iya pudnu nga pammati. Ket dakami met pe̍ ya mangipanecnec iya kinanacman na, ket emmum nga napudnu ya panangpanecnec mi.

¹³ Adu kuma pekkem ya ibagac ikew, ngem madic gabay no isurat ku was ka pape̍l.

¹⁴ Ta namnamaec nga agsingen ta iya di mabayagin, ket itu nad ya panagam-amlang tan.

¹⁵ Natalna kuma nga pe̍yeng ya nakem mu. Kumusta ka kanu kunen diya gagayyem tida ennidi. Ket pakumustaan mi pe̍ ya tunggal isa nga gagayyem mi iyan.