2 Timutyu 3 - Ya Baru nga Tulag

Ya kinadake̍c niya mod-odi nga timpu

¹ Ket tandaanam yani: Uwed nad ngarud panagrigat iya kaodiyan nga timpu wi.

² Ta uwed da nad mangtungtungpal ngas iya uwed iya panpanunut da. Ket ya panagbacnang, itu nad ya ipatpateg dan. Napangas da, natangsit, managuyaw, se̍ di da met mangikaskasu kadiya naganac igida. Ket madi da nad pe̍ emmu ya agyaman, se̍ pulus nga awan panangipateg da e̍ Apu Diyus.

³ Pulus nad nga awan panagayat da kadiya kapada da, ket madi da mapnec iya tungpalen niya toley. Managsadap da, se̍ nabuclis se̍ nauyung da, ket kagura da nad ya orey nagan na nga nalinteg.

⁴ Mangliliput da kadiya kabulun da, ket awan anyaman igida niya pagtungpalan niya wangwanglen da. Napalaus nad met pe̍ ya panagpasindayaw da. Ket ya pagragsakan da, napatpateg nad met igida ngem iya panangipateg da e̍ Apu Diyus.

⁵ Uwed nad tungtungpalen da nga maigapu kanu iya pammati da, ngem busid met, ata madi da gabay ya masuruwan kadiya banbanag niya kustu nga panamati e̍ Apu Diyus. Adeyyuwam ngarud diya agten kadiyan nga toley.

⁶ Ta ya ugali diya duduma igida, ket sicsikapan da diya toley, tasun makasrec da kadiya babaley da, se̍ allilawen da diya babey nga mariribuc diya panpanunut da gapu kadiya adu nga basbasul da. Ket didi nga babey, nalaka da nga maawis, gapu ta paiturayan da ngas kadiya sabasabali nga ricricna da.

⁷ Ta diya agten iyan nga babey, nalaing da nga aggigicna iya orey nagan na, ngem pulus nga madi da makailasin iya kinapudnu.

⁸ Ket diya toley nga mangallilaw kadiya agten iyan nga babey, agten da met kade̍ Hane̍s nge̍ Hambre̍s nga nagsukir e̍ Muyse̍s itun. Ta didi nga mangallilaw nga kunec, pagsukiran da nad met pe̍ ya pudnu. Dake̍c ya uwed iya panpanunut da, ket bekken met nga pudnu ya panamati da.

⁹ Ngem awan pagbanagan da nga nalaing diyan nga toley. Ta nalawag nad met kadiya amin nga duduma nga toltoley nga dake̍c ya wangwanglen da, nga agten pe̍ ito napasamac kadito Hane̍s nge̍ Hambre̍s itun.

Pamagbaga maipanggep iya panagsagana ka pannakairurumen

¹⁰ Ngem ikew, emmum nga nalaingin ya nisursuruc. Ket emmum pe̍ ya ugalic se̍ ya panggep ku idi nga biyag ku. Napanecnekkam pe̍ ya panamatic, ya kinaanus ku, ya panagayat ku, se̍ ya panagitured ku.

¹¹ Naemmuwam pe̍ dito pannakairurumen ku, se̍ ya panaglak-am ku ka orey nagan na nga rigat, nga agten kadito napasamac iyaken enna Antiyakiya, Ikunyu, se̍ Listra, se̍ dito pannakairurumen nga nitured ku itun. Ngem ya Apu, nisalakan nac kadiya amin nga agten kadiyan.

¹² Ngarud, bekken nas nga iyaken ya mairurumen, no di pe̍ diya amin nga mayat nga mangay-ayu e̍ Apu Diyus gapu iya panagbiyag da sigun iya pannakaitipun da e̍ Kristu Je̍sus.

¹³ Ket diya paiturayan ka dake̍c, ad-adda nad met nga dumake̍c da. Ket se̍ diya mangal-allilaw, ket kumarkaru nad met pe̍ ya panangallilaw da kadiya toley. Ngem igida ngas met ya maallilaw nga tutu.

¹⁴ Ngem ikew Timutyu, napasnec ka kuma nga pe̍yeng kadito naisuru ikew nga sinalimetmettam itun. Ituluy mu ya panangipateg mu kadiyan, ta emmum no nagan da dito nangisuru ikew kadiyan.

¹⁵ Malagip mu pe̍ nga manipud ito kinaebbing mu, ket nasuruwan kan kadito nipaisurat ne̍ Apu Diyus. Ta ya naisurat iya Bibliya, itu ya makae̍cde̍ ka pannakaawat mu maipanggep iya pannakaisalakan gapu ka panamati e̍ Kristu Je̍sus.

¹⁶ Ket amin nga naisurat iya Bibliya, nipaisurat ne̍ Apu Diyus. Itu nga ya naisurat iya Bibliya, kustu nga pangisuru iya kinapudnu, pangilbec, mangipakaemmu ka irradu, se̍ pakaadalan ka nalinteg nga panagbiyag.

¹⁷ Ket naipasurat ngarud ya Bibliya tasun awan kuma pagkurangan niya toley nga agsirbi e̍ Apu Diyus, se̍ tasun sisasagana kuma nga mangariman iya orey nagan na nga nabaru.