2 Timutyu 2 - Ya Baru nga Tulag

Ya ugali diya tutu nga agpaay e̍ Apu Je̍sus

¹ Ket ikew, nga ibilang ku nga anac, bumileg ka kuma gapu iya siaayat nga asi nga kuwa tida gapu iya pannakaitipun tida e̍ Kristu Je̍sus.

² Ket amin dito nagicnam nga nisuruc kadito adu nga naggigicna itun, ipakaemmum pe̍ yin nga italec kadiya toley nga mapagtalkan. Ket igida ya makabalin nga mangisuru nad pe̍ kadiya duduma.

³ Anusam diya rigrigat mu nga arig nga nalaing ka nga suldadu ne̍ Kristu Je̍sus.

⁴ Ket emmu ta nga ya suldadu nga uwed iya nakaibonan na, madi ngarud makibiyang kadiya wangwanglen diya sibilyan, ta gabay na nga ay-ayuwen ya turayen na nga suldadu.

⁵ Ket maiyarig tida pe̍ iya isa nga makisalisal ka lumba. Ket emmu tida nga ya isa nga makisalisal, awan magun-guna na no di na nga tungpalen ya paglinteggan niyan nga pagsasalisalan da.

⁶ Maiyarig tida pe̍ iya nagaget nga agwangel iya mumulaan na. Ket emmu tida nga no uwed nad maapitin, ket igina kuma ya mona nga aglak-am iya apit na.

⁷ Utubem ngarud diya nibagbagac ki, ata emmuc nga e̍cde̍ ne̍ Apu Diyus ya pannakaawat mu maipanggep kadiyan nga amin.

⁸ Ket ya laglagipem kuma ngarud nga pe̍yeng, itu nge̍ Je̍su Kristu nga napagungar iya pannakatey na, nga igina ya isa nga kapututan nito Ari Dabid. Itu yan ya banag niya Makaparagsac nga Damag nga ikasabac.

⁹ Ket gapu ta ipalawag ku yan nga Makaparagsac nga Damag, itu ya gapu na nga uwed dac idi nga aglak-am ka rigatin, nga sibabalud dac kun nga sikakawar, nga arig nga isa nga managbasul. Ngem orey maigapus sac ennidi, madi nga gennung nga maigapus ya kagi ne̍ Apu Diyus.

¹⁰ Itu nga anusac ngas ya orey nagan na, para kadiya pinili ne̍ Apu Diyus nga toley na. Agten ngarud iyan ya wanglec, tasun maisalakan da pe̍ gapu e̍ Kristu Je̍sus nga mangiraman igida iya pannakapadayaw na nga madi agpatingga.

¹¹ Tutu met yani nga kunen diya toley: “No nairaman tida iya pannakatey na, mairaman tida met pe̍ iya panagbiyag na.

¹² Ket no anusan tida ya panagrigat tida para igina, makipagturay tida nad met igina. Ket no kunen tida nga madi tida em-emmu, kunen na nad met pe̍ nga di nactida em-emmu.

¹³ Ket orey no nakapsut ya panamati tida, tungpalen na pekkem ya kagi na, ta madi mabalin nga baybay-an na ya bukud na nga panggep.”

Ya nabaru nga panagsirbi e̍ Apu Diyus

¹⁴ Ipalagip mu diyan nga banbanag kadiya toltoley ennan. Ket bilinem da iya imatang mettas ne̍ Apu Diyus, nga madi da ngarud pagdidinniskutiran diya awan pagbanagan da nga nabaru. Ta ya agten iyan nga panagdidiskutir, mangpirdi ngas iya panamati diya aggigicna.

¹⁵ Ngem ikew, wanglem ya amin nga kabaellam iya imatang ne̍ Apu Diyus, tasun maibilang ka nga isa nga agsirsirbi nga maannamungan. Agannad ka kuma ngarud tasun awan iyalyew mu gapu iya wangwanglem, se̍ tasun kustu ya panangisurum iya kinapudnu nga nipakaemmu ne̍ Apu Diyus.

¹⁶ Ket diya panagsusungbat nga madi makaay-ayu e̍ Apu Diyus, adeyyuwam mas, ta mangpadeyyu was diyan kadiya toltoley iya panagdayaw e̍ Apu Diyus.

¹⁷ Ket diya agten iyan nga panursuru niya toley, maiyarig iya talingu nga lumanlan. Agten iyan met ya panursuru de̍ Hime̍nyu nge̍ Pile̍tu.

¹⁸ Ta igida nga duwa, imadeyyu dan iya pudnu nga sursuru, ket riribuken da mettin ya panamati diya duduma. Ta kunen da nga nalpasin ya panagungar diya natey.

¹⁹ Ngem ya panursuru nga gayat e̍ Apu Diyus, madi met mariribuc ya pungut na, ta nabaked met. Ket maiyarig nga namarkaan kadidi nga kagi: “Emmu ne̍ Apu Diyus no nagan diya toltoley na.” Se̍ kunen na pe̍, “Amin diya umapu igina, ket masapul nga ipac da diya wangwanglen da nga dake̍c,” kunen na met.

²⁰ Kaspagarigan no ya baley niya isa nga bacnang, ket adu diya alikamen iya uneg na. Uwed da napateg, nga agten kadiya naariman ka kuwarta winno balituc, se̍ uwed pe̍ diya nakal-alyew nga naariman nas ka kayu winno naduwin nga ginet. Ket diya napateg nga alikamen, mausar kadiya napateg nga panggep. Ngem diya nakal-alyew nga gennung, se̍ ngas mausar kadiya bekken nga napateg.

²¹ Arig tida met pe̍ nga iyan, ta ya umadeyyu kadiya nakal-alyew nga banbanag, maiyarig iya isa kadito napateg nga alikamen nga mausar kadiya orey nagan na nga napateg nga panggep niya akin-kuwa igina. Ket awan met sabali nga mabalin nga mangusar iyan, no di ngas ig-igina nga akin-kuwa.

²² Ket no ikew, adeyyuwam kuma ngarud diya ricricna nga kadawyan diya babagu. Ket agintec ka lugud iya panagbiyag mu nga nalinteg, se̍ kadiya mangpabileg iya panamati e̍ Apu Diyus, se̍ iya panagayat, se̍ iya panagtutunus. Ta itu pe̍ ya ugali diya nabaru ya nakem na nga mamati iya Apu.

²³ Ket adeyyuwam pe̍ diya awan mamaay na nga panagdidinniskutir, nga agtaud ngas kadiya kurang ya pannakaemmu na. Ta emmum met nga agtungpal da ngas ka panagsusuway.

²⁴ Ngem ya agsirsirbi nga gennung iya Apu, madi mabalin nga makisusuway, no di lugud nanacman kadiya amin nga toley. Ta masapul nga isa nga nalaing nga mangisuru nga di nalaka nga malucsew.

²⁵ Masapul pe̍ nga naannad ya panagbagbaga na kadiya mangkuntra igina, bareng no e̍cdan ne̍ Apu Diyus ka gundaway da nga agbabawi, tasun maawatan da ya pudnu.

²⁶ Ket iya agten iyan, bareng no agnakem da, se̍ makatalew dan iya panangituray niya diyablu. Ta arig nga nacna dan iya sinan-ilug na, tasun ya tarigagay na ya tungtungpalen dan.