2 Timutyu 1 - Ya Baru nga Tulag

¹ Iyaken nge̍ Pablu nga pinagbalin ne̍ Apu Diyus nga isa nga apustul nga agpaay e̍ Kristu Je̍sus. Maikanatad yani ito kari na maipanggep iya biyag nga mae̍cde̍ dactida nga maitipun e̍ Kristu Je̍sus.

² Suratan naka, Timutyu, nga ikew ya ibilang ku nga patgec nga anac. Sapay kuma ta uwed ikew ya siaayat nga asi, tulung, se̍ talna, nga gayat e̍ Apu Diyus nga Ama se̍ e̍ Kristu Je̍sus nga Apu tida.

To pudnu nga panamati ne̍ Timutyu

³ Ikararagan naka nga pe̍yeng iya algew se̍ gabi, nga agyaman nac e̍ Apu Diyus gapu ikew. Ket igina ngarud ya pagsirsirbiyac ka nadalus nga nakem, nga agten mettas ito panagsirsirbi dito am-amac igina itun.

⁴ Malagip ku ngarud to leddaang mu nga nagluwaam itun, ket masut tac kun nga makasingen manin ikew tasun makaanggem mac, nga mipac ya essut kun.

⁵ Malagip ku pe̍ ya pudnu nga panamatim, nga agten ito panamati nito apum nga Loyda se̍ e̍ inam nga Yunise̍. Ket emmuc nga ya panamatim, pada met nito panamati da orey itun pekkem.

To makaalayu nga pamagbaga ne̍ Pablu e̍ Timutyu

⁶ Itu nga ipalagip ku ikew nga pabilgem kuma ngarud ya pannakabalin nga ne̍cde̍ ne̍ Apu Diyus ikew ito nipatey ku diya imac ikew itun.

⁷ Ta bekken nga kinakapdog ya ne̍cde̍ ne̍ Apu Diyus dactida, no di lugud pannakabalin, kinamanagayat, se̍ kinanakem gapu iya Ispiritu Santu.

⁸ Dikad pe̍ madi ka ngarud malyew nga mangibaga iya maipanggep iya Apu tida. Ket se̍ madi nac met pe̍ iyalyew, ta naibalud dac ennid gapu was iya panamatic igina. Ituluy mu was ya panangibagbagam iya Makaparagsac nga Damag, orey no itu ya pakarigatam. Ta makipagkanunung ka lugud ka kinarigat iyaken nga mangibagbaga iya Makaparagsac nga Damag. Ket e̍ Apu Diyus ya mange̍cde̍ ka tured mu nga aganus iyan.

⁹ Igina met ya nangisalakan dactida, se̍ igina pe̍ ya nangpili dactida nga agbalin nga toley na. Bekken nga gapu iya nawangel tida diyan, no di lugud gapu iya kabucbukudan na nga panggep se̍ siaayat nga asi. Ket nipaay na yani nga siaayat nga asi na dactida itun pekkem, gapu mettas e̍ Kristu Je̍sus, orey ito madi pekkem naparsuwa ya lubung.

¹⁰ Ket gapu ito numbe̍tan ne̍ Kristu Je̍sus nga Mangisalakan dactida, nalawagin to panggep ne̍ Apu Diyus nga nangaasi dactida. Ta e̍ Kristu Je̍sus, inabac na met to pannakabalin niya patey. Ket gapu iya banag niya Makaparagsac nga Damag, nipalawag na dactidan maipanggep iya biyag nga awan pagpatinggaan na.

¹¹ Ket iyaken met ya pinili ne̍ Apu Diyus nga apustul nga mangikasaba se̍ mangisuru iyan nga Makaparagsac nga Damag.

¹² Ket itu ya gapu na nga laklak-amec didi nga rigrigat ku. Ngem orey agten iyan, awan iyalyew ku kadidi, gapu ta em-emmuc met yan nga talkec. Ket siguradu wac met nga igina ya makaaywan iyan nga nitalec na iyaken agingga nad iyan nga Timpu na.

¹³ Patgem kuma ngarud to kustu nga sursuru nga nipakaemmuc ikew itun, ta itu kuma ya isurum. Ket no isursurum, ituluy mu ya panamati se̍ panagayat mu nga tumaud iya pannakaitipun mu e̍ Kristu Je̍sus.

¹⁴ Ket uwed met pe̍ dactida ya pannakabalin niya Ispiritu Santu nga aged-edyan dactida. Ket igina ya tumulung ikew tasun madi ka liwayan ya kustu nga sursuru nga naitalec ikew.

To panangliwliwa ne̍ One̍sipuru e̍ Pablu

¹⁵ Ket emmum mettin nga binaybay-an dac kun dito amin nga kabulun ku enna prubinsiya nga Asiya, agraman de̍ Pige̍lu nge̍ He̍rmuge̍ne̍s.

¹⁶ Ngem to One̍sipuru nga gennung, name̍n-adu nga liniwliwa nac, nga madi na niyalyew ya pannakaibalud ku. Itu nga ikararag ku nga kaasiyan kuma ne̍ Apu Diyus ya pamilya na.

¹⁷ Ta ito inumbe̍t idi Ruma, nikarigatan nac nga sinapsapul patingga ka nasmac nac.

¹⁸ Kaasiyan kuma ngarud ne̍ Apu Je̍sus to One̍sipuru nad iya Timpu na. Ket orey ito kauwed ku iyan E̍pe̍su, emmum mettin nga adu nga unay dito nikaasi na iyaken itun.