2 Te̍salunika 3 - Ya Baru nga Tulag

Ya talged diya maparigatan

¹ Ket ya modi nga kunen mi dakayun, kakabsat, ket ikararagan dakami kuma tasun dagus kuma ya pannakaiwaragawag niya kagi niya Apu. Ket maipangag kuma pe̍ nga sidadayaw ya kagi na, nga agten mettas ito pannakaipangag na dakayu.

² Se̍ ikararag nu pe̍ nga ilisi nakami kuma nge̍ Apu Diyus kadiya nakillu se̍ dake̍c nga toley. Ta emmu nu nga bekken nga amin nga toley ket uwed panamati da.

³ Ngem mapagtalkan ya Apu, ket pabilgen se̍ isalakan nakayu iya Managdacdake̍c.

⁴ Ket gapu mettas iya Apu, siguradu kami nga tungtungpalen nu ita diya isursuru mi dakayu, se̍ orey nad mettas pe̍ iya timpu nga maadpangan.

⁵ Sapay kuma ta ya Apu, itarus na diya nakem nu iya panagayat ne̍ Apu Diyus se̍ iya panaganus nga ipaay mettas ne̍ Kristu dakayu.

Pamagbaga kadiya nasadut

⁶ Kakabsat, gapu iya turay nga ne̍cde̍ niya Apu tida nga Je̍su Kristu dakami, ibilin mi dakayu nga adeyyuwan nu diya amin nga kakabsat nga nasadut se̍ agbibiyag ka madi maikanatad kadito nisursuru mi dakayu.

⁷ Ket naemmuwan nu mettin to ugali mi ito uwed kami iya edyan nu itun. Ket emmu nu met nga masapul nga tuladen dakami, ta bekken kami nga nasadut.

⁸ Se̍ awan met inawat mi nga kasapulan mi nga di kami binayadan itun, no di lugud pe̍yeng kami nga nagwangel se̍ nagbannug orey algew se̍ gabi, tasun madi kami agbalin nga pakarigatan niya orey isa dakayu.

⁹ Rumbeng met no nibilin mi dakayu kuma itun nga istimaren dakami. Ngem awan nibilin mi nga agten iyan, ta ginabay mi nga ipasingen dakayu ya pagtuladan nu kuma nga ugali.

¹⁰ Ta orey ito uwed kami pekkem iya edyan nu, idi ya nibilbilin mi dakayu: Ya madi na gabay ya agwangel, madi kayu ngarud pe̍ pakanen.

¹¹ Ipalagip mi ngarud yani dakayu, ata nadamag mi met nga uwed kanu duduma dakayu nga nasadut. Awan kanu sabali nga wangwanglen da no di ngas makibibiyang iya biyang diya duduma nga toley.

¹² Ket sigun iya turay nga ne̍cde̍ ne̍ Apu Je̍su Kristu dakami, uwed ibilin mi kadiyan nga toley, nga patigmaanan mi da nga agten idi: Agnakem kayu lugud nga agwangel, tasun dakayu nga mismu ya makaemmu iya pagbiyag nun.

¹³ Ngem dakayu nga bekken nga agten iyan, kakabsat, madi kayu kuma ngarud nga mauma nga agwangel ka nabaru.

¹⁴ Ket no uwed toley nga madi na gabay ya agtungpal kadiya isursuru mi idi nga surat, ket tandaanan nu yan nga toley se̍ madi kayu makibulubulun igina, tasun malyew kuma.

¹⁵ Ngem madi kayu kuma ibilang nga kagura nu, no di lugud patigmaanan nu kuma, nga ibilang nu met nga kabsat nu.

To pakumusta ne̍ Pablu

¹⁶ Sapay kuma ta ya Apu mettas nga paggayatan niya talna, e̍cdan nakayu kuma ka talna iya amin nga timpu se̍ iya amin nga kasasaad. Sapay kuma ta ya Apu ya uwed dakayu nga amin.

¹⁷ Iyaken nge̍ Pablu. Iyaken mettas ya nangisurat idi nga kablaaw ku nga nisurat niya mismu nga imac, ta itu ya pagilasinan iya tunggal surat ku. Agten idi ngarud ya gangey niya panagsurat ku.

¹⁸ Ket uwed kuma dakayu nga amin ya siaayat nga asi niya Apu tida nga Je̍su Kristu.