2 Te̍salunika 2 - Ya Baru nga Tulag

Diya pagilasinan iya umbe̍t ne̍ Apu Je̍sus

¹ Ket no maipanggep iya umbe̍t manin niya Apu tida nga Je̍su Kristu, kakabsat, se̍ ya pannakaurnung tida nga sumabet igina, ket idi kuma ya maibaga mi dakayu ita:

² Madi kayu kuma nga nalaka nga mariribukan winno madanagan kadiya damdamag nga magicgicna nu nga nadatngan kanun ya Timpu niya Apu. Madi kayu ngarud patiyen diyan orey no itu ya ipaikagi kanu ne̍ Apu Diyus igida gapu kanu iya Ispiritu na, se̍ madi kayu pe̍ patiyen orey no uwed mangasaba iya agten iyan winno uwed kanu naisurat nga gayat dakami.

³ Madi kayu ipalubus nga allilawen nakayu ya orey nagan na nga toley gapu iya kagiyen na. Ta ya kinapudnu na, uwed mona nad pekkem nga panangkuntra diya kaaduwan e̍ Apu Diyus. Ket agparang pe̍ nga mona pekkem ya Managsucsukir nga toley. Ngem awan sabali nad nga pagpatinggaan na, no di ngas ya pakapukawan na.

⁴ Ket iyan nga Managsucsukir, kuntraen na nad pekkem diya amin nga ibilang diya toley nga diyus da se̍ diya orey nagan na nga duduma nga daydayawen diya toltoley, tasun ig-igina kuma ngas ya madaydayaw. Ket ipatugew na nad ya beggi na mettas iya Te̍mplu nga pakadayawan ne̍ Apu Diyus, ta kunen na nad nga agbalin kanu nga Diyusin!

⁵ Madi kayu kad malagip diyan nga banag? Nibagbagac met dakayu ito kauwed ku dakayu itun.

⁶ Ket emmu nu ngarudin maipanggep iya pannakatengngel pekkem niyan nga Managsucsukir ita, tasun madi pekkem makaparang agingga ka di pekkem madatngan ya kustu nga timpu na.

⁷ Ngem ita nga timpu, matungtungpal ngarud idi nga lubung dito duduma nga pangpanggep nito Managsucsukirin. Ngem nalimed ngas met, ta mat-atngel pekkem. Ngem pumanaw nad ya mangtengtengngel igina.

⁸ Ket kalpasan na, agparang mettin nga silalatac yan nga Managsucsukir. Ngem e̍ Apu Je̍sus, pukawen na nad mettin gapu was iya iyasngaw na igina nga mangpukaw. Ta no umbe̍t nad nge̍ Apu Je̍sus, abaken na nad gapu iya kinadayaw niya kinauwed na yan nga Managsucsukir.

⁹ Ngem to Managsucsukir, no agparang nad idi nga lubung, uwed met igina ya turay ne̍ Satanas. Uwed nad ngarud igina diya adu nga kita nga kinabusid nga pannakabalin se̍ pagilasinan se̍ nakaskasdaaw.

¹⁰ Awan kinadake̍c nga di na nad iyusar nga pangallilaw kadiya toltoley. Ket diya allilawen na nad, itu diyan diya toley nga madusa nga mapukaw, ta di da nipateg ya kinapudnu tasun maisalakan da kuma.

¹¹ Itu nga palaluwen ne̍ Apu Diyus ya pakaallilawan da tasun busid ngas ya patpatiyen da.

¹² Iya agten iyan, dusa ngas met ya pagbanagan diya amin nga di mamati iya kinapudnu, ta basul met ya patpatgen da.

Diya pinili ne̍ Apu Diyus nga isalakan na

¹³ Kakabsat, mayat met no pe̍yeng nga agyaman kami e̍ Apu Diyus gapu dakayu nga patpatgen niya Apu. Ta itun pekkem sacbay nidi nga timpu, pinili nakayun nge̍ Apu Diyus nga maisalakan gapu iya panangpalinteg niya Ispiritu Santu dakayu iya imatang ne̍ Apu Diyus, se̍ gapu iya panamati nu iya kinapudnu.

¹⁴ Ket pinili nakayu nge̍ Apu Diyus iyan nga kasasaad gapu iya Makaparagsac nga Damag nga nikasaba mi dakayu. Pinili nakayu ngarud, tasun mairaman kayu iya pakadayawan niya Apu tida nga Je̍su Kristu.

¹⁵ Dikad pe̍ kakabsat, pabilgen nu kuma ya panpanunut nu. Salimetmettan nu kuma pe̍ diya panursuru nga nisuru mi dakayu gapu kadito panangaskasaba se̍ sursurat mi.

¹⁶ Ket uwed kuma adngen mi iya Apu tida nga Je̍su Kristu se̍ e̍ Apu Diyus nga Ama tida nga mangayat dactida. Ta gapu iya siaayat nga asi na, liwliwaan nactida ka liwliwa nga madi agpatingga, se̍ namnama nga nabaru.

¹⁷ Ket ya adngen mi, itu ya pabilgen se̍ paturedden nakayu kuma tasun naan-anay kayu kadiya amin nga nabaru nga wanglen se̍ kagiyen nu.