2 Te̍salunika 1 - Ya Baru nga Tulag

¹ Dakami nga tellu: Pablu, Silas, se̍ Timutyu, isurat mi yani nga surat dakayu nga bungguy mamati iyan Te̍salunika, dakayu nga toley ne̍ Apu Diyus nga Ama tida se̍ toley met pe̍ ne̍ Apu Je̍su Kristu.

² Sapay kuma ta uwed dakayu ya siaayat nga asi, se̍ talna, nga gayat e̍ Diyus Ama se̍ e̍ Apu Je̍su Kristu.

Ya pagnamnamaan diya agrigrigat

³ Kakabsat, nabaru no pe̍yeng kami nga agyaman e̍ Apu Diyus gapu dakayu. Kustu yan, ta bumilbileg nga unayin ya panamati nu. Ket bumilbileg pe̍ yin ya panagiinnayat nu iya isa ken isa dakayu.

⁴ Itu nga no dakami, ipasindayaw dakayu, nga ipadpadamag dakayu met kadiya duduma nga bungguy diya mamati e̍ Apu Diyus. Ipakaemmu mi igida ya panaganus nu iya panamati nu, ta orey adu diya rigrigat nu se̍ pakairurumnan nu gapu iya panamati nu, maanusan nu latta.

⁵ Ket ya panagitured nu kadiya rigrigat nu, itu yan ya mangipakaemmu nga kustu ya pananglinteg ne̍ Apu Diyus. Ket iya agten iyan, maisagana kayu nga maikari iya panangituray ne̍ Apu Diyus. Ket ya panangituray na, itu mettas ya gapu niya pakaparparigatan nun.

⁶ Ngem diya mangparparigat dakayu, ket balsen nad ne̍ Apu Diyus nga parigaten na da met, ata itu ya ibilang na nga kustu nga bales igida.

⁷ Ngem dakayu nga maparparigat, pagnam-ayen nakayu nad met, agten pe̍ iya pamaay na dakami. Mapasamac nad didi no agparang nge̍ Apu Je̍sus nga gayat ka langit. Ibulun na nad diya anghe̍le̍s na nga mae̍cdan ka pannakabalin.

⁸ Uwed met pe̍ gumilgilab nga apuy nad no umbe̍t nge̍ Apu Je̍sus nga mangariman iya pakaukuman diya madi makaem-emmu e̍ Apu Diyus se̍ kadiya madi agtungpal iya Makaparagsac nga Damag maipanggep iya Apu tida nga Je̍sus.

⁹ Aglak-am da nad ngarud ka dusa nga agnanayun nga rigat niya pannakapatey. Ket maiyadeyyu da nad pe̍ iya imatang ne̍ Apu Diyus, se̍ madi da makasingen iya bileg niya pannakabalin na.

¹⁰ Ngem dactida nga mamati, masingen tida nad nge̍ Apu Je̍sus no madatngan yan nga Timpu nga umbe̍t na, ata umbe̍t nad tasun mapadayawan kadiya toley na. Ket diya amin nga mamati, ipatpateg da nad nge̍ Apu Je̍sus. Mairaman kayu nad met pe̍ iyan, gapu ta pinati nu to kagi nga nipakaemmu mi dakayu itun maipanggep igina.

¹¹ Ket itu nga ikarkararagan dakayu ngarud nga pe̍yeng, tasun pagbalinen nakayu kuma nge̍ Apu Diyus nga maikari iya nisagana na nga saad nga ne̍cde̍ na dakayu. Ket ikararag mi pe̍ nga gapu iya pannakabalin na, tulungan nakayu kuma kadiya amin nga nabaru nga pamaay nu se̍ diya gabay nu nga wanglen maigapu iya panamati nu.

¹² Ket agten iyan kuma ngarud, tasun maidaydayaw ya Apu tida nga Je̍sus gapu dakayu. Ket maidaydayaw kayu pe̍, ta itu ya pagbanagan niya siaayat nga asi niya Diyus tida se̍ e̍ Apu Je̍su Kristu dactidan.