2 Pe̍dru 3 - Ya Baru nga Tulag

Maipanggep iya umbe̍t manin ne̍ Apu Je̍sus

¹ Idi nga surat, itu ya maikadduwa nga surat nga nisurat ku dakayu nga patpatgec. Ket agpada met ya panggep nidi nga surat ku se̍ ito nona. Ta padasec manin ya mangalayu dakayu iya napudnu nga nakem, gapu iya panangipalagip ku dakayu.

² Ta tantandaanan nu kuma dito kinagkagi dito mammadtu nga nagsirbi e̍ Apu Diyus itun se̍ to paglinteggan niya Apu tida nga Mangisalakan dactida, nga itu ya nibilin diya apustule̍s na dakayu.

³ Idi ya mona nga ipakaemmuc dakayu: Maawatan nu kuma nga iya kaodiyan nga timpu wi, uwed da nad mangnguyaw nga tumaud. Agtungtungpal da ngas kadiya dake̍c nga tarigagay diya begbeggi da, ket uy-uyawen dakayu nad met.

⁴ Ket agten nad idi ya kunen da: “Di lugud nikari na nga umbe̍t kanu manin? Ahah! Ape̍ awan pekkem? Natey mettin dito am-ama tida. Ket orey manipud itun pekkem nga timpu da, agten idi met latta ya kasasaad niya amin, nga awan met nakabalbaliwan na, orey manipud ito pannakaparsuwa niya lubung ngi,” kunen da.

⁵ Ngem diya agkunen iya agten iyan, madi da gabay nga laglagipen nga gapu ngas iya kagi ne̍ Apu Diyus itun pekkem, ket napauwed itun ya abac lawa, se̍ napauwed pe̍ ya ginet. Ket ya ginet, gayat met iya danum itun, ket danum pe̍ to kagagapu na.

⁶ Ket danum met pe̍ ya inusar ne̍ Apu Diyus nga nangpukaw kadito parsuwa na nga uwed iya lubung, ito linayus na da itun.

⁷ Ket gapu pe̍ iya kagi mettas ne̍ Apu Diyus, matungpal nad met pe̍ ya panggep na iya abac lawa se̍ lubung, ta mapooran da nad ngarud. Ngem tengtenglen pekkem mas ne̍ Apu Diyus yan nga panggep na agingga iya timpu niya panangukum se̍ panangpukaw na kadiya toley nga madi agdayaw igina.

⁸ Ket dakayu nga patpatgec, madi kayu kuma le̍ple̍panan yani: No iya panpanunut ne̍ Apu Diyus, agpada met ya kabayag niya isa nga algew se̍ iya isa nga ribu nga dagun. Ta no igina, ibilang na ngas nga agpadpada ya isa nga ribu nga dagun se̍ ya isa nga algew.

⁹ Itu ya madi maawatan diya duduma, ta uwed da mangipagarup nga naladaw ya Apu iya panangtungpal na ito nikari na. Ngem bekken met nga agten iyan, ta ya kinapudnu na, ipampamoya nakayu ngas nge̍ Apu Diyus. Ta di na gabay nga uwed mapukaw, no di lugud gabay na no agbabawi kuma diya amin nga toley.

¹⁰ Ngem no madatnganin ya Timpu niya Apu, kellat met ya panagparang na, nga agten mettas iya umbe̍t niya isa nga mannanakew. Ket mapukaw nad mettin ya abac lawa, nga uwed nad magicna nga nabileg nga ungug, ket diya masingen nga naisaad iya abac lawa, macset da mettin nga mapukawin. Ket agten nad met pe̍ iyan ya lubung, se̍ amin nga uwed iya sap-ew niya ginet, ta macset da nad mettin.

Ya rebbeng diya toley nga pinili ne̍ Apu Diyus

¹¹ Ket gapu ta emmu nun nga mapukaw nad mettas nga agten iyan diya amin, masapul ngarud nga agbibiyag kayu nga sililinteg, nga tungtungpalen nu kuma nga pe̍yeng diya makaay-ayu ngas e̍ Apu Diyus.

¹² Ket bayat niya idadateng niya Timpu ne̍ Apu Diyus, sidadaan kayu kuma nga ikagumaan nu nga madi kuma mapabayag ya umbe̍t na. Ket itu nad ya timpu nga pannakapoor niya abac lawa. Ket amin diya masingen iya abac lawa, malunag da nad met gapu iya apuy, se̍ mapukaw da nad ngarudin.

¹³ Ngem dactida, ya namnamaen tida, ket itu ya kari ne̍ Apu Diyus nga uwed nad kanu met napabaru nga abac lawa se̍ lubungin. Ket yan nas kinalinteg ya uwed nad iyanin.

¹⁴ Dikad pe̍ dakayu nga patpatgec, gapu ta namnamaen nu diyan, wanglen nu kuma ya patingga niya kabaellan nu nga mangtungpal kadiya gabay ne̍ Apu Diyus, tasun ibilang nakayu nga awan mansa winno pagkurangan na, nga katunus nakayun.

¹⁵ Ket ya panangipamoya niya Apu tida ita nga timpu, ibilang nu kuma nga gundaway diya toley nga maisalakan. Ket e̍ Pablu met pe̍ nga patpatgen tida nga kabsat, nisurat na pe̍ yan dakayu sigun iya pannakaawat nga ne̍cde̍ ne̍ Apu Diyus igina.

¹⁶ Ta gangey ne̍ Pablu ya mangisuru maipanggep kadiyan kadiya amin nga sursurat na. Uwed da met pe̍ nisurat na kadito sursurat na nga narigat nga maawatan. Ket diya toley nga madi makaaw-awat se̍ agduwaduwa iya panamati da, pasabaliyen da ya kaipapennan diyan nga banbanag, nga agten mettas iya panangpasabali da pe̍ kadiya duduma nga naisurat iya Bibliya. Ket agbanag mettas yan iya kabucbukudan da nad nga pannakapukawin.

¹⁷ Dikad pe̍ dakayu nga patpatgec, gapu ta naemmuwan nu diyanin maipanggep kadito mangisursuru ka busid, agannad kayu ngarudin. Ta kaynun no masulisug kayu met pe̍ nga sumurut iya irradu diya toley nga madi agtungpal e̍ Apu Diyus. Ket no maiyaw-awan kayu kadiyan, maisina kayu ngarudin iya pagnamnamaan nun.

¹⁸ Ngem sapay kuma ta bumilbileg pekkem ya panamati nu iya Apu tida se̍ Mangisalakan dactida nga Je̍su Kristu, gapu iya siaayat nga panangaasi na dakayu, se̍ gapu iya pannakaemmu nu maipanggep igina. Igina kuma ya madaydayaw, orey ita nga timpu, se̍ iya maadpangan pe̍ nga agnanayun!