2 Pe̍dru 2 - Ya Baru nga Tulag

Maipanggep kadiya busid nga manursuru

¹ Ngem itun, uwed da met pe̍ mammadtu nga nagkunen nga mangikaskasaba da kanu iya kagi ne̍ Apu Diyus kadiya toltoley, ngem busid da met. Ket agten pe̍ iyan ita nga timpu, ta uwed met pe̍ mangisursuru ka busid dakayu nga mamati. Sisisikap da met nga mangisursuru kadiya busid nga sursuru da. Ket didi nga sabali nga sursuru da, mamagsisina da kadiya panpanunut nu. Ket ilibac da met pe̍ nge̍ Kristu nga Apu, nga nangsaka igida. Ket gapu iyan, igida mettas ya mangariman ka kellat nga pannakadusa da nga umbe̍t nad igida.

² Ket adu diya sumurut nad igida iya naalas nga wangwanglen da. Ket gapu igida, adu nad diya manguyaw iya pudnu nga pammati.

³ Ket dito mangisursuru ka busid, gapu iya kinaagum da ka kuwarta, gundawayan dakayu gapu kadiya busid nga kagkagi da. Ngem diyan nga toley, sigud nga nakasagana ya Mangukum igidan, orey itun pekkem. Ket bekken ngarud nga agtudtudug yan nga Mangdusa igida.

⁴ Siguradu nga agten iyan, ta orey diya anghe̍le̍s nga nagbasul itun, madi kinaasiyan ne̍ Apu Diyus da, no di lugud pinapen na da iya pakabaludan da nga nauneg nga lugar. Ket uwed da pekkem antuni nga sibabalud iya nagicbet nga unay nga lugar, agingga iya pannakadusa da nad mettas.

⁵ Agten iyan pe̍ kadito nona nga toley idi nga lubung, ta madi da pe̍ nakalisi itun, ito linayus ne̍ Apu Diyus ya ginet nga pagedyanan dito toley nga madi agdayaw igina. Ito Nue̍, nga nangipakaemmu iya kinalinteg nga gabay ne̍ Apu Diyus, se̍ dito pitu nga kabulun na, igida ngas diya nisalakan ne̍ Apu Diyus ito layus.

⁶ Ket dito ili nga Suduma se̍ Gumura pe̍, pinooran ne̍ Apu Diyus, nga itu ya panangdusa na kadito agdacdake̍c nga toley kadiyan nga il-ili. Ket to panangpukaw na kaditun nga toley, itu ya panangipasingen na no kumaan nad pe̍ ya panangdusa na kadiya duduma nga toley nga madi agdayaw igina.

⁷ Ngem to toley nga Lot, nagtungtungpal kadiya nalinteg, orey nasikuran nga unay itun gapu kadito naalas nga winangwangel dito dake̍c nga kailiyan na. Ket nisalakan met ne̍ Apu Diyus to Lot itun.

⁸ Ta nalinteg ya nakem nito Lot. Ket gapu ta aged-edyan itun iya edyan dito managdacdake̍c, inalgew nga lumlumdaang gapu kadito nasingsingen se̍ nagicgicna na nga dake̍c nga winangwangel dito kailiyan na, nga maikuntra iya gabay ne̍ Apu Diyus. Ngem to Lot nga gennung, diya nalinteg ya tinungtungpal na.

⁹ Ket gapu kadiyan nga napasamac itun, maipasingen dactida ya kabaellan niya Apu nga mangilisi kadiya agtungpal igina kadiya pakasulisugan da. Ket maipasingen pe̍ kadiyan ya kabaellan na nga mangipukuc kadiya agdacdake̍c nga toley iya pakadusaan da agingga iya timpu nga panangukum na nad igida.

¹⁰ Ket nangnangruna ngarud nga madusa diya toley nga mangtungtungpal kadiya dake̍c nga tarigagay niya kinatoley da nga mangaw-awis igida. Ket itu pe̍ diya toley nga madi mangikaskasu iya kinaturay ne̍ Apu Diyus. Ket dito mangisursuru ka busid, natured se̍ natangsit pe̍, nga madi da met mansing nga agkagi ka dake̍c maipanggep kadiya nailangitan.

Ya gangey dito mangisursuru ka busid, se̍ ya pannakadusa da

¹¹ Ngem orey diya anghe̍le̍s mettas, madi da met nga gennung mangpabasul nga sitatangsit iya imatang ne̍ Apu Diyus kadiya agten kadiyan, orey naturturay se̍ ad-adu ya pannakabalin diya anghe̍le̍s ngem kadiyan nga toley nga mangisursuru ka busid.

¹² Ket diyan nga toley, uy-uyawen da ngas diya banag nga di da met maaw-awatan. Arig da ngas nga diya an-animal. Ta diya an-animal, madi da emmu ya agpanunut, ata diyan nas nakaiyanakan da nga ganggangey ya emmu da nga tungpalen. Agsirbi da ngas nga matliw se̍ mapatey. Ket agten ngarud pe̍ iyan diya toley nga mangisursuru ka busid, ta matey da ngas nad pe̍ nga madusa.

¹³ Ta maparparigat da nad, nga itu ya gun-guna da gapu kadiya panangparparigat da ka toley. Ta tungtungpalen da ya orey nagan na nga tarigagay diya beggi da, orey no iya algew se̍ adu diya makasingen, ta itu yan kanu ya mangparagsac igida. Diyan nga toley, igida ya arig nga mansa nu se̍ pakaiyal-alyewwan nu iya imatang diya toltoley, ta makitiptipun da nga siraragsac dakayu nga makipangpangan.

¹⁴ Pe̍yeng nga dake̍c ya mapanunut da no makasingen da ka babey nga bekken da nga asawa, ket madi da met makasardeng iya panagbasul da. Mangawis da kadiya toley nga nakapsut ya panamati na, ket kabisadu da pe̍ yin ya agagum. Igida met diya pakaipaayan niya panangukum ne̍ Apu Diyus!

¹⁵ Diyan nga toley, binaybay-an da ya nalinteg gin. Naiyaw-awan dan nga agtultulad ito gangey nito Balaam nga anac nito Busur. Ta to Balaam, isa nga mammadtu itun, ngem nipateg na met pe̍ ya gun-guna nito dake̍c nga wangel na.

¹⁶ Ngem pinailbec ngarud ne̍ Apu Diyus itun gapu ito basul na. Ta to asnu nito Balaam nga madi kuma makakagi, nagtimec met gayam itun, nga agten iya toley nga nagkagi. Ket itu mettin to nangtupa ito tage̍ wanglen nito Balaam nga sie-ellut itun.

¹⁷ Diyan nga toley nga mangisursuru ka busid, arig da ngas nga nebbasan nga ubbug, winno ya angep nga nipurad ngas niya belluut, ta awan e̍cde̍ da nga nabaru. Ket ya edyan niya napalaus nga unay nga gicbet, itu ngarud ya pagpatinggaan da nad nga sisasagana para kadiya agten iyan nga toley.

¹⁸ Tutu met yan, ta napalaus met ya panagbuwakaw dito mangisursuru ka busid. Ngem awan met sirsirbi diya kagkagiyen da. Ket iya agten iyan, awisen da met diya toley nga kapanpanaw iya pannakikabulun da kadiya toley nga agtungpal kadiya busid nga banbanag. Awisen da ngarud diyan nga kapanpanaw nga toley, ta pangpayayat da kadiyan nga toley diya naalas nga tarigagayan niya kinatoley da.

¹⁹ Ket se̍ da pe̍ ikari kadiyan nga toley nga no sumurut da igida, mawayawayaan da kanu kadiya naiparit. Ngem ya kinapudnu na, diya mangisursuru iya agten iyan, igida mettas diya awan pakawayawayaan na. Ta paiturayan da met kadiya dake̍c nga tarigagay da nga arig nga madi da met mapasardeng, orey itu ya pakapirdiyan da. Ta ya orey nagan na nga madi mabalin nga ipac niya toley, itu yan ya mangtagabu iginan.

²⁰ Kaspagarigan ya isa nga toley nga nipac nan diya dake̍c nga gangey nga tumaud idi nga lubung, gapu iya pannakaemmu nan e̍ Je̍su Kristu nga Apu tida se̍ Mangisalakan dactida: Ta no sumoli manin yan nga toley nga ipalubus na nga maabac manin kadito dake̍c nga gangey niya kinatoley, ket dacdake̍c met ya kasasaad nan ngem ito damu.

²¹ Ket ya agten iyan nga toley, nabarbaru met ya kasasaad na no madi na kuma naem-emmuwan ya nalinteg nga ugali nga gabay ne̍ Apu Diyus. Ta dake̍c met nga unay no naemmuwan na nga mona se̍ na paglikudan ngasin, nga baybay-an nan ya bilin ne̍ Apu Diyus nga naisuru iginan.

²² Ket natungpal ngarud iginan to pagkakagi nga kunen na, “Ya asu, soliyen na nga mawe̍ kanen ya nalpas na nga niyota.” Ket agten pe̍ ito pagkakagi nga kunen na, “Ya abuy nga nadigusin, sumoli ngas nga mawe̍ agloba manin iya loyeg,” kunen na. Ket tutu met yan.