2 Pe̍dru 1 - Ya Baru nga Tulag

¹ Iyaken nge̍ Simon Pe̍dru nga isa nga agsirsirbi e̍ Je̍su Kristu se̍ ya isa nga apustul nga agpaay igina. Agsurat tac dakayu nga nae̍cdan ka pammati nga kapada mettas niya napateg nga pammati mi, gapu iya nalinteg nga gangey niya Diyus tida se̍ Mangisalakan dactida, nga itu nge̍ Je̍su Kristu.

² Sapay kuma ta nawadwad ya siaayat nga asi, se̍ talna, nga naipaay dakayu nga tumaud iya pannakaemmu nu e̍ Apu Diyus se̍ e̍ Je̍sus nga Apu tida.

Ya ugali diya pinili ne̍ Apu Diyus nga toley na

³ Gapu iya nadiyusan nga pannakabalin ne̍ Apu Diyus, ne̍cdan nactidan ka amin nga masapul tida iya panagbiyag tida se̍ iya panangtungpal tida kadiya makaay-ayu igina. Ket nae̍cde̍ yan dactida gapu iya pannakaemmu tida igina, nga igina ya nangpili dactida sigun iya mismu nga kinadayaw se̍ kinalaing na.

⁴ Ket gapu iya kinadayaw se̍ kinalaing na, nikari na dactida diya napapateg se̍ nakaskasdaaw nga unay nga karkari na. Tasun iyan, gapu kadidi nga karkari na, maliclikan nu kuma diya makapadake̍c nga uwed idi nga lubung gapu kadiya dake̍c nga tarigagay niya toley, tasun makipaglak-am kayu kuma iya gangey ne̍ Apu Diyus.

⁵ Ket itu nga ikagumaan nu kuma nga iraman iya panamati nu ya panagtacneng. Ket iya panagtacneng nu, iraman nu kuma pe̍ ya pannakaemmu maipanggep e̍ Apu Diyus.

⁶ Ket iya pannakaemmu nu, iraman nu kuma pe̍ ya panagtimbeng iya beggi nu. Ket iya panagtimbeng nu, iraman nu kuma ya panaganus. Se̍ iya panaganus nu, iraman nu kuma ya panagtungpal kadiya makaay-ayu e̍ Apu Diyus.

⁷ Ket iya panagtungpal nu e̍ Apu Diyus, iraman nu kuma ya panangipateg kadiya kakabsat nu ka pammati. Ket iya panangipateg nu kadiya kakabsat nu, iraman nu kuma pe̍ ya panagayat.

⁸ Ket no uwed dakayu didi nin se̍ pe̍yeng nga itu diya ad-adda nga wangwanglen nun, siguradu nga uwed sirbi se̍ nabaru nga pagbanagan niya pannakaemmu nu iya Apu tida nga Je̍su Kristu.

⁹ Ngem ya toley nga awan igina didi nga ugali, arig met nga toley nga nakulap winno madi makasingen ka nabay-at. Ta nale̍panan nan ya banag nito panangdalus ne̍ Apu Diyus igina kadiya basbasul nga winangwangel na itun.

¹⁰ Itu nga kakabsat, sipapasnec kayu kuma ngarud nga mangpatalged iya pannakapili se̍ pannakaisaad nu. Ket no agten iyan ya wanglen nu, awan ngarud pakairraduwan nu iya imatang ne̍ Apu Diyusin.

¹¹ Ket iya agten iyan, adu diya napateg nga maipaay dakayu iya pannakairaman nu nad iya agnanayun nga pagiturayan ne̍ Je̍su Kristu nga Apu tida se̍ Mangisalakan dactida.

¹² Ket gapu iyan, orey no emmu nun diyan nga nibagac dakayu, se̍ orey nabaked din ya panamati nu iya kinapudnu nga naisuru dakayun, panggep ku latta nga ipalpalagip dakayu nga pe̍yeng diyan.

¹³ Ta ya kunec, mayat no palpalagipan nakayu kadiyan, bayat niya uwed pekkem anges nidi nga beggic.

¹⁴ Ta emmuc nga dandani yin ya panangpanaw ku idi nga beggic, sigun met iya nipakaemmu niya Apu tida nga Je̍su Kristu iyaken.

¹⁵ Itu nga wanglec ngarudin amin nga kabaellac ita, tasun malaglagip nu kuma nga pe̍yeng diyan nga banbanag, orey nad no awan nac kun.

Ya naggayatan niya panursuru niya pammati tida

¹⁶ Bekken met nga sarsarita nga pinataud ngas niya nasirib nga toley to nisuru mi dakayu, ito nipakaemmu mi dakayu ya pannakabalin niya Apu tida nga Je̍su Kristu se̍ ya umbe̍t na nad manin. Bekken ngarud nga agten iyan, ta dakami mettas ya mismu nga nakasingen iya dackel nga kinaturay na.

¹⁷ Ta uwed kami met ito panangipakaemmu ne̍ Apu Diyus nga Ama ito panange̍cde̍ na igina ka dayaw se̍ dayag na. Nae̍cdan ngarud itun, ito nagicna mi to timec mettas ne̍ Apu Diyus nga Katurayan nga Nadayag, nga kinunen na igina, “Itu yani ya Anac ku nga dungdungnguwec. Igina ya pakaay-ayuwac,” kunen na.

¹⁸ Nagicna mi ngarud yan nga timec nga gayat ka langit itun, ata nakibulun kami e̍ Je̍su Kristu itun, enna tageytey nga pinili ne̍ Apu Diyus.

¹⁹ Ket iya agten iyan, napatalgeddan mettin dito nikaskasaba dito mammadtu itun. Ket dakayu, paglaingan nu met no ipangag nu da pe̍. Ta to kasaba da itun, maiyarig iya dilag nga dumardarang iya nagicbet nga lugar agingga ka parbangunin. Itu ya arig nga panagparang niya baggac, ket itu ya mangwada iya panpanunut nun.

²⁰ Ket ya kangrunaan na, maawatan nu kuma nga awan diya padpadtu nga naisurat iya Bibliya nga gayat tas iya kabucbukudan nga panunut niya mammadtu.

²¹ Ta awan pulus kadiyan nga padtu ya nagtaud ngas iya nakem toley, no di lugud nagtaud e̍ Apu Diyus gapu iya panangidalan niya Ispiritu Santu kadiya toley nga nangagi.