2 Kurintu 9 - Ya Baru nga Tulag

Ya siraragsac nga panange̍cde̍

¹ Madic masapul ya agsurat pekkem dakayu maipanggep iya rebbeng tida nga tumulung kadiya makasapul nga mamati.

² Ta emmuc mettin nga disnudu nu ya tumulung. Ket itu ya nipadpadamag ku nga siraragsac ennid Mase̍dunya, nga kunec igida idi nga dakayu nga kakabsat mi iyan Akaya, sisasagana kayu nga tumulung manipud ito nawe̍ nga dagun pekkem. Ket gapu iyan nga kinunec igida maipanggep iya panaggaed nu, naalayu diya kaaduwan igida nga tumulung pe̍ yin.

³ Ngem madic gabay nga agbalin nga busid to nipadpadamag ku maipanggep iya pakaragsakac dakayu. Itu nga ibon ku didi nga kakabsat iyan nga edyan nu, tasun maisagana kuma lugud nga pudnu ya tulung nu, nga agten met ito nibagbagac kadiya duduma nga toley nga wanglen nu.

⁴ Ta no umbe̍t tac nad iyan nga edyan nu, kaynun no uwed da nad kabulun ku nga iMase̍dunya. Ket no madateng da nga bekken kayu pekkem nga nakasagana iya itulung nu, ket mapaalyew kamin, ket nangruna dakayu. Ta no agten iyan, agbalin nga busidin ya panagnamnama mi dakayun.

⁵ Dikad pe̍ kunec nga masapul nga mona ngem iyaken didi nga kakabsat tida, tasun igida ya mangsingen iya pannakaisagana nito tulung nga nikari nu nga isagut. Ta gabay ku no naisagana kuma ngin no dumateng ngac, tasun maipasingen nga disnudu nu ya mangisagut, nga bekken nga gapu ta mapilit kayu.

⁶ Ket lagipen nu yani nga pangngarig ku maipanggep iya panange̍cde̍: Ya toley nga e̍teng ya imula na, e̍teng nad ngarud ya maapit na. Ngem ya toley nga adu ya imula na, adu nad met ya maapit na.

⁷ Tutu met yan, itu nga masapul nga mange̍cde̍ ngarud ya tunggal isa sigun iya panggep na nga itulung, nga madi kuma agduwaduwa winno mapilpilit iya panange̍cde̍ na. Ta napateg e̍ Apu Diyus ya toley nga mange̍cde̍ nga siraragsac.

⁸ Ket e̍ Apu Diyus, mabalinan na ya mange̍cde̍ ka siaayat nga asi nga nasursuruc ngem iya kasapulan nu. Agten iyan ya arimanen na, tasun madi kayu nga agkurang iya orey nagan na, se̍ tasun uwed pe̍ dakayu ya adu nga maitulung nu iya orey nagan na nga rantaen nu nga kaasiyan.

⁹ Ket itu pe̍ yan to kunen na iya Bibliya maipanggep iya agten iyan nga toley: “Manage̍cde̍ kadiya napanglaw, ket ya nalinteg nga panagkaasi na, agpaut ka agnanayun,” kunen na.

¹⁰ Ket e̍ Apu Diyus, igina met ya paggayatan diya imula diya agmulmula, se̍ igina ya paggayatan diya kanen tida. Dikad pe̍ igina mettas pe̍ ya mange̍cde̍ kadiya masapul nu, se̍ ya mangpaadu pe̍ kadidi, tasun umadu ya nabaru nga pagbanagan diya nalinteg nga panagkaasi nu.

¹¹ Manage̍cde̍ ngarud nge̍ Apu Diyus dakayu ka amin nga banbanag, tasun manage̍cde̍ kayu kuma pe̍ kadiya amin nga masapul diya duduma nga toley. Ket iya agten iyan, gapu iya ikaasi nu nga italec nu dakami, e̍ Apu Diyus nad met ya pagyamanan diya mae̍cdan.

¹² Ta gapu iyan nga itutulung nu, bekken nas nga matulungan dito toley ne̍ Apu Diyus kadiya kasapulan da, no di lugud ya pagbalinan nidi, ket adu diya agyaman e̍ Apu Diyus.

¹³ Ket gapu iyan nga panagkaasi nu, maipasingen nga napudnu ya panamati nu. Itu nga agdaydayaw nad diya toley e̍ Apu Diyus, gapu ta maemmuwan da nad nga tungtungpalen nu ya pammati nu iya Makaparagsac nga Damag maipanggep e̍ Kristu, se̍ gapu ta maemmuwan da nga manage̍cde̍ kayu ka tulung nu igida se̍ kadiya amin nga duduma pe̍.

¹⁴ Ket itu nga patpatgen dakayu nad diya toley, se̍ ikararagan dakayu nad pe̍ gapu iya pagbanagan niya nakaskasdaaw nga panangaasi ne̍ Apu Diyus nga siaayat dakayu.

¹⁵ Ket no dactida, agyaman tida ngarud pe̍ e̍ Apu Diyus, gapu iya panangaasi nga nisagut na dactidan, nga awan kapada na!