2 Kurintu 8 - Ya Baru nga Tulag

Ya panagkaasi dito iKurintu kadiya kapada da

¹ Ket ita, kakabsat, gabay mi pe̍ nga ipakaemmu dakayu ya winangel dito mamati ennid Mase̍dunya, gapu iya siaayat nga panangaasi ne̍ Apu Diyus igida.

² Ta orey nakaru ya rigat da nga pakasuutan niya panamati da itun, napalalu latta ya anggem da. Ket orey nakaru nga unay ya kinapanglaw da, sibubuslun latta ya panange̍cde̍ da ka ikaasi da kadiya kapada da.

³ Pudnu yani nga kagkagiyec dakayu, nga nange̍cde̍ da nga bekken nas nga sigun iya rebbeng da nga mange̍cde̍, no di lugud ad-adu pekkem, orey awan nangpilit igida.

⁴ Ket igida mettas ya nangadeng nga sipipilit dakami nga mae̍cdan da kuma kanu ka gundaway da nga tumulung pe̍ kadiya toley ne̍ Apu Diyus enna Hudya ka ikaasi da.

⁵ Ket nasdaaw kami met iyan nga winangel da, ta nipaay da nga nona ya beggi da nga agsirbi iya Apu, se̍ da pe̍ nagpaituray dakamin, nga maikanatad iya tarigagayan ne̍ Apu Diyus.

⁶ Ket gapu ta agten iyan to panange̍cde̍ diya taga-Mase̍dunya, nalagip mi nga nidawat e̍ Titu nga mawe̍ iya edyan nu. Nibon mi ngarud tasun mawe̍ na pailayun to nipairugi na dakayu itun, nga itu ya pamaayan nu nga mangaasi nga tumulung kadiya pada nu nga mamati.

⁷ Ket emmu mi met nga nakalaclaing kayu kadiya amin maipanggep iya pammati nu, agten iya panamati nu, se̍ iya panagisuru se̍ panagadal nu, se̍ iya kinapasnec nu, ket orey pe̍ iya panagayat nu dakami. Itu nga masapul nga nakalaclaing kayu pe̍ yin iya panagkaasi nu nga tumulung kadiya pada nu nga mamati nga makasapul.

⁸ Ket orey no kunec yan, bekken nakayu met nga bilinen nga mapilpilit ya panagkaasi nu kadiya kapada nu. Ngem ibagac ngas tasun maidilig kuma ya kinapasnec nu iya kinapasnec diya duduma, tasun maemmuwan nga napudnu pe̍ ya panagayat nu.

⁹ Ket malagip nu pe̍ no kumaan to siaayat nga panangaasi niya Apu tida nga Je̍su Kristu. Ta orey sigud nga nabacnang itun enna langit, nagbalin nga napanglaw tasun agpaay kuma dakayu. Ket iya agten iyan, gapu ito kasasaad na nga napanglaw, dakayu met ya nagbalin nga arig nga nabacnangin maigapu e̍ Apu Diyus.

¹⁰ Dikad pe̍ bagbagaan nakayu ka paglaingan nu, nga agten idi: Tungpalen nu kuma ngarud itan to panggep nu ito nawe̍ nga dagun. Ta dakayu met diya non-ona nga nangirugi iya agten iyan. Se̍ bekken nas nga iyan, ta dakayu met diya non-ona pe̍ nga nangtarigagay iya agten iyan.

¹¹ Ituluy nu ngarud nga tungpalen nin, tasun tumutup kuma ngin ya panangtungpal nu ito disnudu nu nga pinangpanggep itun. Tungpalen nu kuma ngarudin sigun iya kabaellan nu nga e̍cde̍.

¹² Ta no disnudu tida nga panggeppen ya mange̍cde̍, mayat met e̍ Apu Diyus ya orey nagan na nga mae̍cde̍ tida, sigun iya kabaellan tida. Ta emmu ne̍ Apu Diyus ya patingga niya kabaellan tida.

¹³ Ket bekken ku met nga panggep nga maparigatan kayu tasun mapalag-anan diya sabali, no di lugud padapada kayu kuma iya kasasaad nu.

¹⁴ Ngem gapu ta uwed dakayu ita ya ad-adu nga maitulung, rumbeng nga tulungan nu met diya makasapul. Ket no dakayu nad met ya makasapul, rumbeng met nga igida ya tumulung dakayu. Ket iya agten iyan, agpapada tida nga awan pagkurangan nan.

¹⁵ Ta agten tida kuma iya naisurat iya Bibliya, nga kunen na, “Ya adu ya inurnung na, madi nga nagsursuruc. Ket ya e̍teng ya inurnung na, awan nagkurangan na,” kunen na.

To pannakaibon de̍ Titu ka Kurintu

¹⁶ Ket agyaman kami e̍ Apu Diyus, ta ne̍cde̍ na e̍ Titu ya sipapasnec nga panangasikasu dakayu, nga agten met iya panangasikasu mi dakayu.

¹⁷ Ta e̍ Titu, naragsakan ngarud ito panangalayu mi igina. Ket agdisnudu nga mawe̍ iya edyan nu ita, tasun tulungan nakayu, sigun iya mismu nga kinapasnec na maigapu dakayu.

¹⁸ Ket ibon mi ngarud nge̍ Titu dakayu, se̍ paibulun mi pe̍ igina ya isa nga kabsat tida nga mabigbigbig iya amin nga bungguy diya mamati, gapu iya panangikasaba na iya Makaparagsac nga Damag.

¹⁹ Ket bekken nas nga iyan, ta igina pe̍ ya pinili diya bungguy diya mamati idi, tasun makibulun dakami iya panagsirbi mi nga panangitulud mi idi nga pangtulung kadiya makasapul. Ket yan nga panagsirbi mi, ipaay mi iya pakaidayawan niya Apu, se̍ iya panangipasingen mi nga disnudu mi ya mangaasi kadiya kapada mi.

²⁰ Ket annadan mi met yani nga pamaayan mi, tasun awan kuma pakapilawan mi maipanggep iya panangikem mi idi nga dackel nga maikaasi.

²¹ Ta agtanang kami idi nga panggep mi, tasun nalinteg kuma iya imatang ne̍ Apu Diyus, se̍ orey pe̍ iya imatang diya toley.

²² Ket uwed pekkem isa nga kabsat tida nga paibulun mi pe̍ kade̍ Titu. Ket igina, name̍n-adu win nga napanecnekkan mi ya panamati na se̍ ya kinapasnec na iya orey nagan na nga wanglen na. Ket ita, ad-adda pekkem ya kinapasnec na nga tumulung gapu iya dackel nga namnama na maipanggep dakayu.

²³ Ket no maipanggep e̍ Titu, igina ya kabulun ku iya panagsirsirbic nga maipaay dakayu. Ket no maipanggep kadito duwa nga kabulun na nga kabsat tida, igida diya ebbon diya bungguy diya mamati idi. Ket maipaay da met pe̍ nga pakaidayawan ne̍ Kristu.

²⁴ Dikad pe̍ ipasingen nu kuma ngarud igida ya panagayat nu, tasun maemmuwan da nga napudnu nga tutu ya ayat nu, se̍ tasun maemmuwan da pe̍ nga pudnu to nipadpadamag mi nga makaparagsac maipanggep dakayu. Agten iyan kuma ngarud ya wanglen nu, tasun mapanecnekkan kuma pe̍ kadiya amin nga bungguy diya mamati, nga pudnu ya panagayat nu.